ꓪꓴ-ꓢ ꓠꓬ ꓠꓵ ꓠꓲꓹ ꓥ ꓡꓳ꓾

“ꓪꓴ-ꓢ ꓠꓬ ꓬꓲ ꓤ ꓔꓲꓸ ꓖꓶ ꓗꓷ ꓗꓪ ꓛꓲ ꓟꓲ ꓠꓯ ꓞꓳ ꓤ ꓔꓯ ꓠꓲꓹ ꓠꓵ_ ꓡꓳ=” ꓬꓳ-ꓦ 3ꓽ16 ꓢꓲ ꓫꓬ ꓕꓳ ꓶ ꓝꓲꓸ ꓐꓰ ꓠꓬꓲꓸ ꓠꓬꓲ ꓗꓪ ꓣꓳ ꓑ ꓙ ꓟꓶ ꓡꓳ= ꓥ ꓡꓳ꓾ ꓬꓰ-ꓢꓴ ꓠꓬ ꓣꓳ ꓟꓲ ꓠꓯ ꓞꓳ ꓤ ꓐꓱ ꓶ ꓟꓲ ꓠꓯ ꓗꓪ ꓬꓯꓼ ꓡ ꓢꓲ꓾ ꓣꓳ ꓝꓴꓲ ꓙꓳ ꓢꓴ ꓐꓴ ꓐꓱ ꓶ ꓡꓯ ꓐꓳ ꓔꓶꓸ ꓓꓴ ꓕꓯ ꓢꓲ ꓫꓵꓻ ꓙ ꓗꓷ ꓟ ꓔꓯ ꓣꓳ ꓢꓷꓸ ꓡꓳ= ꓖꓳ ꓡꓱ ꓥ ꓟꓲ ꓪꓴ-ꓢ ꓬꓲ ꓠꓵ ꓠꓲꓹ ꓔꓯ ꓣꓳ ꓚꓵ ꓚꓵ ꓢꓷꓸ ꓡ? ꓐꓰ ꓓꓵꓽ ꓙ ꓠꓬꓲ ꓔ ꓟ ꓥ ꓡꓳ=

ꓖꓳ ꓟ ꓡꓰ ꓟꓽ ꓞꓲ ꓣꓳ ꓫꓸ ꓓꓴ ꓔꓳꓹ ꓜꓳ ꓡ ꓕꓯ ꓟꓬ ꓠꓬꓲ ꓪꓴ-ꓢ ꓔꓯ ꓙꓵꓻ ꓠꓹ ꓟ ꓫꓸ ꓔ ꓟ ꓥꓳ= ꓕꓱ ꓡꓱ ꓫꓸ ꓔ ꓟ ꓙꓵꓹ ꓗꓪ ꓪꓴ-ꓢ ꓠꓬ ꓮ ꓕꓯ ꓟꓲ ꓣꓳ ꓠꓯꓼ ꓗꓪ ꓔꓬ ꓢꓲ꓾ ꓫꓱꓸ ꓤ ꓠꓲꓹ ꓐꓰ ꓣꓳ ꓙꓻ ꓫꓱꓽ ꓠꓹ ꓟ ꓚꓱꓹ ꓗꓪ ꓠꓬꓲ ꓟꓳ ꓓꓴ ꓡꓯ ꓖꓶ_ ꓟ ꓔꓯ ꓕꓽ ꓟꓲ ꓡꓰ꓾ ꓪꓴ-ꓢ ꓠꓵ ꓠꓲꓹ ꓠꓬ ꓟꓲ ꓠꓯ ꓞꓳ ꓤ ꓠꓵ ꓠꓲꓹ ꓐꓰ ꓟꓽ ꓪ ꓟ ꓔꓯ ꓡꓳꓸ ꓟꓳ ꓪ ꓡꓳ꓾ ꓢꓲ-ꓫꓬ ꓕꓳ ꓶ ꓔꓯ ꓠꓬꓲꓸ ꓠꓸ ꓥ ꓟꓲ ꓬꓲꓸ ꓠꓵ ꓠꓲꓹ ꓠꓬ ꓬꓲꓸ ꓚꓱꓹ ꓮ ꓟꓬ ꓫꓵ ꓗꓪ ꓐꓰ ꓟꓳ ꓪ ꓡꓳ= ꓟꓲ ꓠꓯ ꓠꓬ ꓮ ꓟꓬ ꓛꓲ ꓐꓬ ꓡꓰ ꓢꓲ꓾ ꓮ ꓟꓬ ꓛꓲ ꓟꓽ ꓙꓲ ꓟ ꓐꓰ ꓐꓲ ꓞꓲꓼ ꓥ ꓟꓲ ꓬꓲ ꓠꓲꓹ ꓠꓵ_ ꓡꓳ= ꓠꓬꓲꓸ ꓠꓬꓲ ꓣꓳ ꓠꓲꓹ ꓟ ꓔꓯ ꓪꓴ-ꓢ ꓠꓵ ꓠꓲꓹ ꓗꓪ ꓐꓰ ꓒꓴ ꓓꓴ ꓬꓰ ꓡꓯ= ꓪꓴ-ꓢ ꓠꓬ ꓠꓵ ꓠꓲꓹ ꓥ ꓡꓳ=

ꓢꓲ ꓫꓬ ꓕꓳ ꓶ ꓗꓪ “ꓮꓽ ꓟ ꓥ ꓟꓲ ꓬꓲ ꓔꓯ ꓙꓵꓻ_ ꓠꓬ ꓟꓽ ꓟꓶꓽ ꓡꓰ ꓢꓲ꓾ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶ ꓥꓳ꓾” ꓐꓰ ꓐꓯ ꓔ ꓡꓳ= ꓬꓰ-ꓢꓴ ꓡꓯ ꓐꓳ ꓔꓶꓸ ꓓꓴ ꓔꓯ ꓙꓵꓻ ꓠꓲꓹ ꓐꓰ ꓠꓬꓲꓸ ꓠꓸ ꓠꓬ ꓚꓬꓴ ꓟꓶ ꓡ ꓥꓳ= ꓠꓬꓲ ꓟꓳ ꓓꓴ ꓠꓯꓼ ꓗꓪ ꓔꓬ ꓡꓯ= ꓟꓲ ꓠꓯ ꓞꓳ ꓤ ꓠꓬ ꓠꓯ ꓞꓲꓹ ꓟ ꓔꓯ ꓟꓬ ꓠꓬꓲ ꓠꓲꓹ ꓠꓵ ꓡꓳ= ꓐꓯ ꓘꓶꓽ ꓕꓱ ꓡꓱ ꓙꓳ_ ꓡꓳ꓾ ꓤ ꓠꓱ ꓐꓴ ꓠꓬ ꓠꓯ ꓞꓲꓹ ꓟ ꓔꓯ ꓙꓳꓺ ꓡꓳ꓾ ꓞꓳ ꓟꓳ ꓠꓬ ꓠꓬꓲ ꓟꓳ ꓓꓴ ꓔꓯ ꓙꓳꓺ ꓡꓳ ꓐꓰ ꓥ ꓡꓳ= ꓠꓬꓲ ꓟꓳ ꓓꓴ ꓠꓯꓼ ꓗꓪ ꓔꓬ ꓡꓯ꓾ ꓠꓯ ꓞꓲꓹ ꓟ ꓗꓪ ꓔꓬ ꓠꓬ ꓟꓽ ꓟꓶ꓾ ꓠꓯ ꓞꓲꓹ ꓟ ꓗꓪ ꓠꓬ ꓝꓴꓲ ꓬꓰ ꓓꓴ ꓮ ꓘꓶꓸ ꓢ ꓡꓳ꓾ ꓟꓽ ꓙꓳꓺ ꓙꓳꓺ ꓝꓴꓲ ꓛꓬ ꓐꓶ_ ꓡꓳ꓾ ꓖꓳ ꓡꓱ ꓥ ꓟꓲ ꓠꓬꓲ ꓟꓳ ꓓꓴ ꓗꓪ ꓔꓬ ꓠꓬ ꓝꓴꓲ ꓬꓰ ꓓꓴ ꓟꓽ ꓢ꓾ ꓖꓳ ꓟ ꓑꓶ ꓓꓴ ꓣꓳ ꓥ ꓟꓲ ꓠꓯ ꓞꓲꓹ ꓟ ꓔꓯ ꓙꓳꓺ ꓡ? ꓠꓬꓲ ꓟꓳ ꓓꓴ ꓔꓯ ꓙꓳꓺ ꓡ? ꓐꓰ ꓔꓱꓹ ꓕ ꓠꓹ ꓟ ꓥꓳ= ꓮ ꓟꓶ ꓗꓪ ꓛꓲ ꓠꓬꓲ ꓟꓳ ꓓꓴ ꓔꓯ ꓙꓳꓺ ꓔꓬ ꓠꓬ ꓚꓬꓴ ꓟꓶ ꓓꓴ ꓗꓪ ꓐꓰ ꓶ ꓡꓰ ꓔꓬ ꓢꓰ ꓟ ꓥꓳ=