ꓙ ꓖꓴ ꓠꓬꓲꓽ ꓚꓱꓹ ꓟꓸ ꓟꓲꓽ

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓟꓲ ꓠꓯ ꓞꓳ ꓤ ꓮ ꓙꓵ: ꓠꓬ ꓢꓻˍ ꓟ ꓔꓯ ꓖꓼ ꓠꓲꓹ ꓫꓵˍ ꓡꓳ= ꓫ. ꓟ ꓔꓯ ꓮ: ꓟˍ ꓟꓲ ꓟ: ꓠꓲꓹ ꓫꓵ= ꓢˍ ꓟ ꓙ ꓖꓴ ꓗꓪ꓾ ꓢˍ ꓟ ꓕꓲ ꓚꓱꓹ ꓗꓪ ꓮ: ꓟˍ ꓟꓲ ꓙꓰ ꓠꓲꓹ ꓫꓵˍ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓠꓬꓲ. ꓠꓬꓲ ꓟ ꓢꓲ: ꓫꓬ ꓕꓳ ꓶ ꓥ ꓟ (ꓟ-ꓕꓲ 7ꓽ6ꓹ12-14) ꓗꓪ ꓠꓬ꓾ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ.ˍ ꓟ ꓗ ꓘꓶ: ꓗꓪ ꓓꓵ: ꓙꓰ ꓠꓹ ꓟ ꓢꓯꓼ ꓕꓵꓼ= ꓮ ꓡꓲꓳ ꓐꓯ ꓠꓬ ꓐꓬ ꓡꓰˍ ꓟ ꓙ ꓖꓴ ꓠꓬ ꓪꓴ:ˍ ꓡꓳ= ꓙ ꓖꓴ ꓖꓳ ꓟ ꓗꓪ ꓙꓰ ꓢꓴ ꓠꓬ ꓮ ꓟꓬꓹ ꓙꓳˍ ꓡꓳ= ꓣꓳ.ˍ ꓟ ꓗ ꓘꓶ: ꓗꓪ ꓙꓰ= ꓖꓳ ꓗꓪ ꓠꓬ ꓢꓯꓼ ꓟꓬ ꓙꓳˍ ꓡꓳ꓾ ꓐꓰ ꓐꓯ ꓔ ꓡꓳ=

ꓣꓳ ꓠꓬ ꓮ ꓫꓵ: ꓑꓶ. ꓓꓴ ꓫ. ꓟ ꓔꓯ ꓬꓰ ꓠꓯꓹ ꓡ= ꓫ. ꓟ ꓠꓬ ꓣꓳ ꓔꓯ ꓢꓯꓼ ꓟꓬ ꓖꓶ ꓐ ꓡˍ ꓡꓳ꓾ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓔ ꓡꓳ= ꓖꓳ ꓡꓱ ꓠꓬꓲ ꓮ ꓡꓲ ꓐꓰ ꓢꓯꓼ ꓟꓬ ꓖꓶ ꓐ ꓡˍ ꓡ= 

ꓣꓳ ꓠꓬ ꓢꓲ: ꓫꓬ ꓕꓳ: ꓶ ꓕꓲ ꓒꓳꓹ ꓗꓪ ꓐꓰ ꓟ: ꓓꓵ: ꓙ ꓙ꓾ ꓟꓲ ꓠꓯ ꓞꓳ ꓤ ꓕꓲ ꓒꓳꓹ ꓗꓪ ꓐꓰ ꓟꓲ ꓠꓯ ꓞꓳ ꓤ ꓕꓲ ꓣꓳ ꓫ. ꓟ ꓬꓰˍ ꓕꓯ ꓮ ꓡꓲ ꓒꓬꓱꓼ ꓡˍ ꓡ꓾ ꓐꓯ ꓟ ꓧꓶ. ꓕꓯ ꓓꓵ: ꓙ ꓠꓬꓲ ꓡꓯ=

ꓣꓳ ꓐꓱ ꓶ ꓫ.ˍ ꓟ꓾ ꓮ ꓘꓶ. ꓢꓯꓼ ꓕꓵꓼ ꓪˍ ꓟ ꓔꓯ ꓬꓰˍ ꓕꓯ꓾ ꓣꓳ ꓐꓱ ꓶ ꓟꓶ ꓫ. ꓟ ꓔꓯ ꓢꓯꓼ ꓕꓵꓼˍ ꓕꓯ ꓣꓳ ꓖꓳ ꓓꓱ: ꓠꓬ ꓢꓲꓹ ꓪꓰ ꓕꓲ ꓪꓰ ꓡꓰ ꓐꓰ ꓪꓰ ꓡˍ ꓡꓳ= ꓮ ꓫꓵ: ꓑꓶ. ꓓꓴ ꓥ ꓡ= ꓣꓳ ꓟꓲ ꓠꓯ ꓞꓳ ꓤ ꓔꓯ ꓪꓴ-ꓢ ꓡꓰ ꓚꓰꓼ ꓔ ꓟ ꓠꓬ ꓮ ꓫꓵ: ꓔꓯ ꓥ ꓟꓲ ꓢ ꓢˍ ꓡꓰ: ꓟꓶ ꓠꓹ ꓟ ꓚꓰꓼ ꓔ ꓟ ꓟ: ꓥ= ꓮ ꓡꓲ ꓗꓪˍ ꓟꓲ ꓮ ꓫꓵ: ꓗꓪˍ ꓟꓲ ꓢ ꓢˍ ꓡꓰ ꓙꓰ ꓠꓹ ꓟ ꓟ: ꓥ= ꓢꓯꓼ ꓕꓵꓼ ꓢꓲ ꓚꓵꓹ ꓬꓲꓻ ꓓꓳ ꓢꓲ ꓢꓯꓼ ꓕꓵꓼ ꓠꓹ ꓟ ꓪꓴ-ꓢ ꓡꓰ ꓣꓳ ꓔꓯ ꓚꓰꓼ ꓔ ꓡꓳ= ꓕꓲ ꓚꓱꓹ ꓐꓯ ꓠꓬ ꓣꓳ ꓠꓬ ꓢˍ ꓟ ꓙ ꓖꓴ ꓗꓪ꓾ ꓬꓲꓻ ꓙꓬ ꓕꓯ: ꓢꓲ ꓗꓪ ꓙꓰˍ ꓟ ꓡꓰ ꓐꓰ ꓟ: ꓥ= ꓫ. ꓟ ꓙ ꓖꓴ ꓗꓪ ꓣꓳ ꓢꓯꓼ ꓕꓵꓼ ꓠ ꓗꓹ ꓡꓳ=

ꓝꓮꓲ ꓕꓲ ꓚꓱꓹ ꓐꓯ ꓪˍ ꓠꓬ꓾ ꓮ. ꓕ: ꓕꓯꓺ ꓡ ꓠꓹ ꓟ ꓢꓲ.ˍ ꓟ ꓠꓬ ꓡꓳ-ꓟꓲ ꓕꓯ: ꓢꓲ ꓗꓪ ꓢꓲ.ˍ ꓕꓯ ꓢꓲ ꓡꓰ: ꓮ ꓕ: ꓕꓯꓺ ꓡˍ ꓡꓳ= ꓠꓴ:ˍ ꓟ ꓕꓯ: ꓢꓲ ꓗꓪ ꓢꓲ. ꓟ: ꓠ= ꓕꓱ ꓟˍ ꓡꓰ ꓐꓰ ꓣꓳ ꓤꓶꓻ ꓥ ꓟꓲ ꓓꓻ ꓡ ꓠꓹ ꓟ꓾ ꓢꓯꓼ ꓙꓳ ꓡ ꓠꓹ ꓟ ꓐꓱ ꓶ ꓫ.ˍ ꓟ ꓔꓯ ꓬꓰ ꓠ ꓗꓹ ꓡꓳ= ꓠꓲꓹ ꓫ. ꓓꓴ ꓔꓯ ꓑꓶ. ꓑꓶ. ꓡꓰ: ꓔꓳꓹ ꓜꓳ: ꓠ ꓗꓹ ꓡꓳ= ꓕꓱ ꓡꓱ ꓬꓰˍ ꓕꓯ ꓢꓲ ꓡꓰ: ꓢꓯꓼ ꓪ ꓙꓳ ꓡˍ ꓡꓳ=

ꓕꓱ ꓟˍ ꓡꓰ ꓐꓰ ꓣꓳ ꓦ ꓕꓲ ꓛꓱ: ꓔꓯ ꓟꓳ. ꓥˍ ꓟꓲ ꓕꓲ ꓡꓰꓹ ꓥꓳ= ꓢˍ ꓟ ꓗꓪ ꓡꓰ: ꓣꓳ ꓙꓰ ꓔꓬ ꓕꓯ꓾ ꓫ. ꓟ ꓔꓯ ꓟ: ꓘꓳꓹ ꓣꓴ ꓕꓯ ꓣꓳ ꓦ ꓠꓬ ꓢꓯꓼ ꓟꓬ ꓟ: ꓙꓳ= ꓮ ꓫꓵ: ꓑꓶ. ꓓꓴ ꓥ ꓡ= ꓪꓴ-ꓢ ꓬꓲ ꓚꓱꓹ ꓪꓴ-ꓢ ꓠꓲꓹ ꓡꓶ: ꓛꓳ ꓠꓹ ꓟ ꓠꓬ ꓫ. ꓡꓳ= ꓖꓳ ꓡꓱ ꓐꓯ ꓥ ꓟꓲ ꓫ. ꓟ ꓔꓯ ꓢꓯꓼ ꓕꓵꓼ ꓠꓹ ꓟ ꓠꓬ ꓣꓳ ꓶꓻ ꓙꓳˍ ꓡꓳ= ꓟꓶ ꓫ.ˍ ꓟ ꓠꓬ ꓚꓵ ꓚꓵ ꓒꓵ:ˍ ꓡꓳ= ꓮ ꓫꓵ: ꓔꓯ ꓥˍ ꓟꓲ ꓢ ꓢˍ ꓡꓰ: ꓪ ꓟ: ꓓ= ꓫ. ꓟ ꓔꓯ ꓣꓳ ꓢꓯꓼ ꓕꓵꓼ ꓠ ꓗꓹ ꓡꓳ=

ꓖꓳ ꓡꓱ ꓠꓬꓲ ꓢꓲ: ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓳ. ꓖꓶ ꓡˍ ꓟ ꓗꓪ ꓐꓰ ꓣꓳ ꓮ ꓙꓵ: ꓠꓬ ꓫ. ꓟ ꓔꓯ ꓢꓯꓼ ꓕꓵꓼ ꓠꓹ ꓟ ꓐꓱ ꓶ꓾ ꓬꓲ ꓒꓵ: ꓙꓳˍ ꓟ ꓔꓯ ꓢꓯꓼ ꓕꓵꓼ ꓠꓹ ꓟ ꓐꓱ ꓶ ꓣꓳ ꓠꓬ ꓚꓰꓼ ꓔ ꓟ ꓟꓶˍ ꓡꓳ= 

ꓢˍ ꓟ ꓠꓬ ꓣꓳ ꓤꓶꓻ ꓔꓯ ꓐꓬ ꓡꓰ ꓝꓲ ꓐ ꓡˍ ꓡꓳ= ꓢˍ ꓟ ꓚꓱꓹ ꓗꓪ ꓐꓰ ꓣꓳ ꓠꓬ ꓬꓲ ꓢꓶ: ꓓꓱꓼ ꓟ: ꓘꓴ= ꓮ ꓡꓲꓳ ꓐꓯ ꓠꓬ ꓬꓲ. ꓫꓵ. ꓕꓲ ꓢꓶ: ꓔꓶˍ ꓕꓯ꓾ ꓮ ꓡꓰ ꓫꓵ: ꓬꓲ ꓫꓵ. ꓥˍ ꓟꓲ ꓛꓵ: ꓡꓰ ꓕꓯ ꓡꓰ: ꓬꓲ ꓜꓲ ꓣꓱꓻ ꓡ ꓢꓲ ꓬꓲ ꓢꓶ: ꓓꓱꓼ ꓡˍ ꓡꓳ= ꓖꓳ ꓟˍ ꓡꓰ ꓐꓰ ꓣꓳ ꓥˍ ꓟꓲ ꓣꓳ ꓬꓰ ꓠꓲꓹ ꓟ: ꓫꓵ ꓟ꓾ ꓢˍ ꓟ ꓔꓯ ꓡꓰ: ꓬꓰ ꓠꓲꓹ ꓫꓵˍ ꓟ ꓠꓲꓹ ꓟ ꓔꓯ ꓢꓰꓼ ꓗꓷ ꓠ ꓗꓹ ꓡꓳ= ꓖꓳ ꓡꓱ ꓢꓲ ꓣꓳ ꓠꓬ ꓙꓲˍ ꓟ ꓬꓲ ꓢꓶ: ꓓꓱꓼ ꓡˍ ꓥꓳ= 

ꓢꓲ: ꓫꓬ ꓕꓳ: ꓶ ꓗꓪ ꓐꓯ ꓔ ꓟˍ ꓡꓰ ꓐꓰ ꓢˍ ꓟ ꓚꓱꓹ ꓛꓳ ꓢꓴ ꓠꓬ ꓐꓬ ꓡꓰˍ ꓥꓳ ꓐꓰ ꓐꓯ ꓔ ꓟ ꓡꓰ ꓐꓰ꓾ ꓣꓳ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓙꓳ ꓔꓬ ꓟ ꓦꓬꓼ ꓠꓬꓲ ꓗꓪ ꓫ. ꓟ ꓔꓯ ꓬꓰ ꓐ ꓡ ꓠꓹ ꓟ꓾ ꓣꓳ ꓖꓳ ꓓꓱ: ꓠꓬ ꓢꓲꓹ ꓪꓰ ꓕꓲ ꓪꓰˍ ꓡꓰ ꓪꓰ ꓡ ꓠꓹ ꓟ ꓐꓱ ꓶ ꓟ: ꓙꓲꓻ ꓟ ꓣꓳ ꓠꓲꓹ ꓟ꓾ ꓐꓴˍ ꓟ ꓠꓲꓹ ꓟ ꓮ ꓙꓵ: ꓔꓯ ꓛꓵ: ꓡꓰ ꓝꓲ ꓢꓲ ꓢꓯꓼ ꓕꓵꓼ ꓙꓰˍ ꓠꓬ꓾ ꓕꓱ ꓟ ꓠꓬ ꓫꓸˍ ꓟ ꓔꓯ ꓢꓲꓺ ꓙꓰˍ ꓟ ꓥ ꓢꓲ ꓠꓬꓲ ꓟ: ꓟꓶ ꓫꓵ ꓕꓯ ꓠꓬ ꓬꓲ ꓢꓶ: ꓮ ꓟꓬꓹ ꓓꓱꓼ ꓡˍ ꓥꓳ= 

ꓬꓲꓼ ꓤ ꓠꓬꓲ ꓤ ꓐꓴꓳ ꓗ.-ꓡ.-ꓐꓴ:-ꓡꓴꓹ ꓠꓬ ꓐꓶ: ꓓꓲꓻ ꓗꓪ ꓐꓰ ꓒꓬꓱꓼ ꓡˍ ꓟ ꓡꓰ ꓐꓰ ꓫ. ꓙꓵ ꓟꓶ ꓙꓵˍ ꓟ ꓗꓪ ꓐꓰ ꓣꓳ ꓠꓬ ꓮ ꓘꓶ. ꓐꓲˍ ꓟ ꓗ.-ꓡ.-ꓐꓴ:-ꓡꓴꓹ ꓕꓲ ꓟ ꓒꓬꓱꓼ ꓡˍ ꓡꓳ= ꓣꓳ ꓤꓶꓻ ꓗꓪ ꓫ. ꓟ ꓟ: ꓙꓳ ꓕꓯ ꓣꓳ ꓠꓬ ꓮ ꓡꓲ ꓥˍ ꓟꓲ ꓫꓵˍ ꓥꓳ= ꓖꓳ ꓡꓱ ꓠꓬꓲ ꓣꓳ ꓟꓲ: ꓙꓬ ꓙꓰ ꓠꓹ ꓟ ꓐꓱ ꓶ ꓠꓲꓹ ꓫ ꓟꓬ ꓫ ꓓꓴ ꓔꓯ ꓘꓳ ꓣꓴ ꓠꓹ ꓟ ꓬꓳ. ꓚꓵˍ ꓡꓳ= ꓮ ꓙꓵ: ꓠꓬ ꓫ. ꓟ ꓚꓱꓹ ꓔꓯ ꓢꓲꓺ ꓐ ꓡ ꓢꓲ ꓠꓬꓲ ꓑꓶ. ꓑꓶ. ꓡꓰ: ꓙꓰ ꓐ ꓡ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ=