ꓪꓴ-ꓢ ꓖꓶ_ ꓟ ꓢꓯꓼ ꓪ

ꓣꓳ ꓟꓲ ꓠꓯ ꓡ ꓞꓳ ꓕꓲ ꓣꓳ ꓛꓳ ꓕꓲ ꓣꓳ ꓢꓯꓼ ꓖꓶ ꓡꓯ ꓘꓳ ꓕꓯ ꓥꓪ ꓠꓴ ꓐꓰ ꓔꓬ ꓡꓳ꓾ ꓕꓽ ꓙꓳꓺ ꓐꓰ ꓢꓯꓼ ꓖꓶ ꓗꓴꓸ_ ꓡꓳ= ꓔꓯ ꓥꓳꓽ ꓢꓷ ꓠꓲꓹ ꓢꓯꓼ ꓕꓵꓼ ꓔꓬ ꓟ ꓤ ꓠꓱ ꓤ ꓕꓲ ꓣꓳ ꓬꓲꓸ ꓙꓳꓺ ꓕꓯ ꓬꓲꓸ ꓬꓰ ꓟꓽ ꓑꓶꓸ ꓕꓯ ꓬꓰ ꓟꓽ ꓗꓴꓸ ꓕꓯ ꓮꓽ ꓐ ꓮ ꓟ ꓠꓬ ꓕꓽ ꓙꓳꓺ ꓮꓽ ꓐ ꓮ ꓟ ꓠꓬ ꓠꓴ ꓐꓰ ꓔꓬ ꓡꓳ꓾ ꓠꓴ ꓕꓲ ꓛꓱ ꓦꓰꓼ ꓞꓹ ꓔꓬ ꓡꓳ꓾ ꓢꓯꓼ ꓕꓵꓼ ꓐꓰ ꓢꓯꓼ ꓖꓶ ꓗꓴꓸ_ ꓡꓳ= ꓖꓳ ꓟ ꓡꓰ ꓐꓰ ꓤ ꓖꓴ ꓡꓯꓸ ꓤ ꓟꓶꓼ ꓡꓯꓸ ꓬꓲꓸ ꓪ ꓠꓲꓹ ꓠꓵ ꓡꓯ ꓘꓳ ꓕꓯ ꓬꓲꓸ ꓪ ꓬꓰ ꓙ ꓡꓯ ꓘꓳ ꓕꓯ ꓢꓯꓼ ꓖꓶ_ ꓟ ꓠꓬ ꓕꓽ ꓙꓳꓺ꓾ ꓥꓪ ꓠꓴ ꓐꓰ ꓔꓬ ꓡꓳ꓾ ꓐꓰ ꓢꓯꓼ ꓖꓶ ꓗꓴꓸ_ ꓡꓳ= ꓮ ꓡꓲꓳ ꓐꓯ ꓠꓬ ꓚꓲ ꓛꓬ ꓔꓯ ꓠꓲꓹ ꓠꓵ ꓢꓴ ꓕꓲ ꓣꓳ ꓚꓲꓸ ꓛꓬ ꓑ ꓕꓲ ꓗꓪ ꓔꓬ ꓡꓳ= ꓐꓯ_ ꓟ ꓣꓳ ꓙꓵꓻ ꓕꓯ ꓣꓳ ꓠꓲꓹ ꓟ ꓠꓯꓼ ꓗꓪ ꓓꓵꓽ ꓡ ꓕꓯ ꓠꓲꓹ ꓟ ꓠꓬ ꓡꓱ ꓡꓱ ꓡꓰ ꓗꓹ ꓡꓳ= ꓮ ꓘꓶꓸ ꓬꓰ ꓟꓽ ꓘꓴꓸ ꓮ ꓘꓶꓸ ꓬꓰ ꓟꓽ ꓑꓶꓸ ꓕꓱ ꓡꓱ ꓐꓰ ꓢꓯꓼ ꓐ_ ꓕꓯ ꓥ ꓟꓲ ꓣꓳ ꓔꓯ ꓕꓽ ꓙꓳꓺ ꓥꓪ ꓠꓴ ꓐꓰ ꓔꓬ ꓡꓳ꓾ ꓥꓪ ꓠꓴ ꓠꓴ ꓗꓸ ꓠꓯꓸ ꓢꓲ ꓗꓪ ꓔꓬ ꓡꓳ꓾ ꓥꓪ ꓠꓴ ꓠꓴ ꓐꓰ ꓕꓲ ꓡꓲꓹ ꓔꓬ ꓡꓳ꓾ ꓠꓴ ꓔꓯ ꓢꓯꓼ ꓖꓶ ꓔꓬ ꓡꓳ ꓐꓰ ꓢꓯꓼ ꓖꓶ ꓢꓴ ꓙꓳ ꓡ ꓕꓯ ꓣꓳ ꓠꓬ ꓮ ꓟꓬꓹ ꓟꓽ ꓥ ꓡꓲ ꓠꓲꓹ ꓟ ꓠꓯꓼ ꓗꓪ ꓡꓱ ꓡꓱ ꓡꓰ ꓐꓰ ꓢꓯꓼ ꓕꓵꓼ ꓐ ꓡ ꓟ ꓢꓯꓼ ꓪ ꓟꓶ ꓡ_ ꓡꓳ= ꓕꓱ ꓟ ꓠꓬ ꓟꓲ ꓠꓯ ꓕꓲ ꓣꓳ ꓛꓳ ꓕꓲ ꓣꓳ ꓢꓯꓼ ꓖꓶ ꓡꓯ ꓘꓳ ꓟ꓾ ꓢꓯꓼ ꓪ ꓟꓶꓸ_ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓪꓴ-ꓢ ꓥ ꓟꓲ ꓣꓳ ꓔꓯ ꓕꓱ ꓡꓱ ꓐꓰ ꓢꓯꓼ ꓖꓶ ꓔꓬ ꓡꓳ= ꓬꓲ-ꓢ-ꓬ 41ꓽ 10 ꓗꓪ ꓕꓽ ꓙꓳꓺ꓾ ꓮ ꓡꓲꓳ ꓐꓯ ꓠꓬ ꓥꓪ ꓠꓴ ꓐꓰ ꓕꓲ ꓡꓲꓹ ꓔꓬ ꓡꓳ꓾ ꓠꓲꓹ ꓟ ꓕꓽ ꓙꓬ꓾ ꓥꓪ ꓠꓬ ꓠꓴ ꓢꓯꓼ ꓪ ꓥꓳ ꓐꓰ ꓪꓴ-ꓢ ꓡꓰ ꓣꓳ ꓔꓯ ꓢꓯꓼ ꓪ ꓖꓶ_ ꓡꓳ= ꓣꓳ ꓕꓲ ꓣꓳ ꓛꓳ ꓟꓲ ꓠꓯ ꓞꓳ ꓤ ꓢꓯꓼ ꓖꓶ_ ꓟ ꓡꓲ ꓣꓳ ꓔꓯ ꓢꓯꓼ ꓓꓽ ꓟ ꓖꓶ ꓐ ꓡ ꓠꓬ꓾ ꓪꓴ-ꓢ ꓡꓰ ꓖꓶ ꓡ ꓟ ꓢꓯꓼ ꓪ ꓠꓬ ꓣꓳ ꓐꓱ ꓶ ꓵ ꓖꓴ ꓟꓽ ꓓ ꓟ ꓢꓯꓼ ꓪ ꓒꓬꓱꓼ ꓡ ꓥꓳ= ꓮ ꓫꓵ ꓑꓶ ꓓꓴ ꓥ ꓡ? ꓟꓴ ꓗꓪ ꓟꓲ ꓠꓯ ꓚꓰꓼ ꓢꓴ ꓮ ꓙꓵ ꓟ ꓪꓴ-ꓢ ꓬꓲꓸ ꓢꓯꓼ ꓪ ꓖꓶ ꓡ ꓠꓬ ꓣꓳ ꓠꓲꓹ ꓟ ꓠꓯꓼ ꓗꓪ ꓢꓯꓼ ꓓ ꓟ ꓡꓰ ꓗꓷ ꓡꓰ_ ꓥꓳ= ꓖꓳ ꓡꓱ ꓠꓬꓲ ꓠꓲꓹ ꓟ ꓠꓯꓼ ꓗꓪ ꓙꓵꓻ ꓠꓲꓹ ꓙꓳ ꓢꓴ ꓮ ꓫꓵ ꓟꓲ ꓬꓰ ꓐ ꓡ ꓡꓳ= ꓮ ꓫꓵ ꓑꓶ ꓓꓴ ꓥ ꓡ? ꓬꓲ ꓠꓲꓹ ꓟ ꓠꓯꓼ ꓗꓪ ꓪꓴ-ꓢ ꓠꓬ ꓬꓲ ꓐꓰ ꓔꓬ ꓡꓳ꓾ ꓬꓲ ꓮ ꓣꓳ ꓡꓳꓸ ꓒ ꓥ ꓡꓳ꓾ ꓬꓲ ꓔꓯ ꓪꓴ-ꓢ ꓠꓬ ꓬꓲ ꓙ ꓥꓳꓽ ꓔꓯꓹ ꓔ ꓢꓲ꓾ ꓬꓲꓸ ꓑ ꓕꓲ ꓗꓪ ꓔꓬ ꓡꓳ ꓐꓯ_ ꓟ ꓬꓲ ꓙꓵꓻ ꓕꓯ ꓬꓲ ꓠꓬ ꓠꓲꓹ ꓟ ꓡꓱ ꓡꓱ ꓡꓰ ꓫꓸ ꓕꓱ ꓐ ꓡ ꓡꓳ=

ꓟꓲ ꓠꓯ ꓞꓳ ꓤ ꓕꓲ ꓣꓳ ꓛꓳ ꓕꓲ ꓣꓳ ꓢꓯꓼ ꓖꓶ ꓟ ꓡꓲ ꓣꓳ ꓔꓯ ꓢꓯꓼ ꓓ ꓟ ꓡꓰ ꓖꓶ ꓐ ꓡ ꓠꓬ ꓪꓴ-ꓢ ꓡꓰ ꓖꓶ ꓡ ꓟ ꓢꓯꓼ ꓪ ꓠꓬ ꓣꓳ ꓐꓱ ꓶ ꓵ ꓖꓴ ꓟꓽ ꓓ꓾ ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓙꓵꓻ ꓠꓲꓹ ꓙꓳ ꓢꓴ ꓥ ꓕ ꓑꓳꓸ ꓔꓯ ꓪꓴ-ꓢ ꓠꓬ ꓬꓲꓸ ꓪ ꓔꓯ ꓬꓰ ꓙ ꓔꓬ ꓡꓳ ꓐꓯ_ꓟ ꓓꓵꓽ ꓙ ꓔ꓾ ꓣꓳ ꓟꓲ ꓠꓯ ꓞꓳ ꓤ ꓕꓲ ꓣꓳ ꓛꓳ ꓕꓲ ꓣꓳ ꓢꓯꓼ ꓖꓶ ꓡꓯ ꓘꓪ ꓕꓯ ꓥꓪ ꓠꓬ ꓠꓴ ꓐꓰ ꓕꓲ ꓡꓲꓹ ꓔꓬ ꓡꓳ꓾ ꓕꓽ ꓙꓳꓺ꓾ ꓐꓯ_ ꓟ ꓢꓯꓼ ꓪ ꓘꓶꓽ ꓠꓬ ꓣꓳ ꓔꓯ ꓢꓯꓼ ꓟꓶꓸ_ ꓟ ꓡꓰ ꓐꓰ ꓪꓴ-ꓢ ꓖꓶ_ ꓟ ꓢꓯꓼ ꓪ ꓠꓬ ꓟꓲ ꓠꓯ ꓞꓳ ꓤ ꓖꓶ_ ꓟ ꓢꓯꓼ ꓪ ꓢꓷꓸ ꓟꓽ ꓞꓲ ꓟꓬ ꓠꓬꓲ ꓪꓴ_ ꓡꓳ=

ꓖꓳ ꓡꓱ ꓠꓬꓲ ꓣꓳ ꓔꓳꓹ ꓜꓳ ꓔꓬ ꓟ ꓫꓸ ꓙꓵ ꓟꓶ ꓙꓵ ꓓꓴ ꓮ ꓙꓵ ꓔꓯ ꓑꓶꓸ ꓑꓶꓸ ꓐꓰ ꓙ ꓙꓰ ꓠꓹ ꓟ ꓪꓴ-ꓢ ꓠꓬ ꓣꓳ ꓐꓰ ꓔꓬ ꓡꓳ= ꓐꓯ_ ꓟ ꓚꓵꓸ ꓔ ꓖꓳ ꓡꓱ ꓠꓬ ꓧꓪꓸ ꓡꓰ_ ꓟ ꓟꓶ ꓡ ꓥꓳ= ꓪꓴ-ꓢ ꓣꓳ ꓔꓯ ꓪ ꓙꓲ ꓣꓱ ꓛꓰ ꓖꓶ ꓡ ꓥꓳ=