ꓠꓲꓹ ꓟ ꓫꓵꓺ_ ꓟ ꓠꓬ꓾ ꓢꓲ ꓒ ꓬꓰ-ꓢꓴ ꓬꓲ ꓠꓵꓻ ꓠꓲꓹ ꓐꓱ ꓶ ꓔꓱꓹ ꓟ ꓢꓷꓸ ꓙ ꓟꓳ ꓙ ꓓꓴ ꓖꓶ_ ꓡꓳ꓾

ꓠꓲꓹ ꓟ ꓫꓵꓺ_ ꓟ ꓠꓬ꓾ ꓢꓲ ꓒ ꓬꓰ-ꓢꓴ ꓬꓲ ꓠꓵꓻ ꓠꓲꓹ ꓐꓱ ꓶ ꓔꓱꓹ ꓟ ꓢꓷꓸ ꓙ ꓟꓳ ꓙ ꓓꓴ ꓖꓶ_ ꓡꓳ꓾

ꓔꓲꓺ ꓒ ꓪ ꓔꓲ ꓡꓰ ꓙꓲ ꓢꓴ ꓢꓲ ꓤ ꓐꓴ ꓔꓯ ꓢꓲ ꓒ ꓬꓰ-ꓢꓴ ꓬꓲ ꓠꓲꓹ ꓟ ꓫꓵꓺ_ ꓟ ꓔꓯ ꓣꓳ ꓢꓳꓺ ꓠꓹ ꓟ ꓐꓱ ꓶ ꓢꓯꓼ ꓖꓶ_ ꓟ ꓐꓰ ꓕꓱ ꓦꓲꓣꓔꓴꓰ ꓙꓲ_ ꓟ ꓠꓬ ꓪꓴ-ꓢ ꓬꓲ ꓠꓵꓻ ꓠꓲꓹ ꓔꓯ ꓢꓷꓸ ꓙ ꓟꓳ ꓙ ꓟ ꓗꓪ ꓙꓵꓻ ꓐ ꓡ ꓟ ꓕꓲ ꓟ ꓥ ꓡꓳ꓾ꓐꓰ ꓐꓯ ꓔ ꓡꓳ= ꓕꓱ ꓟ ꓡꓰ ꓐꓰ ꓠꓲꓹ ꓟ ꓫꓵꓺ ꓢꓲ꓾ ꓜꓲꓽ ꓐ ꓡ_ ꓟ ꓠꓲꓹ ꓟ ꓔꓯ ꓛꓳ ꓐ ꓡ ꓠꓹ ꓟ ꓐꓱ ꓶ ꓠꓬ ꓟꓽ ꓢ ꓥ ꓟꓲ ꓙꓲ ꓢꓴ ꓢꓲ ꓤ ꓕꓲ ꓣꓳ ꓐꓱ ꓶ ꓪꓴ-ꓢ ꓬꓲ ꓠꓵ ꓠꓲꓹ ꓔꓯ ꓢꓷꓸ ꓙ ꓟꓳ ꓙ ꓟ ꓚꓱꓹ ꓥ ꓟ ꓔꓯ ꓐꓯ ꓡꓳꓹ ꓬꓰ ꓟ ꓥꓳ=

ꓔꓲꓺ ꓒ ꓪ ꓔꓲ ꓡꓰ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓐꓰ ꓢꓔꓸ ꓑꓰꓔꓰꓣ ꓪꓽ ꓘꓴ ꓦꓲꓻ ꓓꓽ ꓗꓪ ꓜꓲ ꓠꓹ ꓟ ꓙ ꓖꓶ ꓔ ꓥ ꓟꓲ ꓟꓶꓽ ꓦ ꓑꓶ ꓓꓴ ꓒꓳ-ꓡꓳ ꓦꓲ ꓜꓲꓼ ꓦꓲꓻ ꓗꓪ ꓚꓲꓸ ꓢꓲ ꓫ ꓕꓱ ꓗꓷ ꓟ ꓥꓳ= ꓕꓱ ꓟ ꓡꓰ ꓐꓰ ꓟꓶꓽ ꓦ ꓑꓶ ꓓꓴ ꓬꓲꓸ ꓔꓶꓸ ꓚꓲꓸ ꓓꓴ ꓗꓷ ꓡꓰ ꓟ ꓔꓯ ꓔꓲꓺ ꓒ ꓪ ꓔꓲ ꓡꓰ “ꓠꓴ ꓪ ꓐꓱ ꓶ ꓬꓲꓸ ꓖ ꓠꓬ ꓮ ꓔꓲ ꓞ ꓣꓳ ꓡ ꓥꓳ꓾ ꓖꓳ ꓡꓱ ꓥ ꓟꓲ ꓣꓳ ꓠꓬ ꓟꓶꓽ ꓦ ꓟꓽ ꓒꓼ ꓡꓰ ꓟ ꓥꓳ꓾” ꓐꓰ ꓐꓯ ꓢꓲ ꓠꓲꓹ ꓟ ꓫꓵꓺ ꓖꓶ ꓡꓰ ꓟ ꓑꓶ ꓓꓴ ꓮ ꓙꓵ ꓔꓯ ꓫꓸ ꓟꓳ ꓐꓰ ꓥ ꓟꓲ ꓐꓯ ꓔ ꓡꓳ=

ꓔꓲꓺ ꓒ ꓪ ꓔꓲ ꓡꓰ ꓦꓲꓚꓰꓢ ꓐꓰ ꓦꓲꓣꓔꓴꓰ ꓔꓯ ꓬꓲ ꓙꓵꓹ ꓮ ꓙꓵꓹ ꓐꓯ ꓡꓳꓹ ꓬꓰ ꓟ ꓥꓳ꓾ ꓟꓬ ꓠꓬꓲ “ꓦꓲꓚꓰꓢ” ꓔꓯ ꓟꓳꓸ ꓐꓯ ꓡꓳꓹ ꓬꓰ ꓟ ꓥꓳ= ꓮ ꓟꓶ ꓠꓬ “ꓦꓲꓣꓔꓴꓰ” ꓚꓱꓹ ꓔꓯ ꓟꓳꓸ ꓐꓯ ꓖꓶ_ ꓡꓳ꓾ ꓝꓮꓲ “ꓑꓣꓴꓓꓰꓠꓚꓰ” ꓚꓱꓹ ꓔꓯ ꓐꓯ ꓡꓳꓹ ꓬꓰꓳ꓾ ꓡꓳꓹ ꓬꓰ ꓟ ꓕꓲ ꓫꓵ ꓠꓽ ꓗꓪ ꓠꓬ꓾ “ꓑꓮꓔꓲꓰꓠꓚꓰ” ꓠꓲꓹ ꓟ ꓫꓵꓺ ꓟ ꓚꓱꓹ ꓔꓯ ꓟꓳꓸ ꓐꓯ ꓡꓳꓹ ꓬꓰ ꓟ ꓥꓳ=

ꓠꓲꓹ ꓟ ꓫꓵꓺ ꓟ ꓬꓲꓸ ꓚꓰꓻ ꓠꓬ ꓠꓵꓻ ꓠꓲꓹ ꓥ ꓡꓳ꓾ ꓐꓰ ꓐꓯ ꓡꓳꓹ ꓬꓰ ꓟ ꓥꓳ= ꓝꓮꓲ ꓕꓲ ꓑꓹ ꓕꓲ ꓧꓪꓹ ꓠꓲꓹ ꓟ ꓫꓵꓺ ꓖꓶ ꓠꓹ ꓟ ꓠꓬ ꓟꓽ ꓢ꓾ ꓖꓳ ꓡꓱ ꓥ ꓟꓲ ꓪꓴ-ꓢ ꓠꓬ ꓣꓳ ꓔꓯ ꓠꓲꓹ ꓟ ꓫꓵꓺ ꓢꓲ ꓠꓲꓹ ꓠꓵ ꓔꓬ ꓟ ꓔꓯ ꓐꓯ ꓔ ꓡꓳ= “ꓐꓹꓐ꓾ ꓟꓹ ꓟ꓾ ꓠꓯꓺ ꓞꓲꓼ ꓟꓸ ꓒ꓾ ꓟꓬꓱꓽ ꓣꓱ ꓔꓬ ꓢꓴ ꓐꓰ ꓠꓻ ꓔꓬ ꓢꓴ ꓐꓴ” ꓮ ꓟꓬꓹ ꓔꓬ ꓟ ꓕꓱ ꓟꓲ ꓠꓯ ꓗꓪ ꓠꓲꓹ ꓟ ꓫꓵꓺ ꓢꓲ ꓜꓲ ꓠꓲꓹ ꓐꓰ ꓐꓲ ꓜꓲꓼ ꓡꓰ ꓠꓹ ꓟ ꓠꓬ ꓓꓵꓽ ꓙ ꓟꓶ ꓓꓴ ꓕꓲ ꓟ ꓡꓰ ꓐꓯ ꓔ ꓡꓳ=   

ꓣꓳ ꓕꓲ ꓧꓪꓹ ꓧꓪꓹ ꓠꓲꓹ ꓟ ꓫꓵꓺ ꓠꓹ ꓟ ꓟꓲ ꓡꓰ ꓫꓵ ꓥ ꓟꓲ ꓙꓳ_ ꓟ ꓔꓯ ꓢꓷꓸ ꓠꓹ ꓔ ꓡꓳ= ꓣꓳ ꓠꓬ ꓠꓲꓹ ꓟ ꓟꓽ ꓫꓵꓺ ꓫꓵꓺ ꓟꓽ ꓙꓲ_ ꓟ ꓔꓯ ꓟꓽ ꓙꓲ ꓐꓰ ꓟꓽ ꓘꓳꓹ ꓣꓴ ꓟ ꓠꓬ ꓣꓳ ꓟꓲ ꓠꓯ ꓞꓳ ꓤ ꓫꓱꓹ ꓡꓰ ꓥꓳ꓾ ꓝꓮꓲ ꓣꓳ ꓠꓬ ꓘꓴ ꓜꓲꓼ ꓞꓳ ꓚꓱꓹ꓾ ꓟꓬꓱꓽ ꓗꓪ꓾ ꓔꓬ ꓦꓲꓻ ꓗꓪ ꓣꓳ ꓠꓲꓹ ꓟ ꓔꓯ ꓜꓲ ꓠꓲꓹ ꓐꓰ ꓫꓵ ꓪꓴ ꓟꓽ ꓙꓳ ꓠ ꓬꓰ ꓠꓹ ꓟ ꓐꓱ ꓶ ꓛꓳ ꓠꓹ ꓟ ꓠꓬ ꓟꓽ ꓢ_ ꓟ ꓔꓯ ꓥ ꓟꓲ ꓐꓯ ꓔ ꓡꓳ=

ꓔꓲꓺ ꓒ ꓪ ꓔꓲ ꓡꓰ ꓠꓲꓹ ꓟ ꓫꓵꓺ ꓟ ꓠꓬ ꓣꓱꓽ ꓬꓯꓼ ꓟ ꓚꓱꓹ ꓡꓰ ꓟꓽ ꓥ ꓥ꓾ ꓣꓳ ꓐꓱ ꓶ ꓘꓴ ꓟꓶ ꓟ ꓚꓱꓹ ꓟꓲ ꓥ ꓡꓳ꓾ ꓐꓰ ꓐꓯ ꓔ ꓡꓳ= “ꓢꓲ ꓒ ꓬꓰ-ꓢꓴ ꓠꓬ ꓣꓳ ꓔꓯ ꓠꓲꓹ ꓟ ꓫꓵꓺ ꓔꓬ ꓟ ꓥꓳ꓾” ꓕꓱ ꓟ ꓠꓬ ꓣꓳ ꓔꓯ ꓠꓲꓹ ꓟ ꓔꓯ ꓵꓺ ꓠꓹ ꓟ ꓐꓱ ꓶ ꓘꓴ ꓔ ꓟ ꓥꓳ꓾”ꓢꓲ ꓒ ꓬꓰ-ꓢꓴ ꓬꓲ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓫꓵꓻ ꓙ ꓗꓷ ꓟ ꓔꓯ ꓡꓳꓸ ꓠꓬꓲ ꓠꓬ ꓬꓲ ꓠꓲꓹ ꓟ ꓮ ꓟꓬ ꓫꓵꓺ ꓢꓲ ꓜꓲ ꓡꓳꓹ ꓬꓰ ꓟ ꓔꓯ ꓣꓳ  ꓢꓳꓺ ꓢꓲ ꓛꓳ ꓐ ꓡ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓠꓹ ꓟ ꓢꓯꓼ ꓖꓶ ꓔ ꓡꓳ꓾