ꓚꓳ ꓑ. ꓐꓴ ꓔꓯ ꓒꓴ ꓡꓯꓼ ꓙꓱ ꓔ ꓟ ꓔꓯ ꓥꓳꓽ (Sunday reflection)

ꓚꓳ ꓑ. ꓐꓴ ꓔꓯ ꓒꓴ ꓡꓯꓼ ꓙꓱ ꓔ ꓟ ꓔꓯ ꓥꓳꓽ

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓼ ꓘꓳꓼ ꓠꓯ ꓗꓪ ꓐꓰ (33) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ ꓢꓲ ꓠꓬꓲ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐7 ꓮ1ꓮ   ꓕꓲ ꓕꓳ ꓶ (25ꓽ14‐30) ꓝꓲ ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓟꓴ ꓗꓪ ꓗꓴꓷꓼ ꓠꓬ ꓚꓳ ꓑ. ꓐꓴ ꓔꓯ ꓒꓴ ꓡꓯꓼ ꓙꓱ ꓟ ꓔꓯ ꓥꓳꓽ ꓟ. ꓟꓲ ꓐꓯ ꓟ. ꓖꓶ ꓟ ꓟ. ꓟꓲ ꓥ ꓡꓳ꓿

ꓢꓲꓽ ꓫꓬ ꓕꓳ ꓶ ꓗꓪ ꓟꓴ ꓗꓪ ꓗꓴꓷꓼ ꓠꓬ ꓬꓲ ꓚꓳ ꓑ. ꓐꓴ ꓔꓯ ꓬꓲ ꓖꓴꓽ ꓙꓴꓽ ꓔꓯ ꓡꓯꓼ ꓙꓱ ꓢꓲ ꓠꓬꓲ ꓬꓲ ꓢꓲꓺ ꓒ ꓠꓱ. ꓐꓯꓼ ꓗꓴꓷꓼ ꓗꓪ ꓙꓰ ꓟ ꓐꓰ ꓫꓱ, ꓡꓯ ꓘꓳ, ꓡꓳ ꓐꓰ ꓐꓯ ꓔ ꓡꓳ꓿ ꓕꓲ ꓣꓳ ꓔꓯ ꓠꓬ ꓒꓴ ꓥꓪ ꓐꓯ ꓖꓶ ꓡꓯꓼ ꓙꓱ ꓔ ꓡꓳ꓿ ꓕꓲ ꓣꓳ ꓔꓯ ꓠꓬ ꓒꓴ ꓠꓬꓲꓽ ꓖꓶ ꓔ ꓢꓲ ꓠꓬꓲ ꓕꓲ ꓣꓳ ꓔꓯ ꓠꓬ ꓕꓲ ꓒꓯꓼ ꓖꓶ ꓔ ꓡꓳ ꓐꓰ ꓐꓯ ꓔ ꓡꓳ꓿

ꓢꓲꓽ ꓫꓬ ꓕꓳ ꓶ ꓗꓪ ꓬꓲ. ꓢꓲꓺ ꓒ ꓡꓰ ꓖꓶ ꓔ ꓟ ꓔꓯ ꓒꓴ ꓥꓪ ꓒꓯ ꓐꓰ ꓠꓬꓲꓽ ꓒꓯ ꓖꓶ ꓔ ꓢꓴ ꓠꓬ ꓬꓲ ꓐꓱ ꓒꓴ ꓪ ꓠ, ꓟ ꓟꓬꓱꓺ ꓬꓰ ꓢꓲ ꓠꓬꓲ ꓬꓲ ꓢꓲꓺ ꓒ ꓡꓽ ꓡ ꓟ ꓙꓵ, ꓕꓯ ꓖꓶ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓒꓴ ꓕꓲ ꓒꓯ ꓖꓶ ꓔ ꓢꓴ ꓠꓬ ꓬꓲ ꓢꓲꓺ ꓒ ꓡꓰ ꓖꓶ ꓔ ꓟ ꓒꓴ ꓔꓯ ꓠꓱ ꓦꓵ ꓗꓪ ꓬꓲ ꓘꓴ ꓚꓴꓽ ꓢꓲ ꓠꓬꓲ ꓔꓴ ꓔ ꓟ ꓔꓯ ꓬꓲ. ꓢꓲꓺ ꓒ ꓢꓷ. ꓡꓰ ꓠꓬ ꓮ ꓘꓶ. ꓛꓲ ꓠꓲ, ꓟ ꓫ. ꓓꓴ ꓙꓳˍ ꓡꓰ  ꓥ ꓡꓳ꓿

  ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓢꓲꓺ ꓒ ꓬꓰ‐ꓢꓴ ꓡꓰ ꓠꓴ ꓥꓪ ꓔꓯ ꓖꓶ ꓔ ꓟ ꓢꓯꓼ ꓪ ꓢꓷ. ꓠꓲ, ꓮ ꓙꓵꓽ ꓔꓯ ꓬꓲ ꓐꓱ ꓶ ꓝꓮꓲ ꓠꓱ. ꓐꓯꓼ ꓢꓴ ꓐꓱ ꓶ ꓙꓲ ꓖꓴ ꓙꓳˍ ꓟ ꓔꓲ ꓗꓪ ꓣꓱ ꓗꓷ ꓡ ꓐꓰ ꓬꓲ ꓣꓳ ꓔꓯ ꓠ, ꓠꓬꓲ ꓡ ꓓꓴ ꓥꓳ꓿ ꓪꓴ‐ꓢ ꓡꓰ ꓣꓳ ꓔꓯ ꓮ ꓫꓵꓽ ꓖꓶ ꓔ ꓡ ꓝꓮꓲ ꓪꓴ‐ꓢ ꓡꓰ ꓣꓳ ꓔꓯ ꓖꓶ ꓔ ꓟ ꓡꓯꓽ ꓫꓴ ꓔꓯ ꓣꓳ ꓠꓬ ꓙꓲ ꓟ ꓕꓲ ꓒꓳ, ꓗꓪ ꓟꓬꓱꓺ ꓬꓰ ꓢꓲ ꓠꓬꓲ ꓮ ꓟꓬ,  ꓟꓬꓽ ꓡ ꓠ, ꓟ ꓢꓯꓼ ꓕꓵꓼ ꓠ, ꓟ ꓟꓬꓱꓺ ꓬꓰ ꓠ, ꓟ ꓥ ꓡꓳ꓿

ꓣꓳ ꓔꓯ ꓪꓴ‐ꓢ ꓖꓶ ꓔ ꓟ ꓢꓯꓼ ꓪ ꓝꓮꓲ ꓢꓷ. ꓠꓲ, ꓬꓲ ꓒꓳ, ꓒꓳ, ꓬꓲ ꓢꓶꓽ ꓓꓱ ꓠ, ꓟ ꓟꓬꓱꓽ ꓬꓰ ꓠ, ꓟ ꓢꓯꓼ ꓕꓵꓼ ꓠ, ꓟ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓠꓵ ꓥꓪ ꓔꓯ ꓐꓯ ꓟ. ꓖꓶ ꓔꓬ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓟꓲ ꓠꓯ ꓗꓪ ꓬꓯꓼ ꓡ ꓟ ꓙꓵ, ꓕꓯ ꓠꓵ ꓥꓪ ꓔꓯ ꓢꓲꓺ ꓒ ꓬꓰ‐ꓢꓴ ꓠꓽ ꓠꓬꓲˍ ꓡ ꓟ ꓙꓵ, ꓕꓯ ꓮ ꓡꓰ ꓬꓰ ꓠ, ꓟ ꓙꓽ ꓖꓶ ꓓꓴ ꓬꓰ ꓡꓯ꓿ ꓢꓲꓺ ꓒ ꓐꓯ ꓘꓶꓽ ꓔꓯ ꓒꓴ ꓛꓳ ꓢꓲ ꓠꓬꓲ ꓬꓲ ꓤ ꓠꓬꓲ ꓤ ꓐꓴ ꓐꓱ ꓶ ꓝꓮꓲ ꓣꓱ ꓞ ꓔꓬ ꓢꓴ ꓐꓴ ꓔꓯ ꓬꓰ ꓙ ꓔꓳ ꓙ ꓓꓴ ꓬꓰ ꓡꓯ꓿

ꓕꓱ ꓟ ꓠꓬ ꓢꓲꓺ ꓒ ꓔꓯ ꓬꓰ ꓙ ꓟ ꓡꓰ ꓐꓰ ꓫꓱ, ꓡꓯꓼ ꓘꓳ ꓟ ꓥ ꓡꓳ꓿ ꓢꓲꓺ ꓒ ꓔꓯ ꓧꓪ, ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓣꓳ ꓠꓲ, ꓟ ꓗ ꓘꓶꓽ ꓒꓴ ꓖꓶ ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓬꓲ ꓙꓵ, ꓖꓶ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿