ꓢꓲ ꓒ ꓬꓰ-ꓢꓴ ꓠꓬ ꓣꓳ ꓠꓲꓹ ꓡꓱ ꓗꓹ ꓛꓲ ꓓꓴ ꓥꓳ꓾

ꓢꓲ ꓒ ꓬꓰ-ꓢꓴ ꓠꓬ ꓣꓳ ꓠꓲꓹ ꓡꓱ ꓗꓹ ꓛꓲ ꓓꓴ ꓥꓳ꓾

ꓢꓲ ꓒ ꓬꓰ-ꓢꓴ ꓠꓬ ꓣꓳ ꓠꓲꓹ ꓡꓱ ꓗꓹ ꓛꓲ ꓓꓴ ꓥ ꓡꓳ꓾ ꓣꓳ ꓙꓵꓻ ꓠꓲꓹ ꓛꓳꓽ ꓒꓯꓹ ꓥ ꓡꓳ꓾ ꓣꓳ ꓙꓻ ꓫꓱꓽ_ ꓟ ꓤꓶꓻ ꓗꓪ ꓬꓲ ꓠꓬ ꓣꓳ ꓐꓰ ꓕꓲ ꓪ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓠꓽ ꓢ ꓠꓬꓲ ꓕꓯ ꓢꓔꓸ ꓑꓰꓔꓰꓣ ꓪꓽ ꓘꓴ ꓦꓲꓻ ꓓꓽ ꓗꓪ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓔꓯ ꓐꓯ ꓔ ꓡꓳ=

“ꓢꓲ ꓒ ꓬꓰ-ꓢꓴ ꓠꓬ ꓣꓳ ꓠꓲꓹ ꓡꓱꓽ ꓗꓹ ꓛꓲ ꓓꓴ ꓥꓳ꓾” ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ= ꓙꓲ ꓢꓴ ꓢꓲ ꓤ ꓐꓴ ꓠꓯꓼ ꓗꓪ ꓮ ꓫꓵ ꓔꓳꓹ ꓜꓳ ꓡ ꓥ ꓟꓲ ꓣꓳ ꓕꓲ ꓛꓱ ꓗꓪ ꓦꓰꓼ ꓞꓹ ꓢꓲ ꓮ ꓕꓯ ꓟꓲ ꓔꓬ ꓟ ꓥꓳ= ꓣꓳ ꓬꓰ_ ꓟ ꓚꓱꓹ ꓮ ꓙꓵ ꓗꓪ ꓬꓲ ꓠꓬ ꓣꓳ ꓐꓰ ꓕꓲ ꓪꓼ ꓔꓬ ꓟ ꓥꓳ= ꓣꓳ ꓬꓲ ꓐꓰ ꓫꓱꓹ ꓡꓯꓼ ꓘꓳ ꓕꓯ ꓣꓳ ꓔꓯ ꓬꓲ ꓫꓵꓼ ꓗꓷ ꓡꓰ ꓝꓲ ꓢꓲ꓾ ꓣꓳ ꓔꓯ ꓠꓲꓹ ꓡꓱ ꓗꓹ ꓛꓲ ꓡꓰ ꓝꓲ_ ꓡꓳ=

ꓠꓲꓹ ꓠꓵ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ-ꓢ ꓶꓼ ꓓꓳ ꓫꓱꓸ ꓓꓳ ꓔꓯ ꓮ ꓡꓰ ꓐꓰ ꓢꓷꓸ ꓙ ꓟꓳ ꓙ ꓡ꓾ ꓐꓰ ꓕꓱ ꓟ ꓠꓬ ꓮ ꓟꓬ ꓗꓹ ꓛꓲ ꓠꓯꓹ ꓡ ꓐꓰ ꓥ ꓡꓳ꓾ ꓣꓳ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓠꓲꓹ ꓡꓱ ꓗꓹ ꓛꓲ ꓛꓲ ꓐꓰ ꓶꓼ ꓓꓳ ꓫꓸ ꓓꓳ ꓔꓯ ꓐꓯ ꓑꓶ ꓠꓹ ꓟ ꓥꓳ꓾ ꓟꓽ ꓥ ꓠꓬ ꓕꓲ ꓚꓱꓹ ꓐꓯ ꓠꓬ꓾ ꓢꓲ ꓒ ꓬꓰ-ꓢꓴ ꓔꓱꓹ ꓚꓵ_ ꓟ ꓚꓱꓹ ꓔꓯ ꓐꓯ ꓒꓬꓱꓽ ꓟꓽ ꓐ ꓡ ꓗꓷ ꓡꓰ ꓟ ꓥꓳ=

ꓪꓴ-ꓢ ꓶꓼ ꓓꓳ ꓫꓱꓸ ꓓꓳ ꓡꓴ-ꓘ ꓕꓳ ꓶ ꓗꓪ ꓛꓳꓽ ꓒꓯꓹ ꓠꓬꓲꓽ ꓣꓳ ꓠꓬ ꓬꓲ-ꓟ-ꓪꓴ-ꓢꓶ ꓟꓬꓱ ꓔ ꓟ ꓘꓹ ꓕꓲ ꓘꓹ ꓗꓪ ꓙꓰ ꓔꓬ ꓕꓯ ꓢꓲ ꓒ ꓬꓰ-ꓢꓴ ꓐꓰ ꓜꓲ ꓓꓳ ꓗꓸ ꓠꓯꓸ ꓠꓲꓹ ꓟ ꓗꓹ ꓛꓲ ꓟ ꓚꓱꓹ ꓔꓯ ꓟꓳꓸ ꓝꓮꓲ ꓓꓵ ꓙ ꓔꓱꓹ ꓕ ꓖꓶ_ ꓡꓳ= ꓮ ꓘꓶꓸ ꓒꓵꓽ_ ꓟ ꓒꓴ ꓫꓵꓻ ꓔꓯ ꓧꓪ ꓟꓳ ꓪ ꓢꓴ ꓡꓰ ꓐꓰ ꓥꓳ꓾ ꓬꓲ ꓪ ꓠꓬꓲꓽ ꓣꓳ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓜꓲ ꓢꓲ꓾ ꓠꓲꓹ ꓟ ꓗꓹ ꓛꓲ ꓡꓰ ꓢꓲ꓾ ꓬꓲ ꓪ ꓤꓶꓻ ꓔꓯ ꓒꓳꓹ ꓡꓰ ꓡꓶꓸ ꓡꓰ ꓝꓲ_ ꓟ ꓥꓳ=

ꓙꓲ ꓢꓴ ꓢꓲ ꓤ ꓐꓴ ꓢꓲ ꓒ ꓬꓰ-ꓢꓴ ꓐꓰ ꓠꓶꓽ ꓞꓹ ꓟ꓾ ꓗꓹ ꓛꓲ_ ꓟ ꓟꓽ ꓙꓳ꓾ ꓥꓳ ꓡꓳꓸ ꓓꓴ ꓟꓽ ꓙꓳ ꓠꓬ ꓣꓳ ꓐꓰ ꓕꓲ ꓪ ꓔꓬ ꓟ ꓔꓯ ꓟꓲ ꓡꓰ_ ꓟ ꓥꓳ ꓐꓰ ꓐꓯ ꓔ ꓡꓳ= ꓢꓲ ꓒ ꓬꓰ-ꓢꓴ ꓐꓰ ꓜꓲ ꓡꓯꓼ ꓘꓳ ꓟ ꓫꓱꓹ ꓡꓯꓼ ꓘꓳ ꓟ ꓠꓬ ꓣꓳ ꓔꓯ ꓮ ꓕꓯ ꓟꓲ ꓗꓹ ꓛꓲ ꓡꓰ ꓝꓲ_ ꓟ ꓥꓳ꓾ ꓟꓽ ꓥ ꓠꓬ ꓢꓲ ꓒ ꓬꓰ-ꓢꓴ ꓐꓰ ꓔꓱꓹ ꓚꓵ_ ꓟ ꓜꓲ ꓡꓯꓼ ꓘꓳ ꓓꓴ ꓟꓽ ꓥ ꓐꓰ ꓐꓯ ꓔ ꓡꓳ=

ꓔꓲꓺ ꓒ ꓪ ꓔꓲ ꓡꓰ ꓣꓳ ꓚꓲ ꓛꓬ ꓠꓲꓹ ꓟ ꓘꓴꓽ ꓗꓪ ꓐꓰ ꓔꓱꓹ ꓔꓱꓹ ꓐꓰ ꓓꓵꓽ ꓙ ꓔꓱꓹ ꓕ ꓠꓹ ꓟ ꓐꓯ ꓗꓷ ꓟ ꓥꓳ꓾

ꓮ ꓙꓵ ꓬꓲ ꓙꓵꓹ ꓕꓲ ꓑꓹ ꓣꓴ ꓢꓲ꓾ ꓢꓲ ꓒ ꓬꓰ-ꓢꓴ ꓠꓬ ꓥꓪ ꓠꓯꓼ ꓗꓪ ꓔꓬ ꓡꓳ꓾ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓜꓲ ꓠꓲꓹ ꓫꓵ_ ꓡꓳ꓾ ꓠꓴ ꓪ ꓙꓲ_ ꓟ ꓛꓳꓽ ꓒꓯꓹ ꓥ ꓡꓳ꓾ ꓠꓴ ꓠꓬ ꓘꓶꓺ ꓡꓶꓽ ꓓꓴ ꓔꓯ ꓠꓵ ꓠꓲꓹ ꓐꓰ ꓫꓬ ꓡꓰ ꓠꓹ ꓟ ꓬꓰ ꓖꓶ ꓢꓴ ꓥ ꓡꓳ꓾ ꓠꓴ ꓠꓬ ꓪꓴ-ꓢ ꓶꓼ ꓓꓳ ꓫꓸ ꓓꓳ ꓟ ꓬꓲ ꓪꓴꓸ ꓟ ꓥ ꓡꓳ꓾ ꓠꓴ ꓠꓬ ꓗꓹ ꓛꓲ ꓠꓲꓹ ꓬꓲ ꓚꓰ ꓥ ꓡꓳ꓾ ꓮꓟꓰꓠ ꓐꓰ ꓓꓵꓽ ꓙ ꓔꓱꓹ ꓕ ꓡꓰ ꓝꓲ_ ꓟ ꓥꓳ=