ꓪꓴꓽˍ ꓟ ꓬꓰ ꓠꓲꓹ ꓫꓵ ꓢꓴ ꓔꓯ ꓟꓸ ꓖꓶˍ ꓟ

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓟ ꓐꓱ ꓶ ꓦ ꓢꓯꓼ ꓪ ꓣꓴ ꓓꓴ ꓬꓰ ꓡꓯ꓾ ꓟ‐ꓘꓳ 9ꓽ33‐35
ꓢꓲ ꓒ ꓬꓰ‐ꓢꓴ ꓬꓲ. ꓛꓳ ꓒꓯꓹ ꓐꓴ ꓠꓬ ꓬꓲ. ꓪ ꓗꓪ ꓟ ꓮ ꓟꓽ ꓪ ꓜꓲ ꓪꓴꓽˍ ꓟ ꓔꓯ ꓒꓬꓱ. ꓡꓯ ꓘꓳ ꓔꓬ, ꓡꓳ ꓐꓰ ꓣꓳꓽ ꓑ, ꓙˍ ꓡꓳ꓿ ꓬꓲ. ꓪ ꓠꓬ ꓮ ꓫꓵꓽ ꓑꓶ. ꓓꓴ ꓪꓴꓽ ꓠꓲ, ꓫꓵˍ ꓡ? ꓬꓲ. ꓪ ꓠꓬ ꓮ ꓫꓵꓽˍ ꓟꓲ ꓬꓰ ꓐ ꓡ ꓢꓴ ꓪꓴ‐ꓢ ꓥ ꓟ ꓢꓲ ꓒ ꓬꓰ‐ꓢꓴˍ ꓐꓰ ꓕꓲꓽ ꓪ ꓔꓬ ꓥˍ ꓟꓲ ꓮ ꓫꓵꓽ ꓑꓶ. ꓓꓴ ꓪꓴꓽ ꓠꓲ, ꓫꓵ ꓡ?
ꓬꓲ. ꓔꓶꓺ ꓙꓱꓼ ꓕꓲꓽ ꓟˍ ꓡꓰ ꓙꓳ ꓡꓳ꓿ ꓙꓵꓽ ꓪ ꓟꓶ ꓠꓲ, ꓫꓵˍ ꓟ ꓡꓰ ꓥꓳ꓿ ꓬꓲ. ꓪ ꓘꓴꓽ ꓗꓪˍ ꓟꓲ ꓬꓲ. ꓪ ꓙꓵꓽ ꓠꓲ, ꓫꓵˍ ꓡꓳ꓿ ꓙꓵꓽ ꓪ ꓐꓯ ꓟ ꓔꓯ ꓮ ꓟˍ ꓟꓲ ꓠꓵ ꓠꓲ, ꓫꓵˍ ꓡꓳ꓿ ꓙꓵꓽ ꓪ ꓙꓳˍ ꓕꓯ ꓠꓬ ꓠꓱ. ꓐꓯ ꓢꓴ ꓔꓯ ꓝꓲ ꓜ ꓠ. ꓡꓳ꓿ ꓩꓴꓽ ꓜ ꓠ. ꓡꓳ꓿ ꓘꓳ, ꓜ ꓠ. ꓡꓳ꓿ ꓗ. ꓜ ꓠ. ꓡꓳ꓿ ꓮ ꓡꓰ ꓗꓪ ꓮ ꓡꓰ ꓫꓵꓽ ꓗꓪ ꓙꓵꓽ ꓪ ꓙꓳˍ ꓥ ꓟꓲ ꓟꓲꓺ ꓠꓯ ꓞꓳ ꓤ ꓠꓬ ꓟꓶ ꓠꓲ, ꓫꓵˍꓡꓳ꓿
ꓖꓳ ꓡꓱ ꓥˍ ꓟꓲ ꓢꓲ ꓒ ꓡꓰ ꓟꓳ. ꓖꓶꓽˍ ꓟ ꓙꓵꓽ ꓪ ꓐꓯ ꓟ ꓠꓬ ꓠꓱ. ꓐꓯꓼ ꓢꓴ ꓔꓯ ꓣꓱꓽ ꓙ ꓓꓴ ꓕꓲꓽ ꓟ ꓡꓰ ꓥꓳ꓾ “ꓮꓡꓡ ꓑꓳꓪꓰꓣ ꓲꓢ ꓔꓳ ꓢꓰꓣꓦꓰ” ꓐꓯ ꓟ ꓡꓰ ꓐꓰ ꓣꓳꓽ ꓔꓯ ꓙꓳˍ ꓟ ꓙꓵꓽ ꓪ ꓮ ꓙꓵꓽ ꓟ ꓠꓬ ꓑ ꓫꓬꓼ ꓐꓴ ꓔꓯ ꓣꓱꓽ ꓙ ꓓꓴ ꓡꓰ ꓥꓳ꓿ ꓠꓱ ꓐꓯ ꓢꓴ ꓐꓱ ꓶ ꓙꓲ ꓖꓴ ꓙꓳˍ ꓟ ꓡꓰ ꓬꓰ ꓓꓴ ꓥꓳ꓿
ꓖꓳ ꓡꓱ ꓠꓬꓲ ꓕꓲꓽ ꓐꓱ ꓙꓳ ꓟ ꓠꓬ ꓥꓪ ꓔꓯ ꓮ ꓫꓵꓽ ꓙꓵꓽ ꓪ ꓟꓽ ꓙꓳ ꓐꓰ ꓓꓵꓽ ꓙ ꓔꓬ, ꓗꓴ. ꓡꓳ꓿ ꓙꓵꓽ ꓪ ꓠꓬ ꓮ ꓟꓬꓽ ꓫꓵꓽ ꓙꓳˍ ꓡꓳ꓿ ꓮ ꓐꓽ ꓮ ꓟ ꓣꓱꓽ ꓢꓴ ꓐꓴ ꓥˍ ꓟꓲ ꓚꓲ. ꓛꓬ ꓤ ꓠꓱ ꓤ ꓕꓯꓽ ꓢꓲ ꓟ. ꓙꓵꓽ ꓪ ꓙꓳ ꓡꓳ꓿ ꓢꓷ. ꓠꓲ, ꓮ ꓟꓬ ꓢꓷ. ꓢꓴ ꓥˍ ꓟꓲ ꓢꓷ. ꓠꓲ, ꓟꓽ ꓢꓷ. ꓢꓴ ꓔꓯ ꓟ. ꓙꓵꓽ ꓪ ꓙꓳ꓿ ꓒꓴꓻ ꓫꓵꓺ ꓮ ꓟꓬ ꓙꓳ ꓢꓴ ꓥˍ ꓟꓲ ꓮ ꓘꓶ. ꓟꓽ ꓙꓳ ꓢꓴ ꓕꓯ ꓢꓲ ꓗꓪ ꓙꓵꓽ ꓪ ꓙꓳ ꓡꓳ꓿ ꓕꓲꓽ ꓐꓱ ꓟ ꓠꓬ ꓮ ꓟꓽˍ ꓟꓲ ꓙꓵꓽ ꓪ ꓟꓽ ꓚꓰꓺ ꓔˍ ꓥˍ ꓟꓲ ꓬꓲ. ꓚꓲ. ꓛꓬ ꓬꓲ. ꓢꓯꓼ ꓪꓴꓽ ꓡˍ ꓕꓯ ꓙꓵꓽ ꓪ ꓙꓳ ꓡ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓙꓵꓽ ꓪ ꓥ ꓕꓯ ꓑꓳ. ꓠꓬ ꓢꓴ ꓐꓱ ꓶ ꓙꓲ ꓓꓴ ꓣꓱꓽ ꓙ ꓠꓯ ꓟ ꓥꓳ ꓡꓰ ꓐꓯ ꓔ ꓡꓳ꓿ ꓬꓲ. ꓤ ꓠꓬꓲ ꓤ ꓐꓴ‐ꓳ ꓠꓴ ꓥꓪ ꓮ ꓙꓵꓽ ꓠꓬ ꓕꓲꓽ ꓙꓰꓽ ꓙꓰꓽ ꓕꓲꓽ ꓚꓱ, ꓚꓱ, ꓗꓪ ꓙꓵꓽ ꓪ ꓙꓳˍ ꓡꓳ꓿ ꓙꓵꓽ ꓪ ꓕꓱ ꓟ ꓔꓯ ꓠꓴ ꓮ ꓡꓰ ꓐꓰ ꓣꓱꓽ ꓔꓬ, ꓡ ꓐꓰ ꓐꓯ ꓟ ꓔꓯ ꓠꓬꓲ. ꓠꓬꓲ ꓓꓵꓽ ꓙ ꓓꓴ ꓬꓰ ꓡꓯ꓿
ꓣꓳꓽ ꓙꓵꓽ ꓪ ꓔꓯ ꓢꓴ ꓔꓯ ꓫ. ꓚꓲ. ꓠꓯˍ ꓟ꓾ ꓢꓴ ꓔꓯ ꓪꓽ ꓫꓱˍ ꓠꓯ ꓟ ꓣꓱꓽ ꓔꓬ ꓥꓳ ꓐꓯ ꓠꓬ꓾ ꓠꓲ, ꓟ ꓒꓳ ꓡꓶ. ꓡꓯ꓿ ꓮ ꓙꓵꓽ ꓟ ꓕꓯꓽ ꓢꓲ ꓪꓴꓽ ꓠꓲ, ꓫꓵ ꓢꓴ ꓠꓬ ꓮ ꓙꓵꓽ ꓟ ꓬꓲ. ꓚꓳ ꓑ ꓬꓰ ꓠꓯ ꓡꓳ ꓐꓰ ꓐꓯ ꓟ ꓢꓲ ꓒ ꓐꓯ ꓘꓶꓽ ꓔꓯ ꓪꓳ ꓔ ꓢꓲ꓾ ꓙꓵꓽ ꓪ ꓮ ꓘꓶ. ꓙꓳ ꓢꓴ ꓟꓬꓱꓽ ꓮ ꓘꓶ. ꓬꓰ ꓡꓯ꓾ ꓐꓰ ꓮ ꓙꓵꓽ ꓢꓴ ꓔꓯ ꓢꓯꓼ ꓖꓶꓽ ꓠꓲ, ꓫꓵˍ ꓡꓳ꓿
ꓮ ꓙꓵꓽ ꓢꓴ ꓔꓯ ꓪꓴ‐ꓢ ꓶ ꓥꓳꓽ ꓙꓱ ꓖꓶꓽ ꓝꓲ꓿