ꓢ-ꓘꓰ-ꓬꓴ ꓠꓲꓹ ꓟ ꓡꓶꓸˍ ꓟ

ꓡꓴ-ꓘ 19ꓽ1-10

ꓬꓰ-ꓢꓴ ꓠꓬ ꓙꓱ-ꓡꓱ-ꓘꓳ ꓡꓳ ꓒꓱ ꓗꓪ ꓓꓵꓽ ꓙꓰ ꓢꓲ ꓗꓳꓸ ꓙꓰ ꓔꓬ ꓕꓯ꓾ ꓝꓲꓸ ꓫ ꓢꓴ ꓪꓴꓸ ꓓꓵ ꓣꓱꓽ ꓑ꓾ ꓢ-ꓘꓰ-ꓬꓲ꓾ ꓟꓬꓱ ꓔ ꓟ ꓝꓳ ꓐꓳ ꓕꓲ ꓣꓳ ꓖꓳ ꓗꓪ ꓔꓬ ꓡꓳ= ꓬꓲ ꓠꓬ ꓬꓰ-ꓢꓴ ꓮꓽ ꓟ ꓥ ꓟ ꓡꓳꓸ ꓠꓬꓲ ꓠꓲꓹ ꓫꓵˍ ꓟꓲ꓾ ꓞꓳ ꓔꓰꓼ ꓡꓰꓼ ꓥ ꓢꓲ꓾ ꓞꓳ ꓜꓴ ꓡꓰ ꓬꓲ ꓔꓯ ꓛꓸ ꓞꓹ ꓠꓬꓲ ꓬꓰ-ꓢꓴ ꓔꓯ ꓟꓽ ꓟꓳ= ꓖꓳ ꓡꓱ ꓠꓬꓲ ꓬꓰ-ꓢꓴ ꓔꓯ ꓡꓳꓸ ꓠꓬꓲ ꓠꓹ ꓟ ꓬꓲ ꓠꓬ ꓟꓲ ꓕꓯꓽ ꓢꓲ ꓔꓷꓹ ꓙꓰ ꓢꓲ꓾ ꓬꓰ-ꓢꓴ ꓗꓳꓸ ꓬꓯꓼ ꓠ ꓗꓹ ꓟ ꓚꓱꓹ ꓗꓪ ꓟ ꓘꓶꓽ ꓢꓶꓽ ꓜꓲ ꓕꓲ ꓜꓲ ꓗꓪ ꓓꓯ ꓙꓰˍ ꓡꓳ=

ꓬꓰ-ꓢꓴ ꓖꓳ ꓗꓪ ꓛꓲ ꓡ ꓠꓬ ꓖꓽ ꓑꓳꓸ ꓬꓲ ꓔꓯ ꓡꓳꓸ ꓢꓲ꓾ ꓢ-ꓘꓰ-ꓬꓴꓳ꓾ ꓮꓸ ꓟꓲꓸ ꓬꓯꓼ ꓡꓯ= ꓮ ꓡꓲꓳ ꓐꓯ ꓠꓬ ꓠꓬꓲꓸ ꓠꓬꓲ ꓥꓪ ꓠꓬ ꓠꓴ ꓦꓲ ꓗꓪ ꓪꓰ ꓤ ꓟꓴ ꓠ ꓗꓹ ꓡꓳ꓾ ꓐꓯ ꓖꓶˍ ꓡꓳ= ꓖꓳ ꓡꓱ ꓠꓬ ꓬꓲ ꓮꓸ ꓟꓲꓸ ꓟꓲꓸ ꓬꓯꓼ ꓡ ꓢꓲ꓾ ꓠꓲꓹ ꓒꓴ ꓒꓴˍ ꓐꓰ ꓬꓰ-ꓢꓴ ꓔꓯ ꓘꓳ ꓣꓴˍ ꓡꓳ= ꓬꓲ ꓪ ꓮ ꓙꓵꓽ ꓖꓳ ꓟ ꓔꓯ ꓟꓳꓻ ꓗꓷ ꓠꓬ꓾ ꓬꓲ ꓠꓽ ꓝꓴꓲ ꓙꓳ ꓢꓴ ꓦꓲ ꓗꓪ ꓪꓰ ꓤ ꓟꓴ ꓙꓰꓳ꓾ ꓐꓰ ꓱ'ꓽ ꓠꓱꓽˍ ꓡꓳ=

ꓢ-ꓘꓰ-ꓬꓴ ꓠꓬ ꓦꓰꓼ ꓞꓹ ꓢꓲ ꓬꓰ-ꓢꓴ ꓔꓯ꓾ ꓢꓲ ꓒꓽꓳ ꓾ ꓥꓪ ꓙꓳˍ ꓟ ꓖꓴꓽ ꓙꓴꓽ ꓠꓬ ꓞꓳ ꓫꓸ ꓔꓯ ꓕꓲ ꓐꓶꓽ ꓐꓱꓻ ꓖꓶˍ ꓥꓳ= ꓝꓮꓲ ꓥꓪ ꓡꓰ ꓮꓽ ꓟ ꓔꓯ ꓒꓯꓸ ꓜꓽ ꓗꓷˍ ꓟꓲ ꓬꓲ ꓔꓯ ꓡꓲ ꓩꓴꓸ ꓡꓲꓸ ꓖꓶˍ ꓥꓳ ꓾ ꓐꓯˍ ꓡꓳ= ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓔꓯ꓾ ꓚꓬꓴˍ ꓟ ꓣꓱ ꓛꓰ ꓠꓬ ꓠꓬꓲꓸ ꓠꓬꓲ ꓕꓱ ꓕꓲ ꓦꓲ ꓗꓪ ꓛꓲ ꓡꓺ ꓳ= ꓮ ꓡꓲꓳ ꓐꓯ ꓠꓬ ꓬꓲˍ ꓟꓲ ꓮ-ꓐ-ꓡ-ꓦ ꓞꓲꓼ ꓤ ꓡꓯꓹ ꓤ ꓥ ꓡꓳ= ꓡ-ꓞꓳ-ꓮ-ꓐꓲ ꓠꓽ ꓒꓲꓼ ꓬꓰ ꓢꓴ ꓔꓯ ꓧꓪ ꓢꓲ ꓚꓬꓴˍ ꓐꓰ ꓡˍ ꓟ ꓥ ꓡꓳ꓾ ꓐꓯˍ ꓡꓳ=