ꓒꓵꓽ ꓛꓳ_ ꓟ ꓐꓰ ꓬꓰ-ꓢꓴ ꓔꓯ ꓢꓷꓸ ꓙ ꓟꓳ ꓙ ꓠꓹ ꓟ

ꓒꓵꓽ ꓛꓳ_ ꓟ ꓐꓰ ꓬꓰ-ꓢꓴ ꓔꓯ ꓢꓷꓸ ꓙ ꓟꓳ ꓙ ꓠꓹ ꓟ ꓔꓲ-ꓒ ꓪ ꓔꓲ ꓡꓰ ꓢꓯꓼ ꓖꓶ_ ꓟ-ꓸ

                ꓔꓲ-ꓒ ꓪ ꓔꓲ ꓡꓰ ꓜ ꓚꓲꓸ ꓚꓲꓸ ꓦꓬꓼ ꓠꓬꓲ 5 ꓫꓵꓽ ꓠꓽ ꓟ ꓠꓽ ꓫꓵꓽ ꓠꓬꓲ ꓗꓪ ꓵ ꓠꓹ ꓟ ꓪꓴ-ꓢ ꓶꓼ ꓓꓳ ꓫꓱꓹ ꓓꓳ ꓗꓪ ꓦꓲ-ꓡꓲ ꓡ ꓞꓳ ꓕꓲ ꓐꓱ ꓠꓬ ꓒꓲ-ꓡꓲ ꓔꓯ ꓡ ꓢꓲ-ꓸ ꓬꓰ-ꓢꓴ ꓔꓯ ꓟꓳ ꓠꓲꓹ ꓫꓵ_ ꓟ ꓚꓱꓹ ꓬꓲ ꓪ ꓶꓽ ꓓꓰ_ ꓟ ꓠꓬ ꓕꓲ ꓤꓶꓸꓹ ꓡꓲ ꓕꓲ ꓤꓶꓸꓹ ꓬꓰ-ꓢꓴ ꓔꓯ ꓢꓷꓸ ꓠꓲꓹ ꓫꓵꓽ_ ꓟ ꓔꓯ ꓟꓳ ꓪ ꓡꓳ ꓐꓰ ꓐꓯ_ ꓡꓳ=

                ꓲꓔꓮꓡꓬ ꓗꓴꓷꓼ ꓗꓪ ꓒꓬꓱꓼ ꓔꓬ ꓟ ꓠ ꓫꓵꓽ ꓫꓵꓼ ꓑꓶꓸ ꓓꓴ ꓦꓮꓔꓲꓚꓮꓠ ꓕꓳ ꓶ ꓵ ꓖꓴ ꓦꓲ ꓗꓪ ꓐꓰ ꓡꓲꓦꓰ ꓬꓲ ꓢꓲ-ꓸ ꓙꓲ ꓢꓴ ꓢꓲ ꓤ ꓐꓴ ꓔꓯ ꓶꓼ ꓓꓳ ꓫꓱꓹ ꓓꓳ ꓚ_ ꓟ ꓗꓪ ꓔꓲ-ꓒ ꓪ ꓔꓲ ꓡꓰ ꓞꓳ ꓤ ꓐꓴ ꓔꓯ ꓬꓰ-ꓢꓴ ꓐꓰ ꓟꓳ ꓡꓯꓼ ꓘꓳ ꓠꓹ ꓟ ꓐꓱ ꓶ ꓬꓲ ꓙ ꓠꓹ ꓟ ꓙꓲ ꓢꓴ ꓢꓲ ꓤ ꓐꓴ ꓐꓰ ꓣꓳ ꓮ ꓙꓵꓽ ꓠꓯꓼ ꓗꓪ ꓟꓬꓱꓽ ꓙꓳ_ ꓡꓳ ꓐꓰ ꓐꓯ_ ꓡꓳ=

                ꓠꓬꓲꓸ ꓠꓬꓲ ꓶꓼ ꓓꓳ ꓫꓱꓹ ꓓꓳ ꓔꓯ ꓵ_ ꓕꓯ ꓦꓲ-ꓡꓲ ꓡ ꓞꓳ ꓐꓴ ꓶꓽ ꓓꓰꓽ_ ꓟ ꓔꓯ ꓬꓰ-ꓢꓴ ꓡꓰ ꓡ-ꓞꓳ-ꓮ-ꓐꓲ ꓠꓬ ꓟꓬꓱ ꓓꓳꓽ ꓟꓶ ꓡꓰ ꓠꓹ ꓟ ꓬꓲ ꓙꓵꓹ ꓛꓲ ꓡꓸꓹꓳ= ꓫꓪ ꓫꓵꓸ ꓕꓲ ꓢꓶꓽ ꓠꓬ ꓟꓲ ꓠꓯ ꓗꓪ ꓞꓰꓸꓹ ꓓꓵꓽ ꓡꓰ ꓢꓲ ꓟꓽ ꓛꓵꓽ ꓡꓰ ꓠꓬ ꓬꓲ ꓕꓲ ꓢꓶꓽ_ ꓡꓰꓽ ꓓꓹ ꓡꓳ= ꓖꓳ ꓡꓱ ꓥ_ ꓟꓲ ꓫꓪ ꓫꓵꓸ ꓖꓳ  ꓟ ꓛꓵꓽ ꓡꓰ ꓕꓯ ꓠꓽ ꓬꓲ ꓢꓶꓽ ꓮꓽ ꓟꓬꓹ ꓓꓱꓼ ꓡ_ ꓡꓳ= (ꓬꓳ-ꓦ 12ꓽ23-24) ꓐꓰ ꓐꓯ_ ꓟ ꓔꓯ ꓐꓯ ꓟꓸ ꓖꓶ_ ꓡꓳ= ꓬꓰ-ꓢꓴ ꓠꓬ ꓬꓲ ꓢꓶꓽ ꓮꓽ ꓟꓬꓹ ꓓꓱꓼ ꓡ ꓠꓹ ꓟ ꓐꓱ ꓶ ꓫꓵꓸꓹ ꓠꓹ ꓟ ꓙꓽ ꓖꓶꓽ ꓔ ꓟ ꓫꓪ ꓫꓵꓸ ꓕꓲ ꓫꓵꓸ ꓥ ꓡꓳ= ꓬꓰ-ꓢꓴ ꓔꓯ ꓢꓷꓸ ꓠꓹ ꓟ ꓐꓱ ꓶ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓛꓳ ꓐꓰ ꓔꓲ-ꓒ ꓪ ꓔꓲ ꓡꓰ ꓐꓯ_ ꓡꓳ=

ꓡꓯꓼ ꓐꓳ ꓔꓶꓸ ꓓꓴ ꓠꓬ ꓙꓲ ꓢꓴ ꓢꓲ ꓤ ꓐꓴ ꓐꓱ ꓶ ꓟꓽ ꓓ ꓣꓳ ꓚꓵꓸ_ ꓟ ꓢꓷꓸ ꓡꓰ ꓓꓴ

                ꓔꓲ-ꓒ ꓪ ꓔꓲ ꓡꓰ ꓡꓯꓼ ꓐꓳ ꓔꓶꓸ ꓓꓴ ꓠꓬ ꓬꓰ-ꓢꓴ ꓢꓲ ꓤ ꓐꓴ ꓕꓲ ꓤꓶꓸꓹ ꓡꓱꓼ ꓗꓪ ꓣꓱꓽ ꓔꓬ ꓟ ꓣꓳꓸ ꓚꓵꓸ_ ꓟ ꓢꓷꓸ ꓡꓰ ꓓꓴ ꓥ ꓟ-ꓸ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓡ ꓞꓳ ꓐꓴ ꓬꓰ-ꓢꓴ ꓔꓯ ꓟꓳ ꓪ_ ꓟ ꓞꓳ ꓤ ꓮ ꓘꓶꓸ ꓟꓽ ꓢꓷꓸ ꓔ ꓟ ꓬꓲ ꓖꓽ ꓗꓪ ꓡꓯꓼ ꓐꓳ ꓔꓶꓸ ꓓꓴ ꓕꓱ ꓟ ꓗꓪ ꓐꓰ ꓙꓲ ꓢꓴ ꓢꓲ ꓤ ꓐꓴ ꓔꓯ ꓢꓷꓸ ꓡ_ ꓟ-ꓸ ꓕꓱ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓪꓽ ꓘꓴ ꓦꓲ ꓐꓰ ꓙꓲ ꓢꓴ ꓢꓲ ꓤ ꓐꓴ ꓦꓲ ꓗꓪ ꓟꓳ ꓪ ꓓ_ ꓡꓳ= ꓣꓳ ꓚꓵꓸ_ ꓟ ꓕꓲ ꓫꓵꓽ ꓠꓬ ꓡꓯꓼ ꓐꓳ ꓔꓶꓸ ꓓꓴ ꓣꓱꓽ ꓢꓴ ꓠꓬ ꓬꓰ-ꓢꓴ ꓟꓳꓸ ꓖꓶ ꓔ ꓟ ꓚꓱꓹ ꓔꓯ ꓛꓳ ꓢꓲ-ꓸ ꓠꓵ ꓠꓲꓹ-ꓸ ꓒꓵꓽ ꓛꓳ_ ꓟ ꓣꓳ ꓚꓲꓸ ꓛꓬ ꓡꓯꓼ ꓙꓱ ꓠꓹ ꓟ-ꓸ ꓕꓱ ꓟ ꓔꓯ ꓟꓸ ꓖꓶ_ ꓟ-ꓸ ꓔꓱ_ ꓟ ꓢꓯꓼ ꓟꓬ ꓗꓷ ꓠ ꓔ ꓡꓳ ꓐꓯ_ ꓡꓳ=

ꓬꓰ-ꓢꓴ ꓔꓯ ꓢꓷꓸ ꓡ_ ꓟ

                ꓮ ꓟꓶ ꓕꓲꓽ ꓞꓲꓼ ꓞꓳ ꓤ ꓮ ꓟꓬꓹ ꓠꓬ ꓬꓰ-ꓢꓴ ꓔꓯ ꓟꓬ ꓠꓬꓲ ꓢꓷꓸ ꓠꓲꓹ ꓫꓵꓽ ꓟꓳ ꓠꓲꓹ ꓫꓵꓽ ꓢꓲ-ꓸ ꓙꓲ ꓢꓴ ꓢꓲ ꓤ ꓐꓴ ꓠꓬ ꓒꓵꓽ ꓛꓳ_ ꓟ ꓤꓶꓸꓹ ꓗꓪ ꓐꓰ ꓢꓷꓸ ꓙ ꓟꓳ ꓙ ꓠ ꓔ ꓡꓳ= ꓣꓳ ꓠꓬ ꓫꓸ ꓪ ꓡꓰ ꓟꓽ ꓥ ꓠꓵ ꓠꓲꓹ ꓫꓵꓸ ꓖꓶ ꓠꓹ ꓟ ꓐꓱ ꓶ ꓘꓴꓽ ꓟꓶ ꓢꓴ ꓥꓳ ꓐꓰ ꓔꓲ-ꓒ ꓪ ꓔꓲ ꓡꓰ ꓐꓯ_ ꓡꓳ= ꓫꓸ ꓓꓴ ꓔꓳꓹ ꓜꓳ ꓔꓬ ꓕꓯ ꓥ ꓟꓲ ꓪꓴ-ꓢ ꓶꓼ ꓤ ꓫꓱꓹ ꓤ ꓗꓪ ꓐꓰ ꓣꓳ ꓔꓯ ꓬꓲ ꓢꓶꓽ ꓮꓽ ꓟꓬꓹ ꓓꓱꓼ ꓡ ꓝꓲ_ ꓡꓳ= ꓫꓪ ꓫꓵꓸ ꓫꓵꓸꓹ _ ꓟ ꓠꓬ ꓬꓲ ꓙꓵꓹ ꓛꓲ ꓡ ꓕꓯ ꓬꓲ ꓢꓶꓽ ꓮꓽ ꓟꓬꓹ ꓓꓱꓼ ꓡ ꓠꓹ ꓟ ꓐꓱ ꓶ ꓥꓳ ꓐꓰ ꓔꓲ-ꓒ ꓪ ꓔꓲ ꓡꓰ ꓐꓯ_ ꓡꓳ= ꓢꓯꓸ ꓔꓬ ꓟ ꓐꓰ ꓫꓵꓸꓹ_ ꓟ ꓙꓵꓹ ꓙꓳ ꓥ ꓟꓲ ꓣꓳ ꓠꓬ ꓪꓴ-ꓢ ꓗꓪ ꓐꓰ ꓠꓲꓹ ꓡꓱ_ ꓟ-ꓸ ꓫꓱꓸ ꓤ ꓟ-ꓸ ꓟꓸ ꓖꓶ_ ꓟ-ꓸ ꓔꓱ_ ꓟ ꓠꓵ ꓠꓲꓹ ꓐꓰ ꓗꓹ ꓛꓲ ꓓꓴ ꓔꓯ ꓣꓳ ꓟꓶ_ ꓟ ꓥꓳ=

                ꓣꓳ ꓠꓬ ꓬꓰ-ꓢꓴ ꓠꓯꓼ ꓗꓪ ꓛꓳ ꓢꓲ-ꓸ ꓬꓰ-ꓢꓴ ꓠꓵ ꓠꓲꓹ ꓠꓬ ꓣꓳ ꓡ ꓞꓳ ꓮ ꓙꓵꓽ ꓬꓲ ꓔꓯ ꓢꓷꓸ ꓡꓰ ꓠꓹ ꓟ-ꓸꓢꓷꓸ ꓙ ꓟꓳ ꓙ ꓠꓹ ꓟ ꓟꓹ ꓟ ꓟ-ꓡꓲ ꓐꓰ ꓬꓰ ꓙ ꓖꓶ ꓠꓹ ꓟ-ꓸ ꓐꓰ ꓔꓲ-ꓒ ꓪ ꓔꓲ ꓡꓰ ꓪꓽ ꓘꓴꓽ ꓖꓶ_ ꓡꓳ=

Translated By Cecilia Hti Ram

Source: Vatican News

  http://bit.ly/2OLvj5h