ꓠꓲꓹ ꓗꓴ ꓟꓬ ꓗꓴ ꓢꓴ ꓖꓶ ꓙ ꓟꓳˍ ꓟ

“ꓥꓪ ꓙꓰˍ ꓟ ꓠꓬ ꓠꓴ ꓪ ꓐꓱ ꓶ ꓙꓲꓻˍ ꓡꓳ= ꓮ ꓡꓲꓳ ꓐꓯ ꓠꓬ ꓥꓪ ꓟꓽ ꓙꓰ ꓠꓬ꓾ ꓠꓲꓹ ꓟ ꓗꓴ ꓖꓶ ꓢꓴ ꓠꓴ ꓪ ꓔꓯ ꓟꓽ ꓡ= ꓖꓳ ꓡꓱ ꓥˍ ꓟꓲ ꓥꓪ ꓙꓰˍ ꓠꓬ ꓠꓴ ꓪ ꓔꓬ ꓗꓪ ꓥꓪ ꓬꓲ ꓔꓯ ꓝꓲ ꓩꓴ ꓡˍ ꓥꓳ=” ꓐꓰ ꓢꓲ ꓒ ꓬꓰ-ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓐꓯ ꓖꓶˍ ꓡꓳ= ꓕꓱ ꓟ ꓔꓯ ꓬꓲ ꓪ ꓑ ꓙꓽ ꓡꓰ ꓠꓬ ꓬꓲ ꓪ ꓓꓵꓽ ꓙ ꓟꓬꓽˍ ꓡꓳ= ꓐꓯ ꓘꓶꓽ ꓕꓱ ꓟ ꓬꓲ ꓪ ꓟꓽ ꓙꓽ ꓜꓲꓼ ꓑꓶꓸ ꓓꓴ ꓬꓲ ꓪ ꓠꓲꓹ ꓟ ꓫꓸ ꓥˍ ꓟꓲ ꓢꓲ ꓒ ꓬꓰ-ꓢꓴ ꓐꓯ ꓘꓶꓽ ꓔꓯ ꓬꓲ ꓪ ꓙꓵꓻ ꓠꓹ ꓟ ꓢꓯꓼ ꓕꓵꓼˍ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓐꓹ ꓐ ꓔꓬꓹ ꓗꓪ ꓓꓯꓻ ꓙꓰˍ ꓥꓳ꓾ ꓖꓳ ꓡꓱ ꓙꓰˍ ꓟ ꓠꓬ ꓬꓲ ꓝꓲ ꓓꓴ ꓐꓴ ꓐꓱ ꓶ ꓟꓬꓽ ꓠꓬꓲ ꓙꓲꓻˍ ꓟ ꓔꓯ ꓬꓲ ꓝꓲ ꓓꓴ ꓐꓴ ꓔꓯ ꓐꓯ ꓟꓸ ꓖꓶˍ ꓡꓳ= ꓮ ꓫꓵꓽ ꓑꓶꓸ ꓓꓴ ꓥ ꓡ? ꓢꓲ ꓒ ꓬꓰ-ꓢꓴ ꓟꓽ ꓙꓰ ꓕꓯ ꓠꓽ ꓬꓲ ꓪ ꓐꓱ ꓶ ꓟꓽ ꓙꓲꓻꓳ ꓫꓵꓽ ꓡꓺ? ꓐꓰ ꓠꓺ ꓠꓬꓲ ꓓꓴ ꓙꓳˍ ꓡꓳ= ꓖꓳ ꓡꓱ ꓥ ꓟꓲ ꓬꓲ ꓙꓰ ꓗꓷ ꓠꓬ ꓬꓲ ꓠꓬ ꓢꓲꓽ-ꓫꓬ-ꓟ-ꓦ ꓔꓯ ꓬꓲ ꓝꓲ ꓓꓴ ꓐꓴ ꓔꓬ ꓗꓪ ꓝꓲ ꓩꓴ ꓖꓶˍ ꓥꓳ= ꓖꓳ ꓡꓱ ꓢꓲ-ꓫꓬ-ꓟ-ꓦ ꓔꓯ ꓝꓲ ꓩꓴ ꓖꓶ ꓠꓹ ꓟ ꓐꓱ ꓶ ꓢꓲ ꓒ ꓬꓰ-ꓢꓴ ꓠꓬ ꓐꓹ ꓐ ꓔꓬ ꓗꓪ ꓙꓰ ꓠ ꓗꓹ ꓟ ꓥ ꓡꓳ=

ꓟꓲ ꓠꓯ ꓞꓳ ꓤ ꓫꓵꓽ ꓧꓪꓽ ꓥ ꓟ ꓝꓲ ꓓꓴ ꓐꓴ ꓠꓬ꓾ ꓢꓲ ꓒ ꓬꓰ-ꓢꓴ ꓐꓰ 3 ꓘꓳꓼ ꓟꓽ ꓞꓲꓺ ꓕꓲ ꓡꓰꓹ ꓔꓬ ꓗꓷ ꓠꓬꓲ꓾ ꓢꓲ ꓒ ꓬꓰ-ꓢꓴ ꓡꓰ ꓟꓸ ꓖꓶ ꓡ ꓟ ꓔꓯ ꓠ ꓠꓹ ꓢꓲ ꓕꓲ ꓠꓬꓲ ꓕꓲ ꓠꓬꓲ ꓦꓬꓼ ꓠꓬꓲ ꓗꓳꓸ ꓔꓬ ꓠꓬꓲ꓾ ꓮ ꓟꓶ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓪ ꓔꓯ ꓐꓰ ꓧꓹ ꓙꓰˍ ꓕꓯ ꓠꓽ ꓬꓲ ꓪ ꓐꓱ ꓶ ꓬꓰ ꓫꓸ ꓥꓳ= ꓬꓲ ꓪ ꓠꓬ ꓟꓲ ꓠꓯ ꓡ ꓞꓳ ꓥ ꓟ ꓑꓶꓸ ꓓꓴ ꓢꓲ ꓒ ꓬꓰ-ꓢꓴ ꓬꓲ ꓒꓬꓱꓽ ꓬꓲ ꓢꓯꓸ ꓬꓲ ꓣꓱꓽ ꓬꓰ ꓔꓬ ꓟ ꓚꓱꓹ ꓔꓯ ꓬꓲ ꓪ ꓢꓲꓼ ꓙꓬˍ ꓥꓳ= ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓙꓰ ꓗꓷˍ ꓗꓪ ꓛꓲ ꓬꓲ ꓠꓬ ꓬꓲ ꓝꓲ ꓓꓴ ꓐꓴ ꓐꓰ ꓮ ꓕꓯ ꓟꓲ ꓔꓬ ꓥꓳ꓾ ꓐꓰ ꓐꓯ ꓖꓶ ꓗꓷꓳ= ꓖꓳ ꓟ ꓡꓰꓽ ꓟꓽ ꓞꓲꓺ ꓬꓲ ꓠꓬ ꓢꓲꓽ-ꓫꓬ-ꓟ-ꓦ ꓔꓯ ꓬꓲ ꓝꓲ ꓓꓴ ꓐꓴ ꓕꓯꓽ ꓢꓲ ꓗꓪ ꓝꓲ ꓩꓴ ꓖꓶˍ ꓥꓳ= ꓬꓲ ꓪ ꓔꓯ ꓧꓳꓽ ꓪꓴꓸ ꓟꓴ ꓖꓶ ꓠꓹ ꓟ꓾ ꓬꓲ ꓪ ꓐꓴ ꓔꓯ ꓔꓽ ꓝꓲ ꓙꓳ ꓡ ꓝꓲ ꓠꓹ ꓟ꓾ ꓮ ꓫꓵꓽ ꓗꓪˍ ꓟꓲ ꓟꓽ ꓙꓳꓺ ꓠꓹ ꓟ꓾ ꓔꓱꓹ ꓚꓵˍ ꓟ ꓔꓯ ꓟꓸ ꓖꓶ ꓠꓹ ꓟ ꓐꓱ ꓶ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓕꓯꓽ ꓢꓲ ꓗꓪ ꓢꓲꓽ-ꓫꓬ-ꓟ-ꓦ ꓔꓯ ꓝꓲ ꓩꓴ ꓖꓶ ꓡˍ ꓢꓰꓽ ꓥꓳ= ꓬꓲ ꓪ ꓐꓴ ꓠꓬ ꓢꓲꓽ-ꓫꓬ-ꓟ-ꓦ ꓢꓯꓼ ꓪ ꓗꓪ ꓐꓰ ꓟꓲ ꓠꓯ ꓕꓱ ꓟ ꓗꓪ ꓢꓲ ꓒ ꓐꓰ ꓕꓲ ꓪꓽ ꓔꓬ ꓟꓶˍ ꓥꓳ=

ꓣꓳꓽ ꓠꓬ ꓝꓲ ꓓꓴ ꓐꓴ ꓡꓰ ꓐꓰ ꓢꓲ ꓒ ꓬꓰ-ꓢꓴ ꓔꓯ ꓕꓲ ꓧꓪꓹˍ ꓟꓲ ꓟꓽ ꓟꓳꓻ ꓠꓬꓲ ꓡꓰ= ꓖꓳ ꓡꓱ ꓥˍ ꓟꓲ ꓣꓳ ꓐꓴ ꓥˍ ꓟꓲ ꓝꓲ ꓓꓴ ꓐꓴ ꓡꓰ ꓐꓰ ꓢꓲ ꓒ ꓬꓰ-ꓢꓴ ꓠꓬ ꓣꓳꓽ ꓐꓰ ꓕꓲ ꓪꓽ ꓔꓬ ꓟ ꓙꓵꓽ ꓪ ꓕꓲ ꓡꓰꓹ ꓟꓶˍ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓐꓰ ꓕꓲ ꓪꓽ ꓔꓬ ꓟ ꓡꓰ ꓐꓰ ꓣꓳ ꓐꓰ ꓥˍ ꓟꓲ ꓕꓲ ꓪꓽ ꓔꓬ ꓡꓳ= ꓟꓲ ꓠꓯ ꓡꓳꓹ ꓬꓰˍ ꓗꓪ ꓛꓲ ꓬꓲ ꓠꓬ ꓣꓳ ꓐꓰ ꓕꓲ ꓪꓽ ꓔꓬ ꓥꓳ= ꓝꓮꓲ ꓣꓳ ꓐꓴ ꓠꓬ ꓝꓲ ꓓꓴ ꓐꓴ ꓐꓰ ꓕꓲ ꓡꓰꓹ ꓢꓲꓽ-ꓫꓬ-ꓟ-ꓦ ꓬꓲ ꓐꓲ ꓜꓲꓼˍ ꓟ ꓔꓯ ꓘꓳ ꓣꓴ ꓟꓶˍ ꓡꓳ= ꓕꓱ ꓟ ꓠꓬ ꓣꓳ ꓐꓱ ꓶ ꓙꓲꓻˍ ꓟ ꓥ ꓡꓳ=  ꓮ ꓘꓶꓸ ꓙꓲꓻˍ ꓟ ꓥ ꓡꓳ= ꓖꓳ ꓡꓱ ꓥ ꓟꓲ ꓣꓳ ꓠꓬ ꓕꓱ ꓟ ꓔꓯ ꓟꓽ ꓠꓽ ꓠꓽ ꓟꓷꓼ ꓢꓲꓼ ꓔꓬ ꓠꓬ ꓟꓬꓽ ꓠꓬꓲ ꓙꓲꓻ ꓓꓰ ꓡꓰˍ ꓟ ꓥ ꓡꓳ=

ꓡ ꓠꓹ ꓟ ꓠꓬꓲꓽ ꓠꓽ ꓕꓲ ꓠꓽ ꓢꓲ-ꓒ-ꓦꓬꓼ-ꓠꓬꓲ ꓕꓯ ꓠꓬ ꓗ ꓔꓳ ꓡꓲꓗ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓢꓲꓽ-ꓫꓬ-ꓟ-ꓦ ꓬꓯꓼ ꓡ ꓟ ꓑꓮꓲꓽ ꓔꓯ ꓬꓰˍ ꓥꓳ= ꓕꓱ ꓟ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓐꓯ ꓔꓲꓸ ꓬꓰ ꓟ ꓐꓯ ꓘꓶꓽ ꓐꓲꓻ ꓡꓰ ꓟ ꓚꓲꓸ ꓟꓶ ꓓꓴ ꓑꓮꓲꓽ ꓔꓯ ꓕꓲ ꓘꓳꓼ ꓡꓰ ꓕꓲ ꓘꓳꓼ ꓬꓰ ꓩꓴ ꓡ ꓔꓬ ꓟ ꓑꓮꓲꓽ ꓕꓲ ꓟ ꓥ ꓡꓳ= ꓖꓳ ꓕꓲ ꓠꓬꓲ ꓗꓪ ꓣꓳ ꓐꓴ ꓠꓬ ꓢꓲꓽ-ꓫꓬ-ꓟ-ꓦ ꓝꓲ ꓓꓴ ꓕꓯꓽ ꓢꓲ ꓗꓪ ꓬꓯꓼ ꓡ ꓗꓷ ꓟ ꓐꓰ꓾ ꓮ ꓟꓶ ꓣꓳꓽ ꓠꓬ ꓢꓲꓽ-ꓫꓬ-ꓟ-ꓦ ꓬꓲ ꓦꓬꓼ ꓠꓬꓲ ꓠꓯꓸꓼ ꓗꓪ ꓔꓬ ꓡꓳ ꓐꓯ ꓟ ꓔꓯ ꓓꓵꓽ ꓙꓽ ꓛꓲ ꓔꓬ ꓡꓳ=

ꓢꓲꓽ-ꓫꓬ-ꓟ-ꓦ ꓚꓱꓹ ꓔꓯ ꓠꓬꓲꓸ ꓠꓬꓲ ꓣꓳ ꓓꓵꓽ ꓙ ꓠꓬꓲ ꓡꓯ= ꓢꓲꓽ-ꓫꓬ-ꓟ-ꓦ ꓔꓯ ꓚꓲꓸ ꓛꓬ ꓤꓶꓻ ꓗꓪ ꓟꓬꓽ ꓠꓬꓲ ꓣꓱꓽ ꓝꓲ ꓠꓲꓹ ꓫꓵˍ ꓠꓬ ꓚꓲꓸ ꓛꓬ ꓔꓯ ꓚꓲꓸ ꓛꓬ ꓙꓽ ꓣꓳ ꓠꓲꓹ ꓙꓳ ꓝꓲ ꓠꓯꓹ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓠꓴ ꓔꓯ ꓬꓲ ꓐꓰ ꓬꓲ ꓐꓲ ꓜꓲꓼˍ ꓟ ꓔꓯ ꓘꓳ ꓣꓴ ꓟꓶ ꓡꓰ ꓝꓲ ꓠꓲꓹ ꓫꓵˍ ꓡꓳ ꓐꓯ ꓟ ꓔꓯ ꓙꓵꓻ ꓠꓯꓹ ꓡꓳ=

ꓳꓺ ꓢꓲꓽ-ꓫꓬ-ꓟ-ꓦ ꓪꓴ-ꓢꓺꓳ꓾ ꓥꓪ ꓠꓯꓸꓼ ꓗꓪ ꓬꓯꓼ ꓡꓯ= ꓥꓪ ꓤꓶꓻ ꓠꓯꓸꓼ ꓗꓪ ꓠꓴ ꓔꓬ ꓟ ꓔꓯ ꓥꓪ ꓠꓲꓹ ꓟ ꓡꓱ ꓠꓹ ꓟ ꓬꓰ ꓙ ꓖꓶ ꓡꓯ= ꓢꓲ ꓒ ꓬꓰ-ꓢꓴ ꓡꓰ ꓢꓷꓸ ꓙ ꓟꓳ ꓙ ꓔ ꓟ ꓠꓴ ꓔꓯ ꓥꓪ ꓘꓳ ꓣꓴ ꓐ ꓡ ꓝꓲ= ꓢꓲꓽ-ꓫꓬ-ꓟ-ꓦ꓾ ꓢꓲ ꓒ ꓬꓰ-ꓢꓴ꓾ ꓫꓱꓸ ꓤ ꓠꓲꓹ ꓐꓲ ꓞꓹ ꓢꓴ ꓐꓹ ꓐꓽꓳ꓾ ꓠꓴ ꓔꓯ ꓥꓪ ꓙꓵꓻˍ ꓡꓳ=