ꓠꓵ ꓠꓲꓹ ꓠꓬ ꓢꓴ ꓔꓯ ꓙꓵꓽ_ ꓟ ꓟꓽ ꓥ-ꓸ ꓝꓲ ꓓꓴ ꓟꓬꓱꓽ ꓥ ꓡꓳ=

ꓠꓵ ꓠꓲꓹ ꓠꓬ ꓢꓴ ꓔꓯ ꓙꓵꓽ_ ꓟ ꓟꓽ ꓥ-ꓸ ꓝꓲ ꓓꓴ ꓟꓬꓱꓽ ꓥ ꓡꓳ=

            ꓠꓽ ꓫꓵꓽ ꓠꓬꓲ Regina Coeli ꓙꓵꓹ ꓗꓪ ꓔꓲꓸꓸ ꓒ ꓪ ꓔꓲꓸ ꓡꓰ ꓢꓴ ꓐꓱ ꓶ ꓚꓲꓸ ꓛꓬ ꓔꓯ ꓡꓯꓼ ꓛꓱ ꓢꓲ-ꓸ ꓬꓰ-ꓢꓴ ꓠꓵ ꓠꓲꓹ ꓗꓪ ꓐꓰ ꓔꓬ ꓟ ꓔꓯ ꓔꓱ ꓕꓸ ꓟ ꓥꓳ= ꓬꓳ-ꓦ 15ꓽ9-17 ꓗꓪ ꓐꓰ ꓔꓲꓸ ꓸꓒ ꓪ ꓔꓲꓸ ꓡꓰ ꓙꓲ-ꓢꓴ ꓢꓲ ꓤ ꓕꓲꓽ ꓣꓳ ꓠꓬ ꓬꓰ-ꓢꓴ ꓠꓵ ꓠꓲꓹ ꓗꓪ ꓔꓬ ꓠꓬ ꓬꓲ ꓢꓶꓽ ꓓꓱꓼ ꓡ_ ꓟ ꓚꓱꓹ ꓔꓯ ꓟꓳ ꓪ ꓡꓳ= ꓬꓰ-ꓢꓴ ꓠꓬ ꓬꓲ ꓗꓹ ꓛꓲ ꓠꓲꓹ ꓠꓴ ꓪ ꓠꓯꓸꓼ ꓗꓪ ꓓꓯꓹ ꓢꓲ-ꓸ ꓠꓴ ꓪ ꓗ ꓛꓲ ꓠꓲꓹ ꓐꓲ ꓡ ꓝꓲ ꓠꓹ ꓟ ꓬꓲ ꓠꓵ ꓠꓲꓹ ꓗꓪ ꓐꓰ ꓔꓬ ꓠꓹ ꓟ ꓐꓯ_ ꓟ ꓥꓳ=

ꓪꓴ-ꓢ ꓠꓵ ꓠꓲꓹ ꓔꓯ ꓢꓷꓸ ꓠꓹ ꓟ

            ꓕꓱ ꓠꓵ ꓠꓲꓹ ꓠꓬ ꓪꓴ-ꓢ ꓠꓯꓼ ꓗꓪ ꓔꓬ ꓢꓲ-ꓸ ꓬꓰ-ꓢꓴ ꓗꓪ ꓐꓰ ꓣꓳ ꓠꓯꓼ ꓗꓪ ꓔꓬ ꓟ ꓥꓳ= ꓬꓰ-ꓢꓴ ꓡꓰ ꓣꓳ ꓔꓯ ꓖꓶ_ ꓟ ꓠꓵ ꓠꓲꓹ ꓠꓬ ꓪꓴ-ꓢ ꓡꓰ ꓬꓲ ꓔꓯ ꓖꓶ_ ꓟ ꓠꓵ ꓠꓲꓹ ꓡꓰ ꓐꓰ ꓥꓳ= ꓖꓳ ꓡꓱ ꓠꓲꓹ ꓠꓵ_ ꓟ ꓡꓰ ꓐꓰ ꓬꓰ-ꓢꓴ ꓠꓬ ꓣꓳ ꓔꓯ ꓣꓳ ꓟꓯꓼ ꓛꓳ ꓒꓯꓹ ꓡꓰ ꓐꓰ ꓫꓸ ꓕꓱ ꓢꓲ-ꓸ ꓪꓴ-ꓢ ꓡꓰ ꓣꓳ ꓔꓯ ꓢꓷꓸ ꓠꓹ ꓟ ꓬꓰ ꓖꓶ_ ꓟ ꓡꓰ ꓟꓽ ꓛꓲ ꓬꓲ ꓠꓬ ꓣꓳ ꓔꓯ ꓕꓲ ꓞꓲꓼ ꓕꓲ ꓑ ꓟꓲ ꓠꓯ ꓢꓯꓼ ꓟꓬ ꓪ ꓠꓹ ꓟ ꓐꓱ ꓶ ꓪꓴ-ꓢ ꓖꓶ ꓡ_ ꓟ ꓚꓬꓴ ꓙ_ ꓟ ꓟꓬꓱꓽ ꓗꓪ ꓣꓳ ꓔꓯ ꓥ ꓟꓲ ꓐ ꓡꓰ ꓝꓲ_ ꓟ ꓥꓳ= ꓣꓳ ꓥ ꓟꓲ ꓪꓴ-ꓢ ꓙꓵꓽ ꓗ ꓔꓯ ꓛꓳ_ꓟ ꓗꓪ ꓐꓰ ꓬꓰ-ꓢꓴ ꓠꓵ ꓠꓲꓹ ꓗꓪ ꓔꓬ ꓟ ꓥꓳ=

ꓕꓲ ꓣꓳ ꓐꓰ ꓕꓲ ꓣꓳ ꓠꓵ ꓠꓲꓹ

            ꓬꓰ-ꓢꓴ ꓡꓰ ꓥꓪ ꓠꓴ ꓪ ꓔꓯ ꓠꓲꓹ ꓠꓵ_ ꓟ ꓡꓰ ꓐꓰ ꓠꓴ ꓪ ꓕꓲ ꓣꓳ ꓡꓲ ꓕꓲ ꓣꓳ ꓠꓲꓹ ꓠꓵ ꓡꓯꓼ ꓘꓳ= ꓔꓲꓸꓸ ꓒ ꓪ ꓔꓲꓸ ꓡꓰ ꓙꓲ-ꓢꓴ ꓡꓰ ꓐꓰ ꓠꓵ ꓠꓲꓹ ꓐꓯ_ ꓟ ꓠꓬ ꓬꓰ-ꓢꓴ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓛꓲ ꓒꓯꓹ ꓞꓲꓽ ꓖꓶ_ ꓟ ꓡꓰ ꓐꓰ ꓣꓳ ꓥ ꓟꓲ ꓝꓲ ꓓꓴ ꓟꓬꓱꓽ ꓬꓰ_ ꓟ ꓗꓪ ꓣꓳ ꓚꓲ ꓛꓬ ꓡꓯꓼ ꓛꓱ ꓠ ꓔ ꓡꓳ=

ꓙꓵꓽ ꓠꓹ ꓟ ꓟꓽ ꓥ-ꓸ ꓝꓲ ꓓꓴ ꓟꓬꓱꓽ ꓥ ꓡꓳ

            ꓔꓲꓸꓸ ꓒ ꓪ ꓔꓲꓸ ꓡꓰ ꓬꓰ-ꓢꓴ ꓡꓰ ꓐꓰ ꓠꓵ ꓠꓲꓹ ꓠꓬ ꓟꓲ ꓠꓯ ꓗꓪ ꓐꓰ ꓠꓵ ꓠꓲꓹ ꓥ ꓟ ꓔꓯ ꓟꓽ ꓠꓲꓹ ꓥꓳ ꓠꓹ ꓟ ꓣꓱꓽ ꓬꓯꓼ_ ꓡꓳ= ꓪꓴ-ꓢ ꓡꓰ ꓣꓳ ꓔꓯ ꓠꓲꓹ ꓠꓵ_ ꓟ ꓡꓰ ꓐꓰ ꓠꓱꓸ ꓐꓯꓼ ꓔꓯ ꓠꓵ ꓠꓲꓹ ꓙꓳ_ ꓟ ꓠꓬ ꓣꓳ ꓐꓰ ꓔꓬ ꓟ ꓡꓽ ꓞꓳ ꓔꓯ ꓞꓳ ꓒꓵꓽ ꓠꓹ ꓟ ꓥ ꓡꓳ= ꓐꓯ_ ꓟ ꓠꓬ ꓠꓱꓸ ꓐꓯꓼ ꓔꓯ ꓙꓵꓽ ꓠꓹ ꓟ ꓟꓽ ꓥ=

ꓗꓹ ꓛꓲ_ ꓟ ꓔꓯ ꓢꓷꓸ ꓙ ꓟꓳ ꓙ ꓠꓹ ꓟ

            ꓔꓲꓸꓸ ꓒ ꓪ ꓔꓲꓸ ꓡꓰ ꓣꓳ ꓗꓹ ꓛꓲ ꓓꓴ ꓠꓬ ꓐꓲ ꓞꓲꓼ_ ꓟ ꓔꓯ ꓛꓲ ꓠꓹ ꓟ ꓬꓰ-ꓢꓴ ꓠꓵ ꓠꓲꓹ ꓗꓪ ꓐꓰ ꓙꓲ-ꓢꓴ ꓢꓲ ꓤ ꓐꓴ ꓔꓯ ꓘꓴ_ ꓟ ꓥꓳ= ꓪꓴ-ꓢ ꓠꓵ ꓠꓲꓹ ꓔꓯ ꓢꓷꓸ _ ꓟ ꓠꓬ ꓣꓳ ꓔꓯ ꓟꓲ ꓠꓯ ꓗꓪ ꓘꓶꓸꓹ ꓡꓶꓽ_  ꓟ ꓫꓸ ꓓꓴ ꓗꓪ ꓐꓰ ꓡꓲꓸ ꓙꓲ ꓠꓹ ꓟ ꓐꓱ ꓶ ꓬꓰ ꓙ ꓢꓲ-ꓸ ꓟꓬ ꓠꓬꓲ ꓙꓲ_ ꓟ ꓤꓶꓸꓹ ꓗꓪ ꓢꓯꓸ ꓔꓬ ꓟꓶ ꓝꓲ_ ꓡꓳ= ꓣꓳ ꓔꓱ_ ꓟ ꓢꓷꓸ ꓙ ꓟꓳ ꓙ ꓟ ꓠꓬ ꓬꓰ-ꓢꓴ ꓢꓯꓸ ꓬꓯꓼ ꓡ_ ꓟ ꓗꓹ ꓛꓲ ꓓꓴ ꓗꓪ ꓐ_ ꓟ ꓥꓳ=

ꓔꓲꓸꓸ ꓒ ꓪ ꓔꓲꓸ ꓡꓰ ꓬꓰ-ꓢꓴ ꓠꓵ ꓠꓲꓹ ꓗꓪ ꓐꓰ ꓔꓬ ꓠꓹ ꓟ ꓐꓰ ꓡꓽ ꓞꓳ ꓮ ꓙꓵꓽ ꓔꓯ ꓠꓲꓹ ꓠꓵ ꓠꓹ ꓟ-ꓸ ꓢꓯꓸ ꓬꓯꓼ ꓡ_ ꓟ ꓬꓰ-ꓢꓴ ꓗꓹ ꓛꓲ_  ꓟ ꓚꓱꓹ ꓔꓯ ꓢꓷꓸ ꓙ ꓟꓳ ꓙ ꓠꓹ ꓟ ꓐꓱ ꓶ ꓟꓹ ꓟ ꓟ-ꓡꓲ ꓡꓰ ꓣꓳ ꓔꓯ ꓡꓳꓸ ꓙ ꓔ ꓙ ꓝꓲ ꓐꓰ ꓪꓽ ꓘꓴ ꓢꓲ-ꓸ Regina Coeli ꓔꓯ ꓬꓲꓸ ꓟꓶꓽ ꓢꓲꓼ ꓗꓷ_ ꓡꓳ=

https://bit.ly/3eKOUwi