ꓘꓹ-ꓒꓱ-ꓠꓴ ꓜꓲꓼ ꓦꓲ ꓗꓪ ꓠꓲꓽ ꓖꓼ ꓓꓳ ꓗꓷˍ ꓟ

ꓪꓽ ꓘꓴ ꓦꓲꓻ ꓗꓪˍ ꓟꓲ ꓠꓲꓽ ꓙꓳˍ ꓡ? ꓮ ꓕꓯ ꓟꓲ ꓪꓽ ꓘꓴ ꓔꓬ ꓢꓴ ꓔꓯ ꓠꓲꓽ ꓜꓶꓽ ꓗꓴꓸˍ ꓡ? ꓐꓰ ꓕꓲ ꓣꓳ ꓣꓳ ꓡꓰ ꓠ ꓠꓬꓲ ꓗꓴꓸˍ ꓡꓳ= ꓕꓱ ꓟ ꓔꓯ ꓠꓬ ꓡꓴ-ꓘ 4ꓽ31-37 ꓗꓪ ꓟꓳꓻ ꓪˍ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓖ-ꓡꓲ-ꓡꓲ ꓟꓵꓽ ꓘꓹ-ꓒꓱ-ꓠꓴ ꓗꓪ ꓙꓰ ꓢꓲ ꓢꓲ ꓒ ꓦꓬꓼ ꓠꓬꓲ ꓗꓪ ꓪꓽ ꓘꓴ ꓦꓲ ꓗꓪ ꓙꓰ ꓢꓲ ꓟꓸ ꓟꓲꓽ ꓟꓸ ꓖꓶˍ ꓡꓳ= ꓖꓳ ꓕꓯ ꓠꓲꓽ ꓜꓶꓽ ꓞꓹ ꓢꓴ ꓕꓲ ꓣꓳ ꓠꓬ ꓬꓰ-ꓢꓴ ꓔꓯ ꓡ ꓢꓲ꓾ ꓠꓴ ꓠꓬ ꓥꓪ ꓠꓴꓽˍ ꓐꓰ ꓮ ꓫꓵꓽ ꓗꓴꓸ ꓙꓲꓽ ꓙꓳˍ ꓡ? ꓥꓪ ꓠꓴꓽ ꓔꓯ ꓟꓶꓽ ꓬꓰ ꓝꓲˍ ꓐꓰ ꓬꓰˍ ꓡ? ꓐꓰ ꓢꓲ ꓒ ꓬꓰ-ꓢꓴ ꓔꓯ ꓐꓯ ꓖꓶˍ ꓟ ꓔꓯ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓑ ꓙꓽ ꓪˍ ꓡꓳ= ꓢꓲ ꓒ ꓬꓰ-ꓢꓴ ꓡꓰ ꓬꓲ ꓔꓯ ꓟꓽ ꓪꓳꓹ ꓔꓬ ꓐꓰ ꓐꓯ ꓢꓲ ꓠꓲꓽ ꓔꓯ ꓖꓼ ꓓꓳ ꓗꓷ ꓟ ꓔꓯ ꓣꓳ ꓑ ꓙꓽ ꓪˍ ꓡꓳ=

ꓖꓳ ꓡꓱ ꓠꓬꓲ ꓕꓱ ꓗꓪ ꓣꓳ ꓓꓵꓽ ꓙ ꓠꓬꓲ ꓓꓴ ꓠꓬ꓾ ꓢꓲ ꓒ ꓬꓰ-ꓢꓴ ꓠꓬ ꓪꓽ ꓘꓴ ꓦꓲꓻ ꓗꓪ ꓙꓰ ꓢꓲ ꓠꓬꓲ ꓟꓸ ꓟꓲꓽ ꓧꓶꓸ ꓕꓯ ꓚꓺ ꓖꓶˍ ꓡꓳ= ꓪꓴ-ꓢ ꓐꓯ ꓘꓶꓽ꓾ ꓪꓴ-ꓢ ꓟꓸ ꓟꓲꓽ꓾ ꓪꓴ-ꓢ ꓠꓬ ꓙꓲˍ ꓟ꓾ ꓪꓴ-ꓢ ꓬꓲ ꓔꓱꓹ ꓜꓳꓽˍ ꓟ꓾ ꓪꓴ-ꓢ ꓠꓬ ꓞꓳ ꓤ ꓔꓯ ꓮ ꓡꓲ ꓟꓬ ꓛꓲ ꓠꓲꓹ ꓠꓵˍ ꓟ꓾ ꓟꓸ ꓖꓶ ꓔꓬ ꓕꓯ ꓑ ꓫꓬ ꓐꓴ ꓗꓳ ꓡꓳ ꓗꓪ ꓟ ꓡ ꓞꓳ ꓕꓲ ꓣꓳ ꓠꓬ ꓠꓲꓽ ꓜꓶꓽ ꓓꓹ ꓡꓳ꓾ ꓐꓰ ꓣꓳ ꓢꓷꓸ ꓪ ꓡꓳ=

ꓕꓱ ꓗꓪ ꓣꓳ ꓚꓲꓸ ꓔ ꓠꓹ ꓟ ꓬꓲ ꓪꓴꓸ ꓕꓲ ꓟ ꓠꓬ꓾ ꓪꓴ-ꓢ ꓐꓯ ꓘꓶꓽ ꓔꓯ ꓣꓳ ꓠ ꓠꓹ ꓕꓯ꓾ ꓪꓴ-ꓢ ꓐꓰ ꓕꓲ ꓪˍ ꓔꓬ ꓕꓯ꓾ ꓪꓴ-ꓢ ꓐꓯ ꓘꓶꓽ ꓔꓯ ꓠꓲꓹ ꓟ ꓠꓯꓸꓼ ꓗꓪ ꓗꓶ ꓔ ꓢꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓛꓳ ꓫꓱꓽˍ ꓕꓯ꓾ ꓪꓴ-ꓢ ꓐꓱ ꓶ ꓣꓳ ꓢꓷꓸ ꓙ ꓟꓳ ꓙˍ ꓕꓯ ꓖꓳ ꓟ ꓗꓳ ꓡꓳ ꓗꓪˍ ꓟꓲ ꓠꓲꓽ ꓢ-ꓓꓯ ꓙꓳˍ ꓡꓳ꓾ ꓐꓯ ꓟ ꓔꓯ ꓢꓷꓸ ꓠ ꓗꓹ ꓡꓳ= ꓪꓽ ꓘꓴ ꓦꓲꓻ ꓗꓪ ꓡꓰꓽ ꓟꓽ ꓞꓲꓺ꓾ ꓠꓱꓸ ꓐꓯ ꓮ ꓡꓲ ꓗꓪ ꓥˍ ꓟꓲ ꓣꓳ ꓗꓳ ꓡꓳ ꓗꓪ ꓥ ꓟꓲ꓾ ꓣꓳ ꓛꓳꓽ ꓒꓯꓹ ꓛꓳꓽ ꓤ ꓐꓴ ꓘꓴꓽ ꓗꓪ ꓥˍ ꓟꓲ꓾ ꓣꓳ ꓦꓲꓻ ꓘꓴꓽ ꓗꓪ ꓥ ꓟꓲ꓾ ꓣꓳ ꓪꓴ-ꓢ ꓐꓰ ꓛꓳ ꓫꓱꓽ ꓔꓬ ꓕꓯ ꓕꓲ ꓫꓵꓽ ꓫꓵꓽ ꓘꓶꓻ ꓡꓶꓽ ꓓꓴ ꓠꓬ ꓮ ꓕꓯ ꓟꓲ  ꓙꓳ ꓡ ꓗꓴꓸˍ ꓡꓳ= ꓮ ꓡꓲꓳ ꓐꓯ ꓠꓬ ꓪꓴ-ꓢ ꓐꓯ ꓘꓶꓽ ꓔꓯ ꓛꓳ ꓫꓱꓽ ꓢꓴ꓾ ꓪꓴ-ꓢ ꓐꓯ ꓘꓶꓽ ꓔꓯ ꓠꓲꓽ ꓢ-ꓓꓯ ꓠꓲꓹ ꓜꓳˍ ꓟ꓾ ꓙꓲˍ ꓟ ꓬꓰ ꓢꓴ ꓔꓯ ꓠꓲꓽ ꓢ-ꓓꓯ ꓠꓲꓹ ꓜꓳˍ ꓟ ꓣꓳ ꓢꓷꓸ ꓪ ꓓꓹˍ ꓡꓳ=

ꓝꓮꓲ ꓕꓲ ꓫꓵꓽ ꓠꓬ ꓢꓲ ꓒ ꓬꓰ-ꓢꓴ ꓠꓬ ꓟꓸ ꓟꓲꓽ ꓚ ꓔꓬ ꓕꓯ ꓪꓽ ꓘꓴ ꓦꓲꓻ ꓗꓪ ꓠꓲꓽ ꓜꓶꓽˍ ꓐꓯ ꓟ ꓠꓬ ꓣꓳ ꓐꓱ ꓶ ꓓꓵꓽ ꓙꓽ ꓟꓶ ꓓꓴ ꓥ ꓡꓳ= ꓪꓽ ꓘꓴ ꓦꓲꓻ ꓠꓬ ꓢꓲꓽ ꓫꓬ ꓦꓲꓻ꓾ ꓪꓽ ꓘꓴ ꓦꓲꓻ ꓠꓬ ꓪꓴ-ꓢ ꓔꓬ ꓟ ꓦꓲꓻ꓾ ꓪꓽ ꓘꓴ ꓦꓲꓻ ꓠꓬ ꓢꓲ ꓤ ꓮ ꓙꓵꓽ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓼˍ ꓟ ꓦꓲꓻ ꓥ ꓡꓳ= ꓕꓱ ꓡꓱ ꓫꓵꓽ ꓗꓪ ꓮ ꓫꓵꓽ ꓪꓴꓸ ꓠꓬꓲ ꓠꓲꓽ ꓢ-ꓓꓯ ꓔꓬ ꓡ ꓐꓯ ꓟ ꓠꓬ ꓡ ꓞꓳ ꓕꓲ ꓐꓱ ꓠꓬ ꓬꓲ ꓪ ꓠꓲꓹ ꓟ ꓗꓪ ꓠꓲꓽ ꓢ-ꓓꓯ ꓔꓯ ꓘꓳ ꓣꓴ ꓢꓲ ꓔꓬꓹ ꓖꓴ ꓖꓶ ꓔ ꓡꓳ= ꓬꓲ ꓪ ꓪꓽ ꓮ ꓟꓬꓹ ꓘꓴ ꓔꓬ ꓥ ꓟꓲ ꓬꓲ ꓪ  ꓠꓲꓹ ꓟ ꓠꓯꓸꓼ ꓗꓪ ꓠꓲꓽ ꓢ-ꓓꓯ ꓔꓯ ꓔꓬ ꓖꓴ ꓖꓶ ꓔ ꓕꓯ ꓠꓲꓽ ꓢ-ꓓꓯ ꓠꓬ ꓬꓲ ꓪ ꓮ ꓡꓲ ꓗꓪ ꓙꓰˍ ꓠꓬ ꓖꓳ ꓗꓪ ꓔꓬ ꓥꓳ= ꓔꓯ ꓥꓳꓽ꓾ ꓪꓴ-ꓢ ꓔꓯ ꓙꓵꓻ ꓔꓬ ꓥ ꓟꓲ ꓠꓲꓽ ꓢ-ꓓꓯ ꓔꓯ ꓗꓹ ꓘꓶꓽ ꓒꓴ ꓖꓶ ꓔ ꓕꓯ꓾ ꓟꓲ ꓕꓯ ꓢꓲ ꓟ ꓦꓬꓼ ꓠꓬꓲ ꓗꓪ ꓮ ꓫꓵꓽ ꓒꓬꓱꓼ ꓡˍ ꓟ ꓔꓯ ꓡꓯꓼ ꓗꓪ ꓝꓲꓸ ꓡꓳꓸ ꓠꓬꓲ꓾ ꓝꓮꓲ ꓕꓲ ꓫꓵꓽ ꓠꓬ ꓣꓳ ꓔꓯ ꓝꓴꓲꓸ ꓕꓲ ꓫꓵꓽ ꓫꓵꓽ ꓠꓶꓼ ꓞꓹ ꓕꓯ ꓡꓲꓹ ꓗꓷ ꓟꓽ ꓓ ꓩꓴ ꓗꓷ ꓟꓽ ꓓ ꓟ ꓝꓴꓲꓸ ꓓꓽ ꓟ ꓣꓳ ꓔꓯ ꓙꓳˍ ꓕꓯ ꓕꓱ ꓟ ꓠꓬ ꓠꓲꓽ ꓢ-ꓓꓯ ꓔꓯ ꓗꓹ ꓘꓶꓽ ꓒꓴ ꓖꓶ ꓔ ꓟˍ ꓡꓰ ꓐꓰ꓾ ꓪꓽ ꓘꓴ ꓔꓬ ꓥ ꓟꓲ ꓝꓴꓲꓸ ꓖꓳ ꓟ ꓔꓯ ꓣꓳ ꓕꓶꓺ ꓕꓶꓺ ꓡꓰꓽ ꓪꓳ ꓔ ꓕꓯ꓾ ꓣꓳ ꓮ ꓡꓲ ꓗꓪ ꓙꓰˍ ꓥ ꓟꓲ꓾ ꓪꓽ ꓘꓴ ꓦꓲꓻ ꓗꓪ ꓥˍ ꓟꓲ꓾ ꓝꓮꓲ ꓪꓽ ꓙꓵꓽ ꓗꓪ ꓙꓰˍ ꓥ ꓟꓲ꓾ ꓠꓲꓽ ꓢ-ꓓꓯ ꓠꓬ ꓣꓳ ꓗ ꓠꓯꓸ ꓢꓲ ꓗꓪ ꓖꓼ ꓛꓳ ꓔꓬ ꓥꓳ=

ꓖꓳ ꓡꓱ ꓠꓬꓲ ꓪꓽ ꓘꓴ ꓦꓲꓻ ꓗꓪ ꓔꓬ ꓥ ꓟꓲ ꓞꓳ ꓤ ꓥ ꓟ ꓑꓶꓸ ꓓꓴ ꓞꓳ ꓤ ꓖꓳ ꓓꓱꓽ ꓗꓪ ꓠꓲꓽ ꓓꓵꓽˍ ꓟ ꓣꓳ ꓟꓳꓻ ꓪˍ ꓡꓳ= ꓖꓳ ꓡꓱ ꓥ ꓟꓲ ꓕꓱ ꓡꓱ ꓫꓵꓽ ꓡ ꓞꓳ ꓔꓯ ꓣꓳ ꓔꓳꓹ ꓜꓳꓽˍ ꓕꓯ꓾ ꓕꓲ ꓚꓱꓹ ꓐꓯ ꓪˍ ꓠꓬ ꓣꓳ ꓔꓯ ꓘꓶꓸ ꓡ ꓢꓴ꓾ ꓣꓳ ꓔꓯ ꓗꓸ ꓧꓪ ꓡ ꓢꓴ꓾ ꓣꓳ ꓔꓯ ꓠꓬꓲꓸ ꓤꓲ ꓡ ꓢꓴ ꓔꓯ ꓣꓳ ꓟꓳꓻˍ ꓕꓯ ꓣꓳ ꓠꓬ ꓖꓳ ꓟꓬ ꓙꓳꓺ ꓟꓽ ꓛꓵꓻ= ꓢꓲ ꓒ ꓬꓰ-ꓢꓴ ꓠꓬ ꓣꓳ ꓔꓯ ꓙꓵꓽ ꓪ ꓖꓶ ꓔ ꓡꓳ= ꓬꓲ ꓟꓬꓱ ꓗꓪ ꓐꓰ ꓠꓴ ꓪ ꓮ ꓫꓵꓽ ꓟꓲ ꓬꓰ ꓐ ꓡˍ ꓥꓳ ꓐꓰ ꓣꓳ ꓔꓯ ꓪꓵꓼ ꓘꓶꓽ ꓖꓶ ꓔ ꓟ ꓑꓶꓸ ꓓꓴ ꓑꓶꓸ ꓑꓶꓸ ꓡꓰꓽ ꓢꓯꓼ ꓙꓳ ꓙꓳ ꓡꓰꓽ ꓞꓳ ꓙꓳ ꓠꓹ ꓟ ꓣꓳ ꓐꓱ ꓶ ꓬꓳꓸ ꓚꓵ ꓓꓰ ꓡꓰ ꓟ ꓥ ꓡꓳ=

ꓤꓹ ꓠꓬꓲ ꓫꓵꓽ ꓠꓬꓲˍ ꓟ ꓑꓶꓸ ꓓꓴ ꓠꓲꓽ ꓜꓶꓽ ꓢꓴ ꓬꓲ ꓪ ꓫꓸ ꓕꓱ ꓘꓶꓽ꓾ ꓟꓽ ꓙꓲꓻ ꓟ ꓫꓸ ꓕꓱ ꓘꓶꓽ꓾ ꓟꓽ ꓔꓱꓹ ꓟ ꓫꓸ ꓕꓱ ꓘꓶꓽ ꓕꓱ ꓟꓬ ꓫꓵꓽ ꓗꓪ ꓐꓰ ꓣꓳ ꓬꓰ ꓔꓬ ꓟ ꓙꓲꓻˍ ꓟ ꓮ ꓔꓳꓸ ꓟꓽ ꓫꓵꓻ ꓝꓲ ꓠꓹ ꓟ ꓢꓯꓼ ꓕꓵꓼ ꓠꓹ ꓟ ꓐꓱ ꓶ ꓶꓻ ꓙꓳˍ ꓡꓳ= ꓮ ꓡꓲ ꓫꓵꓽ ꓦꓬꓼ ꓠꓬꓲ ꓔꓳꓹ ꓜꓳꓽ ꓡˍ ꓥ ꓟꓲ ꓪꓴ-ꓢ ꓔꓯ ꓕꓶꓺ ꓕꓶꓺ ꓡꓰꓽ ꓪꓳ ꓔ ꓢꓲ ꓞꓳ ꓙꓳˍ ꓠꓬ ꓣꓳ ꓐꓱ ꓶ ꓗꓹ ꓛꓲꓽˍ ꓟ ꓢꓲ ꓡꓲ ꓟ ꓟꓶˍ ꓥꓳ= ꓣꓳ ꓤꓶꓻ ꓗꓪ ꓢꓲ ꓒ ꓣꓱꓽ ꓛꓰꓽ ꓟꓬꓽ ꓠꓬꓲ ꓖꓶ ꓡˍ ꓥꓳ= ꓠꓲꓹ ꓟ ꓢꓲ ꓡꓲ ꓢꓲ ꓬꓰˍ ꓟ ꓮ ꓙꓵꓽ ꓗꓪ ꓧꓪꓸ ꓡꓰˍ ꓥꓳ꓾ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓠꓬꓲ ꓟꓳꓻ ꓓꓴ ꓡꓬꓸ ꓖꓶ ꓡ ꓔꓬ ꓡꓳ=