ꓟꓲꓽ ꓦꓲꓻ ꓕꓳꓽ ꓥꓳ ꓢꓯꓼ ꓓꓽ ꓟ ꓡꓰ ꓐꓰ ꓗꓷ ꓔꓬ ꓟ ꓣꓳ ꓢꓯꓸ ꓔꓬ ꓟ ꓤꓶꓻ ꓗꓪ ꓪꓴ-ꓢ ꓔꓯ ꓘꓴ ꓢꓲ꓾ ꓘꓳꓹ ꓣꓴ ꓓꓴ ꓬꓰ ꓡꓯ꓾

 ꓟꓲꓽ ꓦꓲꓻ ꓕꓳꓽ ꓥꓳ ꓢꓯꓼ ꓓꓽ ꓟ ꓡꓰ ꓐꓰ ꓣꓳ ꓢꓯꓸ ꓔꓬ ꓟ ꓤꓶꓻ ꓗꓪ ꓪꓴ-ꓢ ꓔꓯ ꓘꓴ ꓢꓲ꓾ ꓘꓳꓹ ꓣꓴ ꓓꓴ ꓬꓰ ꓡꓯ꓾

 ꓬꓰ-ꓢꓴ ꓡꓰ ꓛꓳꓽ ꓒꓯꓹ ꓐꓴ ꓔꓯ ꓡꓲ ꓗꓪ ꓓꓵꓽ ꓡꓰ ꓝꓲ ꓢꓲ꓾ ꓬꓲ ꓪ ꓔꓯ ꓧꓶꓸ ꓕꓯ ꓖꓳ ꓐꓽ ꓢꓲ ꓙꓰ ꓝꓲ ꓟ ꓔꓯ ꓔꓱꓹ ꓕꓽꓡꓰ ꓝꓲ_ ꓡꓳ= ꓔꓲꓺ ꓒ ꓪ ꓔꓲ ꓠꓬ ꓕꓱ ꓟ ꓗꓪ ꓐꓰ ꓬꓲꓸ ꓛꓳꓽ ꓒꓯꓹ ꓐꓴ ꓔꓯ ꓢꓲ ꓒꓽ ꓠꓬ ꓮ ꓙꓵꓽ ꓟ ꓪꓴ-ꓢ ꓥ ꓟ ꓔꓯ ꓢꓷꓸ ꓠꓹ ꓟ ꓐꓰ ꓣꓳ ꓤꓶꓻ ꓗꓪ ꓔꓳꓹ ꓜꓳ ꓡ ꓟ ꓫꓸ ꓓꓴ ꓟꓷꓼ ꓓꓴ꓾ ꓙꓳꓺ ꓓꓴ ꓮ ꓙꓵ ꓔꓯ ꓗꓳꓸ ꓙꓰ ꓝꓲ ꓐ ꓡ_ ꓟ ꓔꓯ ꓐꓯ ꓖꓶ ꓔ ꓡꓳ=

ꓖꓳ ꓕꓯ ꓟꓲꓽ ꓦꓲꓻ ꓕꓳꓽ ꓥꓳ ꓑꓶ ꓓꓴ ꓙꓳꓺ ꓡꓰ ꓓꓴ ꓗꓷ ꓔꓬ ꓟ ꓙꓵꓹ ꓠꓯꓺ ꓞꓲꓺ ꓟ ꓙꓵꓹ ꓗꓪ ꓡ ꓞꓳ ꓐꓴ ꓠꓬ ꓬꓲꓻ ꓙꓬ ꓔꓯ ꓡꓰ ꓙꓳꓺ ꓙꓳꓺ ꓡꓰ ꓐꓰ ꓡꓳꓸ ꓠꓬꓲ ꓔꓬ ꓟ ꓥꓳ= ꓝꓮꓲ ꓝꓲ ꓓꓴ ꓐꓴ ꓠꓬ ꓢꓯꓼ ꓓꓽ ꓟ ꓙꓳ_ ꓟ ꓟꓲꓽ ꓦꓲꓻ ꓕꓳꓽ ꓥꓳ ꓗꓪ ꓐꓰ ꓢꓲ ꓒꓽ ꓬꓰ-ꓢꓴ ꓬꓲꓻ ꓙꓬ ꓕꓯꓽ ꓢꓲ ꓫꓱꓽ ꓡ_ ꓟ ꓔꓯ ꓟꓳꓻ ꓗꓷ ꓠꓬ ꓬꓲꓸ ꓝꓲ ꓓꓴ ꓐꓴ ꓠꓬ ꓙꓳꓺ ꓦꓲꓸ ꓡꓰ ꓢꓲ꓾ ꓫꓵꓻ ꓗꓴꓸ ꓫꓵ ꓦ ꓥ ꓠꓳꓹ꓾ ꓐꓯ ꓢꓲ ꓙꓳꓺ ꓠꓬꓲ ꓘꓴ ꓔꓴ ꓡ ꓡꓳ= ꓝꓮꓲ ꓢꓲ ꓒ ꓬꓰ-ꓢꓴ ꓡꓰ ꓝꓮꓲ ꓬꓲ ꓪ ꓔꓯ ꓫꓸ ꓕꓱ ꓔ ꓟ ꓠꓬ꓾”ꓠꓲꓹ ꓪꓴꓽ ꓪꓴꓽ ꓔꓬ= ꓥꓪ ꓥ ꓡꓳ꓾ ꓕꓽ ꓙꓳꓺ꓾ ꓐꓰ ꓥ ꓡꓳ= ꓪꓴ-ꓢ ꓠꓬ ꓣꓳ ꓫꓸ ꓓꓴ ꓔꓳꓹ ꓜꓳ ꓡ ꓟ ꓗꓪ ꓮ ꓡꓰ ꓐꓰ ꓔꓬ ꓟ ꓚꓱꓹ ꓛꓳꓽ ꓒꓯꓹ ꓐꓴ ꓔꓯ ꓟꓸ ꓖꓶ ꓟ ꓥꓳ=

ꓢꓲ ꓒꓽ ꓬꓰ-ꓢꓴ ꓠꓬ ꓣꓳ ꓐꓰ ꓕꓲ ꓪꓼ ꓔꓬ ꓟ ꓡꓰ ꓐꓰ ꓣꓳ ꓔꓯ ‘’ꓠꓲꓹ ꓪꓴꓽ ꓪꓴꓽ ꓔꓬ꓾”ꓐꓰ ꓮ ꓕꓯ ꓟꓲ ꓐꓯ ꓖꓶ_ ꓡꓳ= ꓟꓲꓽ ꓦꓲꓻ ꓕꓳꓽ ꓥꓳ ꓡꓰ ꓐꓰ ꓗꓷ ꓔꓬ ꓟ ꓣꓳ ꓢꓯꓸ ꓔꓬ ꓟ ꓤꓶꓻ ꓗꓪ ꓣꓳ ꓕꓲ ꓣꓳ ꓕꓵꓼ ꓡꓰ ꓟꓽ ꓥ ꓟ ꓔꓯ ꓔꓲꓺ ꓒ ꓪ ꓔꓲ ꓡꓰ ꓐꓯ ꓖꓶ ꓔ ꓡꓳ= ꓣꓳ ꓤꓶꓻ ꓗꓪ ꓟꓲꓽ ꓦꓲꓻ ꓕꓳ ꓥꓳ ꓙꓱꓼ ꓡ ꓕꓯ ꓝꓲ ꓓꓴ ꓐꓴ ꓡꓰ ꓐꓰ ꓣꓳ ꓥ ꓟꓲ ꓪꓴ-ꓢ ꓔꓯ ꓘꓴ ꓢꓲ꓾ ꓘꓳꓹ ꓣꓴ ꓠꓹ ꓟ ꓥꓳ=

ꓒꓲ-ꓕꓱ ꓡꓰ ꓢꓲ ꓒꓽꓳ꓾ ꓠꓴ ꓔꓬ ꓗꓪ ꓡ ꓠꓹ ꓟ ꓥꓪ ꓔꓯ ꓕꓵꓼ ꓪꓽ ꓖꓶ ꓡꓯ꓾ ꓐꓰ ꓐꓯ ꓕꓯ꓾ ꓡꓯ꓾ ꓐꓰ ꓬꓰ-ꓢꓴ ꓗꓪ ꓐꓰ ꓘꓴ ꓟꓶ ꓢꓲ꓾ ꓡꓲ ꓗꓪ ꓐꓰ ꓬꓯꓼ ꓡ ꓕꓯ ꓟꓲꓽ ꓦꓲ ꓓꓽ ꓟ ꓙꓰꓼ ꓟ ꓔꓯ ꓟꓳꓻ ꓗꓷ ꓠꓬ ꓒꓲ-ꓕꓱ ꓠꓽ ꓙꓳꓺ ꓡꓰ ꓠꓬꓲ ꓦꓱꓺ ꓡꓰ ꓟ ꓗꓹ ꓢꓲ꓾ ꓢꓲ ꓒꓽꓳ꓾ ꓥꓪ ꓔꓯ ꓚꓬꓴ ꓙ ꓡꓯ꓾ ꓐꓰ ꓘꓴ_ ꓟ ꓥꓳ= ꓕꓱ ꓡꓱ ꓶꓽ ꓓꓰꓽ ꓘꓶꓽ ꓔꓯ ꓮ ꓕꓯ ꓟꓲ ꓣꓳ ꓓꓰꓽ ꓠꓹ ꓟ ꓥꓳ= ꓢꓲ ꓒꓽ ꓠꓬ ꓟꓽ ꓙꓲ_ ꓟ꓾ ꓙꓳꓺ ꓡꓰ ꓝꓲ ꓟꓗꓪ ꓐꓰ ꓣꓳ ꓔꓯ ꓚꓬꓴ ꓙ ꓐ ꓡ_ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ_ ꓡꓳ=

ꓣꓳ ꓤꓶꓻ ꓠꓯꓼ ꓗꓪ ꓣꓳ ꓜꓶꓽ ꓔꓬ ꓟ ꓡꓲ ꓕꓱ ꓟ ꓔꓯ ꓮ ꓟꓬ ꓛꓲ ꓢꓯꓼ ꓙꓳ_ ꓟ ꓟꓲꓽ ꓦꓲ ꓕꓳꓽ ꓥꓳ ꓙꓱꓼ ꓡ ꓔꓬ ꓥ ꓟꓲ ꓢꓯꓼ ꓕꓵꓼ ꓢꓲ꓾ ꓓ ꓔꓳꓹ ꓐ ꓡ ꓠꓹ ꓟ ꓥꓳ꓾ ꓢꓲ ꓒꓽ ꓠꓬ ꓣꓳ ꓔꓯ ꓫꓸ ꓓꓴ ꓔꓯ ꓣꓳ ꓜꓲ ꓢꓲ꓾ ꓧꓪꓸ ꓡꓰ ꓠꓹ ꓟ ꓐꓱ ꓶ ꓐꓯ ꓔ ꓟ ꓡꓰ ꓐꓰ ꓪꓴ-ꓢ ꓠꓯꓼ ꓗꓪ ꓙꓵꓻ_ ꓟ꓾ ꓚꓬꓴ ꓙ_ ꓟ꓾ ꓬꓲꓸ ꓐꓰ ꓜꓲ ꓡꓯꓼ ꓘꓳ ꓠꓹ ꓟ ꓚꓱꓹ ꓖꓶ ꓡ ꓥꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ=

ꓬꓲꓸ ꓟꓶꓽ ꓗꓪ ꓐꓰ ꓣꓳ ꓕꓱ ꓡꓱ ꓐꓰ ꓫꓸ ꓓꓴ ꓟꓲꓽ ꓦꓲꓻ ꓕꓳꓽ ꓥꓳ ꓐꓰ ꓔꓳꓹ ꓜꓳ ꓡ ꓕꓯ ꓣꓳ ꓚꓲꓸ ꓛꓬ ꓢꓯꓼ ꓕꓵꓼ ꓡ? ꓟꓽ ꓥ ꓠꓬ ꓪꓴ-ꓢ ꓔꓯ ꓬꓰ ꓙ ꓠꓹ ꓟ ꓘꓴ_ ꓡ? ꓐꓰ ꓔꓱꓹ ꓕ ꓠꓬꓲ ꓓꓴ ꓬꓰ ꓡꓯ= ꓬꓰ-ꓢꓴ ꓠꓬ ꓣꓳ ꓠꓯꓼ ꓗꓪ ꓙꓱꓼ ꓡ_ ꓟ ꓟꓲ ꓦꓲ ꓕꓳꓽ ꓥꓳ ꓟꓽ ꓞꓲ ꓟꓬ ꓠꓬꓲ ꓢꓯꓼ ꓙꓳ_ ꓡ ꓐꓰ ꓙꓵꓻ ꓡ? ꓖꓳ ꓡꓱ ꓥ ꓟꓲ ꓕꓱ ꓡꓱ ꓐꓰ ꓔꓳꓹ ꓜꓳ ꓡ ꓕꓯ ꓣꓳ ꓤꓶꓻ ꓡꓲ ꓔꓯ ꓙꓵꓽ ꓠꓹ ꓟ ꓪꓴ-ꓢ ꓔꓯ ꓘꓴ_ ꓡ? ꓐꓰ ꓔꓱꓹ ꓕ ꓠꓬꓲ ꓠꓹ ꓟ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓔ ꓡꓳ=