ꓞꓳ ꓡꓱ ꓐꓴ ꓠꓬ ꓘꓴ ꓜꓲꓼ ꓞꓳ ꓗꓪ ꓟ ꓢꓯꓸ ꓔꓬ ꓠꓹ ꓟ ꓥꓳ ꓡꓳꓸ ꓓꓴ ꓥ ꓡꓳ꓾

ꓞꓳ ꓡꓱ ꓐꓴ ꓠꓬ ꓘꓴ ꓜꓲꓼ ꓞꓳ ꓗꓪ ꓟ ꓢꓯꓸ ꓔꓬ ꓠꓹ ꓟ ꓥꓳ ꓡꓳꓸ ꓓꓴ ꓥ ꓡꓳ꓾

ꓔꓲꓺ ꓒ ꓪ ꓔꓲ ꓡꓰ ꓥꓪꓽ ꓧꓪꓹ ꓕꓲ ꓧꓪꓹ ꓟ “Apostolic Exhortation” ꓗꓪ ꓞꓳ ꓡꓱ ꓐꓴ ꓔꓯ ꓢꓲ ꓒ ꓬꓰ-ꓢꓴ ꓐꓰ ꓫꓱꓹ ꓡꓯꓽ ꓘꓳ ꓟ ꓗꓹ ꓛꓲ_ ꓟ ꓓꓳꓽ ꓔꓯ ꓢꓷꓸ ꓙ ꓟꓳ ꓙ ꓟꓸ ꓖꓶ_ ꓟ ꓡꓰ ꓐꓰ ꓬꓲ ꓪ ꓢꓯꓼ ꓔꓯ ꓑ ꓙ ꓠ ꓗꓪ ꓛꓲ ꓢꓯꓼ ꓕꓵꓼ ꓠꓹ ꓟ ꓐꓱ ꓶ ꓢꓯꓼ ꓖꓶ ꓗꓷ ꓟ ꓥꓳ꓾

ꓔꓲꓺ ꓒ  ꓪ ꓔꓲ ꓡꓰ ꓡꓳꓹ ꓬꓰ ꓟ 2018 ꓘꓳꓼ ꓢꓬꓠꓳꓓ ꓗꓪ ꓞꓳ ꓡꓱ ꓐꓴ ꓔꓯ “ꓙꓵꓻ ꓠꓲꓹ ꓐꓰ ꓧꓪ ꓜ ꓧꓪ ꓓꓳ ꓠꓹ ꓟ ꓟꓬꓱꓽ” ꓔꓯ ꓢꓷꓸ ꓠꓹ ꓟ ꓙ ꓜꓲꓼ ꓠꓹ ꓟ ꓐꓰ ꓕꓳ ꓶ ꓐꓳ ꓑꓶ ꓗꓷ ꓟ ꓥꓳ= ꓕꓱ ꓕꓲ ꓧꓪꓹ ꓝꓮꓲ ꓥꓪꓽ ꓧꓪꓹ ꓕꓲ ꓧꓪꓹ ꓟ “Apostolic Exhortation” ꓞꓳ ꓡꓱ ꓢꓳ ꓜꓲꓼ ꓓꓴ ꓗꓪ “ꓢꓯꓸ ꓔꓬ ꓟ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓬꓲ ꓔꓯ ꓙꓵꓻ ꓢꓲ ꓢꓯꓸ ꓔꓬ ꓠꓹ ꓟ ꓐꓰ ꓐꓯ ꓡꓳꓹ ꓬꓰ ꓟ ꓥꓳ=

ꓡꓳꓹ ꓬꓰ ꓟ ꓠꓽ ꓕꓲ ꓠꓬꓲ ꓕꓯ ꓔꓲꓺ ꓒ ꓪ ꓔꓲ ꓐꓯ ꓘꓶꓽ ꓗꓪ ꓐꓰ “ꓮ ꓙꓵ ꓠꓯꓼ ꓗꓪ ꓫꓸ ꓓꓴ ꓙꓳ_ ꓟ ꓔꓯ ꓐꓯ ꓡꓳꓹ ꓬꓰ ꓟ ꓥꓳ” “ꓫꓸ ꓓꓴ ꓐꓰ ꓘꓶ ꓡꓶꓽ ꓓꓴ ꓮ ꓟꓬꓹ ꓙꓳ_ ꓟ ꓕꓱ ꓟꓲ ꓠꓯ ꓗꓪ ꓠꓲꓹ ꓟ ꓐꓬ ꓡꓰ ꓢꓲ ꓙꓳꓺ ꓔꓬ ꓟ ꓞꓳ ꓡꓱ ꓐꓴ ꓐꓱ ꓶ ꓥꓪ ꓐꓯ ꓘꓶꓽ ꓠꓬ ꓬꓲ ꓪ ꓐꓱ ꓶ ꓥꓳ ꓡꓳꓸ ꓓꓴ ꓕꓲ ꓟ ꓞ ꓗꓷ ꓡꓰ ꓠꓹ ꓟ ꓐꓱ ꓶ” ꓓꓵꓽ ꓙ ꓥꓳ ꓡꓳꓸ ꓔꓬ ꓟ ꓔꓯ ꓐꓯ ꓔ ꓡꓳ=

ꓢꓯꓸ ꓔꓬ ꓟ ꓪꓴ-ꓢ ꓠꓬ ꓬꓲ ꓟꓽ ꓡꓳꓹ ꓬꓰ ꓟ ꓠꓵꓻ ꓠꓲꓹ ꓐꓰ ꓣꓳ ꓔꓯ ꓚꓵ ꓚꓵ ꓔꓱ ꓔꓱꓹ ꓐꓰ ꓠꓲꓹ ꓠꓵ_ ꓟ ꓚꓱꓹ ꓐꓯ ꓔ ꓡꓳ= ꓞꓳ ꓡꓱ ꓐꓴ ꓔꓯ ꓬꓲ ꓐꓰ ꓕꓲ ꓪ ꓛꓳꓽ ꓒꓯꓹ ꓡꓰ ꓐꓰ ꓕꓲ ꓪ ꓙꓻ ꓫꓱꓽ ꓢꓲ꓾ ꓣꓳ ꓤꓶꓻ ꓠꓯꓼ ꓗꓪ ꓬꓲ ꓔꓯ ꓘꓳꓹ ꓣꓴ ꓢꓲ ꓣꓳ ꓤꓶꓻ ꓗꓪ ꓔꓳꓹ ꓜꓳ ꓡ ꓟ ꓫꓸ ꓓꓴ꓾ ꓥꓳ ꓡꓳꓸ ꓓꓴ ꓗꓹ ꓛꓲ ꓓꓴ ꓔꓯ ꓬꓲ ꓐꓰ ꓕꓲ ꓪ ꓘꓳꓹ ꓣꓴ ꓠꓹ ꓟ ꓔꓯ ꓐꓯ ꓔ ꓡꓳ=

ꓣꓳ ꓠꓬ ꓪꓴ-ꓢ ꓐꓰ ꓕꓲ ꓪ ꓫꓱꓹ ꓟ ꓡꓰ ꓐꓰ ꓘꓳꓹ ꓣꓴ ꓟꓶ ꓡ ꓟ ꓗꓹ ꓛꓲ ꓓꓴ ꓔꓯ ꓠꓱꓸ ꓐꓯꓼ ꓔꓯ ꓢꓷꓸ ꓙ ꓟꓳ ꓙ ꓠꓹ ꓟ ꓠꓬ “ꓪꓴꓽ ꓡꓳꓹ ꓬꓰ ꓟ ꓢ-ꓢꓲ-ꓠ” ꓥ ꓡꓳ= ꓘꓴ ꓟꓶ ꓡ ꓟ ꓔꓯ ꓓꓵꓽ ꓙ ꓢꓲ꓾ ꓬꓲ ꓡꓰ ꓢꓯꓼ ꓖꓶ ꓡ ꓟ ꓢꓯꓼ ꓔꓯ ꓠ ꓠꓹ ꓢꓲ ꓑ ꓙ ꓠꓹ ꓟ ꓢꓯꓼ ꓕꓵꓼ ꓠ ꓔ ꓡꓳ= ꓔꓲꓺ ꓒ ꓪ ꓔꓲ ꓡꓰ ꓞꓳ ꓡꓱ ꓐꓴ ꓔꓯ “ꓢꓲ ꓒ ꓬꓰ-ꓢꓴ ꓣꓳ ꓐꓰ ꓕꓲ ꓪ ꓢꓯꓸ ꓔꓬ ꓙ ꓫꓱꓽ_ ꓟ ꓠꓬ ꓣꓳ ꓠꓯꓼ ꓗꓪ ꓔꓳꓹ ꓜꓳ ꓡꓳꓹ ꓬꓰ ꓟ ꓔꓯ ꓝꓮꓲ ꓓꓵꓽ ꓙ ꓡꓰ ꓟ ꓥꓳ꓾ ꓕꓱ ꓟ ꓠꓬ ꓮ ꓟꓶ ꓣꓳ ꓢꓯꓸ ꓔꓬ ꓟ ꓚꓱꓹ ꓗꓪ ꓢꓯꓼ ꓖꓶ_ ꓟ ꓡꓰ ꓐꓰ ꓣꓳ ꓡ ꓠꓹ ꓟ ꓤꓶꓻ ꓗꓪ ꓥ ꓟꓲ ꓓꓵꓽ ꓙ ꓡꓰ ꓝꓲ_ ꓟ ꓔꓯ ꓬꓰ ꓙ_ ꓟ ꓥꓳ꓾ ꓐꓰ ꓐꓯ ꓔ ꓡꓳ=

ꓘꓴ ꓜꓲꓼ ꓞꓳ ꓠꓬ ꓪꓴ-ꓢ ꓠꓲꓹ ꓡꓶꓽ ꓙꓳ_ ꓟ ꓔꓯ ꓠ ꓠꓹ ꓔ ꓡꓳ꓾ ꓬꓲ ꓐꓰ ꓫꓸ ꓕꓱ ꓢꓲ꓾ ꓠꓲꓹ ꓟ ꓙ ꓜꓲꓼ ꓢꓲ ꓢꓯꓼ ꓕꓵꓼ ꓙꓻ ꓫꓱꓽ_ ꓟ ꓔꓯ ꓠꓲꓹ ꓫꓵ_ ꓡꓳ꓾ ꓣꓳ ꓮ ꓟꓶ ꓛꓳ ꓔꓬ ꓟ ꓠꓬ ꓡꓳꓹ ꓬꓰ ꓟ 2018 ꓘꓳꓼ ꓢꓬꓠꓳꓓ ꓗꓪ ꓬꓰ ꓗꓷ ꓟ ꓢꓲꓹ ꓪꓰ ꓢꓲꓹ ꓢꓶꓽ ꓥ ꓡꓳ ꓐꓰ ꓐꓯ ꓔ ꓡꓳ= ꓔꓲꓺ ꓒ ꓪ ꓔꓲ ꓡꓰ ꓞꓳ ꓡꓱ ꓐꓴ ꓔꓯ “ ꓠꓴ ꓪ ꓠꓬ ꓘꓴ ꓜꓲꓼ ꓞꓳ ꓘꓴꓽ ꓠꓯꓼ ꓗꓪ ꓟ ꓢꓯꓸ ꓔꓬ ꓥꓳ ꓡꓳꓸ ꓓꓴ ꓥꓳ꓾” ꓐꓰ ꓢꓯꓼ ꓖꓶ_ ꓟ ꓡꓰ ꓐꓰ ꓘꓴ ꓜꓲꓼ ꓗꓪ ꓢꓯꓼ ꓕꓵꓼ ꓢꓲ ꓐ ꓔꓬ ꓟ ꓑꓶ ꓓꓴ ꓫ ꓟꓳ ꓐꓰ ꓢꓯꓼ ꓖꓶ ꓐꓯ ꓡꓳꓹ ꓬꓰ ꓟ ꓥꓳ=