ꓔꓲ-ꓒ ꓙꓵꓽ ꓪꓽ ꓟꓶ_ ꓟ ꓠꓬ ꓝꓲ ꓓꓴ ꓟꓬꓱꓽ ꓡꓯꓼ ꓫꓴꓸꓹ ꓥ ꓡꓳ=

ꓔꓲ-ꓒ ꓙꓵꓽ ꓪꓽ ꓟꓶ_ ꓟ ꓠꓬ ꓝꓲ ꓓꓴ ꓟꓬꓱꓽ ꓡꓯꓼ ꓫꓴꓸꓹ ꓥ ꓡꓳ=

            ꓔꓲ-ꓒ ꓪ ꓔꓲ ꓡꓰ ꓙꓵꓹ ꓟ ꓮ ꓣꓳ ꓡꓳꓸ ꓒꓽ ꓠꓽ ꓫꓵꓽ ꓠꓬꓲ (Good Shepherd Sunday) ꓕꓯ St. Peter’s Basilica ꓗꓪ ꓟꓲ-ꓢ ꓪꓽ ꓘꓴꓽ ꓟ ꓗꓪ ꓔꓲ-ꓒ ꓙꓵꓽ ꓪ ꓘꓴꓹ ꓣꓴ ꓠꓹ ꓟ ꓓꓽ ꓪꓴꓸ ꓙ ꓖꓶ ꓔ ꓟ ꓙꓵꓽ ꓪ(Deacons) (9) ꓣꓳ ꓥ ꓟ Georg Marius Bogdan, Salvatore Marco Montone, Manuel Secci, Diego Armando Barrera Parra, Salvatore Lucchesi, Giorgio de Iuri, Riccardo Cendamo, Samuel Piermarini, and Mateus Henrique Ataide da Cruz ꓐꓴ ꓔꓯ ꓔꓲ-ꓒ ꓙꓵꓽ ꓪꓽ ꓖꓶ ꓗꓷꓳ=

ꓙꓲ-ꓢꓴ ꓔꓲ-ꓒ ꓐꓰ ꓟꓸ ꓖꓶ_ ꓟ

            ꓔꓲ-ꓒ ꓪ ꓔꓲ ꓡꓰ ꓶꓽ ꓓꓳ ꓫꓱꓹ ꓓꓳ ꓚ ꓕꓯ ꓔꓲ-ꓒ (9) ꓣꓳ ꓔꓯ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ ꓮ ꓕꓯ ꓥ ꓟꓲ ꓙꓵꓸꓹ ꓠ ꓔ ꓡꓳ ꓐꓰ ꓢꓯꓼ ꓖꓶ_ ꓡꓳ= ꓕꓱ ꓙꓵꓽ ꓪꓽ ꓠꓬ ꓬꓰ-ꓢꓴ ꓙꓲ-ꓢꓴ ꓬꓲ ꓟꓸ ꓒꓽ ꓤꓶꓸꓹ-ꓸ ꓔꓲ-ꓒ ꓤꓶꓸꓹ ꓐꓰ ꓮ ꓣꓳ ꓡꓳꓸ ꓒꓽ ꓤꓶꓸꓹ ꓔꓯ ꓟꓸ ꓔ ꓟ ꓥꓳ=

            ꓔꓲ-ꓒ ꓐꓯ_ ꓟ ꓠꓬ ꓔꓲ-ꓒ ꓓꓽ ꓐꓴ ꓐꓰ ꓟꓬꓱꓽ ꓬꓰ ꓛꓳ ꓒꓯꓹ ꓥ ꓡꓳ= ꓔꓲ-ꓒ ꓓꓽ ꓐꓴ ꓐꓰ ꓕꓲ ꓪ ꓢ-ꓢꓶ-ꓠ ꓟꓬꓱꓽ ꓗꓪ ꓕꓲ ꓠꓲꓹ ꓕꓲ ꓪ ꓬꓰ ꓢꓲ-ꓸ ꓪꓴ-ꓢ ꓞꓳ ꓫꓵꓽ ꓐꓱ ꓶ ꓟꓬꓱꓽ ꓬꓰ ꓠꓹ ꓟ ꓥ ꓡꓳ= ꓬꓲ ꓪ ꓙꓵꓽ ꓪꓽ ꓠꓬ ꓪꓴ-ꓢ ꓶꓽ ꓓꓳ ꓫꓱꓹ ꓓꓳ ꓔꓯ ꓚ ꓠꓹ ꓟ-ꓸ ꓪꓴ-ꓢ ꓞꓳ ꓫꓵꓽ ꓐꓴ ꓔꓯ ꓡꓳꓸ ꓠꓹ ꓟ ꓐꓰ ꓟꓲ-ꓢ ꓪꓽ ꓘꓴꓽ ꓠꓹ ꓟ ꓥꓳ ꓐꓰ ꓔꓲ-ꓒ ꓪ ꓔꓲ ꓡꓰ ꓐꓯ_ ꓡꓳ=

ꓫꓱꓸ ꓤ_ ꓟ ꓮ ꓣꓳ ꓡꓳꓸ ꓒꓽ

            ꓔꓲ-ꓒ ꓪ ꓔꓲ ꓡꓰ ꓠꓴ ꓪ ꓠꓬ ꓔꓲ-ꓒ ꓕꓲ ꓣꓳ ꓒꓬꓱꓼ ꓡ ꓠꓬ ꓙꓲ_ ꓟ ꓮ ꓣꓳ ꓡꓳꓸ ꓒꓽ ꓥ ꓟ ꓬꓰ-ꓢꓴ ꓡꓰ ꓐꓰ ꓢꓯꓼ ꓕꓵꓼ ꓠ ꓔ ꓡꓳ= ꓔꓲ-ꓒ ꓤꓶꓸꓹ ꓠꓬ ꓶꓸꓹ ꓡꓯꓼ ꓬꓰ ꓚꓱꓹ ꓟꓽ ꓥ-ꓸ ꓝꓲ-ꓓꓴ ꓟꓬꓱꓽ ꓥ ꓡꓳ ꓐꓰ ꓐꓯ_ ꓡꓳ= ꓣꓳ ꓝꓲ ꓓꓴ ꓟꓬꓱꓽ ꓬꓰ ꓕꓯ ꓪꓴ-ꓢ ꓐꓰ ꓫꓱꓹ ꓡꓯꓼ ꓘꓳ ꓠꓹ ꓟ-ꓸ ꓔꓲ-ꓒ ꓓꓽ ꓐꓴ ꓐꓰ ꓫꓱꓹ ꓡꓯꓼ ꓘꓳ ꓠꓹ ꓟ-ꓸ ꓔꓲ-ꓒ ꓐꓴ ꓕꓲ ꓣꓳ ꓐꓰ ꓕꓲ ꓣꓳ ꓫꓱꓹ ꓡꓯꓼ ꓘꓳ ꓠꓹ ꓟ ꓐꓰ ꓪꓴ-ꓢ ꓤ ꓠꓱ ꓐꓴ ꓐꓰ ꓫꓱꓹ ꓡꓯꓼ ꓘꓳ ꓠꓹ ꓟ-ꓸ ꓕꓱ (4) ꓫꓵꓽ ꓔꓯ ꓫꓸ ꓤ ꓟ ꓐꓰ ꓢꓯꓼ ꓕꓵꓼ ꓠꓹ ꓟ ꓔꓲ-ꓒ ꓐꓴ ꓔꓯ ꓶꓽ ꓓꓰꓽ_ ꓡꓳ=

ꓫꓸ ꓓꓴ ꓟꓶ ꓓꓴ ꓔꓯ ꓜꓲꓽ ꓠꓲꓹ ꓙꓳ

            ꓔꓲ-ꓒ ꓪ ꓔꓲ ꓡꓰ ꓫꓸ ꓓꓴ ꓐꓰ ꓔꓳꓹ ꓜꓳ ꓢꓴ ꓔꓯ ꓬꓲ ꓙꓵꓹ ꓖꓶ ꓢꓲ ꓠ ꓠꓹ ꓖꓶ ꓠꓹ ꓟ ꓐꓰ ꓢꓯꓼ ꓖꓶ ꓠꓹ ꓟ ꓣꓳꓸ ꓚꓵ_ ꓡꓳ= ꓫꓸ ꓓꓴ ꓔꓳꓹ ꓜꓳ ꓕꓯ ꓠꓴ ꓪ ꓠꓲꓹ ꓟ ꓗꓸ ꓘꓶꓽ ꓔꓯ ꓒꓵꓽ ꓠ ꓔ ꓡꓳ ꓐꓰ ꓢꓯꓼ ꓖꓶ_ ꓡꓳ= ꓫꓱꓸ ꓤ ꓟ ꓠꓲꓹ ꓟ ꓠꓬ ꓝꓴꓲ ꓖꓽ ꓖꓶ ꓠꓹ ꓟ ꓐꓰ ꓫꓱꓸ ꓤ ꓟ ꓗꓪ ꓘꓴꓸꓹ ꓔꓯ ꓙꓲ_ ꓡꓳ ꓐꓰ ꓐꓯ ꓢꓲ ꓫꓱꓸ ꓤ ꓟ ꓠꓲꓹ ꓟ ꓙꓳ ꓠꓹ ꓟ-ꓸ ꓝꓴꓲ ꓖꓽ ꓖꓶ ꓠꓹ ꓟ-ꓸ ꓪꓴ-ꓢ ꓗꓪ ꓐꓰ ꓮ ꓙꓵꓽ ꓔꓯ ꓝꓴꓲ ꓖꓽ ꓖꓶ ꓠꓹ ꓟ ꓥ ꓡꓳ= ꓝꓴꓲ ꓖꓽ ꓖꓶ_ ꓟ ꓠꓬ ꓢꓯꓼ ꓐꓽ ꓓꓴ ꓟꓽ ꓙꓳ_ ꓟ ꓪꓴ-ꓢ ꓥꓳ ꓐꓰ ꓢꓯꓼ ꓖꓶ_ ꓡꓳ=

ꓟꓲ ꓠꓯ ꓒꓵꓸꓹ ꓫꓵꓸꓹ ꓔꓯ ꓕꓽ ꓛꓳ

            ꓔꓲ-ꓒ ꓪ ꓔꓲ ꓡꓰ ꓒꓵꓸꓹ ꓫꓵꓸꓹ ꓠꓬ ꓮ ꓟꓬ ꓘꓶꓸꓹ ꓡꓶꓽ ꓓꓴ ꓙꓳ_ ꓟ ꓔꓯ ꓐꓯ_ ꓡꓳ= ꓪꓴ-ꓢ ꓤ ꓠꓱ ꓐꓴ ꓫꓸ ꓔ ꓟ ꓡꓰ ꓐꓰ ꓠꓴ ꓪ ꓥ ꓟꓲ ꓫꓸ ꓔꓬ ꓢꓴ ꓡꓰ ꓐꓰ ꓗꓷ ꓡꓰ ꓝꓲ ꓐꓰ ꓐꓯ_ ꓡꓳ=

ꓐꓯ ꓡꓳꓹ ꓬꓰ_ ꓟ ꓡꓰ ꓐꓰ ꓫꓱꓹ ꓡꓯꓼ ꓘꓳ_ ꓟ (4) ꓚꓱꓹ ꓠꓬ ꓮ ꓣꓳ ꓡꓳꓸ ꓒꓽ ꓒꓬꓱꓼ ꓡ ꓠꓹ ꓟ ꓚꓱꓹ ꓥ ꓡꓳ= ꓬꓰ-ꓢꓴ ꓠꓬ ꓙꓲ_ ꓟ ꓮ ꓣꓳ ꓡꓳꓸ ꓒꓽ ꓥ ꓢꓲ-ꓸ ꓮ ꓣꓳ ꓜꓴ ꓔꓯ ꓥ ꓟꓲ ꓠꓲꓹ ꓟ ꓗꓳꓸ ꓖꓶ_ ꓟ ꓥꓳ= ꓬꓰ-ꓢꓴ ꓗꓪ ꓐꓰ ꓠꓲꓹ ꓟ ꓗꓳꓸ ꓖꓶ ꓓꓴ ꓧꓪ ꓠ ꓔ ꓡꓳ= ꓠꓴ ꓪ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓔꓳꓹ ꓜꓳ ꓔꓬ ꓟ ꓫꓸ ꓓꓴ ꓔꓯ ꓠꓴ ꓪ ꓟꓯ= ꓠꓴ ꓪ ꓕꓽ ꓙꓽ ꓫ= ꓮ ꓙꓵꓽ ꓠꓬ ꓪꓴ-ꓢ ꓗꓰ ꓐꓰ ꓢ ꓡ ꓥꓳ ꓐꓰ ꓢꓯꓼ ꓖꓶ ꓢꓲ ꓶꓽ ꓓꓳ ꓫꓱꓹ ꓓꓳ ꓔꓯ ꓬꓲꓸ ꓟꓶꓽ ꓢꓲꓼ ꓗꓷ_ ꓡꓳ=