ꓖꓳ ꓓꓱ ꓔꓲꓹ ꓟ ꓗꓪ ꓐꓰ ꓪꓴ-ꓢ ꓤ ꓠꓱ ꓒꓬꓱꓼ ꓡꓰ ꓟ꓾

ꓖꓳ ꓓꓱ ꓔꓲꓹ ꓟ ꓗꓪ ꓐꓰ ꓪꓴ-ꓢ ꓤ ꓠꓱ ꓒꓬꓱꓼ ꓡꓰ ꓟ꓾

 ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓡꓳꓹ ꓬꓰ ꓟ ꓠꓽ ꓦꓬꓼ ꓠꓬꓲ ꓟꓲ-ꓢ ꓪꓽ ꓘꓴ ꓙꓵꓹ ꓗꓪ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓔꓯ ꓣꓳ ꓠꓬ ꓖꓳ ꓓꓱ ꓔꓲꓹ ꓟꓶ ꓗꓸ ꓠꓯꓸ ꓕꓲ ꓞꓲꓼ ꓕꓲ ꓑ ꓟ ꓪꓴ-ꓢ ꓤ ꓠꓱ ꓒꓬꓱꓼ ꓡꓰ ꓟ ꓥꓳ= ꓕꓱ ꓶꓼ ꓤ ꓫꓱꓸ ꓤ ꓔꓯ ꓓꓵꓽ ꓙ ꓢꓲ꓾ ꓮ ꓕꓯ ꓟꓲ ꓣꓳ ꓫꓱꓸ ꓖꓶ ꓫ ꓟꓳ ꓠꓹ ꓟ ꓟꓲ ꓥ ꓡꓳ꓾ ꓐꓰ ꓐꓯ ꓡꓳꓹ ꓬꓰ ꓟ ꓥꓳ=

ꓢꓲ ꓒꓽ ꓬꓰ-ꓢꓴ ꓖꓳ ꓓꓱ ꓔꓲꓹ ꓟ ꓑꓮꓲ ꓦꓬꓼ ꓠꓬꓲ ꓟꓲ-ꓢ ꓪꓽ ꓘꓴ ꓙꓵꓹ ꓕꓯ ꓢꓔꓸ ꓑꓰꓔꓰꓣ ꓪꓽ ꓘꓴ ꓦꓲꓻ ꓓꓽ ꓗꓪ ꓜꓲꓼ ꓡ ꓢꓴ ꓐꓴ ꓔꓯ ꓪꓴ-ꓢ ꓶꓼ ꓓꓳ ꓫꓱꓸ ꓓꓳꓽ ꓗꓪ ꓐꓰ ꓔꓱꓹ ꓕ ꓖꓶ ꓗꓷ ꓟ ꓥꓳ= ꓝꓮꓲ ꓢꓲ ꓒꓽ ꓬꓰ-ꓢꓴ ꓔꓯ ꓢꓲ ꓫꓬ ꓢꓴ ꓬꓳ-ꓦ ꓡꓰ ꓖꓳ ꓓꓱ ꓔꓲꓹ ꓖꓶ_ ꓟ ꓐꓰ ꓖꓳ ꓕꓲ ꓠꓬꓲ ꓵ ꓠꓹ ꓟ ꓢꓲ ꓫꓬ ꓕꓳ ꓶ ꓝꓲꓸ ꓗꓪ ꓐꓰ ꓓꓵꓽ ꓙ ꓠꓹ ꓟ ꓐꓱ ꓶ ꓔꓱꓹ ꓕ ꓖꓶ_ ꓟ ꓠꓬ ꓣꓳ ꓠꓬ ꓖꓳ ꓓꓱ ꓔꓲꓹ ꓟꓶ ꓟ ꓗꓪ ꓐꓰ ꓣꓳ ꓤꓶꓻ ꓔꓯ ꓒꓳꓹ ꓖꓶ_ ꓟ ꓐꓰ ꓣꓳ ꓔꓯ ꓪꓴ-ꓢ ꓬꓲ ꓠꓲꓹ ꓡꓱ_ ꓟ ꓫꓱꓸ ꓤ ꓟ ꓠꓲꓹ ꓟ ꓗꓪ ꓔꓬ ꓟꓶ ꓠꓹ ꓟ ꓔꓯ ꓐꓯ ꓡꓳꓹ ꓬꓰ ꓟ ꓥꓳ= ꓣꓳ ꓖꓳ ꓓꓱ ꓔꓲꓹ ꓟꓶ ꓟ ꓡꓰ ꓐꓰ ꓣꓳ ꓔꓯ “ꓪꓴ-ꓢ ꓤ ꓠꓱ ꓪꓴ-ꓢ ꓢꓲ ꓤ” ꓐꓰ ꓒꓬꓱꓼ ꓡꓰ ꓟ ꓥꓳ= ꓕꓱ ꓟ ꓠꓬ ꓢꓲ ꓫꓬ ꓢꓴ ꓬꓳ-ꓦ ꓡꓰ ꓟꓸ ꓖꓶ_ ꓟ ꓬꓲ ꓔꓯ ꓥꓳꓽ ꓟꓽ ꓥ꓾ ꓪꓴ-ꓢ ꓗꓪ ꓐꓰ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓐꓰ ꓥ ꓢꓲ꓾ ꓐꓹ ꓐ꓾ ꓤ ꓔꓲ꓾ ꓢꓲ-ꓫꓬ-ꓟ-ꓦ ꓐꓰ ꓕꓲ ꓪꓼ ꓫꓱꓹ ꓡꓯ ꓘꓳ ꓠꓹ ꓟ ꓶ ꓤ ꓫꓱꓸ ꓤ ꓪ ꓟꓶ ꓟ ꓥ ꓡꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ= ꓣꓳ ꓠꓬ ꓖꓳ ꓓꓱ ꓔꓲꓹ ꓟ ꓗꓪ ꓐꓰ ꓕꓲ ꓞꓲꓼ ꓕꓲ ꓑ ꓬꓲ ꓠꓵꓻ ꓠꓲꓹ ꓠꓬ ꓣꓳ ꓔꓯ ꓖꓶ_ ꓟ ꓶꓼ ꓤ ꓫꓱꓸ ꓤ ꓐꓰ ꓕꓲ ꓞꓲꓼ ꓕꓲ ꓑ ꓬꓲ ꓡꓯꓽ ꓒꓯꓹ ꓐꓰ ꓣꓳ ꓔꓯ ꓠꓬꓲꓸ ꓠꓸ ꓖꓶ_ ꓟ ꓶꓼ ꓤ ꓫꓱꓸ ꓤ ꓖꓶ_ ꓟ ꓔꓯ ꓢꓷꓸ ꓠꓹ ꓟ ꓐꓱ ꓶ ꓐꓯ ꓔ ꓡꓳ= ꓖꓳ ꓓꓱ ꓔꓲꓹ ꓟ ꓠꓬ ꓣꓳ ꓔꓯ ꓤꓶꓻ ꓫꓵꓼ ꓖꓶ_ ꓟ ꓡꓰ ꓟꓽ ꓞꓲ꓾ ꓕꓲ ꓞꓲꓼ ꓕꓲ ꓑ ꓪꓴ-ꓢ ꓢꓲ ꓤ ꓒꓬꓱꓼ ꓠꓹ ꓟ ꓶꓼ ꓤ ꓫꓱꓸ ꓤ ꓥ ꓟꓲ ꓖꓶ_ ꓟ ꓔꓯ ꓢꓷꓸ ꓠꓹ ꓟ ꓐꓯ_ ꓡꓳ= ꓚꓲꓸ ꓛꓬ ꓖꓳ ꓓꓱ ꓔꓲꓹ ꓟ ꓦꓬꓼ ꓠꓬꓲ ꓔꓯ ꓓꓵꓽ ꓙ ꓓꓴ ꓬꓰ ꓡꓯ꓾ ꓝꓮꓲ ꓠꓬꓲꓸ ꓠꓬꓲ ꓣꓳ ꓗꓪ ꓐꓰ ꓬꓲ ꓣꓳ ꓐꓰ ꓕꓲ ꓪꓼ ꓔꓬ ꓟ ꓡꓰ ꓟꓽ ꓞꓲ ꓣꓳ ꓠꓲ ꓹ ꓟ ꓘꓴꓽ ꓗꓪ ꓔꓬ ꓡꓰ ꓟ ꓑꓶ ꓓꓴ ꓫ ꓟꓳ ꓓꓴ ꓬꓰ ꓡꓯ=

ꓔꓲꓺ ꓒ ꓪ ꓔꓲ ꓡꓰ ꓣꓳ ꓔꓯ ꓦꓵꓻ ꓖꓶ ꓡ ꓟ ꓐꓹ ꓐ ꓾ ꓟꓹ ꓟ꓾ ꓢꓮꓚꓣꓮꓟꓰꓠꓔꓳ ꓕꓲ ꓒꓳꓹ ꓧꓳꓽ ꓪꓴꓸ ꓖꓶ ꓡ ꓟ꓾ ꓣꓳ ꓐꓰ ꓕꓲ ꓪꓼ ꓢꓲ ꓒꓽ ꓬꓰ-ꓢꓴ ꓔꓯ ꓘꓳꓹ ꓣꓴ ꓟ ꓠꓶꓼ ꓛꓳ ꓕꓲ ꓛꓳ ꓐꓴ ꓔꓯ ꓥ ꓟꓲ ꓫ ꓟꓳ ꓠꓹ ꓟ ꓐꓯ ꓔ ꓡꓳ= ꓔꓲꓺ ꓒ ꓪ ꓔꓲ ꓡꓰ ꓙꓲ ꓢꓴ ꓢꓲ ꓤ ꓐꓴ ꓔꓯ ꓚꓲ ꓛꓬ ꓔꓱꓹ ꓚꓲ ꓛꓬ ꓠ ꓠꓬꓲ ꓔꓱꓹ ꓕ ꓠꓹ ꓟ ꓐꓱ ꓶ ꓐꓯ ꓗꓷꓳ= “ ꓥꓪ ꓢꓲ ꓫꓬ ꓖꓳ ꓓꓱ ꓔꓲꓹ ꓟ ꓗꓪ ꓐꓰ ꓥꓪ ꓕꓯ ꓢꓲ ꓪꓴꓽ_ ꓟ ꓶꓼ ꓤ ꓫꓱꓸ ꓤ ꓘꓳꓹ ꓣꓴ ꓟꓶ_ ꓟ ꓔꓯ ꓢꓷꓸ ꓔ ꓡ?” “ ꓥꓪ ꓤꓶꓻ ꓗꓪ ꓪꓴ-ꓢ ꓠꓬꓲ ꓟꓳ ꓓꓴ ꓡꓯ ꓖꓶ ꓡ_ ꓟ ꓔꓯ ꓢꓷꓸ ꓔ ꓡ꓾ ꓥꓪ ꓔꓯ ꓪꓴ-ꓢ ꓢꓲ ꓤ ꓐꓰ ꓠꓱꓸ ꓐꓯꓼ ꓢꓴ ꓟꓳ_ ꓡ?” ꓔꓲꓺ ꓒ ꓪ ꓔꓲ ꓡꓰ ꓙꓲ ꓢꓴ ꓢꓲ ꓤ ꓐꓴ ꓔꓯ ꓣꓳ ꓠꓬ ꓢꓲ ꓫꓬ ꓖꓳ ꓓꓱ ꓔꓲꓹ ꓓꓳ ꓟ ꓔꓯ ꓓꓵꓽ ꓙ ꓓꓴ ꓬꓰ ꓡꓯ= ꓪꓴ-ꓢ ꓔꓯ ꓣꓳ ꓤꓶꓻ ꓗꓪ ꓠꓲꓹ ꓡꓱ ꓘꓳꓹ ꓣꓴ ꓟ ꓐꓰ ꓢꓲ ꓫꓬ_ ꓟ ꓡꓯꓽ ꓒꓳ ꓔꓶꓸ ꓓꓴ ꓔꓯ ꓙꓵꓻ ꓠꓲꓹ ꓐꓰ ꓘꓳꓹ ꓣꓴ ꓠꓹ ꓟ ꓐꓱ ꓶ ꓮ ꓙꓵ ꓔꓯ ꓢꓯꓼ ꓖꓶ ꓟ ꓐꓰ “ ꓮ ꓙꓵ ꓐꓹ ꓐ꓾ ꓤ ꓔꓲ꓾ ꓢꓲ-ꓫꓬ-ꓟ-ꓦ ꓔꓯ ꓘꓳꓹ ꓣꓴ ꓓꓴ ꓬꓰ ꓡꓯ=” ꓐꓰ ꓐꓯ ꓔ ꓡꓳ=

ꓔꓲꓺ ꓒ ꓪ ꓔꓲ ꓗꓪ ꓐꓰ “ꓦ ꓕꓲ ꓒꓳꓹ ꓧꓳꓽ ꓣꓱꓽ ꓢꓴ ꓥ ꓟ ꓟꓹ ꓟ ꓟ-ꓡꓲ “ ꓪꓴ-ꓢ ꓶꓼ ꓤ ꓫꓱꓸ ꓤ ꓡꓯ ꓐꓳ ꓔꓶꓸ ꓓꓴ ꓔꓯ ꓠꓲꓹ ꓡꓱ ꓡꓱ ꓐꓰ ꓘꓳꓹ ꓣꓴ ꓠꓹ ꓟ ꓐꓱ ꓶ ꓣꓳ ꓔꓯ ꓬꓰ ꓙ ꓝꓲ꓾” ꓬꓲꓸ ꓟꓶꓽ ꓗꓪ ꓐꓰ ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓢꓔꓸ ꓑꓰꓔꓰꓣ ꓪꓽ ꓘꓴ ꓦꓲꓻ ꓓꓽ ꓗꓪ ꓜꓲꓼ ꓡ ꓢꓴ ꓐꓴ ꓔꓯ “ ꓟꓹ ꓟ ꓟ-ꓡꓲ ꓗꓪ ꓐꓰ ꓣꓳ ꓔꓯ ꓡꓳꓸ ꓙ ꓠꓬꓲ ꓙ ꓠꓹ ꓟ ꓐꓱ ꓶ ꓪꓽ ꓘꓴ ꓖꓶ_ ꓡꓳ꓾ “ ꓮ ꓙꓵ ꓔꓯ ꓚꓲ ꓛꓬ ꓢꓲ ꓫꓬ ꓖꓳ ꓓꓱ ꓔꓲꓹ ꓟ ꓦꓬꓼ ꓠꓬꓲ ꓔꓯ ꓢꓷꓸ ꓠꓹ ꓟ ꓐꓱ ꓶ ꓟꓽ ꓓꓵꓽ ꓙ ꓗꓷ ꓡꓰ ꓠꓬ ꓢꓷꓸ ꓠ ꓟ ꓢꓯꓼ ꓕꓵꓼ ꓢꓲ꓾ ꓣꓳ ꓦꓵꓻ ꓦꓬꓼ ꓠꓬꓲ ꓔꓯ ꓫꓱꓸ ꓖꓶ ꓢꓷꓸ ꓔ ꓟ ꓡꓰ ꓐꓰ ꓕꓱ ꓟ ꓔꓯ ꓥ ꓟꓲ ꓫꓱꓸ ꓖꓶ ꓢꓲ ꓢꓷꓸ ꓠꓹ ꓟ ꓬꓰ ꓠꓹ ꓟ ꓐꓱ ꓶ ꓢꓯꓼ ꓖꓶ ꓔ ꓟ ꓥꓳ=