ꓠꓲꓹ ꓟ ꓘꓴꓽ ꓗꓪ ꓐꓰ ꓙꓲ_ ꓟ ꓓꓳꓽ ꓫꓵꓽ ꓔꓯ ꓐꓯ ꓑꓶ ꓓꓴ ꓬꓰ꓾(communicate Gospel with the heart)

ꓠꓲꓹ ꓟ ꓘꓴꓽ ꓗꓪ ꓐꓰ ꓙꓲ_ ꓟ ꓓꓳꓽ ꓫꓵꓽ ꓔꓯ ꓐꓯ ꓑꓶ ꓓꓴ ꓬꓰ꓾

ꓡꓳꓹ ꓬꓰ ꓟ ꓙꓵꓹ ꓕꓯ ꓝꓣꓮꓠꓚꓰ ꓗꓴꓷꓼ ꓗꓪ ꓐꓰ ꓓꓳꓽ ꓫꓵꓽ ꓣꓴ ꓢꓴ ꓐꓴ ꓐꓰ ꓜꓲ ꓡꓯꓽ ꓘꓳ ꓟ ꓙꓵꓹ ꓕꓯ ꓙꓲ_ ꓟ ꓠꓲꓹ ꓟ ꓐꓰ ꓓꓳꓽ ꓫꓵꓽ ꓔꓯ ꓐꓯ ꓑꓶ ꓠꓹ ꓟ ꓐꓯ ꓔ ꓟ ꓥꓳ= ꓓꓳꓽ ꓫꓵ ꓣꓴ ꓢꓴ ꓟꓬꓱꓽ ꓚꓱꓹ꓾ ꓠꓵ ꓠꓲꓹ ꓐꓰ ꓐꓯ ꓑꓶ ꓠꓹ ꓟ ꓐꓰ ꓠꓵ ꓠꓲꓹ ꓙꓳ ꓠꓬ ꓐꓯ ꓟ ꓬꓲ ꓕꓲ ꓟꓴ ꓢ ꓟ ꓐꓰ ꓢꓯꓼ ꓖꓶ ꓔ ꓡꓳ=

ꓔꓲꓺ ꓒ ꓪ ꓔꓲ ꓡꓰ ꓮ ꓟꓶ ꓤꓶꓻ ꓟꓲ ꓠꓯ ꓗꓪ ꓓꓳꓽ ꓫꓵ ꓠꓬ ꓮ ꓟꓬ ꓛꓲ ꓣꓳꓸ ꓚꓵ_ ꓟ ꓐꓰ ꓮ ꓟꓬ ꓛꓲ ꓬꓲ ꓢꓯꓼ ꓶꓸ ꓟ ꓚꓱꓹ꓾ ꓕꓱ ꓡꓱ ꓣꓳꓸ ꓚꓵ_ ꓟ ꓟꓬꓱꓽ ꓚꓱꓹ ꓔꓯ ꓬꓰ ꓔꓬ ꓕꓯ ꓬꓲ ꓙꓵꓹ ꓣꓴ ꓢꓲ ꓚꓲ ꓛꓬ ꓙꓽ ꓜꓲꓼ ꓠꓹ ꓟ ꓮ ꓘꓶꓸ ꓣꓳꓸ ꓚꓵ_ ꓟ ꓔꓯ ꓬꓲꓸ ꓪꓴꓸ ꓢꓯꓼ ꓖꓶ ꓔ ꓡꓳ= ꓕꓱ ꓕꓲ ꓙꓵꓹ ꓗꓪ ꓙ ꓡꓯꓽ ꓘꓳ ꓟ ꓐꓰ ꓪꓽ ꓘꓴ ꓠꓹ ꓟ ꓡꓰ ꓟꓽ ꓞꓲ ꓐꓯ ꓘꓶꓽ ꓬꓲꓸ ꓚꓰꓻ ꓥ ꓟ ꓠꓵ ꓠꓲꓹ ꓐꓰ ꓔꓱꓹ ꓟ ꓔꓯ ꓧꓪ ꓠꓹ ꓟ ꓢꓯꓼ ꓖꓶ ꓔ ꓡꓳ= ꓔꓱꓹ_ ꓟ ꓓꓳꓽ ꓠꓬ ꓕꓲ ꓣꓳ ꓕꓵꓼ ꓡꓰ ꓓꓵꓽ ꓙ_ ꓟ꓾ ꓙꓳꓺ ꓟ ꓗꓪ ꓐꓰ ꓗꓸ ꓘꓶꓽ ꓐꓲꓸ ꓞꓲꓼ ꓓꓴ ꓟꓽ ꓥ ꓟ ꓐꓰ ꓮ ꓙꓵꓽ ꓠꓬ ꓙꓼ ꓗꓪ ꓐꓰ ꓡꓰ ꓟꓽ ꓥ ꓐꓰ ꓐꓯ ꓔ ꓟ ꓥꓳ=

ꓡꓴ-ꓢꓲ ꓡꓳ ꓒꓱ ꓗꓪ ꓐꓰ ꓢꓲ ꓫꓬ ꓢꓴ ꓔꓧꓰꓣꓰꓢꓰ ꓔꓯ ꓔꓲꓺ ꓒ ꓪ ꓔꓲ ꓡꓰ ꓙꓲ_ ꓟ ꓓꓳꓽ ꓐꓯ ꓑꓶ ꓢꓴ ꓐꓰ ꓐꓯ ꓖꓶ ꓔ ꓟ ꓥꓳ= ꓬꓲ ꓫꓵꓻ ꓟ 150 ꓘꓳꓼ ꓐꓰ ꓢꓲ ꓫꓬ ꓢꓴ ꓐꓰ ꓘꓳꓹ ꓣꓴ ꓟꓶ ꓗꓷ ꓟ 100 ꓘꓳꓼ ꓐꓲ_ ꓟ ꓚꓲꓸ ꓟꓶ ꓓꓴ ꓑꓮꓲ ꓔꓯ ꓝꓣꓮꓠꓚꓰ ꓡꓳ ꓒꓱ ꓗꓪ ꓬꓰ ꓗꓷ ꓟ ꓥꓳ= ꓬꓲ ꓔꓯ ꓔꓯꓺ ꓢꓳꓺ ꓢꓲ ꓔꓱꓹ_ ꓟ ꓔꓯ ꓠꓲꓹ ꓫꓵ_ ꓟ ꓟꓲ ꓠꓯ ꓐꓱ ꓶ ꓢꓯꓼ ꓕꓵꓼ ꓠꓹ ꓟ ꓢꓯꓼ ꓖꓶ_ ꓟ ꓥꓳ=

ꓓꓳꓽ ꓫꓵ ꓐꓰ ꓙꓻ ꓡꓯꓽ ꓘꓳ ꓠꓹ ꓟ ꓠꓬ ꓟꓮꓣꓗꓰꓔꓲꓠꓖ ꓕꓲ ꓟ ꓡꓰ ꓟꓽ ꓥ꓾ ꓛꓴ ꓙꓳ ꓠꓹ ꓟ ꓐꓱ ꓶ ꓥ ꓟꓲ ꓢꓯꓼ ꓪ ꓟꓽ ꓥ ꓟ꓾ ꓢꓲ ꓫꓬ_ ꓟ ꓔꓱ_ ꓟ ꓓꓳꓽ ꓫꓵ ꓔꓯ ꓡꓰ ꓟꓲ ꓠꓯ ꓡ ꓞꓳ ꓐꓴ ꓣꓱꓽ ꓬꓯꓼ ꓔꓬ ꓟ ꓔꓯ ꓐꓯ ꓔ ꓡꓳ=ꓖꓳ ꓟ ꓡꓰ ꓟꓽ ꓞꓲ ꓝꓣꓮꓠꓚꓰ ꓗꓪ ꓐꓰ ꓓꓳꓽ ꓫꓵ ꓣꓴ ꓢꓴ ꓐꓴ ꓔꓯ ꓬꓲꓸ ꓚꓱꓹ ꓢꓽ ꓚꓱꓹ ꓐꓰ ꓬꓰ ꓠꓹ ꓟ ꓢꓯꓼ ꓖꓶ_ ꓡꓳ=

ꓬꓲꓸ ꓪꓴꓸ ꓕꓲ ꓚꓱꓹ ꓠꓬ꓾ ꓠꓬꓲ ꓟꓳ ꓢꓲ ꓢꓷꓸ ꓙ ꓟꓳ ꓙ ꓠꓹ ꓟ ꓥ ꓡꓳ= ꓘꓴ ꓜꓲꓼ ꓞꓳ ꓐꓰ ꓞꓳ ꓜꓴꓻ ꓗꓪ ꓐꓰ ꓙꓲ_ ꓟ ꓚꓱꓹ ꓔꓯ ꓔꓱꓹ ꓔꓱꓹ ꓟꓳ ꓢꓲ ꓠꓱꓸ ꓐꓯꓼ ꓢꓴ ꓔꓯ ꓥ ꓟꓲ ꓕꓲ ꓞꓸ ꓙꓻ ꓡꓯꓽ ꓘꓳ ꓓꓴ ꓥ ꓡꓳ= ꓠꓬꓲꓽ ꓚꓱꓹ ꓕꓲ ꓚꓱꓹ ꓠꓬ꓾ ꓙꓲ_ ꓟ ꓓꓳꓽ ꓔꓯ ꓐꓯ ꓖꓶ_ ꓟ ꓙꓵꓹ ꓗꓪ ꓣꓳ ꓟꓽ ꓙ ꓟꓶ ꓟ ꓐꓯ ꓘꓶꓽ ꓔꓯ ꓐꓯ ꓔꓳꓹ ꓖꓶ ꓡ ꓗꓪ ꓛꓲ ꓠꓲꓹ ꓟ ꓟꓽ ꓐꓬ ꓠꓹ ꓟ ꓐꓰ ꓡ ꓞꓳ ꓞꓳ ꓜꓴꓻ ꓠꓬ ꓘꓴ ꓜꓲꓼ ꓞꓳ ꓗꓪ ꓐꓰ ꓐꓯ ꓖꓶ ꓡ ꓟ ꓶꓼ ꓓꓳꓽ ꓫꓱꓸ ꓓꓳ ꓔꓯ ꓠꓲꓹ ꓥꓳ_ ꓟ꓾ ꓢꓽ ꓚꓱꓹ ꓕꓲ ꓚꓱꓹ ꓠꓬ꓾ ꓛꓱꓻ ꓓꓳꓺ ꓢꓲ ꓓꓵꓽ ꓙ ꓟꓶ ꓠꓹ ꓟ ꓥ ꓢꓲ꓾ ꓟꓽ ꓫꓱꓸ ꓟ ꓕꓲ ꓢ ꓫꓱꓹ ꓟ ꓔꓯ ꓡꓰ ꓟꓬ ꓠꓬꓲ ꓛꓱꓻ ꓓꓳꓺ ꓠꓹ ꓟ ꓐꓱ ꓶ ꓢꓯꓼ ꓖꓶ ꓔ ꓟ ꓥꓳ=

ꓬꓲꓸ ꓟꓶꓽ ꓗꓪ ꓐꓰ “ꓠꓵ ꓠꓲꓹ ꓙꓳ ꓠꓬ ꓘꓶꓽ ꓡꓶꓽ ꓔꓬ ꓟ ꓣꓳ ꓤꓶꓻ ꓠꓬ ꓟꓬ ꓠꓬ ꓫꓬ ꓡꓰ ꓡ ꓥꓳ꓾” ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓔ ꓟ ꓥꓳ=