ꓠꓲꓹ ꓗꓴ ꓟꓬ ꓗꓴ ꓢꓴ ꓖꓶ ꓙ ꓟꓳˍꓟ

ꓟꓹ ꓟ ꓣꓱꓽ ꓢꓴ ꓮ ꓙꓵꓽ ꓠꓬ ꓕꓱ ꓟ ꓔꓯ ꓢꓷꓸˍ ꓥꓳ= ꓤ ꓠꓱ ꓤ ꓦꓵꓻ ꓡ ꓕꓯ ꓮ ꓘꓶꓸ ꓠꓻˍ ꓟ ꓔꓯ ꓜꓲꓽ ꓪˍ ꓥ ꓟꓲ ꓤ ꓠꓱ ꓤ ꓔꓯ ꓟꓳꓻ ꓗꓷ ꓠꓬ ꓗꓹ ꓛꓲꓽ ꓢꓲ ꓠꓻˍ ꓟ ꓔꓯ ꓟꓲ ꓡꓰˍ ꓗꓷꓳ꓾ ꓐꓰ ꓬꓳ-ꓦ 16ꓽ21 ꓗꓪ ꓬꓰ-ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓐꓯ ꓔ ꓡꓳ= ꓔꓯꓺ ꓥꓳꓽ ꓕꓱ ꓟ ꓠꓬ ꓝꓲ ꓓꓴ ꓐꓴ ꓔꓯ ꓐꓯ ꓬꓯꓼˍ ꓟ ꓥ ꓡꓳ=

ꓢꓲꓺ ꓒ ꓬꓰ-ꓢꓴ ꓔꓯ ꓣꓴ ꓔꓯꓹ ꓙꓰ ꓢꓲ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓕꓯꓼ ꓢꓰꓼ ꓗꓷ ꓕꓯ ꓬꓲ ꓪ ꓐꓴ ꓠꓬ ꓮ ꓘꓶꓸ ꓙꓳꓺ ꓛꓱꓽ ꓢꓲ ꓠꓬꓲ ꓠꓲꓹ ꓟ ꓙꓬ ꓡꓰ ꓥˍ ꓟꓲ꓾ ꓢꓲꓺ ꓒ ꓬꓰ-ꓢꓴ ꓢꓯꓸ ꓬꓲꓼ ꓡ ꓗ ꓠꓯꓸ ꓠꓬ ꓬꓲ ꓪ ꓗꓹ ꓛꓲꓽˍ ꓟ ꓟꓶ ꓡꓰꓳ= ꓖꓳ ꓗ ꓠꓯꓸ ꓑꓰꓠꓔꓰꓚꓳꓢꓔ ꓥꓪꓽ-ꓞꓲ-ꓠꓬꓲ-ꓑꓮꓲ ꓗꓪ꓾ ꓶꓼ ꓓꓳ ꓫꓱꓹ ꓓꓳꓽ ꓚ ꓒꓬꓱˍ ꓟ ꓟꓬꓱꓽ ꓔꓯ ꓝ ꓢꓲ ꓬꓰ ꓠꓹ ꓟ ꓬꓲ ꓪ ꓠꓬ ꓙꓵꓽ ꓪ ꓟꓶ ꓡꓰ ꓗꓷꓳ=

ꓚꓵ ꓚꓵ ꓠꓬ꓾ ꓠꓻˍ ꓟ ꓟꓽ ꓙꓳ ꓠꓬ ꓓꓻ ꓡꓰˍ ꓟ ꓟꓽ ꓙꓳ= ꓫꓸ ꓙꓵˍ ꓟ ꓟꓽ ꓙꓳ ꓠꓬ ꓧꓪꓸ ꓡꓰˍ ꓟ ꓟꓽ ꓙꓳ= ꓠꓲꓹ ꓫꓸ ꓟꓬ ꓫꓸ ꓓꓴ ꓟꓽ ꓙꓳ ꓠꓬ ꓐꓬꓱ ꓡꓱꓼ ꓡꓱꓼˍ ꓟˍ ꓟꓲ ꓟꓽ ꓙꓳ= ꓖꓳ-ꓡ-ꓖꓳ-ꓕ ꓗꓪ ꓟꓽ ꓫꓸ ꓙꓵ ꓗꓷ ꓠꓬ ꓢꓯꓸ ꓬꓲꓼ ꓡˍ ꓟˍ ꓟꓲ ꓟꓽ ꓙꓳ ꓟ ꓥ ꓡꓳ= ꓞꓳ ꓤ ꓤꓶꓻ ꓠꓬ ꓠꓲꓹ ꓫ ꓟꓬ ꓫ ꓟ ꓐꓰ ꓐꓲ ꓓꓹ ꓥ ꓟꓲ꓾ ꓕꓱ ꓟ ꓔꓯ ꓪꓴ-ꓢ ꓬꓲ ꓐꓬꓱꓼ ꓡꓱꓼ ꓡꓱꓼ ꓟ ꓐꓱ ꓶ ꓔꓲꓺ ꓖꓶ ꓗꓷ ꓔꓯ꓾ ꓠꓲꓹ ꓫ ꓟꓬ ꓫ ꓓꓴ ꓮ ꓙꓵꓽ ꓠꓬ ꓣꓳ ꓐꓴ ꓫꓵꓻˍ ꓟ ꓐꓱ ꓶ ꓠ ꓢˍ ꓟ ꓢꓯꓼ ꓟꓶ ꓓꓴ ꓒꓬꓱꓼ ꓡˍ ꓡꓳ=

ꓕꓱ ꓡꓱ ꓒꓬꓱꓼ ꓡˍ ꓕꓯ꓾ ꓪꓴ-ꓢ ꓠꓬ ꓣꓳ ꓐꓴ ꓔꓯ ꓫ ꓙꓵ ꓟꓶ ꓙꓵ ꓓꓴ ꓔꓯ ꓜꓲꓽ ꓐ ꓡ ꓠꓹ ꓟ ꓢꓯꓼ ꓪ ꓐꓰ꓾ ꓠꓲꓹ ꓫ ꓟꓬ ꓫꓸˍ ꓟ ꓗꓪ ꓐꓰ ꓢꓳ ꓣꓴ ꓠꓹ ꓟ ꓢꓷꓸ ꓠꓲꓹ ꓚꓴꓽ ꓬꓲꓹ ꓣꓳ ꓐꓴ ꓔꓯ ꓖꓶ ꓡˍ ꓥꓳ= ꓪꓴ-ꓢ ꓗꓪ ꓐꓰ ꓢꓯꓼ ꓪ ꓐꓰ ꓢꓷꓸ ꓠꓲꓹ ꓕꓱ ꓟ ꓠꓬ ꓗꓹ ꓛꓲ ꓠꓲꓹ ꓒꓴ ꓢꓲ ꓠꓲꓹ ꓟ ꓢꓲ ꓡꓲ ꓟ ꓟꓶ ꓠꓹ ꓟ ꓡꓳꓼ ꓡꓰˍ ꓟ ꓬꓲ ꓟꓸ ꓟꓲꓽ ꓥ ꓡꓳ=

ꓟꓲ ꓠꓯ ꓡꓳꓹ ꓬꓰˍ ꓗꓪ ꓛꓲ ꓣꓳ ꓐꓴ ꓐꓰ ꓕꓲ ꓪ ꓔꓬ ꓥꓳ꓾ ꓐꓰ ꓬꓰ-ꓢꓴ ꓡꓰ ꓙ ꓟꓳ ꓘꓶꓽ ꓖꓶ ꓔ ꓡꓳ (ꓟ-ꓕꓲ 28ꓽ20)= ꓬꓲ ꓕꓲ ꓣꓳˍ ꓡꓰꓽ ꓙꓳ ꓔꓬ ꓟ ꓠꓬ ꓣꓳ ꓐꓴ ꓔꓯ ꓗꓹ ꓛꓲꓽ ꓓꓴ ꓖꓶˍ ꓡꓳ= ꓕꓱ ꓟ ꓔꓯ ꓣꓳ ꓠꓯꓸꓼ ꓗꓪ ꓐꓰ ꓮꓽ ꓟˍ ꓟꓲ ꓦꓴ ꓔꓯꓹ ꓙꓰ ꓟꓽ ꓐ ꓡ= ꓕꓱ ꓟ ꓠꓬ ꓟꓲ ꓠꓯ ꓡꓰ ꓖꓶˍ ꓟ ꓕꓲ ꓑꓹ ꓤ ꓗꓹ ꓛꓲꓽ ꓓꓴ ꓔꓯ ꓟꓽ ꓫꓱꓸ= ꓖꓳ ꓟ ꓑꓶꓸ ꓓꓴ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓙꓵꓽ ꓗ ꓐꓴ ꓔꓯ ꓖꓼ ꓛꓳ ꓠꓹ ꓟ ꓐꓰ ꓬꓲ ꓪ ꓗꓹ ꓛꓲꓽ ꓠꓲꓹ ꓐꓲ ꓡꓰ ꓝꓲ ꓠꓹ ꓟ ꓐꓱ ꓶ ꓬꓲ ꓠꓵꓻ ꓠꓲꓹ ꓠꓯꓸꓼ ꓗꓪ ꓛꓳ ꓫꓱꓽ ꓠꓹ ꓟ ꓕꓵꓼ ꓪ ꓖꓶ ꓗꓷꓳ (ꓬꓳ-ꓦ 15ꓽ11)=