ꓛꓬ ꓢꓴ ꓔꓯ ꓮ ꓡꓲ ꓬꓰ ꓠꓯꓹ ꓟ

ꓟꓲ ꓠꓯ ꓕꓱ ꓟ ꓗꓪ ꓡ ꓞꓳ ꓮ ꓘꓶꓸ ꓬꓰ ꓙ ꓠꓲꓹ ꓟꓽ ꓫꓵ ꓟ꓾ ꓕꓲ ꓫꓵ ꓟ ꓮ ꓫꓵ ꓥ ꓐꓯ_ ꓟ ꓠꓬ ꓡ ꓞꓳ ꓕꓲ ꓣꓳ ꓥꓳꓽ ꓡꓰ ꓕꓯ ꓛꓬ ꓡꓰ ꓕꓯ ꓮ ꓘꓶꓸ ꓟꓸ ꓖꓶ ꓐꓱ ꓖꓶ ꓗꓷ ꓠꓲꓹ ꓟꓽ ꓫꓵ ꓕꓱ ꓟ ꓠꓬ ꓟꓲ ꓠꓯ ꓞꓳ ꓤ ꓠꓲꓹ ꓟ ꓥ ꓡꓳ= ꓔꓯ ꓥꓳꓽ ꓐꓯ ꓠꓬ ꓣꓳ ꓚꓳ ꓡꓳ ꓚꓳ ꓫꓵ ꓗꓪ ꓕꓲ ꓣꓳ ꓣꓳ ꓬꓰ ꓛꓬ ꓗꓷ ꓫꓵ꓾ ꓥꓳꓽ ꓡꓰ ꓫꓵ꓾ ꓣꓳ ꓘꓹ ꓐꓰ ꓟꓽ ꓪ ꓫꓵ ꓕꓲ ꓫꓵ ꓫꓵ ꓕꓱ ꓡꓱ ꓐꓰ ꓥꓳꓽ ꓗꓷ ꓠꓬ ꓮꓽ ꓟ ꓟꓲ ꓙꓲ ꓠꓲ ꓐꓯ ꓖꓶ ꓠꓲꓹ ꓟꓽ ꓫꓵ꓾ ꓣꓳ ꓔꓯ ꓥꓳꓽ ꓬꓲ ꓔꓯ ꓐꓯ ꓟꓳꓸ ꓖꓶ ꓕꓯ ꓬꓲ ꓡꓰ ꓣꓳ ꓔꓯ ꓝꓴꓲ ꓡꓰ ꓡ_ ꓟ꓾ ꓣꓳ ꓔꓯ ꓚꓱꓹ ꓬꓲꓼ ꓡ ꓢꓲ ꓧꓪꓸ ꓞ ꓡ_ ꓟ꓾ ꓣꓳ ꓙꓳꓺ ꓡꓳ= ꓕꓱ ꓟ ꓑꓶ ꓓꓴ ꓥꓳꓽ ꓓ ꓟꓲ ꓥꓳꓽ ꓓ_ ꓝꓲ꓾ ꓛꓬ ꓓ_ ꓟꓲ ꓛꓬ ꓓ_ ꓝꓲ꓾ ꓐꓯ ꓢꓲ ꓕꓱ ꓡꓱ ꓐꓰ ꓡꓳ ꓦ ꓫꓵ ꓟꓬ_ꓡꓳ=  ꓕꓱ ꓡꓱ ꓕꓽ ꓬꓰ ꓠꓹ ꓟ ꓠꓬꓲꓸ ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓔ ꓡꓳ=

ꓟ-ꓕꓲ 18ꓽ15-20 ꓗꓪ ꓠꓴ ꓪ ꓗꓳ ꓡꓳ ꓗꓪ ꓬꓲꓼ ꓤ ꓠꓬꓲ ꓤ ꓕꓲ ꓣꓳ ꓛꓬ ꓔ ꓠꓬ꓾ ꓙꓰ ꓢꓲ ꓬꓲ ꓔꓯ ꓐꓯ ꓟꓳꓸ ꓖꓶ꓾ ꓐꓯ ꓢꓲ ꓢꓲ ꓒ ꓬꓰ-ꓢꓴ ꓡꓰ ꓢꓯꓼ ꓪ ꓖꓶ ꓔ ꓡꓳ= ꓕꓲ ꓣꓳ ꓐꓯ ꓟꓳꓸ ꓖꓶ ꓟꓽ ꓠ ꓠꓹ ꓠꓬ ꓠꓬꓲꓽ ꓣꓳ ꓙꓰ ꓐꓯ ꓟꓳꓸ ꓖꓶ꓾ ꓠꓬꓲꓽ ꓣꓳ ꓙꓰ ꓐꓯ ꓟꓳꓸ ꓖꓶ ꓟꓽ ꓠ ꓠꓹ ꓠꓬ ꓢꓼ ꓣꓳ ꓡꓲꓸ ꓣꓳ ꓞꓳ ꓜꓴꓻ ꓙꓰ ꓢꓲ ꓐꓯ ꓟꓳꓸ ꓖꓶ꓾ ꓐꓱ ꓟꓸ ꓖꓶ ꓐꓰ ꓐꓯ ꓢꓲ ꓠꓬꓲ ꓢꓲ ꓒ ꓬꓰ-ꓢꓴ ꓡꓰ ꓕꓵꓼ ꓪ ꓖꓶ ꓔ ꓡꓳ=

ꓬꓲꓼ ꓤ ꓠꓬꓲ ꓤ ꓐꓴꓽꓳ꓾ ꓮ ꓫꓵ ꓑꓶ ꓓꓴ ꓣꓳ ꓠꓬ ꓥꓳꓽ ꓡꓰ ꓟ꓾ ꓛꓬ ꓡꓰ ꓟ꓾ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓐꓯ ꓟꓸ ꓖꓶ ꓠꓲꓹ ꓟꓽ ꓫꓵ ꓡ? ꓠꓬꓲꓸ ꓠꓬꓲ ꓢꓲ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓕꓵꓼ ꓪ ꓖꓶ ꓔꓬ ꓡꓳ= ꓕꓲ ꓐꓱ ꓟ ꓠꓬ ꓚꓵ ꓚꓵ ꓟꓽ ꓢꓷꓸ ꓢꓷꓸ ꓠꓬꓲ ꓥꓳꓽ ꓡꓰ ꓫꓵ ꓟꓲ ꓙꓳ_ ꓡꓳ= ꓕꓲ ꓐꓱ ꓟ ꓠꓬ ꓢꓷꓸ ꓢꓷꓸ ꓡꓰ ꓥꓳꓽ ꓡꓰ ꓫꓵ ꓟꓲ ꓙꓳ_ ꓡꓳ= ꓟꓽ ꓢꓷꓸ ꓢꓲ ꓠꓬꓲ ꓥꓳꓽ ꓡꓰ ꓢꓴ ꓛꓬ ꓡꓰ ꓢꓴ ꓠꓬ ꓣꓳ ꓐꓯ ꓟꓸ ꓖꓶ_ ꓕꓯ ꓐꓱ ꓟꓸ ꓖꓶ_ ꓕꓯ ꓬꓲ ꓠꓬ ꓗꓹ ꓛꓲ ꓛꓲ ꓡꓰ ꓘꓳꓹ ꓣꓴ_ ꓡꓳ= ꓖꓳ ꓡꓱ ꓠꓬꓲ ꓡ ꓞꓳ ꓕꓲ ꓣꓳ ꓥꓳꓽ ꓔ ꓟ ꓔꓯ ꓟꓳ ꓕꓯ ꓙꓰ ꓢꓲ ꓐꓯ ꓟꓸ ꓖꓶ꓾ ꓣꓳ ꓐꓯ ꓘꓶꓽ ꓔꓯ ꓟꓽ ꓠ ꓠꓹ ꓕꓯ ꓞꓳ ꓪꓴꓽ ꓞꓳ ꓔꓲ ꓐꓴ ꓐꓰ ꓙꓰ ꓢꓲ ꓠꓬꓲ ꓐꓱ ꓟꓸ ꓖꓶ= ꓖꓳ ꓡꓱ ꓥ ꓟꓲ ꓟꓽ ꓠ ꓠꓹ ꓠꓬ ꓬꓲꓸ ꓟꓶꓽ ꓕꓯ ꓢꓲ ꓡꓳ ꓩꓴ ꓐꓰ ꓢꓲ ꓫꓬ ꓕꓳ ꓶ ꓗꓪ ꓓꓯ_ ꓡꓳ= ꓖꓳ ꓡꓱ ꓠꓬꓲ ꓞꓳ ꓤ ꓮ ꓙꓵ ꓠꓬ ꓙꓲ_ ꓟ ꓬꓰ ꓠꓹ ꓟ꓾ ꓧꓹ ꓟ ꓬꓰ ꓠꓹ ꓟ ꓐꓱ ꓶ ꓪꓴ-ꓢ ꓡꓰ ꓚꓰꓼ ꓔ ꓟ ꓥ ꓡꓳ= ꓪꓴ-ꓢ ꓔꓯ ꓢꓷꓸ ꓢꓲ ꓠꓬꓲ ꓪꓴ-ꓢ ꓔꓯ ꓠꓲꓹ ꓠꓵ ꓗꓷ ꓗꓸ ꓠꓯꓸ ꓚꓳ ꓡꓳ ꓚꓳ ꓫꓵ ꓐꓴ ꓔꓯ ꓠꓲꓹ ꓠꓵ ꓗꓷ ꓗꓸ ꓠꓯꓸ ꓕꓲ ꓞꓲꓼ ꓕꓲ ꓑ ꓢꓲ ꓡꓲꓹ ꓟ ꓢꓯꓼ ꓟꓬ ꓘꓳꓹ ꓣꓴ ꓟꓶ ꓠꓹ ꓟ ꓐꓱ ꓶ ꓪꓴ-ꓢ ꓠꓬ ꓠꓲꓹ ꓡꓶꓽ ꓙꓳ_ ꓡꓳ= ꓖꓳ ꓡꓱ ꓠꓬꓲ ꓠꓲꓹ ꓡꓶꓽ ꓕꓱ ꓟ ꓔꓯ ꓒꓵꓽ ꓛꓳ ꓠꓹ ꓟ ꓐꓱ ꓶ ꓮ ꓙꓵ ꓢꓯꓼ ꓕꓵꓼ ꓓꓴ ꓥ ꓡꓳ꓾ ꓕꓱ ꓟ ꓔꓯ ꓟꓽ ꓢꓷꓸ ꓢꓷꓸ ꓐꓰ ꓥꓳꓽ ꓫꓵ ꓝꓴꓲ ꓬꓰ ꓔꓬ ꓫꓵ ꓕꓲ ꓚꓱꓹ ꓐꓯ ꓠꓬ ꓘꓴ ꓜꓲꓼ ꓞꓳ ꓐꓰ ꓕꓲ ꓡꓲꓹ ꓔꓬ ꓟꓽ ꓗꓴꓸ ꓟ ꓞꓳ ꓤ ꓔꓯ ꓟꓳ ꓡꓰ ꓕꓯ ꓣꓳ ꓠꓬ ꓬꓲ ꓔꓯ ꓐꓱ ꓖꓶ ꓐꓯ ꓟꓸ ꓖꓶ ꓠꓹ ꓟ ꓶꓻ ꓙꓳ_ ꓡꓳ= ꓢꓲ ꓒ ꓬꓰ-ꓢꓴ ꓡꓰ ꓠꓬꓲꓸ ꓠꓬꓲ ꓕꓱ ꓡꓱ ꓐꓰ ꓣꓳ ꓔꓯ ꓢꓯꓼ ꓖꓶ ꓔ ꓟ ꓥ ꓡꓳ= ꓕꓱ ꓡꓱ ꓐꓰ ꓣꓳ ꓡꓳꓸ ꓠꓬꓲ ꓕꓯ ꓢꓲ ꓒ ꓬꓰ-ꓢꓴ ꓠꓬ ꓠꓴ ꓪ ꓠꓬꓲꓽ ꓣꓳ ꓢ ꓣꓳ ꓥꓪ ꓟꓬꓱꓺ ꓗꓪ ꓐꓰ ꓡꓵꓽ ꓞꓲ_ ꓠꓬ ꓠꓴ ꓪ ꓟꓲ ꓙꓬ ꓗꓪ ꓥꓪ ꓔꓬ ꓥꓳ ꓐꓰ ꓢꓲ ꓒ ꓬꓰ-ꓢꓴ ꓟꓴ ꓗꓴ ꓘꓶ ꓖꓶ ꓡ_ ꓡꓳ= ꓣꓳ ꓕꓱ ꓡꓱ ꓪꓴ-ꓢ ꓟꓬꓱꓺ ꓗꓪ ꓐꓰ ꓢꓲ ꓒ ꓬꓰ-ꓢꓴ ꓟꓬꓱꓺ ꓗꓪ ꓐꓰ ꓡ ꓞꓳ ꓔꓯ ꓟꓸ ꓖꓶ ꓐꓱ ꓖꓶ ꓬꓰ ꓕꓯ ꓝꓮꓲ ꓣꓳ ꓪꓽ ꓘꓴ ꓕꓯ ꓪꓴ-ꓢ ꓠꓬ ꓣꓳ ꓟꓲ ꓙꓬ ꓗꓪ ꓛꓲ ꓡ ꓥꓳ ꓐꓯ_ ꓟ ꓔꓯ ꓣꓳ ꓠꓲꓹ ꓟ ꓗꓪ ꓗꓷ ꓔ ꓢꓲ ꓠꓬꓲ ꓡ ꓞꓳ ꓔꓯ ꓟꓸ ꓖꓶ ꓐꓱ ꓖꓶ ꓗꓴꓸ_ ꓟ ꓠꓲꓹ ꓟ ꓙꓳ_ ꓟ ꓡꓰ ꓐꓰ ꓣꓳ ꓚꓲꓸ ꓛꓬ ꓠꓲꓹ ꓟ ꓔꓯ ꓥ ꓟꓲ ꓔꓱ_ꓟ ꓠꓲꓹ ꓟ ꓙꓲ_ ꓟ ꓠꓲꓹ ꓟ ꓗꓷ ꓡꓰ ꓠꓹ ꓟ ꓐꓱ ꓶ ꓟꓸ ꓖꓶ ꓐꓱ ꓖꓶ ꓢꓲ ꓠꓬꓲ ꓢꓯꓼ ꓕꓵꓼ ꓙꓰ ꓥꓳ ꓐꓯ ꓠꓬ ꓶꓼ ꓙꓳ ꓫꓱꓸ ꓙꓳ_ ꓟ ꓞꓳ ꓤ ꓕꓲ ꓣꓳ ꓒꓬꓱꓼ ꓡ ꓥꓳ=