ꓢꓲ ꓒ ꓠꓬ ꓣꓳ ꓔꓯ ꓮ ꓫꓵ: ꓐꓱ ꓶ ꓘꓴꓻ ꓔ ꓡ

ꓒꓲ-ꓕꓱ ꓡꓰ ꓢꓲ ꓒ ꓬꓰ-ꓢꓴ ꓔꓯ ꓕꓱ ꓡꓱ ꓐꓯ ꓡꓳ= ꓥꓪ ꓠꓴꓽ ꓠꓬ ꓮ ꓙꓵꓽ ꓡꓱꓸꓼ ꓡꓳꓺ ꓗꓷ ꓢꓲ ꓠꓴ ꓔꓯ ꓛꓳˍ ꓡꓳ꓾ ꓐꓯˍ ꓡꓳ (ꓟ-ꓘꓳ 10ꓽ28)=

ꓕꓲ ꓐꓱ ꓠꓬ ꓬꓲ ꓪ ꓔꓯ ꓙꓳˍ ꓟ ꓮ ꓙꓵꓽ ꓡꓳꓺ ꓗꓷ ꓢꓲ꓾ ꓢꓲ ꓒ ꓬꓰ-ꓢꓴ ꓗ ꓠꓯꓸ ꓛꓳ ꓠꓹ ꓟ ꓘꓴꓻ ꓔ ꓟ ꓟꓶ ꓗꓷꓳ= ꓔꓯ ꓥꓳꓽ꓾ ꓔꓲꓺ ꓒ꓾ ꓔꓲꓺ ꓟ ꓐꓴ ꓠꓬ ꓬꓲ ꓪ ꓮꓽ ꓐ ꓮ ꓟ꓾ ꓮ ꓬꓲꓼ ꓠꓬꓲ ꓤ꓾ ꓖꓴꓽ ꓙꓴꓽ ꓮ ꓙꓵꓽ ꓡꓳꓺ ꓗꓷ ꓢꓲ ꓪꓴ-ꓢ ꓟꓬꓱꓽ ꓬꓰ ꓠꓹ ꓟ ꓘꓴꓻ ꓔ ꓟ ꓟꓶ ꓗꓷꓳ= ꓬꓲ ꓪ ꓮ ꓙꓵꓽ ꓠꓬ ꓚꓲꓸ ꓛꓬ ꓠꓲꓹ ꓡꓶꓽ ꓔꓯ ꓡꓳꓺ ꓗꓷ ꓢꓲ ꓠꓬꓲ ꓢꓲ ꓒ ꓬꓰ-ꓢꓴ ꓗ ꓠꓯꓸ ꓛꓳ ꓫꓱꓽ ꓠꓹ ꓟ ꓘꓴꓻ ꓢꓯꓼ ꓔꓯ ꓓꓽ ꓔꓳꓹ ꓢꓲ ꓢꓲ ꓒ ꓠꓲꓹ ꓡꓶꓽ ꓛꓳ ꓠꓹ ꓟ꓾ ꓚꓵ ꓚꓵ ꓟꓲ ꓠꓯ ꓗꓪ ꓟ ꓮ ꓙꓵꓽ ꓔꓯ ꓡꓳꓺ ꓒꓰꓹ ꓗꓷꓳ= ꓖꓳ ꓡꓱ ꓥ ꓟꓲ꓾ ꓣꓳ ꓮ ꓙꓵꓽ ꓠꓬ ꓚꓲꓸ ꓛꓬ ꓚꓱꓹ ꓗꓪ ꓐꓰ ꓢꓲ ꓒ ꓬꓰ-ꓢꓴ ꓔꓯ ꓛꓳꓻ ꓠꓹ ꓟ ꓐꓱ ꓶ ꓮ ꓙꓵꓽ ꓡꓱꓸꓼ ꓡꓳꓺ ꓗꓷ ꓠꓹ ꓟ ꓣꓳ ꓔꓯ ꓠꓬꓲꓸ ꓠꓬꓲ ꓢꓲ ꓒ ꓡꓰ ꓘꓴꓻ ꓔꓬ ꓡꓳ= ꓮ ꓙꓵꓽ ꓡꓳꓺ ꓗꓷˍ ꓟ ꓗꓪ ꓐꓰ꓾ ꓣꓳ ꓐꓴ ꓠꓬ ꓢꓲ ꓒ ꓬꓰ-ꓢꓴ ꓘ-ꓣꓲ-ꓢ-ꓔꓴ ꓬꓲ ꓠꓲꓹ ꓡꓶꓽ ꓙꓳˍ ꓟ ꓡꓰ ꓣꓳ ꓠꓲꓹ ꓡꓶꓽ ꓐꓰ ꓣꓳ ꓠꓲꓹ ꓫꓵˍ ꓟ ꓔꓯ ꓮ ꓙꓵꓽ ꓡꓱꓸꓼ ꓡꓳꓺ ꓗꓷ ꓠꓹ ꓟ ꓐꓱ ꓶ ꓣꓳ ꓔꓯ ꓘꓴꓻ ꓔꓬ ꓡꓳ= ꓕꓱ ꓟ ꓠꓬ ꓮ ꓟꓬꓹ ꓚꓱꓹ ꓗꓪ ꓐꓰ ꓣꓱꓽ ꓬꓰ ꓐ ꓡˍ ꓥ ꓟꓲ꓾ ꓡꓳꓹ ꓬꓰˍ ꓕꓯ ꓮ ꓙꓵꓽ ꓡꓳꓺ ꓗꓷ ꓠꓹ ꓟ ꓐꓱ ꓶ ꓮ ꓕꓯ ꓟꓲ ꓓꓰꓽ ꓔꓬ ꓡꓳ=

ꓕꓱ ꓗꓪ ꓣꓳ ꓐꓱ ꓶ ꓙꓲꓻˍꓟ ꓓꓳꓽ ꓠꓬ꓾ “ꓮ ꓙꓵꓽ ꓡꓱꓸꓼ ꓡꓳꓺ ꓗꓷ ꓐꓯ ꓟ ꓠꓬ” ꓣꓳ ꓤꓶꓻ ꓗꓪ ꓣꓳ ꓚꓲꓸ ꓛꓬ ꓐꓱ ꓶˍ ꓡꓰꓽ ꓓꓵꓽ ꓙˍ ꓟ ꓐꓰ ꓣꓳ ꓠꓲꓹ ꓫꓵˍ ꓟ ꓔꓯ ꓡꓰꓽ ꓬꓰ ꓫꓵˍ ꓟ ꓠꓲꓹ ꓟ꓾ ꓣꓳ ꓠꓲꓹ ꓡꓶꓽ ꓔꓯ ꓡꓳꓺ ꓗꓷ ꓠꓹ ꓟ ꓔꓯ ꓐꓯ ꓖꓶ ꓡ ꓔꓬ ꓟ ꓥ ꓡꓳ= ꓣꓳ ꓐꓱ ꓶ ꓟꓬꓽ ꓠꓬꓲ ꓙꓲˍ ꓟ ꓓꓳꓽ ꓠꓬ꓾ ꓣꓳ ꓐꓱ ꓶ ꓪꓴ-ꓢ ꓡꓰ ꓝꓰ ꓔ ꓖꓶˍ ꓟ ꓢꓯꓼ ꓟꓬ ꓠꓬ꓾ ꓣꓳ ꓓꓵꓽ ꓙ ꓫꓪꓸ ꓠꓬꓲ ꓐ ꓡˍ ꓟ ꓕꓯꓽ ꓢꓲ ꓮ ꓟꓬꓹ ꓙꓲˍ ꓡꓳ꓾ ꓐꓯ ꓟ ꓥ ꓡꓳ= ꓖꓳ ꓟ ꓑꓶꓸ ꓓꓴ ꓣꓳ ꓠꓲꓹ ꓡꓶꓽ ꓐꓰ ꓣꓳ ꓓꓵꓽ ꓙ ꓔ ꓟ ꓔꓯ ꓡꓰꓽ ꓬꓰˍ ꓟ ꓔꓯ ꓠꓽ ꓗꓷ ꓡꓳꓺ ꓗꓷ ꓢꓲ꓾ ꓣꓳ ꓐꓴ ꓠꓬ ꓚꓵ ꓚꓵ ꓪꓴ-ꓢ ꓬꓲ ꓐꓲ ꓜꓲꓼˍ ꓟ ꓚꓱꓹ ꓗꓪ ꓛꓳ ꓫꓱꓽ ꓠꓹ ꓟ ꓐꓱ ꓶ ꓐꓯ ꓖꓶ ꓡ ꓔꓬ ꓟ ꓥ ꓡꓳ=

ꓣꓳ ꓠꓬ ꓣꓳꓽ ꓤꓶꓻ ꓠꓯꓸꓼ ꓗꓪ ꓕꓲ ꓠꓬꓲ ꓕꓲ ꓠꓬꓲ ꓞꓳ ꓙꓳ ꓔꓬ ꓕꓯ ꓢꓲ ꓒ ꓠꓲꓹ ꓡꓶꓽ ꓔꓯ ꓮ ꓫꓵꓽ ꓑꓶꓸ ꓓꓴ ꓧꓪ ꓠꓲꓹ ꓟꓽ ꓫꓵ ꓡ? ꓣꓳꓽ ꓠꓬ ꓢꓲ ꓒ ꓐꓰ ꓬꓲ ꓐꓲ ꓜꓲꓼˍ ꓟ ꓚꓱꓹ ꓔꓯ ꓮ ꓫꓵꓽ ꓑꓶꓸ ꓓꓴ ꓣꓱꓽ ꓙ ꓠꓲꓹ ꓟꓽ ꓫꓵ ꓡ? ꓣꓳ ꓠꓬ ꓢꓲ ꓒ ꓠꓲꓹ ꓡꓶꓽ ꓔꓯ ꓛꓳ ꓫꓱꓽˍ ꓟ ꓗꓪ꓾ ꓣꓳ ꓠꓬ ꓣꓳ ꓕꓲ ꓦꓲ ꓢꓴ ꓐꓱ ꓶ ꓬꓰ ꓔꓬ ꓡꓳ ꓐꓰ ꓘꓳ ꓣꓴ ꓐ ꓡˍ ꓡꓳ= ꓣꓳ ꓚꓲꓸ ꓛꓬ ꓕꓲ ꓦꓲꓻ ꓢꓴ ꓐꓱ ꓶ ꓕꓲ ꓙꓰꓽ ꓙꓰꓽ ꓬꓰ ꓖꓶˍ ꓕꓯ ꓣꓳꓽ ꓠꓬ ꓠꓵꓻ ꓠꓲꓹ ꓒ ꓐꓲꓻ ꓬꓰ ꓖꓶˍ ꓡꓳ= ꓖꓳ ꓟ ꓡꓰ ꓐꓰ ꓪꓴ-ꓢ ꓐꓱ ꓶ ꓣꓳ ꓣꓱꓽ ꓙˍ ꓕꓯ ꓥˍ ꓟꓲ ꓣꓳ ꓕꓲ ꓦꓲꓻ ꓢꓴ ꓐꓱ ꓶ ꓬꓰ ꓔꓬ ꓟ ꓡꓰ ꓐꓰ ꓘꓳ ꓣꓴ ꓠ ꓗꓹ ꓡꓳ= ꓣꓳꓽ ꓠꓯꓸꓼ ꓗꓪ ꓕꓲ ꓐꓱ ꓠꓬ ꓦꓲꓻ ꓕꓴꓽ ꓗꓪ ꓕꓴꓽ ꓢꓲ ꓚꓲꓸ ꓛꓬ ꓦꓲꓻ ꓢꓴ ꓐꓱ ꓶ꓾ ꓤ ꓫꓵꓸ ꓤ ꓠꓱ ꓐꓱ ꓶ ꓬꓲ ꓪ ꓠꓵꓻ ꓠꓲꓹ ꓡꓰ ꓣꓱꓽ ꓙˍ ꓟ ꓚꓱꓹ ꓗꓪ ꓐꓰ ꓪꓴ-ꓢ ꓠꓲꓹ ꓡꓶꓽ ꓔꓯ ꓛꓳ ꓠꓹ ꓟ ꓘꓴꓻ ꓔ ꓟ ꓟꓶ ꓗꓷꓳ= ꓕꓲ ꓐꓱ ꓠꓬ ꓪꓴ-ꓢ ꓐꓱ ꓶ ꓮ ꓔꓲꓸ ꓤ ꓡꓰꓽ ꓣꓱꓽ ꓙ ꓗꓷ ꓟ ꓐꓰ ꓮ ꓔꓲꓸ ꓤ ꓟ ꓠꓵꓻ ꓠꓲꓹ ꓠꓯꓸꓼ ꓗꓪ ꓗꓹ ꓛꓲꓽ ꓓꓴ ꓔꓯ ꓟꓶ ꓠꓹ ꓟ ꓢꓯꓼ ꓕꓵꓼˍ ꓠꓹ ꓟ ꓘꓴꓻ ꓔ ꓟ ꓟꓶ ꓗꓷꓳ= ꓕꓲ ꓐꓱ ꓐꓱ ꓶ ꓠꓬ꓾ ꓢꓲ ꓒ ꓬꓲ ꓠꓲꓹ ꓡꓶꓽ ꓔꓯ ꓧꓪ ꓠꓹ ꓟ ꓐꓱ ꓶ ꓚꓲꓸ ꓛꓬ ꓤꓶꓻ ꓠꓯꓸꓼ ꓗꓪ ꓙꓳˍ ꓟ ꓮ ꓙꓵꓽ ꓔꓯ ꓡꓳꓺ ꓗꓷ ꓠꓹ ꓟ ꓘꓴꓻ ꓔ ꓟ ꓟꓶ ꓗꓷꓳ= ꓮ ꓡꓲ ꓫꓵꓽ ꓚꓱꓹ ꓗꓪ ꓐꓰ ꓣꓳ ꓔꓯ ꓘꓴꓻ ꓔ ꓥˍ ꓟꓲ ꓪꓴ-ꓢ ꓬꓲ ꓠꓲꓹ ꓡꓶꓽ ꓔꓯ ꓣꓳ ꓠꓬ ꓘꓳꓹ ꓣꓴ ꓒꓵꓽˍ ꓡꓳ=

ꓠꓴ ꓐꓰ ꓥꓪ ꓠꓬ ꓢꓲ ꓒ ꓬꓰ-ꓢꓴ ꓡꓰ ꓮ ꓫꓵꓽ ꓓꓰꓽ ꓡˍ ꓥ ꓟꓲ꓾ ꓮ ꓫꓵꓽ ꓬꓰ ꓝꓲ ꓡˍ ꓥ ꓟꓲ꓾ ꓢꓲ ꓒ ꓬꓰ-ꓢꓴ ꓔꓯ “ꓥꓪ ꓬꓰˍ ꓥꓳ” ꓐꓰ ꓒꓳꓹ ꓖꓶ ꓠꓹ ꓟ ꓠꓴ ꓐꓰ ꓥꓪ ꓠꓬ ꓮ ꓟꓬ ꓛꓲ ꓠꓲꓹ ꓡꓶꓽ ꓙꓳˍ ꓡ꓾ ꓮ ꓡꓲ ꓟꓬ ꓛꓲ ꓙꓽ ꓖꓶ ꓔ ꓡ ꓐꓯ ꓟ ꓔꓯ ꓠꓬꓲꓸ ꓠꓬꓲ ꓗꓪ ꓓꓵꓽ ꓙꓽ ꓠꓬꓲ ꓡꓯ= ꓢꓲ ꓒ ꓡꓰ ꓣꓳꓽ ꓔꓯ ꓟꓽ ꓖꓴ ꓟꓸ ꓖꓶ ꓗꓷ ꓢꓰꓽ ꓟ꓾ ꓟꓽ ꓓꓰꓽ ꓗꓷ ꓢꓰꓽ ꓟ ꓬꓲ ꓠꓲꓹ ꓡꓶ ꓐꓱ ꓶ ꓥˍ ꓟꓲ “ꓥꓪ ꓬꓰˍ ꓥꓳ” ꓐꓰ ꓒꓳꓹ ꓖꓶ ꓠꓹ ꓟ ꓠꓲꓹ ꓡꓶꓽ ꓙꓳˍ ꓡ? ꓐꓯ ꓟ ꓔꓯ ꓥˍ ꓟꓲ ꓓꓵꓽ ꓙ ꓠꓬꓲ ꓡꓯ= ꓟꓲ ꓕꓯ ꓢꓲ ꓟ ꓤꓶꓻ ꓗꓪ ꓣꓳ ꓔꓳꓹ ꓜꓳꓽ ꓠ ꓔ ꓟ ꓮ ꓫꓵꓽ ꓔꓯ ꓥˍ ꓟꓲ “ꓬꓰꓢ” ꓐꓰ ꓐꓯ ꓡꓯ= ꓖꓳ ꓡꓱ ꓠꓬ ꓢꓲ ꓒ ꓪꓴ-ꓢ ꓡꓰ ꓣꓳ ꓔꓯ ꓣꓱꓽ ꓛꓰꓽ ꓵꓻ ꓖꓴ ꓟꓽ ꓓꓻ ꓓꓻ ꓡꓴꓽ ꓖꓶ ꓡˍ ꓥꓳ= ꓮ ꓟꓶ ꓕꓲ ꓤꓶꓻ ꓗꓪ ꓥˍ ꓟꓲ ꓕꓲ ꓦꓬ ꓝꓸ꓾ ꓡ ꓠꓹ ꓟ ꓤꓶꓻ ꓗꓪˍ ꓟꓲ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓟꓶˍ ꓥꓳ=