ꓬꓰ-ꓢꓴ ꓦꓵꓻ ꓡ ꓠꓯꓹ ꓟ ꓓꓳꓽ

ꓡꓴ-ꓘ 1ꓽ26-38
ꓡꓴ-ꓘ 1ꓽ34 ꓗꓪ ꓟ-ꓡꓲ ꓡꓰ ꓥꓪ ꓠꓬ ꓤ ꓟꓶ ꓡꓯꓸ ꓚꓵ ꓥ ꓠꓬꓲ꓾ ꓕꓱ ꓟ ꓮ ꓡꓲ ꓒꓬꓱꓼ ꓡ ꓓ ꓢꓰꓽ꓾ ꓐꓯˍ ꓡꓳ=
ꓩꓱ-ꓡꓲ-ꓫꓵ ꓐꓴ ꓠꓬ ꓝꓮꓲ ꓕꓲ ꓧꓪꓹ ꓬꓲ-ꓢꓷ-ꓡꓰ ꓗꓴꓷꓼ ꓔꓯ ꓓꓶꓽ ꓡ ꓢꓲ꓾ ꓬꓲ-ꓢꓷ-ꓡꓰ ꓟꓵꓽ ꓮ ꓙꓵꓽ ꓔꓯ ꓣꓴ ꓔꓯꓹ ꓙꓰ ꓗꓷꓳ= ꓖꓳ ꓡꓱ ꓠꓬꓲ ꓬꓲ-ꓢꓷ-ꓡꓰ ꓐꓴ ꓐꓱ ꓶ ꓬꓲ ꓪ ꓤꓶꓻ ꓠꓬ ꓮ ꓘꓶꓸ ꓫꓸ ꓡꓰꓳ= ꓬꓲ ꓪ ꓔꓯ ꓛꓴꓽ ꓙꓳ ꓢꓴ ꓐꓴ ꓡꓰ ꓙꓵꓽˍ ꓟ ꓠꓯꓸꓼ ꓗꓪ ꓬꓲ ꓪ ꓐꓴ ꓠꓬ ꓪꓽ ꓠꓬꓲˍ ꓟ ꓧꓳꓽ ꓣꓱꓽ ꓢꓴ ꓕꓲ ꓣꓳ ꓓꓳꓻ ꓡ ꓠꓹ ꓟ ꓐꓱ ꓶ ꓪꓽ ꓘꓴ ꓗꓷꓳ=
ꓬꓲ ꓪ ꓐꓴ ꓘꓴꓽ ꓗꓪ ꓟ-ꓠꓳ-ꓪ ꓟꓬꓱꓺ ꓔ ꓟ ꓡ ꓞꓳ ꓕꓲ ꓣꓳ ꓙꓳˍ ꓡꓳ= ꓬꓲ ꓐꓰ ꓬꓲ ꓤ ꓟꓶ ꓔꓯ ꓠꓬ ꓤ ꓠꓱ ꓟꓽ ꓙꓳ= ꓬꓲ ꓪ ꓠꓬꓲ ꓫꓵꓸ ꓡꓱꓸꓼ ꓤ ꓠꓱ ꓙꓳ ꓡ ꓠꓲꓹ ꓫꓵˍ ꓡꓳ= ꓕꓲ ꓠꓬꓲ ꓙꓳˍ ꓕꓯ ꓟꓴꓽ ꓗꓪ ꓝꓲ ꓓꓴ ꓡꓰ ꓤ ꓟꓶ ꓔꓬ ꓗꓪ ꓡ ꓢꓲ ꓕꓱ ꓡꓱ ꓐꓯ ꓡꓳ= “ꓟꓽ ꓟꓶ ꓫꓵˍ ꓕꓯ ꓠꓴ ꓔꓯ ꓤ ꓠꓱ ꓕꓲ ꓣꓳ ꓙꓳ ꓡˍ ꓥꓳ= ꓬꓲ ꓠꓬ ꓪꓴꓽ ꓡ ꓢꓲ ꓩꓱ-ꓡꓲ-ꓫꓵ ꓐꓴ ꓙꓵꓽˍ ꓟ ꓠꓯꓸꓼ ꓗꓪ ꓐꓰ ꓬꓲ-ꓢꓷ-ꓡꓰ ꓐꓴ ꓔꓯ ꓡꓲꓹ ꓗꓷ ꓟꓶ ꓠꓹ ꓟ ꓬꓰ ꓙ ꓖꓶˍ ꓥꓳ” ꓐꓯ ꓖꓶˍ ꓡꓳ= ꓟꓴꓽ ꓗꓪ ꓝꓲ ꓓꓴ ꓬꓲ ꓫꓸ ꓕꓱ ꓘꓶꓽ ꓬꓲ ꓤ ꓖꓴ ꓔꓯ ꓐꓯ ꓖꓶˍ ꓕꓯ ꓬꓲ ꓤ ꓖꓴ ꓠꓬ ꓪꓴ-ꓢ ꓔꓯ ꓔꓲꓺ ꓖꓴ ꓕꓲꓽ ꓟ ꓬꓰ ꓗꓷꓳ=
ꓔꓲ ꓖꓴ ꓖꓳ ꓟ ꓔꓯ ꓮ ꓔꓳꓸ ꓓꓳꓼ ꓗꓷˍ ꓕꓯ ꓡꓰ ꓮ ꓔꓳꓸ ꓮ ꓘꓶꓸ ꓪꓴꓽ ꓡ ꓠꓬꓲ ꓬꓲ ꓠꓬ ꓙꓳꓺ ꓡꓰ ꓢꓲ ꓦꓲꓻ ꓗꓪ ꓔꓷꓹ ꓬꓲꓼ ꓡꓻꓳ ꓜꓳꓽ= ꓙꓳꓺ ꓔꓬ ꓟ ꓬꓲ ꓤ ꓖꓴ ꓔꓯ ꓬꓲ ꓤ ꓟꓶ ꓡꓰ꓾ ꓕꓽ ꓙꓳ꓾ ꓥꓪ ꓦꓲ ꓢꓲꓺ ꓒꓽꓳ= ꓠꓴ ꓔꓲꓺ ꓖꓶˍ ꓟ ꓔꓯ ꓪꓴ-ꓢ ꓘꓳꓹ ꓣꓴˍ ꓟ ꓢꓷꓸ ꓡꓰ ꓓꓴ ꓥ ꓡꓳ= ꓓꓵꓽ ꓙ ꓟꓶ ꓓꓴ ꓒꓬꓱꓼ ꓡˍ ꓥꓳ ꓐꓯ ꓟ ꓔꓯ ꓪꓴ-ꓢ ꓡꓰ ꓐꓯ ꓟꓸ ꓖꓶ ꓡ ꓔꓬ ꓟ ꓥ ꓡꓳ꓾ ꓐꓰ ꓐꓯ ꓖꓶˍ ꓡꓳ=
ꓦ ꓐ ꓠꓬꓲꓽ ꓢ ꓟ ꓙꓳ ꓡꓰ ꓕꓯ ꓬꓲ ꓠꓬ ꓖꓳ ꓓꓱꓽ ꓡꓲꓽ ꓡꓰ ꓢꓲ꓾ ꓤ ꓠꓱ ꓕꓲ ꓣꓳ ꓦꓵꓻ ꓖꓶꓽ ꓗꓷꓳ= ꓤ ꓠꓱ ꓤ ꓟꓬꓱꓺ ꓠꓬ ꓢ-ꓟꓳ-ꓢꓳ-ꓠ ꓥ ꓡꓳ=
“ꓪꓴ-ꓢ ꓐꓱ ꓶ ꓒꓬꓱꓼ ꓡ ꓟꓽ ꓓ ꓟ ꓮ ꓫꓵꓽˍ ꓟꓲ ꓟꓽ ꓙꓳ” ꓐꓯ ꓟ ꓘꓶꓽ ꓫꓵꓽ ꓡꓵꓺ ꓬꓲ ꓢꓷꓸ ꓡꓰ ꓓꓴ ꓕꓲ ꓟ ꓥ ꓡꓳ=
1 ꓢ-ꓟꓴ-ꓬꓰ 1
ꓬꓲ-ꓡꓲ-ꓘꓷ-ꓠ ꓔꓯ ꓤ ꓟꓶ 2 ꓣꓳ ꓙꓳˍ ꓡꓳ= ꓧ-ꓠ ꓐꓰ ꓒꓱ-ꓠꓲ-ꓠ= ꓬꓲ ꓔꓯ ꓙꓳˍ ꓟ ꓤ ꓠꓱ ꓮ ꓙꓵꓽ ꓔꓯ ꓒꓱ-ꓠꓲ-ꓠ ꓗꓪ ꓐꓰ ꓦꓵꓻ ꓟꓶ ꓔ ꓟ ꓥꓳ= ꓧ-ꓠ ꓠꓬ ꓞꓳ ꓡꓱꓽ ꓟ ꓥ ꓢꓲ꓾ ꓤ ꓠꓱ ꓟꓽ ꓟꓶ ꓥˍ ꓟꓲ ꓬꓲ-ꓡꓲ-ꓘꓷ-ꓠ ꓮ ꓘꓶꓸ ꓠꓲꓹ ꓠꓵˍ ꓟ ꓠꓬ ꓧ-ꓠ ꓔꓯ ꓥ ꓡꓳ=
ꓦꓲ ꓢꓲ ꓒ ꓡꓰ ꓠꓲꓹ ꓠꓵˍ ꓟ꓾ ꓦꓲꓻ ꓢꓲ ꓒ ꓡꓰ ꓒꓵꓽ ꓗ ꓬꓰˍ ꓟ ꓟꓶˍ ꓟ ꓤ ꓟꓶ ꓠꓬ ꓦꓲꓻ ꓢꓲ ꓒ ꓐꓱ ꓶ ꓤ ꓠꓱ ꓕꓲ ꓣꓳˍ ꓡꓰꓸ ꓦꓵꓻ ꓖꓶ ꓟꓽ ꓐ ꓡ ꓟ ꓠꓬ ꓬꓲ ꓐꓱ ꓶ ꓮ ꓘꓶꓸ ꓠꓲꓹ ꓫꓸ ꓓꓴ ꓕꓲ ꓫꓵꓽ ꓥ ꓡꓳ= ꓟꓶꓽ ꓘꓶꓼ ꓛꓲ ꓡ ꓕꓯ ꓕꓲ ꓣꓳ ꓔꓵꓸꓼ ꓠꓲꓹ ꓟ ꓫꓸ ꓟ ꓔꓯ ꓜꓲꓽ ꓗꓷꓳ= ꓕꓱ ꓟ ꓡꓰꓽ ꓟꓽ ꓞꓲꓺ ꓤ ꓠꓱ ꓮ ꓟꓬꓹ ꓦꓵꓻ ꓔ ꓟ ꓒꓱ-ꓠꓲ-ꓠ ꓡꓰ ꓬꓲ ꓔꓯ ꓟꓽ ꓒꓵꓽ ꓟꓽ ꓚꓬꓹ ꓬꓰ ꓡ ꓠꓬꓲ ꓬꓲ ꓠꓽ ꓪ ꓜꓲ ꓠꓲꓹ ꓟ ꓫꓸ ꓪ ꓡꓳ= ꓜꓽˍ ꓟꓲ ꓜꓽ ꓟꓽ ꓓꓵꓽ ꓾ ꓬꓲꓼ ꓟꓶ ꓟꓽ ꓓ ꓗꓷ ꓡꓰ ꓢꓲ ꓡꓳꓹ ꓬꓰˍ ꓕꓯ ꓬꓲ ꓠꓬ ꓢꓲꓽ ꓫꓬ ꓦꓲꓻ ꓗꓪ ꓙꓰ ꓢꓲ ꓪꓽ ꓘꓴˍ ꓡꓳ=
“ ꓪꓴ-ꓢ ꓡꓰ ꓤ ꓕꓲ ꓣꓳ ꓖꓶ ꓡˍ ꓕꓯ ꓠꓽ ꓬꓲ ꓕꓲ ꓤꓶꓻ ꓡꓱꓸꓼ ꓪꓴ-ꓢ ꓔꓯ ꓣꓱꓽ ꓙ ꓝꓲˍ ꓥꓳ” ꓐꓰ ꓘꓴ ꓓꓰꓽˍ ꓡꓳ= ꓟꓬ ꓐꓲ ꓞꓰ ꓢꓲ ꓪꓽ ꓘꓴˍ ꓟ ꓢꓯꓼ ꓔꓯ ꓪꓴ-ꓢ ꓑ ꓙ ꓡꓰꓳ= ꓬꓲ ꓗꓪ ꓐꓰ ꓦꓵꓻ ꓔ ꓟ ꓤ ꓠꓱ ꓤ ꓠꓬ ꓢ-ꓟꓴ-ꓬꓰ ꓥ ꓡꓳ= “ꓪꓴ-ꓢ ꓐꓱ ꓶ ꓒꓬꓱꓼ ꓡ ꓟꓽ ꓓ ꓟ ꓮ ꓫꓵꓽˍ ꓟꓲ ꓟꓽ ꓙꓳ” ꓐꓯ ꓟ ꓘꓶꓽ ꓫꓵꓽ ꓡꓵꓺ ꓬꓲ ꓢꓷꓸ ꓡꓰ ꓓꓴ ꓝꓮꓲ ꓕꓲ ꓟ ꓥ ꓡꓳ=
ꓘꓶꓽ ꓫꓵꓽ ꓫꓵꓼ ꓗꓪ ꓟꓳꓻ ꓪˍ ꓟ ꓬꓲ-ꓡꓲ-ꓫ-ꓑꓷ ꓥˍ ꓟꓲ ꓞꓳ ꓡꓱꓽ ꓟ ꓕꓲ ꓣꓳ ꓥꓳ= ꓬꓲ ꓤ ꓖꓴ ꓢ-ꓚꓬ-ꓡꓲ-ꓬ ꓐꓰ ꓬꓲ ꓠꓬ ꓞꓲꓼ ꓮ ꓘꓶꓸ ꓟꓳꓽ ꓢꓴ ꓐꓴ ꓥꓳ= ꓞꓲꓼ ꓟꓳꓽ ꓡꓰ ꓠꓬꓲ ꓬꓲ-ꓡꓲ-ꓫ-ꓑꓷ ꓠꓬ ꓫꓵꓽ ꓖꓴ ꓡꓰ ꓢꓲ ꓤ ꓠꓱ ꓟꓶ ꓟꓽ ꓓ ꓟ ꓬꓲ ꓙꓵ ꓟꓲ ꓥ ꓡꓳ= ꓬꓲ ꓤ ꓖꓴ ꓠꓬ ꓟꓴꓽ ꓗꓪ ꓝꓲ ꓓꓴ ꓔꓯ ꓐꓯ ꓖꓶˍ ꓟ ꓐꓯ ꓘꓶꓽ ꓗꓪ ꓐꓰ ꓢꓷꓸ ꓪ ꓓꓹ ꓡꓳ= “ꓥꓪ ꓠꓬ ꓞꓲꓼ ꓟꓳꓽ ꓢꓴ ꓕꓲ ꓣꓳ ꓥꓳ= ꓥꓪ ꓤ ꓟꓶ ꓥˍ ꓟꓲ ꓮ ꓘꓶꓸ ꓟꓳꓽˍꓳ=” ꓐꓯ ꓟ ꓐꓯ ꓘꓶꓽ ꓗꓪ ꓐꓰ ꓢꓷꓸ ꓪ ꓓꓹ ꓡꓳ=
ꓖꓳ ꓡꓱ ꓥˍ ꓟꓲ ꓟꓴꓽ ꓗꓪ ꓝꓲ ꓓꓴ ꓬꓲ ꓐꓯ ꓘꓶꓽ ꓙꓳˍ ꓟ ꓡꓰ ꓬꓲ-ꓡꓲ-ꓫ-ꓑꓷ ꓔꓯ ꓤ ꓠꓱ ꓶꓻ ꓡꓰꓳ= ꓤ ꓘꓶꓻ ꓗꓪ ꓖꓳ ꓓꓱꓽ ꓡꓲꓽ ꓔꓬ ꓕꓯ ꓬꓲ ꓡꓰ ꓐꓯ ꓟ ꓠꓬ꓾ “ꓪꓴ-ꓢ ꓡꓰ ꓞꓳ ꓤ ꓟꓲꓽ ꓙꓬ ꓗꓪ ꓥꓪ ꓫꓸ ꓔꓳ ꓓꓴ ꓔꓯ ꓣꓴ ꓦ ꓖꓶꓽ ꓗꓷꓳ= ꓥꓪ ꓔꓯ ꓠꓬꓲ ꓙ ꓡꓳꓸ ꓙ ꓗꓷꓳ” ꓐꓰ ꓐꓯ ꓡꓳ=
ꓕꓱ ꓟ ꓠꓬ ꓤ ꓟꓶ ꓤ ꓐꓴ ꓐꓰ ꓗꓴꓸ ꓙꓲ ꓙꓳ ꓢꓲ ꓘꓶꓽ ꓫꓵꓽ ꓫꓵꓼ ꓗꓪ ꓝꓸ ꓢꓲ ꓟꓳꓻ ꓪˍ ꓟ ꓥ ꓡꓳ= ꓖꓳ ꓡꓱ ꓠꓬ ꓒꓬꓱꓼ ꓡ ꓟꓽ ꓓ ꓟ ꓠꓬ ꓚꓵ ꓚꓵ ꓥ ꓡ?
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ-ꓢ ꓬꓲ “ꓒꓬꓱꓼ ꓡ ꓝꓲ” ꓐꓯ ꓟ ꓐꓯ ꓘꓶꓽ ꓕꓲ ꓘꓶꓽ ꓤ ꓗꓪ ꓐꓰ ꓮ ꓟꓶ ꓣꓳ ꓔꓬ ꓟ ꓟꓴꓽ ꓗꓪ ꓐꓰ ꓟꓲ ꓠꓯ꓾ ꓬꓲꓻ ꓙꓬ ꓠꓯ ꓬꓲꓻ ꓒꓬꓱꓼ ꓡ ꓗꓷ ꓟ ꓥ ꓡꓳ=
ꓪꓴ-ꓢ ꓬꓲ “ꓒꓬꓱꓼ ꓡ ꓝꓲ” ꓐꓯ ꓟ ꓐꓯ ꓘꓶꓽ ꓕꓲ ꓘꓶꓽ ꓗꓪ ꓐꓰ ꓣꓳ ꓟꓲ ꓠꓯ ꓞꓳ ꓤ ꓒꓬꓱꓼ ꓡ ꓗꓷ ꓟ ꓥ ꓡꓳ=
ꓪꓴ-ꓢ ꓬꓲ “ꓒꓬꓱꓼ ꓡ ꓝꓲ” ꓐꓯ ꓟ ꓐꓯ ꓘꓶꓽ ꓗꓪ ꓐꓰ ꓣꓳ ꓮ ꓙꓵꓽ ꓠꓬ ꓟꓳꓻ ꓡꓯ ꓘꓳ ꓪˍ ꓟ ꓥ ꓢꓲ꓾ ꓕꓲ ꓣꓳ ꓐꓰ ꓕꓲ ꓣꓳ ꓢꓷꓸ ꓡꓯ ꓘꓳ ꓪ꓾ ꓪꓽ ꓡꓯ ꓘꓳ ꓕꓽ ꓡꓯ ꓘꓳ ꓪ꓾ ꓝꓮꓲ ꓠꓬ ꓟꓲ ꓕꓯꓽ ꓢꓲ ꓟ ꓦꓬꓼ ꓠꓬꓲ ꓗꓪ ꓕꓲ ꓪꓽ ꓛꓳ ꓫꓱꓽ ꓪˍ ꓟ ꓥ ꓡꓳ=
ꓪꓴ-ꓢ ꓬꓲ “ꓒꓬꓱꓼ ꓡ ꓝꓲ” ꓐꓯ ꓟ ꓐꓯ ꓘꓶꓽ ꓕꓲ ꓘꓶꓽˍ ꓗꓪ ꓙꓬꓻˍ ꓟ ꓟꓶꓽ ꓘꓶꓼ꓾ ꓟꓶ ꓦ ꓦˍ ꓟ ꓟꓶꓽ ꓘꓶꓼ ꓐꓰ ꓕꓲ ꓪꓽ ꓦ ꓐ ꓡꓴꓸ ꓡꓴꓸ ꓡꓬꓸ ꓔꓬ ꓟ ꓦꓬꓽ ꓟꓶꓽ ꓘꓶꓼ ꓒꓬꓱꓼ ꓡ ꓗꓷ ꓟ ꓥ ꓡꓳ=
ꓪꓴ-ꓢ ꓬꓲ “ꓒꓬꓱꓼ ꓡ ꓝꓲ” ꓐꓯ ꓟ ꓐꓯ ꓘꓶꓽ ꓕꓲ ꓘꓶꓽˍ ꓗꓪ ꓙꓬꓻ ꓝꓲ꓾ ꓡꓱꓻ ꓝꓲ꓾ ꓟꓶꓽ ꓦ ꓦ ꓝꓲ ꓒꓬꓱꓼ ꓡ ꓙꓳ ꓡ ꓗꓷ ꓟ ꓥ ꓡꓳ=
ꓠꓬꓲꓽ ꓧꓪꓹ ꓕꓲ ꓧꓪꓹ ꓟ Vatican ꓖꓪ ꓙꓱꓻ ꓜꓲꓼ ꓓꓴ ꓗꓪ ꓐꓰ ꓐꓯˍ ꓟ ꓐꓯ ꓘꓶꓽ ꓠꓬ꓾ ꓚꓰꓼ ꓖꓶ ꓡ ꓢꓴ ꓟꓽ ꓙꓳ ꓕꓯ ꓠꓽ ꓠꓴ ꓐꓰ ꓥꓪ ꓟꓽ ꓒꓬꓱꓼ ꓡ ꓜꓳꓽ= ꓣꓳ ꓐꓴ ꓦ ꓡꓱ ꓔꓬ ꓟ꓾ ꓪꓴꓸ ꓓꓵ ꓕꓱꓼ ꓔꓬ ꓟ ꓪꓴ-ꓢ ꓠꓬ ꓒꓬꓱꓼ ꓡ ꓟꓽ ꓓ ꓟ ꓪꓴ-ꓢ ꓟꓽ ꓥ= ꓬꓲ ꓠꓲꓹ ꓡꓶꓽ ꓙꓳˍ ꓕꓯ “ꓒꓬꓱꓼ ꓡ ꓝꓲ” ꓐꓰ ꓐꓯ ꓢꓲ ꓚꓵ ꓚꓵ ꓒꓬꓱꓼ ꓡ ꓝꓲˍ ꓟ ꓪꓴ-ꓢ ꓡꓰꓽ ꓥ ꓡꓳ=