ꓝꓴꓲꓸ ꓾ ꓡꓳꓺ ꓗꓷ ꓟꓶˍ ꓟ ꓾ ꓞꓳ ꓤ ꓕꓲꓽ ꓣꓳ ꓡꓰ ꓐꓰ ꓒꓵꓽ ꓗ ꓬꓰˍ ꓟ ꓟꓽ ꓟꓶ ꓟ ꓪꓴꓸ ꓠꓬꓲ ꓠꓲꓹ ꓟ ꓕꓽ ꓣꓳ= ꓠꓴ ꓔꓯ ꓪꓴ-ꓢ ꓢꓷˍ ꓡꓳ꓾ꓠꓴ ꓒ ꓕꓲꓸꓼ ꓗꓪ ꓔꓬꓹ ꓡꓳ꓾ꓠꓴ ꓔꓯ ꓬꓰ ꓙ ꓔꓬꓹ ꓡꓳ=

ꓝꓴꓲꓸ ꓾ ꓡꓳꓺ ꓗꓷ ꓟꓶˍ ꓟ ꓾ ꓞꓳ ꓤ ꓕꓲꓽ ꓣꓳ ꓡꓰ ꓐꓰ ꓒꓵꓽ ꓗ ꓬꓰˍ ꓟ ꓟꓽ ꓟꓶ ꓟ ꓪꓴꓸ ꓠꓬꓲ ꓠꓲꓹ ꓟ ꓕꓽ ꓣꓳ= ꓠꓴ ꓔꓯ ꓪꓴ-ꓢ ꓢꓷˍ ꓡꓳ꓾ꓠꓴ ꓒ ꓕꓲꓸꓼ ꓗꓪ ꓔꓬꓹ ꓡꓳ꓾ꓠꓴ ꓔꓯ ꓬꓰ ꓙ ꓔꓬꓹ ꓡꓳ=

9 ꓦ ꓟ 23꓾ 2019

ꓡꓴ-ꓘ ꓕꓳꓽ ꓶꓽ ꓗꓪ ꓝꓲ ꓫ ꓢꓴ ꓤ-ꓘꓰ-ꓬꓴ ꓟꓸ ꓟꓲ ꓔꓯ ꓟꓳꓸꓼ ꓣꓳꓽ ꓛꓳꓸ ꓛꓬ ꓗꓷ ꓟ ꓝꓴꓲꓸ꓾ ꓪꓴ-ꓢ ꓔꓯ ꓐꓰ ꓗꓷꓹ ꓶꓽ ꓡꓰ ꓝꓲ ꓓꓴ ꓐꓴ ꓠꓬ ꓪꓴ-ꓢ ꓬꓲꓸ ꓠꓲꓹ ꓟ ꓗꓪ ꓠꓴ ꓔꓯ ꓟꓲ ꓡꓲ ꓝꓲ ꓟꓽ ꓐꓻ ꓡ=ꓪꓴ-ꓢ ꓠꓬ ꓣꓳꓽ ꓐꓴ ꓔꓯ ꓮ ꓕꓯˍ ꓟꓲ ꓓꓵꓽ ꓙ ꓔꓬꓹ ꓡꓳ꓾ ꓒꓵꓽ ꓗ ꓗꓶ ꓔꓬꓹ ꓡꓳ ꓐꓯˍ ꓟ ꓔꓯ ꓮ ꓕꓯˍ ꓟ ꓝꓲ ꓔ ꓠ ꓗˍ ꓡꓳ꓾ ꓐꓰ ꓮ-ꓐ-ꓠꓳ ꓗꓪ ꓔꓲꓺ ꓖꓶꓽˍ ꓟ ꓟꓲ-ꓢ ꓪꓽ ꓘꓴˍ ꓟ ꓗꓪ ꓚ ꓖꓶꓽ ꓗꓷ ꓟ ꓥꓳ=

ꓙꓱ-ꓡꓱ-ꓘꓳ ꓡꓳ ꓒꓱ ꓗꓪ ꓟ ꓤ-ꓘꓰ-ꓬꓴ ꓠꓬ ꓢꓲꓺ ꓒ ꓬꓰ-ꓢꓴ ꓓꓳꓽ ꓔꓯ ꓑ ꓙˍ ꓕꓯ ꓬꓰ-ꓢꓴ ꓔꓯ ꓟꓳ ꓠꓲꓹ ꓫꓵˍ ꓡꓳ꓾ ꓮ ꓡꓰ ꓡꓳ ꓫꓵꓽ ꓡꓽ ꓞꓳ ꓥ ꓡ? ꓐꓯˍ ꓟ ꓔꓯ ꓢꓷ ꓠꓲꓹ ꓫꓵˍ ꓡꓳ= ꓬꓲꓸ ꓠꓬ ꓞꓳ ꓔꓰꓼ ꓡꓰꓼ  ꓥ ꓟ ꓪꓴꓸ ꓠꓬꓲ ꓞꓳ ꓜꓴꓻ ꓘꓴꓽ ꓗꓪ ꓐꓰ ꓡꓳꓸ ꓟꓳ ꓟꓽ ꓓ ꓠꓬꓲ꓾ ꓬꓲꓸ ꓒ ꓕꓲꓸꓼ ꓗꓪ ꓟ ꓢꓲꓹ ꓜꓲ ꓕꓯꓽ ꓢꓲ ꓓꓯꓺ ꓙꓰ ꓢꓲ ꓡꓳꓸ ꓗꓷꓳ= ꓖꓳ ꓟ ꓔꓯ ꓬꓰ-ꓢꓴ ꓢꓷ ꓡꓰ ꓠꓬꓲ ꓢꓲꓹ ꓜꓲ ꓕꓯꓽ ꓢꓲ ꓗꓪ ꓐꓰ ꓬꓯꓼ ꓡ ꓠꓹ ꓟ ꓘꓴ ꓗꓷ ꓢꓲ꓾ ꓬꓲꓸ ꓦꓲꓻ ꓗꓪ ꓪꓰ ꓤ ꓟꓴ ꓢꓴ ꓬꓰˍ ꓥꓳ ꓐꓰ ꓐꓯ ꓖꓶꓽ ꓗꓷꓳ=

ꓖꓳ ꓡꓱ ꓐꓯ ꓗꓷ ꓟꓶˍ ꓟ ꓝꓴꓲꓸ ꓙꓳ ꓢꓴ꓾ ꓝꓲꓸ ꓫ ꓢꓴ ꓤ-ꓘꓰ-ꓬꓴ ꓠꓬ ꓮ ꓘꓶꓸ ꓗꓹ ꓛꓲꓽ ꓡꓰꓳ=ꓖꓳ ꓡꓱ ꓥˍ ꓟꓲ ꓚꓳꓺ ꓡꓳꓺ ꓗꓪ ꓔꓬꓹ ꓟ ꓞꓳ ꓤ ꓐꓴ ꓝꓴꓲꓸ ꓟꓳ ꓓꓴ ꓗꓷ ꓡꓻ ꓳ꓾ ꓚꓳꓺ ꓡꓳꓺ ꓗꓪ ꓔꓬꓹ ꓢꓴ ꓐꓴ ꓠꓬ ꓤ-ꓘꓰ-ꓬꓴ ꓔꓯ ꓝꓲ ꓫ ꓔꓬꓹ ꓟ ꓝꓴꓲ ꓙꓳ ꓢꓴ ꓕꓲꓽ ꓣꓳ ꓡꓰꓽ ꓟꓳˍ ꓡꓳ= ꓖꓳ ꓡꓰ ꓐꓰ ꓝꓴꓲ ꓙꓳ ꓢꓴ ꓦꓲꓻ ꓗꓪ ꓪꓰ ꓤ ꓬꓰ ꓔꓬꓹ ꓟ ꓔꓯ ꓮꓽ ꓟ ꓥˍ ꓟꓲ ꓟꓽ ꓠꓲꓹ ꓒꓴ=ꓖꓳ ꓡꓱ ꓥˍ ꓟꓲ ꓤ-ꓘꓰ-ꓬꓴ ꓐꓱ ꓶꓼ ꓠꓽ ꓪꓴꓽˍ ꓟ ꓠꓲꓹ ꓟ ꓡꓶꓸ ꓓꓴ ꓕꓲꓽ ꓟ ꓒꓬꓱꓼ ꓡꓻ ꓳ= ꓬꓲ ꓔꓯ ꓙꓳˍ ꓟ ꓖꓴꓽ ꓙꓴꓽ ꓕꓲꓽ ꓐꓶꓽ ꓞꓳ ꓫꓸ ꓐꓴ ꓔꓯ ꓐꓱꓻ ꓖꓶꓽ ꓗꓷꓳ꓾ ꓢꓲꓺ ꓒꓽ ꓬꓰ-ꓢꓴ ꓗꓪ ꓐꓰ ꓬꓲꓸ ꓚꓬꓴꓸ ꓟꓶ ꓡꓰꓳ=

ꓤ-ꓘꓰ-ꓬꓴ ꓤꓶꓻ ꓗꓪ ꓙ ꓫꓸ ꓓꓴ ꓮꓽ ꓟꓬꓹ ꓔꓳꓹ ꓜꓳꓽ ꓗꓷꓳ= ꓞꓳ ꓔꓰꓼ ꓡꓰꓼ ꓥ ꓟ꓾ ꓝꓲꓸ ꓫ ꓢꓴ ꓥ ꓟ ꓪꓴꓸ ꓠꓬꓲ ꓞꓳ ꓔꓱꓹ ꓕꓲꓽ ꓣꓳ ꓟꓽ ꓥ꓾ ꓞꓳ ꓜꓴꓻ ꓟꓲꓽ ꓙꓬꓽ ꓗꓪ ꓙꓰꓽ ꓟꓽ ꓑꓶꓸ꓾ ꓝꓴꓲꓸ ꓙꓳ ꓢꓴ ꓐꓯˍ ꓟ ꓟꓶˍ ꓡꓳ꓾ ꓫꓵꓽ ꓟꓽ ꓧꓳꓹ ꓢꓴ ꓟꓬꓹ ꓟ ꓪꓴꓸ ꓠꓬꓲ ꓢꓲꓹ ꓜꓲ ꓕꓯꓽ ꓢꓲ ꓓꓯꓺ ꓙꓰ ꓢꓲ ꓑꓬꓹ ꓔꓬꓹ ꓟ ꓟꓲ ꓥ ꓢꓰꓼˍ ꓡꓳ꓾ ꓢꓲꓺ ꓒ ꓬꓰ-ꓢꓴ ꓔꓯ ꓟꓳ ꓠꓲꓹ ꓫꓵˍ ꓥ ꓟꓲ ꓬꓲꓸ ꓡꓰ ꓐꓰ ꓝꓴꓲꓸ ꓙꓳ ꓢꓴ ꓔꓯ ꓬꓰ-ꓢꓴ ꓟꓳ ꓗꓷˍ ꓟ ꓔꓯˍ ꓟꓲ ꓫꓸ ꓔꓳ ꓔꓬꓹ ꓡꓳ=

ꓬꓲꓸ ꓤꓶꓻ ꓗꓪ ꓫꓵꓽ ꓪꓴꓽ ꓖꓳ ꓟ ꓗꓪ ꓐꓰ ꓢꓲꓺ ꓒꓽ ꓬꓰ-ꓢꓴ ꓡꓰ ꓐꓰ ꓙꓲꓻ ꓫꓬꓹ ꓢꓴ ꓔꓯ ꓟꓳ ꓪ ꓠꓹ ꓟ ꓗꓪ ꓐꓰ ꓗꓽ ꓕ ꓦꓽ ꓟꓶˍ ꓡꓳ꓾ ꓖꓳ ꓡꓱ ꓥˍ ꓟꓲ ꓝꓴꓲ ꓙꓳ ꓢꓴ ꓔꓯ ꓘꓳꓹ ꓣꓴ ꓠꓹ ꓟ꓾ ꓚꓬꓴꓸ ꓠꓹ ꓟ ꓢꓲꓺ ꓒꓽ ꓬꓰ-ꓢꓴ ꓔꓯ ꓗꓽ ꓕ ꓦꓽ ꓔ ꓟ ꓝꓴꓲ ꓐꓰ ꓝꓴꓲ ꓙꓳ ꓢꓴ ꓐꓴ ꓬꓰ ꓗꓷ ꓟ ꓟꓽ ꓙꓲꓻ ꓟ ꓮꓸ ꓡꓰ ꓕꓲꓽ ꓫꓵꓽ ꓥˍ ꓟꓲ ꓗꓽ ꓟꓽ ꓐꓻ ꓡ= ꓬꓰ-ꓢꓴ ꓠꓬ ꓝꓴꓲ ꓙꓳ ꓢꓴ ꓐꓴ ꓔꓯ ꓠꓲꓹ ꓠꓵˍ ꓡꓳ꓾ ꓝꓴꓲ ꓙꓳ ꓢꓴ ꓔꓬꓹ ꓗꓪ ꓙꓰˍ ꓡꓳ꓾ ꓚꓬꓴꓸ ꓙˍ ꓡꓳ= ꓝꓴꓲ ꓙꓳ ꓢꓴ ꓮ ꓡꓰ ꓕꓲꓽ ꓣꓳ ꓔꓯ ꓥˍ ꓟꓲ ꓬꓲ ꓟꓽ ꓟꓲ ꓡꓲ=

ꓖꓳ ꓟ ꓪꓴꓸ ꓠꓬꓲ ꓪꓽ ꓘꓴ ꓦꓲꓻ ꓗꓪ ꓝꓴꓲꓸ ꓙꓳ ꓢꓴ ꓐꓱ ꓶ꓾ ꓪꓴ-ꓢ ꓠꓬ ꓬꓲꓸ ꓪ ꓐꓴ ꓔꓯ ꓠꓲꓹ ꓠꓵˍ ꓡꓳ ꓐꓯˍ ꓟ ꓙꓵꓻ ꓠꓲꓹ ꓗꓪ ꓐꓰ ꓢꓯꓸ ꓔꓬꓹ ꓝꓲ ꓠ ꓗꓹ ꓡꓳ=ꓢꓲꓺ ꓒꓽ ꓬꓰ-ꓢꓴ ꓔꓯ ꓞꓳ ꓤ ꓮꓽ ꓟꓬꓹ ꓟ ꓠꓬ ꓝꓴꓲꓸ ꓐꓯˍ ꓡꓳ=ꓝꓴꓲꓸ ꓙꓳ ꓢꓴ ꓐꓴ ꓐꓰ ꓫꓸ ꓕꓱˍ ꓟ ꓪꓴꓸ ꓠꓬꓲ ꓾ ꓬꓲꓸ ꓪ ꓦꓲꓻ ꓗꓪ ꓪꓰ ꓤꓽ ꓬꓰ ꓔꓬꓹ ꓟ ꓪꓴꓸ ꓠꓬꓲ꓾ ꓐꓯˍ ꓢꓲ ꓞꓳ ꓤ ꓐꓴ ꓝꓴꓲꓸ ꓟꓳ ꓔꓬꓹ ꓡꓳ= ꓖꓳ ꓡꓱ ꓐꓯˍ ꓥ ꓟꓲ ꓢꓲꓺ ꓒꓽ ꓬꓰ-ꓢꓴ ꓠꓽ ꓝꓴꓲꓸ ꓙꓳ ꓢꓴ ꓕꓲꓽ ꓣꓳ ꓔꓯ ꓚꓬꓴꓸ ꓠꓹ ꓟ ꓐꓱ ꓶ ꓞꓳ ꓤ ꓐꓴ ꓝꓴꓲꓸ ꓟꓳˍ ꓟ ꓔꓯ ꓟꓽ ꓡꓳꓸ= ꓠꓴ ꓠꓬ ꓞꓳ ꓤ ꓐꓴ ꓟꓲꓽ ꓙꓬꓼ ꓗꓪ ꓮ ꓡꓲ ꓐꓰ ꓙꓽ ꓣꓳˍ ꓥˍ ꓟꓲ꓾ ꓫꓸ ꓔꓳˍ ꓥˍ ꓟꓲ꓾ ꓙꓳꓺ ꓔꓬꓹ ꓥˍ ꓟꓲ꓾ ꓬꓰ-ꓢꓴ ꓠꓴ ꓔꓯ ꓟꓳˍ ꓡꓳ=ꓬꓲ ꓠꓴ ꓐꓰ ꓫꓸ ꓕꓱꓻ ꓡꓹ ꓥꓳ= ꓕꓽ ꓙꓳꓺ=   

ꓤ-ꓘꓰ-ꓬꓴ ꓠꓬ ꓢꓲꓺ ꓒꓽ ꓬꓰ-ꓢꓴ ꓔꓯ ꓟꓳˍ ꓟ ꓡꓰꓽ ꓟꓽ ꓛꓲ꓾ ꓮ ꓡꓲ ꓡꓳ ꓫꓵꓽ ꓞꓳ ꓤ ꓥ ꓐꓯˍ ꓟ ꓔꓯˍ ꓟꓲ ꓢꓷꓸ ꓠꓲꓹ ꓫꓵˍ ꓡꓳ= ꓬꓲꓸ ꓥꓳ ꓡꓳꓸ ꓔ ꓟ꓾ ꓓꓵꓽ ꓙ ꓔ ꓟ ꓔꓯ ꓟꓳˍ ꓟ ꓬꓰ-ꓢꓴ ꓠꓬ ꓬꓲꓹ ꓠꓲꓹ ꓟ ꓘꓴꓽ ꓠꓯꓸꓼ ꓗꓪ ꓟ ꓠꓲꓹ ꓡꓶꓽ ꓔꓯ ꓐꓲꓻ ꓡꓶꓽ ꓡꓰ ꓝꓲ ꓠꓹ ꓟ ꓬꓰ-ꓢꓴ ꓠꓬ ꓬꓲꓸ ꓔꓯ ꓓꓽ ꓪꓴꓸ ꓫꓸ ꓕꓱꓻ ꓗꓷꓳ=ꓢꓲꓺ ꓒꓽ ꓬꓰ-ꓢꓴ  ꓧꓶꓸ ꓕꓯꓽ ꓝꓴꓲꓸ ꓙꓳ ꓢꓴ ꓔꓯ ꓟꓳˍ ꓡꓳ꓾ ꓠꓲꓹ ꓠꓵˍ ꓡꓳ꓾ ꓘꓳꓹ ꓣꓴˍ ꓡꓳ꓾ ꓫꓸ ꓕꓱˍ ꓡꓳ= ꓖꓳ ꓟ ꓠꓬ ꓬꓰ-ꓢꓴ ꓬꓲꓸ ꓚꓬꓴꓸ ꓙ ꓟ ꓚꓱꓹ ꓥ ꓡꓳ=ꓣꓳꓽ ꓔꓯ ꓢꓷˍ ꓟ ꓠꓲꓹ ꓠꓵˍ ꓟ ꓔꓯ ꓣꓳꓽ ꓢꓷˍ ꓡ ꓕꓯꓽ ꓠꓽ ꓣꓳꓽ ꓒꓳꓹ ꓡꓶꓸ ꓬꓲꓼ ꓡ ꓔꓬꓹ ꓟ ꓥ ꓡꓳ=

ꓤ-ꓘꓰ-ꓬꓴ ꓦꓲꓻ ꓗꓪ ꓛꓲ ꓬꓰˍ ꓕꓯ ꓤ-ꓘꓰ-ꓬꓴ ꓔꓯ ꓠꓲꓹ ꓒꓵꓽ ꓠꓲꓹ ꓡꓱꓹ ꓟ ꓦꓲꓻ ꓐꓰ ꓚꓬꓹ ꓪ ꓝꓲˍ ꓡꓳ=ꓞꓳ ꓤ ꓮꓽ ꓟꓬꓹ ꓘꓴꓽ ꓗꓪ ꓬꓲꓸ ꓠꓬ ꓝꓴꓲꓸ ꓙꓳ ꓢꓴ꓾ ꓬꓲꓸ ꓔꓯ ꓞꓳ ꓤ ꓐꓴ ꓟꓽ ꓘꓳꓹ ꓣꓴ꓾ ꓟꓽ ꓫꓸ ꓕꓱꓻ ꓾ ꓮꓽ ꓟ ꓥˍ ꓟꓲ ꓟꓽ ꓘꓳꓹ ꓣꓴ ꓾ ꓖꓳ ꓡꓱ ꓐꓯˍ ꓥˍ ꓟꓲ ꓢꓲꓺ ꓒꓽ ꓬꓰ-ꓢꓴ ꓔꓬꓹ ꓗꓪ ꓐꓰ ꓬꓲꓸ ꓐꓱ ꓶꓼ ꓠꓵ ꓠꓲꓹ꓾ ꓙ ꓗꓳ ꓠꓲꓹ꓾ ꓘꓳꓹ ꓣꓴˍ ꓟ ꓔꓯ ꓬꓲꓸ ꓟꓳ ꓪ ꓡꓰꓳ= ꓖꓳ ꓕꓯ ꓡꓰꓽ ꓬꓲꓸ ꓥˍ ꓟꓲ ꓬꓲꓸ ꓠꓲꓹ ꓟ ꓗꓹ ꓘꓶꓽ ꓔꓯ ꓒꓴꓽ ꓗꓷꓳ= ꓬꓲꓸ ꓚꓳꓺ ꓡꓳꓺ ꓗꓪ ꓟ ꓞꓳ ꓫꓸ ꓐꓴ ꓔꓯ ꓔꓳꓹ ꓙˍ ꓟ꓾ ꓬꓲꓸ ꓚꓳꓺ ꓡꓳꓺ ꓗꓪ ꓬꓲꓸ ꓚꓲꓸ ꓛꓬꓼ ꓘꓳꓹ ꓣꓴ ꓐꓻ ꓡ ꓗꓷꓳ= ꓮꓽ ꓡꓰ ꓥ ꓮꓽ ꓡꓰ ꓟꓳ ꓗꓷ ꓢꓲ꓾ ꓙꓲˍ ꓟ ꓕꓲꓽ ꓒꓳꓹ ꓗꓪ ꓐꓰ ꓡꓳꓸ ꓟꓳ ꓢꓴ ꓕꓲꓽ ꓣꓳ ꓗꓷ ꓡꓰꓳ=

ꓖꓳ ꓟ ꓡꓰ ꓐꓰ ꓘꓴ-ꓜꓲ-ꓞꓳ ꓠꓬ ꓝꓴꓲꓸ ꓙꓳ ꓢꓴ ꓐꓴ ꓚꓲꓸ ꓛꓬꓼ ꓤꓶꓻ ꓔꓯ ꓢꓷꓸ ꓢꓲ꓾ ꓚꓳꓺ ꓡꓳꓺ ꓗꓪ ꓙꓲˍ ꓟ ꓡꓽ ꓞꓳ ꓒꓬꓱꓼ ꓡ ꓠꓹ ꓟ ꓧꓳꓽ ꓟꓳꓸ ꓖꓶꓽ ꓖꓴ ꓒꓬꓱꓼ ꓠ ꓗꓹ ꓡꓳ=ꓞꓳ ꓤ ꓮꓽ ꓙꓵꓽ ꓐꓱ ꓶꓼ ꓔꓱꓹ ꓚꓵˍ ꓟ ꓙꓲˍ ꓟ ꓗꓹ ꓛꓲꓽ ꓓꓴ ꓔꓯ ꓧꓪꓺ ꓟꓳ ꓖꓴ ꓒꓬꓱꓼ ꓠ ꓗꓹ ꓡꓳ=

ꓣꓳꓽ ꓐꓴ ꓠꓬ ꓠꓱꓸ ꓐꓯꓼ ꓢꓴ ꓢꓯꓼ ꓐꓽˍ ꓟ ꓔꓯꓸ ꓝꓴꓲꓸ ꓐꓯ ꓢꓴ ꓟꓽ ꓥ= ꓬꓲꓸ ꓪ ꓤꓶꓻ ꓔꓯ ꓛꓵꓹ ꓔꓴꓺ ꓖꓶꓽ ꓢꓴ ꓥ ꓠꓯˍ ꓡꓳ= ꓪꓴ-ꓢ ꓠꓬ ꓝꓴꓲꓸ ꓙꓳ ꓢꓴ ꓔꓯ ꓫꓱꓸ ꓤ ꓠꓲꓹ ꓟꓳꓸ ꓖꓶꓽ ꓢꓲ ꓘꓳꓹ ꓣꓴ ꓖꓶꓽˍ ꓟ ꓡꓰ ꓐꓰ꓾ ꓣꓳꓽ ꓥˍ ꓟꓲ ꓠꓱꓸ ꓐꓯꓼ ꓢꓴ ꓔꓯ ꓠꓵ ꓠꓲꓹ ꓟꓳꓸ ꓖꓶꓽ ꓢꓲ ꓘꓳꓹ ꓣꓴ ꓖꓶꓽ ꓢꓴ ꓒꓬꓱꓼ ꓡ ꓝꓲ ꓡꓯ꓾ꓐꓰ ꓔꓲꓺ ꓒꓽ ꓪ ꓔꓲ Francis ꓡꓰ ꓚꓺ ꓖꓶꓽ ꓗꓷ ꓟ ꓥꓳ=

Credit to Vatican News

https://bit.ly/2n6YUbb                         ...