"ꓢꓲ-ꓢ ꓔꓯ ꓟ ꓢꓲ-ꓢ ꓔꓯ ꓖꓶꓽ꓾ ꓪꓴ-ꓢ ꓔꓯ ꓟ ꓪꓴ-ꓢ ꓔꓯ ꓖꓶ"

(ꓟ-ꓘꓳ 12ꓽ14-15) ꓒ-ꓡꓲ-ꓢꓷ ꓐꓴˍ ꓐꓰ ꓩꓴ-ꓡꓲ ꓕꓲ ꓧꓳꓽ ꓟ ꓛꓲ ꓡ ꓠꓬ ꓬꓲ ꓔꓯ꓾ ꓟꓸ ꓒꓽꓳ꓾ ꓠꓴ ꓠꓽ ꓞꓳ ꓔꓱꓹ ꓥ ꓟ ꓐꓰ꓾ ꓮꓽ ꓟ ꓔꓯˍ ꓟꓲ ꓞꓳ ꓒꓬꓱꓽ ꓟꓽ ꓢꓲ ꓢꓲ꓾ ꓔꓱꓹ ꓔꓱꓹꓼ ꓐꓰ ꓪꓴ-ꓢ ꓙ ꓖꓴ ꓟꓸ ꓖꓶˍ ꓟ ꓥꓪ ꓠꓴꓽ ꓢꓷꓸˍ ꓡꓳ꓿ ꓢꓲ-ꓢ ꓔꓯ ꓝꓲꓸ ꓒꓴ ꓓꓳ ꓓ ꓡ?꓾ ꓟꓽ ꓓ ꓡ? ꓥꓪ ꓠꓴꓽ ꓝꓲꓸ ꓒꓴ ꓓꓳ ꓠꓯꓹ ꓡ?꓾ ꓕꓽ ꓓꓳ ꓠꓯꓹ ꓡ?꓾ ꓐꓰ ꓠ ꓠꓬꓲˍ ꓡꓳ꓿ ꓬꓲ ꓠꓽ ꓬꓲ ꓪꓽ ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽˍ ꓟ ꓢꓷꓸˍ ꓠꓬꓲ꓾ ꓠꓴ ꓪꓽ ꓮꓸ ꓫꓵ ꓪꓴꓸ ꓠꓬꓲ ꓥꓪ ꓔꓯ ꓫꓵꓽ ꓠꓬꓲˍ ꓡ? ꓓꓲ-ꓠ-ꓣꓲ ꓕꓲ ꓒꓯꓼ ꓥꓪ ꓔꓯ ꓔꓯꓹ ꓖꓶ ꓡꓯ꓾ ꓐꓯˍ ꓡꓳ꓿

ꓬꓲ ꓪ ꓛꓲ ꓡ ꓠꓬ ꓬꓲ ꓔꓯ꓾ ꓟꓸ ꓒꓽꓳ꓾ ꓠꓴ ꓠꓽ ꓞꓳ ꓔꓱꓹ ꓥ ꓟˍ ꓐꓰ꓾ ꓮꓽ ꓟ ꓔꓯˍ ꓟꓲ ꓞꓳ ꓒꓬꓱꓽ ꓟꓽ ꓢꓲ ꓢꓲ꓾ ꓔꓱꓹ ꓔꓱꓹˍ ꓐꓰ ꓪꓴ-ꓢ ꓙ ꓖꓴ ꓟꓸ ꓖꓶˍ ꓟ ꓥꓪ ꓠꓴꓽ ꓢꓷꓸˍ ꓡꓳ= ꓢꓲ-ꓢ ꓔꓯ ꓝꓲꓸ ꓒꓴ ꓓꓳˍ ꓟ ꓠꓬ ꓜꓳꓽˍ ꓡ? ꓥꓪ ꓠꓴꓽ ꓝꓲꓸ ꓒꓴ ꓓꓳ ꓠꓯꓹ ꓡ꓾ ꓕꓽ ꓓꓳ ꓠꓯꓹ ꓡ? ꓐꓰ ꓠ ꓠꓬꓲˍ ꓡꓳ= ꓬꓲ ꓠꓽ ꓬꓲ ꓪ ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽˍ ꓟ ꓢꓷꓸˍ ꓠꓬꓲ꓾ ꓠꓴ ꓪ ꓮ ꓵꓽ ꓪꓴꓸ ꓠꓬꓲ ꓥꓪ ꓔꓯ ꓫꓵꓽ ꓠꓬꓲˍ ꓡ? ꓓꓲ-ꓠ-ꓣꓲ ꓕꓲ ꓒꓯꓼ ꓥꓪ ꓔꓯ ꓔꓯꓹ ꓖꓶ ꓡꓯ꓾ ꓐꓯˍ ꓡꓳ=

ꓒ-ꓡꓲ-ꓢꓷ ꓐꓴ ꓐꓰ ꓩꓴ-ꓡꓲ ꓕꓲ ꓧꓳꓽ ꓐꓴ ꓠꓬ ꓢꓲ ꓒ ꓔꓯ ꓬꓲ ꓐꓯ ꓘꓶꓽ ꓗꓪ ꓐꓰ ꓪꓴꓻ ꓡꓰ ꓠꓹ ꓟ ꓐꓱ ꓶ ꓬꓰ-ꓢꓴ ꓔꓯ ꓫꓵꓽ ꓠꓬꓲˍ ꓡꓳ= ꓬꓲ ꓪ ꓐꓴ ꓠꓬ ꓠꓱꓸ ꓐꓯ ꓢꓴ ꓝꓴꓲꓸ ꓧꓪˍ ꓟ ꓗꓪ ꓗꓹ ꓛꓲˍ ꓡꓳ= ꓬꓲ ꓪ ꓠꓬ ꓬꓲ ꓪ ꓚꓲꓸ ꓛꓬ ꓐꓱ ꓶˍ ꓡꓰꓽ ꓔꓱꓹ ꓚꓵ ꓢꓴ ꓥ ꓢꓲ꓾ ꓦꓻ ꓚꓬꓴꓸ ꓟꓶ ꓠꓹ ꓟ ꓐꓱ ꓶ ꓖꓳ ꓟꓬ ꓟꓽ ꓢꓯꓼ ꓕꓵꓼ= ꓖꓳ ꓡꓱ ꓠꓬ ꓬꓲ ꓪ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓝꓴꓲꓸ ꓧꓪ ꓠꓹ ꓐꓱ ꓶ ꓕꓱ ꓡꓱ ꓠꓺ ꓠꓬꓲ ꓗꓷ ꓟ ꓥ ꓡꓳ= ꓢꓲ-ꓢ ꓔꓯ ꓝꓲꓸ ꓒꓴ ꓐꓶˍ ꓟ ꓔꓯ ꓢꓲ ꓒ ꓠꓬ ꓟꓽ ꓠꓲꓹ ꓒꓴ ꓓꓴ ꓥꓳ ꓐꓰ ꓓꓵꓽ ꓙ ꓢꓲ꓾ ꓬꓲ ꓪ ꓠꓬ ꓬꓰ-ꓢꓴ ꓔꓬ ꓗꓪ ꓡˍ ꓡꓳ= ꓬꓲ ꓪ ꓓꓵꓽ ꓙ ꓔ ꓟ ꓡꓰ ꓥ ꓕꓯ ꓠꓽ ꓬꓲ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓙꓵꓽ ꓪ ꓙꓳ ꓢꓴ ꓐꓴ ꓔꓯ ꓡꓯꓼ ꓙꓱ ꓗꓷ ꓠꓹ ꓟ ꓥ ꓡꓳ= ꓬꓲ ꓪ ꓠꓬ ꓮ ꓡꓲ ꓕꓲ ꓫꓵꓽ ꓠꓬ ꓙꓲꓻˍ ꓡ ꓐꓯ ꓟ ꓔꓯ ꓟꓽ ꓓꓵꓽ ꓙ= ꓬꓲ ꓪ ꓠꓬ ꓣꓳ ꓢꓲ ꓒ ꓔꓯ ꓬꓲ ꓐꓯ ꓘꓶꓽ ꓗꓪ ꓐꓰ ꓪꓴꓻ ꓡꓰ ꓝꓲ ꓠꓹ ꓟ ꓡꓰꓽ ꓓꓵꓽ ꓙˍ ꓡꓳ= ꓢꓲ-ꓢ ꓐꓬꓱꓽ ꓠꓷꓼ ꓓꓹ ꓟ ꓒꓵ ꓒꓬꓸ ꓔꓯ ꓬꓰ-ꓢꓴ ꓔꓬ ꓗꓪ ꓔꓯꓹ ꓡ ꓕꓯ꓾ ꓢꓲ ꓒ ꓬꓰ-ꓢꓴ ꓠꓬ ꓢꓷꓸ ꓠꓲꓹ ꓙꓳ ꓙꓳ ꓡꓰꓽ ꓒꓳꓹ ꓖꓶˍ ꓡꓳ= “ꓢꓲ-ꓢ ꓔꓯ ꓟ ꓢꓲ-ꓢ ꓔꓯ ꓖꓶ= ꓪꓴ-ꓢ ꓔꓯ ꓟ ꓪꓴ-ꓢ ꓔꓯ ꓖꓶ” ꓐꓰ ꓒꓳꓹ ꓖꓶˍ ꓡꓳ=

ꓒ-ꓡꓲ-ꓢꓷ ꓐꓴ ꓐꓰ ꓙꓵꓽ ꓗ ꓟꓸ ꓒ ꓐꓴ ꓠꓬ꓾ ꓖꓳꓼ ꓠꓲꓹ ꓗꓪ ꓐꓰ ꓟꓽ ꓥ ꓥ꓾ ꓙꓽ ꓣꓳ ꓠꓲꓹ ꓐꓰ ꓠꓲꓹ ꓔꓱꓹ ꓠꓲꓹ ꓗꓪ ꓐꓰ ꓢꓲ ꓒ ꓔꓬ ꓗꓪ ꓡˍ ꓕꓯ ꓠꓽ꓾ ꓬꓲ ꓒꓳꓹ ꓖꓶ ꓘꓶꓽ ꓠꓬ ꓝꓮꓲ ꓕꓲ ꓚꓱꓹˍ ꓟꓲ ꓥ ꓗꓴꓸˍ ꓥꓳ= ꓖꓳ ꓡꓱ ꓥˍ ꓟꓲ ꓬꓲ ꓪ ꓠꓬ ꓢꓲ ꓒ ꓔꓯ ꓠꓸ ꓣꓴ ꓠꓹ ꓟ ꓐꓱ ꓶ ꓐꓬ ꓡꓰ ꓝꓲ ꓠꓹ ꓟ ꓐꓱ ꓶ ꓡˍ ꓟ ꓑꓶꓸ ꓓꓴ꓾ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓪ ꓔꓯ ꓢꓷꓸ ꓠꓲꓹ ꓙꓳ ꓙꓳ ꓡꓰꓽ ꓒꓳꓹ ꓖꓶ ꓗꓷ ꓟ ꓥ ꓡꓳ= ꓬꓲ ꓠꓬ ꓝꓲꓸ ꓒꓴ ꓐꓶꓻ ꓠꓹ ꓟ ꓔꓯ ꓠꓲꓹ ꓒꓴˍ ꓟ ꓟꓲ ꓟꓽ ꓟꓳꓸ ꓖꓶ꓾ ꓖꓳ ꓟ ꓔꓯ ꓟꓽ ꓠꓲꓹ ꓒꓴ ꓐꓰˍ ꓟꓲ ꓬꓲ ꓟꓽ ꓐꓯ= ꓖꓳ ꓡꓱ ꓠꓬꓲ꓾ ꓢꓲꓽ ꓫꓬ ꓕꓳꓽ ꓶ ꓡꓳꓹ ꓬꓰˍ ꓟ ꓗꓪ ꓕꓱ ꓡꓱ ꓐꓯ ꓔ ꓡꓳ꓾ “ꓖꓳ ꓡꓱ ꓠꓬ ꓬꓲ ꓪ ꓠꓽ ꓬꓲ ꓔꓯ ꓮ ꓘꓶꓸ ꓓꓵꓽ ꓙ ꓟꓶ ꓡꓰꓳ” ꓐꓰ ꓐꓯ ꓔ ꓡꓳ= ꓓꓵꓽ ꓙ ꓟꓶˍ ꓟ ꓠꓬ ꓔꓱꓹ ꓜꓳꓽˍ ꓟ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓙꓵꓽ ꓗ ꓟꓸ ꓑ ꓐꓴ ꓐꓰ ꓒ-ꓡꓲ-ꓢꓷ ꓐꓴ ꓗꓪ ꓐꓰ ꓣꓳ ꓠꓬ ꓢꓳ ꓣꓴ ꓐ ꓡˍ ꓡꓳ= ꓣꓳ ꓐꓴ ꓠꓬ ꓪꓴ-ꓢ ꓬꓲ ꓙꓽ ꓗꓴꓸ ꓠꓲꓹ ꓔꓯ ꓒꓬꓱꓽ ꓔꓳꓹ ꓟꓬ ꓔꓳꓹ ꓟꓳꓻ ꓪˍ ꓕꓯ꓾ ꓣꓳ ꓐꓴ ꓠꓬ ꓓꓵꓽ ꓙ ꓟꓶ ꓠ ꓗꓹ ꓡꓳ=

ꓥ ꓡꓳ꓾ ꓬꓲ ꓪ ꓔꓳꓹ ꓜꓳꓽ ꓔꓬ ꓟ ꓓꓵꓽ ꓙ ꓟꓶˍ ꓟ ꓠꓬ ꓬꓲ ꓪ ꓡꓰ ꓟꓽ ꓔꓱꓹ ꓟꓽ ꓜꓳꓽ ꓢꓲ ꓒ ꓔꓯ ꓠꓸ ꓣꓴ ꓡˍ ꓟ ꓔꓯ꓾ ꓬꓰ-ꓢꓴ ꓡꓰ ꓐꓯ ꓧꓪꓸ ꓡꓰ ꓟ ꓑꓶꓸ ꓓꓴ ꓥ ꓡꓳ= ꓖꓳ ꓡꓱ ꓥ ꓠꓬꓲ ꓪꓴ-ꓢ ꓬꓲ ꓙꓽ ꓜꓲꓼ ꓢꓷꓸ ꓠꓲꓹ ꓔꓯ ꓮ ꓕꓯˍ ꓥ ꓟꓲ ꓧꓪꓸ ꓡꓰ ꓟꓽ ꓐ ꓡ ꓐꓯ ꓟ ꓔꓯ ꓟꓸ ꓟꓲꓽ ꓕꓱ ꓟ ꓗꓪ ꓐꓰ ꓣꓳ ꓢꓳ ꓣꓴ ꓠ ꓗꓹ ꓡꓳ= ꓪꓴ-ꓢ ꓬꓲ ꓙꓽ ꓗꓴꓸ ꓠꓲꓹ ꓠꓬ ꓟꓶˍ ꓟ ꓔꓯ ꓚꓵꓺ ꓔ ꓢꓲ꓾ ꓥꓶˍ ꓟ ꓗ ꓠꓯꓸ ꓢꓲ ꓗꓪ ꓚꓵꓺ ꓔ ꓟ ꓟꓬ ꓔꓳꓹˍ ꓟ ꓔꓯ ꓖꓴ ꓟꓸ ꓖꓶˍ ꓡꓳ= ꓥ ꓡꓳ꓾ ꓙꓵꓽ ꓗ ꓟꓸ ꓒ ꓐꓰ ꓒ-ꓡꓲ-ꓢꓷ ꓐꓴ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓟꓬ ꓔꓳꓹˍ ꓟ ꓑꓶꓸ ꓓꓴ ꓬꓲ ꓪ ꓠꓬ ꓢꓲ ꓒ ꓔꓯ ꓮ ꓕꓯˍ ꓟꓲ ꓝꓴꓲꓸ ꓓꓰꓺˍ ꓡꓳ= ꓢꓲ ꓒ ꓐꓯ ꓘꓶꓽ ꓠꓯꓸꓼ ꓗꓪ ꓠꓸ ꓣꓴ ꓠꓹ ꓟ ꓮ ꓕꓯ ꓟꓲ ꓬꓲ ꓚꓱꓹ ꓧꓪˍ ꓡꓳ=

ꓣꓳ ꓤꓶꓻ ꓗꓪ ꓥˍ ꓟꓲ꓾ ꓣꓳ ꓐꓯ ꓘꓶꓽ ꓗꓪ ꓐꓰ ꓠꓸ ꓣꓴ ꓡˍ ꓟ ꓫꓵꓽ ꓪꓴ ꓔꓳꓹ ꓜꓳꓽ ꓠꓬꓲˍ ꓟ ꓙꓳˍ ꓡ? ꓟꓽ ꓥ ꓠꓬ ꓠꓱꓸ ꓐꓯ ꓢꓴ ꓕꓲ ꓣꓳ ꓡꓰ ꓗꓸ ꓧꓪ ꓡˍ ꓟ ꓔꓳꓹ ꓜꓳꓽ ꓠꓬꓲˍ ꓡ? ꓣꓳ ꓙꓵꓻ ꓠꓲꓹ ꓐꓰ ꓗꓴꓸ ꓙꓲꓽ ꓙꓳ ꓢꓲ ꓢꓴ ꓡꓰ ꓒꓳꓹ ꓔꓳꓹ ꓟ ꓔꓳꓹ ꓜꓳꓽ ꓠꓬꓲˍ ꓡ꓾ ꓟꓽ ꓥ ꓠꓬ꓾ ꓣꓳ ꓔꓱꓹ ꓜꓳꓽˍ ꓟ ꓐꓰ ꓗꓴꓸ ꓙꓲ ꓙꓳ ꓢꓲ ꓢꓴ ꓔꓯ ꓠꓺ ꓠꓬꓲ ꓠꓬꓲˍ ꓡ? ꓟꓬꓽ ꓠꓬꓲ ꓠꓬ꓾ ꓣꓳ ꓠꓬ ꓣꓳ ꓙꓵꓻ ꓠꓲꓹ ꓠꓯꓸꓼ ꓗꓪ ꓕꓶ ꓕꓶ ꓡꓰ ꓞꓳ ꓙꓳ ꓔꓬ ꓕꓯ ꓠꓽ ꓠꓱꓸ ꓐꓯ ꓢꓴ ꓡꓰ ꓣꓳ ꓔꓯ ꓙꓵꓻ ꓠꓲꓹ ꓔꓯ ꓟꓳꓸ ꓗꓸ ꓧꓪ ꓡ ꓛꓴꓽ ꓙꓳ ꓡˍ ꓟ ꓔꓯ ꓣꓳ ꓔꓳꓹ ꓜꓳꓽ ꓠꓬꓲˍ ꓥꓳ=  ꓠꓯꓸˍ ꓟ ꓙꓵꓻ ꓠꓲꓹ ꓐꓰ ꓙꓽ ꓗꓴꓸ ꓠꓲꓹ ꓣꓱꓽ ꓛꓰꓽ ꓟꓽ ꓙꓳ ꓢꓴ ꓐꓱ ꓶ ꓠꓬ꓾ ꓕꓱ ꓡꓱ ꓛꓴꓽ ꓙꓳ ꓡ ꓗꓸ ꓧꓪ ꓡˍ ꓕꓯ꓾ ꓠꓲꓹ ꓟ ꓓꓵꓽ ꓙ ꓪꓴꓸ ꓧꓶ ꓡꓰ ꓗꓴꓸˍ ꓡꓳ= ꓕꓲ ꓖ ꓕꓲ ꓧꓪꓹ ꓮ ꓡꓲ ꓒꓳꓹ ꓖꓶ ꓠꓯꓹ ꓡ ꓐꓯˍ ꓟ ꓔꓯˍ ꓟꓲ ꓟꓽ ꓢꓷꓸ ꓗꓷ ꓡꓰ ꓗꓴꓸˍ ꓡꓳ= ꓣꓳ ꓕꓯ ꓣꓳ ꓮ ꓡꓲ ꓬꓰˍ ꓠꓯꓹ ꓡ? ꓪꓴ-ꓢ ꓔꓯ ꓟꓽ ꓙꓵꓻ ꓢꓴ꓾ ꓮ ꓟ ꓔꓯ ꓥˍ ꓟꓲ ꓟꓼ ꓦꓻ ꓡꓱ ꓢꓴ ꓮ ꓟꓬꓹ ꓟꓬꓽ ꓡ ꓔꓬ ꓟ ꓟꓲ ꓠꓯ ꓕꓱ ꓟ ꓗꓪ꓾ ꓣꓳ ꓮ ꓙꓵꓽ ꓔꓳꓹ ꓜꓳꓽ ꓠ ꓔ ꓟ ꓬꓲ ꓚꓱꓹ ꓐꓰ ꓣꓳ ꓔꓯ ꓫꓵꓽ ꓠꓬꓲ ꓤꓹ ꓠꓬꓲ ꓡˍ ꓟ ꓐꓱ ꓶ  ꓕꓲ ꓟˍ ꓟ ꓒꓳꓹ ꓖꓶ ꓓꓴ ꓠꓬ ꓢꓲꓽ ꓫꓬˍ ꓟ ꓙꓽ ꓗꓴꓸ ꓠꓲꓹ ꓗꓪ ꓐꓰ ꓓꓳꓻ ꓡˍ ꓟ ꓒꓳꓹ ꓖꓶ ꓓꓴ ꓥ ꓡꓳ= ꓣꓳ ꓚꓲꓸ ꓛꓬ ꓠꓬ ꓕꓱ ꓟ ꓔꓯ ꓫꓬꓹ ꓔꓱꓹ ꓠꓹ ꓟ ꓐꓱ ꓶ ꓣꓳ ꓢꓷꓸ ꓠꓲꓹ ꓟꓽ ꓐꓲ ꓜꓲꓼ= ꓖꓳ ꓟ ꓑꓶꓸ ꓓꓴ ꓣꓳ ꓬꓰ ꓠ ꓔ ꓟ ꓕꓲ ꓙꓰꓽ ꓠꓬ ꓪꓴ-ꓢ ꓬꓲ ꓙꓽ ꓗꓴꓸ ꓠꓲꓹ ꓔꓯ ꓮ ꓕꓯ ꓟꓲ ꓓꓰꓽ ꓠꓹ ꓟ ꓥ ꓡꓳ=

ꓪꓽ ꓘꓴˍ ꓟ ꓐꓰ ꓪꓴ-ꓢ ꓚꓱꓹ ꓢꓳ ꓣꓴˍ ꓟ ꓗꓪ ꓐꓰ ꓣꓳ ꓐꓴ ꓠꓬ꓾ ꓪꓴ-ꓢ ꓗꓪ ꓐꓰ ꓙꓽ ꓗꓴꓸ ꓠꓲꓹ ꓟꓶ ꓡˍ ꓡꓳ= ꓣꓳ ꓪꓴꓽ ꓘꓴˍ ꓟ ꓠ ꓢꓲꓽ ꓫꓬꓹˍ ꓟ ꓔꓱꓹ ꓚꓵˍ ꓟ ꓔꓯ ꓡꓰꓽ ꓟꓸ ꓖꓶ ꓔꓬ ꓟ ꓪꓴ-ꓢ ꓬꓲ ꓢꓯꓼ ꓔꓯ ꓫꓬꓽ ꓫꓬꓽ ꓡꓰꓽ ꓑ ꓙꓽ ꓠꓹ ꓟ ꓣꓳ ꓠꓲꓹ ꓟ ꓔꓯ ꓒꓴ ꓖꓶˍ ꓡꓳ= ꓟꓬꓽ ꓠꓬꓲ ꓢꓲꓽ ꓫꓬ ꓕꓳꓽ ꓶ ꓔꓯ ꓢꓳ ꓣꓴˍ ꓟ꓾ ꓘꓴ ꓜꓲꓼ ꓞꓳ ꓟꓸ ꓖꓶˍ ꓟ ꓐꓰ ꓢꓲꓽ ꓫꓬ ꓢꓴ ꓐꓴ ꓬꓲ ꓪ ꓞꓳ ꓙꓳ ꓗꓷ ꓟ ꓔꓯ ꓢꓳ ꓣꓴˍ ꓟ ꓠꓬ꓾ ꓪꓴ-ꓢ ꓬꓲ ꓢꓯꓼ ꓔꓯ ꓫꓬꓽ ꓫꓬꓽ ꓢꓲꓽ ꓢꓲꓽ ꓡꓰꓽ ꓑ ꓙꓽ ꓠꓹ ꓟ ꓐꓰ꓾ ꓣꓳ ꓐꓴ ꓔꓯ ꓠꓬꓲꓸ ꓞꓰꓻ ꓠꓹ ꓟ ꓢꓯꓼ ꓕꓵꓼ ꓔꓬ ꓟ ꓟꓲ ꓠꓯ ꓬꓲ ꓘꓶ ꓡꓶꓽ ꓓꓴ ꓐꓴ ꓔꓯ ꓣꓴ ꓦ ꓠꓹ ꓟ ꓣꓳ ꓔꓯ ꓬꓰ ꓙ ꓖꓶˍ ꓥꓳ= ꓡꓳꓹ ꓬꓰˍ ꓕꓯ꓾ ꓣꓳꓽ ꓐꓴ ꓠꓬ ꓪꓴ-ꓢ ꓬꓲ ꓔꓱꓹ ꓜꓳꓽˍ ꓟ ꓙꓽ ꓗꓴꓸ ꓠꓲꓹ ꓗꓪ ꓣꓳ ꓠꓲꓹ ꓟ ꓔꓯ ꓟꓽ ꓗꓶ ꓔ ꓕꓯ ꓠꓽ꓾ ꓟꓲ ꓠꓯ ꓕꓱ ꓟ ꓗꓪ ꓣꓳꓽ ꓔꓳꓹ ꓜꓳꓽ ꓠ ꓔ ꓫꓵꓽ ꓪꓴ ꓐꓱ ꓶ ꓙꓽ ꓖꓶꓼ ꓔ ꓟꓽ ꓐ ꓡ ꓗꓷ ꓡꓰˍ ꓥꓳ= 

ꓠꓬꓲꓸ ꓠꓬꓲ꓾ ꓟꓲ ꓠꓯ ꓬꓲ ꓫꓵꓽ ꓠꓬꓲ ꓤꓹ ꓠꓬꓲ ꓡˍ ꓟ ꓐꓰ ꓟꓲ ꓠꓯ ꓬꓲ ꓥꓶˍ ꓟ ꓔꓯ ꓟꓳꓻ ꓠꓹ ꓟ ꓐꓱ ꓶ ꓪꓴ-ꓢ ꓔꓯ ꓬꓲ ꓙꓽ ꓗꓴꓸ ꓠꓲꓹ ꓣꓱꓽ ꓞꓹ ꓡꓳ꓾ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓡꓯ= ꓣꓳ ꓤꓶꓻ ꓠꓯꓸꓼ ꓗꓪ ꓟ ꓘꓶꓻ ꓡꓶꓽ ꓓꓴ ꓐꓴ ꓔꓯ ꓗꓳꓸ ꓘꓳ ꓠꓹ ꓟ ꓣꓳ ꓚꓲꓸ ꓛꓬ ꓢꓷꓸ ꓠꓲꓹ ꓟꓽ ꓙꓳ꓾ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓡꓯ= ꓙꓽ ꓗꓴꓸ ꓠꓲꓹ ꓣꓱꓽ ꓛꓰꓽ ꓡꓯꓼ ꓫꓴ ꓟꓶ ꓠꓹ ꓟ ꓪꓽ ꓘꓴ ꓢꓲ ꓠꓬꓲ꓾ ꓪꓴ-ꓢ ꓠꓬ ꓙꓽ ꓗꓴꓸ ꓠꓲꓹ ꓖꓳ ꓟ ꓔꓯ ꓣꓳ ꓠꓯꓸꓼ ꓗꓪ ꓧꓳꓽ ꓡꓴꓽ ꓖꓶ ꓡ ꓝꓲ=