ꓡꓯꓼ ꓐꓳ ꓔꓶꓸ ꓓꓴ ꓠꓬ ꓣꓳꓽ ꓐꓱ ꓶ

ꓡꓯꓼ ꓐꓳ ꓔꓶꓸ ꓓꓴ ꓠꓯꓼ ꓗꓪ ꓐꓰ ꓢꓲ-ꓒ ꓬꓰ-ꓢꓴ ꓣꓳꓽ ꓔꓯꓸ ꓮ ꓟꓬ ꓗꓪ ꓛꓲ ꓠꓲꓹ ꓠꓵ ꓔꓬ ꓟ ꓣꓳꓽ ꓢꓷꓹ ꓐ ꓡꓹˍ ꓡꓳ-ꓸ  ꓢꓲ-ꓒ ꓬꓰ-ꓢꓴ ꓡꓰꓽ ꓟꓸ ꓖꓶꓽ ꓡˍ ꓟ ꓮꓽ ꓙꓵꓽ ꓠꓬ  ꓖꓳ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓬꓲꓸ ꓚꓰꓸꓸ ꓥˍ ꓡꓳ= ꓐꓯ ꓠꓲꓹ ꓫꓵˍ ꓟ ꓠꓬ ꓝꓴꓲꓸ ꓠꓯꓼˍ ꓗꓪ ꓟ ꓟꓲ-ꓠꓯ ꓡꓽ ꓞꓳ ꓐꓱ ꓶꓽ ꓫꓵꓸꓸ ꓙ ꓠꓼ ˍ ꓟ ꓢꓲ-ꓒ ꓬꓰꓼ ꓡ ꓢꓲꓹ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓐꓰ ꓟꓲ-ꓠꓯ ꓞꓳ ꓤꓽ ꓔꓯ ꓚꓬꓴ ꓗꓷꓼˍ ꓟ ꓪꓴꓸ ꓠꓬꓲ-ꓸ ꓡꓯꓼ ꓐꓳ ꓔꓶꓸ ꓓꓴ ꓠꓬ ꓣꓳꓽ ꓐꓴ ꓥꓳ ꓡꓳꓸ ꓓꓴ ꓒꓬꓳꓼ ꓡ ꓡꓳ=

ꓮꓽ ꓠꓱ ꓕꓲꓽ ꓤꓶ ꓠꓬ ꓝꓴꓲꓸ ꓙꓳ ꓢꓴ ꓔꓯ ꓝꓴꓲꓸ ꓖꓶꓽˍ ꓟ ꓣꓱꓽ ꓫꓵꓽ ꓡꓯꓼ ꓐꓳ ꓔꓶꓸ ꓓꓴ ꓥ ꓡꓳ-ꓸ ꓖꓳ ꓡꓰ ꓥꓼˍ ꓟꓲ-ꓸ ꓠꓬꓲꓸ ꓠꓬꓲ ꓟ ꓦꓬꓼ ꓠꓬꓲ ꓗꓪ ꓠꓬ ꓢꓲ-ꓒ ꓬꓰ-ꓢꓴ ꓟꓲ-ꓠꓯ ꓝꓴꓲꓸ ꓙꓳ ꓢꓴ ꓐꓱ ꓶ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓫꓵꓸꓸ ꓙ ꓗꓷˍ ꓟ ꓪꓴꓸ ꓠꓬꓲ ꓡꓯꓼ ꓐꓳ ꓔꓶꓸ ꓓꓴ ꓠꓬ ꓢ-ꓓꓯꓼ ꓐꓰ ꓫꓵꓸꓸ ꓓꓴ ꓔꓯ ꓧꓪꓸ ꓡꓰ ꓓꓴ ꓒꓬꓳꓼ ꓡꓸˍ ꓟ ꓥ ꓡꓳ-ꓸ

ꓖꓳ ꓟ ꓪꓴꓸ ꓠꓬꓲ ꓢꓲ-ꓒ ꓬꓰ-ꓢꓴ ꓔꓯ ꓛꓳ ꓢꓴ ꓠꓬ ꓖꓳ ꓡꓯꓼ ꓐꓳ ꓔꓶꓸ ꓓꓴ ꓔꓯꓸꓸ ꓠꓲꓹ ꓡꓱ ꓡꓱˍ ꓐꓰ ꓘꓴ ꓣꓴ ꓢꓲ ꓫꓸ ꓙꓵ ꓓꓴ ꓔꓯꓼ ꓬꓰ-ꓢꓴ ꓠꓯꓼˍ ꓗꓪ ꓢꓯꓼ ꓕꓵꓼ ꓘꓴ ꓣꓴ ꓔꓬˍ ꓟ ꓥ ꓡꓳ=

ꓬꓰ-ꓢꓴ ꓡꓰꓼ ꓐꓯꓸˍ ꓟ ꓠꓬ ꓮꓽ ꓟ ꓥꓪ ꓔꓯ ꓛꓳ ꓠꓲꓹ ꓫꓵˍ ꓠꓬ-ꓸ ꓚꓲꓸ ꓛꓬ  ꓙꓲ ꓖꓴ  ꓡꓳ ꓗꓷ ꓢꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓬꓲ ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓔ ꓢꓲ ꓠꓬꓲ ꓥꓪ ꓔꓯ ꓛꓳ ꓠꓯꓹ ꓡꓳ= (ꓡꓴ-ꓘ 9ꓽ23)

ꓕꓲ ꓠꓬꓲ ꓡꓰꓸ ꓕꓲ ꓠꓬꓲ ꓣꓳꓽ ꓠꓯꓼˍ ꓗꓪ ꓔꓳꓸ ꓜꓳꓽ ꓡ  ꓟ ꓫꓸ ꓙꓵꓽ ꓓꓴ ꓮꓽ ꓙꓵꓽ ꓠꓬ ꓢꓲ-ꓒ ꓪꓴ-ꓢ ꓟꓲꓽ ꓙꓯꓽ ꓗꓪ ꓝꓮꓲ  ꓓꓵꓽ ꓡ ꓠꓼˍ ꓟ-ꓸ ꓬꓲꓸ ꓢꓲ-ꓒ ꓔꓯ ꓠꓲꓹ ꓒꓵ ꓫꓱꓸ  ꓖꓶ ꓐ ꓡ ꓠꓼˍ ꓟ ꓒꓬꓳꓼ ꓡ ꓝꓲˍ ꓡꓳ=

ꓖꓳ ꓡꓯꓼ ꓐꓳ ꓔꓶꓸ ꓓꓴ ꓠꓬ ꓢꓲ-ꓒ ꓪꓴ-ꓢ ꓔꓯ ꓥꓳ ꓡꓳꓸ ꓓꓴ ꓒꓬꓳꓼ ꓡꓸˍ ꓟ  ꓡꓰꓽ ꓐꓰ  ꓢꓲ-ꓒ ꓡꓰꓽ ꓡꓳꓸ ꓙ ꓔ ꓙ ꓢꓲ-ꓸ ꓶ  ꓤꓼ ꓫꓱꓸ ꓤꓼ ꓘꓴ ꓣꓴ ꓐ ꓡ ꓠꓼˍ ꓟ ꓒꓬꓳꓼ ꓡ ꓝꓲˍ ꓡꓳ=

ꓔꓱꓸꓸ ꓚꓲˍ ꓟ ꓟꓬꓱꓽ ꓬꓰ ꓔꓬˍ ꓟꓲ ꓢꓴ ꓡꓰꓽ ꓠꓲꓹ ꓜꓳ ꓓꓴ ꓔꓳꓹ ꓜꓳꓽ ꓡ ꓕꓯꓽ (ꓟꓽ ꓥˍ ꓠꓬ) ꓮꓽ ꓘꓶꓸ ꓢꓯꓼ ꓕꓵꓼ ꓢꓲ ꓬꓰ ꓔꓬ ꓥˍ ꓟꓲ ꓙꓵꓽ ꓖꓴ ꓟꓽ ꓙꓳ  ꓗꓷ ꓡꓰ ꓕꓯꓽ ꓠꓲꓹ ꓟ ꓐꓬ ꓡꓰ ꓓꓴ ꓔꓳꓸ ꓜꓳꓽ ꓡꓹˍ ꓥꓳ-ꓸ ꓕꓱ  ꓡꓰ ꓔꓳꓹ ꓜꓳꓽ ꓡꓹ ꓟ ꓠꓬ ꓕꓲꓽ ꓠꓬꓲ  ꓡꓰꓸ ꓕꓲꓽ ꓠꓬꓲ ꓟ ꓚꓲꓸ ꓛꓬꓽ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓑꓱꓸ ꓔꓸ ꓟ ꓥ ꓡꓳ=

ꓢꓲ-ꓒ ꓬꓰ-ꓢꓴ ꓫꓹ ꓙꓵꓹˍ ꓟ ꓔꓯ  ꓜꓲ ꓜꓲ ꓟꓳ ꓟꓳ ꓡꓳꓹ ꓠꓬꓲ ꓠꓬ ꓣꓳꓽ ꓔꓳꓹ ꓜꓳꓽˍ ꓟ ꓫꓸ ꓙꓵ ꓓꓴ ꓕꓯꓽ ꓢꓲ  ꓚꓬꓴ ꓢꓲ-ꓒ ꓔꓳꓸ ꓜꓳꓽˍꓟ ꓠꓬ ꓪ ꓜꓲ ꓦꓶˍ ꓡꓳ-ꓸ

ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓳꓽ ꓐꓴ ꓔꓳꓹ ꓜꓳꓽ ꓔꓬ ꓟ ꓫꓸ ꓙꓵ ꓓꓴ 3 ꓫꓵꓽ ꓙꓳ ꓔꓬ ꓐꓶ-ꓸ

1ꓸ  ꓡꓯꓼ ꓐꓳ ꓔꓶꓸ ꓓꓴ ꓠꓬ  ꓡꓰꓽˍ ꓟ ꓶꓸꓸ ꓟꓽ ꓥ-ꓸ ꓣꓱꓽ ꓛꓲ ꓕꓲꓽ ꓟ ꓥ ꓡꓳ-ꓸ ꓫꓸ ꓙꓵꓽ ꓓꓴ ꓠꓬ  ꓠꓴ ꓕꓲꓽ ꓣꓳ ꓔꓯꓼˍ ꓡꓰꓽ ꓔꓳꓼ ꓜꓳꓽ ꓔꓸ ꓟ ꓟꓽ ꓥ ꓐꓰꓼ ꓡꓯꓼ ꓐꓳ ꓔꓶꓸ ꓓꓴ ꓠꓯꓼˍ ꓗꓪ ꓣꓳꓽ ꓢꓷꓸ ꓠ ꓗ ꓡꓳ-ꓸ

2ꓸ ꓡꓯꓼ ꓐꓳ ꓔꓶꓸ ꓓꓴ ꓠꓬ ꓫꓸ ꓙꓵꓽ ꓓꓴ ꓔꓯ  ꓐꓬꓱꓽ ꓟꓽ ꓥ-ꓸ ꓣꓳꓽ ꓐꓴ ꓐꓱ ꓶ ꓚꓬꓴ ꓙˍ ꓟꓸꓸ ꓢꓷꓸ ꓡꓰ ꓓꓴ ꓔꓯ  ꓐꓬꓱꓽ ꓥ ꓡꓳ=

3ꓸ ꓡꓯꓼ ꓐꓳ ꓔꓶꓸ ꓓꓴ ꓠꓬ ꓠꓸꓸ ꓫꓵꓽ ꓕꓲꓽ ꓟ ꓟꓽ ꓥ-ꓸ ꓢꓯꓼ ꓪꓽ ꓙꓳ ꓓꓴ ꓕꓲꓽ ꓟ ꓢꓲꓸ ꓥ ꓡꓳ-ꓸ

ꓡꓯꓼ ꓐꓳ ꓔꓶꓸ ꓓꓴ ꓕꓯꓽ ꓢꓲ ꓗꓪ ꓢꓲ-ꓒ ꓬꓰ-ꓢꓴ ꓬꓰ ꓗꓷˍ ꓟ ꓮꓽ ꓙꓵꓽ ꓐꓰ ꓬꓲꓸ ꓠꓲꓹ ꓡꓶꓽ ꓔꓯ ꓛꓳ ꓢꓲ-ꓸ  ꓕꓲꓽ ꓠꓬꓲ ꓡꓰ ꓕꓲ ꓠꓬꓲ  ꓣꓳꓽ ꓔꓳꓼ ꓜꓳꓽˍ ꓟ  ꓫꓸ ꓙꓵꓽ ꓟꓶꓽ ꓙꓵ ꓓꓴ ꓮꓽ ꓙꓵꓽ ꓬꓲꓸ  ꓢꓲ-ꓒꓽ ꓔꓯ ꓡꓯꓼ ꓙꓱ  ꓢꓲ ꓙ ꓫꓱꓽ ꓔꓬ ꓠꓬ ꓣꓳꓽ ꓤꓶ ꓠꓯꓼ ꓗꓪ ꓢꓯꓼ ꓪꓽ ꓓꓽ ꓟ ꓗꓷ ꓡꓰ ꓥꓳ=

ꓥꓪ-ꓬꓳ-ꓢꓷ