ꓣꓳ ꓠꓬ ꓮ ꓕꓯ ꓥ ꓟꓲ ꓪꓽ ꓘꓴꓽ ꓠꓹ ꓟ

ꓣꓳ ꓠꓬ ꓮ ꓕꓯ ꓥ ꓟꓲ ꓪꓽ ꓘꓴꓽ ꓠ ꓔ ꓡꓳ=

            ꓡꓽ ꓞꓳ ꓐꓴ ꓐꓰ ꓜꓲ ꓡꓯꓼ ꓘꓳ_ ꓟ ꓗꓪ ꓔꓲ-ꓒ ꓪ ꓔꓲ ꓡꓰ ꓪꓽ ꓘꓴꓽ_ ꓟ ꓠꓬ ꓮ ꓟꓬ ꓙꓲ ꓖꓴ ꓙꓳ_ ꓟ ꓢꓲ-ꓒ ꓬꓰ-ꓢꓴ ꓔꓯ ꓥꓳꓽ (3) ꓟ ꓔꓯ ꓕꓱꓹ ꓕꓽ_ ꓡꓳ= ꓔꓲ-ꓒ ꓪ ꓔꓲ ꓡꓰ ꓠꓽ ꓢ ꓠꓬꓲ ꓪꓽ ꓘꓴꓽ_ ꓟ ꓗꓪ ꓶꓼ ꓓꓳ ꓫꓱꓹ ꓓꓳ ꓚ_ ꓟ ꓗꓪ ꓢꓯꓼ ꓕꓵꓼ ꓠ ꓔ ꓟ ꓔꓯ ꓟꓸ ꓖꓶ_ ꓡꓳ= ꓬꓰ-ꓢꓴ ꓬꓲ ꓚꓲ ꓛꓬ ꓢꓯꓼ ꓕꓵꓼ ꓢꓲ-ꓸ ꓪꓽ ꓘꓴꓽ_ ꓟ ꓔꓯ ꓟꓸ ꓖꓶ ꓗꓷ_ ꓟ ꓥꓳ=

ꓪꓽ ꓘꓴꓽ_ ꓟ ꓔꓯ ꓥꓳꓽ

            ꓗ-ꓔꓳꓹ-ꓡꓲꓗ ꓟꓸ ꓖꓶ_ꓟ ꓠꓬ ꓪꓽ ꓘꓴꓽ_ ꓟ ꓔꓯ ꓥꓳꓽ (3) ꓚꓱꓹ ꓔꓯ ꓟꓳ ꓪ_ ꓡꓳ= ꓦꓬꓼ ꓔꓱ ꓫꓵ ꓗꓪ ꓣꓳ ꓟꓽ ꓓꓵꓽ ꓙ ꓕꓯ ꓡ_ ꓟ ꓦꓰ ꓤꓼ ꓔꓯ ꓥꓳꓽ ꓗꓪ ꓣꓳ ꓔꓯ ꓪꓽ ꓘꓴꓽ ꓠꓹ ꓟ ꓚꓱꓹ ꓟꓳ ꓪ_ ꓡꓳ= ꓣꓳ ꓣꓱꓽ ꓬꓯꓼ_ ꓟ ꓔꓯ ꓪꓴ-ꓢ ꓡꓰ ꓢꓷꓸ ꓔ ꓡꓳ= ꓶꓽ ꓓꓰꓽ_ ꓟ ꓠꓬ ꓪꓴ-ꓢ ꓔꓯ ꓢꓷꓸ ꓡꓰ ꓝꓲ ꓠꓹ ꓟ-ꓸ ꓪꓴ-ꓢ ꓘꓳꓹ ꓣꓴ ꓓꓴ ꓟꓽ ꓥ= ꓖꓳ ꓡꓱ ꓥ ꓟꓲ ꓣꓳ ꓠꓲꓹ ꓡꓶꓽ ꓐꓰ ꓥꓳ ꓡꓳꓸ ꓓꓴ ꓙꓳ ꓠꓹ ꓟ ꓣꓱꓽ ꓬꓯꓼ_ ꓡꓳ= ꓟꓽ ꓕꓱ_ ꓟ ꓐꓯ ꓟꓴ ꓫꓬꓹ ꓒꓽ ꓔꓯ ꓥꓳꓽ ꓗꓪ ꓣꓳ ꓙꓵꓸꓹ ꓠꓲꓹ ꓠꓬ ꓕꓲꓽ ꓐꓹ ꓐꓱ ꓶ ꓟꓽ ꓥ= ꓖꓳ ꓡꓱ ꓥ ꓟꓲ ꓟꓽ ꓙꓲ_ ꓟ ꓐꓰ ꓟꓽ ꓔꓱ_ ꓟ ꓗꓪ ꓐꓰ ꓟꓽ ꓓꓳꓸꓸ ꓪꓴ-ꓢ ꓐꓰ ꓐꓯ ꓔꓳꓹ ꓡꓯꓼ ꓘꓳ ꓗꓪ ꓛꓲ ꓪꓴ-ꓢ ꓠꓯꓼ ꓗꓪ ꓪꓽ ꓘꓴꓽ ꓓꓴ ꓢꓯꓼ ꓙꓳ_ ꓟ ꓥꓳ=ꓒ-ꓡꓲ-ꓢꓷ ꓐꓰ ꓝꓲꓸ ꓫ ꓢꓴ ꓔꓯ ꓥꓳꓽ ꓗꓪ ꓬꓰ-ꓢꓴ ꓡꓰ ꓪꓴ-ꓢ ꓠꓬ ꓢꓴ ꓔꓯ ꓟꓳꓸꓹ ꓟꓽ ꓟꓵ ꓢꓴ ꓪꓽ ꓘꓴꓽ ꓢꓯꓼ ꓔꓯ ꓟꓽ ꓠ ꓠꓹ ꓔ ꓟ-ꓸ ꓖꓳ ꓡꓱ ꓥ ꓟꓲ ꓚꓲ ꓛꓬ ꓙ ꓣꓳꓽ ꓢꓴ ꓔꓯ ꓠꓬ ꓪꓴ-ꓢ ꓡꓰ ꓠ ꓠꓹ ꓖꓶ_ ꓟ-ꓸ ꓐꓯ_ ꓡꓳ= ꓔꓲ-ꓒ ꓪ ꓔꓲ ꓡꓰ ꓠꓲꓹ ꓟ ꓙ ꓣꓳꓽ ꓓꓴ ꓟꓽ ꓙꓳ ꓠꓬ ꓔꓱ_ ꓟ ꓪꓽ ꓘꓴꓽ_ ꓟ ꓥ ꓟꓲ ꓟꓽ ꓙꓳ ꓐꓰ ꓐꓯ_ ꓡꓳ=

ꓣꓳ ꓠꓬ ꓮ ꓕꓯ ꓥ ꓟꓲ ꓪꓽ ꓘꓴꓽ ꓠ ꓔ ꓡꓳ=

            ꓮ ꓙꓵꓽ ꓠꓬ ꓙꓲ ꓖꓴ ꓟꓽ ꓙꓳ ꓐꓰ ꓓꓵꓽ ꓙ ꓟꓶ ꓗꓪ ꓛꓲ ꓣꓳ ꓠꓬ ꓮ ꓕꓯ ꓥ ꓟꓲ ꓪꓽ ꓘꓴꓽ ꓠꓹ ꓟ ꓣꓱꓽ ꓬꓯꓼ_ ꓡꓳ= ꓪꓽ ꓘꓴꓽ ꓓꓴ ꓫꓸ ꓔꓬ ꓢꓲ-ꓸ ꓪꓴ-ꓢ ꓠꓬ ꓣꓳ ꓪꓽ ꓘꓴꓽ ꓢꓯꓼ ꓔꓯ ꓟꓽ ꓠ ꓠꓹ ꓖꓶ ꓐꓰ ꓓꓵꓽ ꓙ ꓟꓶ ꓗꓪ ꓛꓲ ꓪꓽ ꓘꓴꓽ ꓠꓹ ꓟ ꓢꓯꓼ ꓕꓵꓼ ꓠ ꓔ ꓡꓳ= ꓖꓳ ꓡꓱ ꓫꓸ ꓔꓬ ꓟ ꓙꓵꓹ ꓗꓪ ꓪꓽ ꓘꓴꓽ ꓢꓴ ꓠꓬ ꓮ ꓕꓯ ꓥ ꓟꓲ ꓕꓲ ꓣꓳ ꓡꓰ ꓟꓽ ꓔꓬ= ꓬꓰ-ꓢꓴ ꓠꓬ ꓪꓽ ꓘꓴꓽ ꓢꓴ ꓐꓰ ꓕꓲ ꓪ ꓔꓬ ꓟ ꓥꓳ= ꓬꓰ-ꓢꓴ ꓐꓰ ꓕꓲ ꓪ ꓬꓰ-ꓢꓴ ꓠꓯꓼ ꓗꓪ ꓐꓰ ꓣꓳ ꓪꓽ ꓘꓴꓽ ꓠꓹ ꓟ ꓬꓲ ꓪꓽ ꓘꓴꓽ_ ꓟ ꓗꓪ ꓣꓳ ꓔꓯ ꓘꓳꓹ ꓣꓴ_ ꓡꓳ= ꓕꓱ ꓟ ꓠꓬ ꓢꓲ-ꓫꓬ-ꓟ-ꓦ ꓡꓰ ꓬꓰ_ ꓟ ꓟꓬꓱꓽ ꓥ ꓡꓳ= ꓬꓰ-ꓢꓴ ꓐꓰ ꓪꓽ ꓘꓴꓽ_ ꓟ ꓗꓪ ꓫꓱꓹ ꓡꓯꓼ ꓘꓳ_ ꓟ ꓠꓬ ꓡꓽ ꓞꓳ ꓕꓲ ꓣꓳ ꓪꓽ ꓘꓴꓽ_ ꓟ ꓗꓪ ꓬꓲ ꓡꓰ ꓮ ꓕꓯ ꓟꓲ ꓠꓲꓹ ꓫꓵ_ ꓟ ꓔꓯ ꓖꓶ_ ꓡꓳ ꓐꓰ ꓔꓲ-ꓒ ꓪ ꓔꓲ ꓡꓰ ꓚ_ ꓟ ꓥꓳ=

ꓪꓽ ꓘꓴꓽ ꓢꓴ ꓙꓲ-ꓢꓴ ꓢꓲ-ꓤ ꓠꓬ ꓮ ꓫꓵꓽ ꓔꓯ ꓟꓲ ꓟꓽ ꓙꓳ

ꓔꓲ-ꓒ ꓪ ꓔꓲ ꓡꓰ ꓪꓴ-ꓢ ꓔꓯ ꓙꓵꓸꓹ ꓠꓹ ꓟ ꓔꓯ ꓟꓴꓽ ꓖꓪ ꓕꓳ ꓶ ꓢꓲ ꓫꓬ ꓕꓳ ꓶ ꓝꓲꓸ ꓔꓯ ꓐꓯ ꓖꓶ_ ꓡꓳ= ꓬꓰ-ꓢꓴ ꓪꓽ ꓘꓴꓽ_ ꓟ ꓠꓬ ꓐꓲ ꓡꓰ ꓝꓲ ꓢꓲ-ꓸ ꓢꓲ-ꓒ ꓠꓯꓼ ꓗꓪ ꓔꓱ_ ꓟ ꓔꓯ ꓧꓪ ꓟꓶ ꓓ_ ꓡꓳ= ꓬꓰ-ꓢꓴ ꓡꓰ ꓣꓳ ꓪꓽ ꓘꓴꓽ_ ꓟ ꓤꓶꓸꓹ ꓗꓪ ꓐꓰ ꓣꓳ ꓐꓱ ꓶ ꓡꓰ ꓥꓳ= St. Augustine ꓡꓰ ꓐꓳ ꓔ ꓟ ꓗꓪ ꓬꓰ-ꓢꓴ ꓠꓬ ꓔꓲ-ꓒ ꓕꓲ ꓣꓳ ꓡꓰ ꓣꓳ ꓐꓱ ꓶ ꓪꓽ ꓘꓴꓽ ꓖꓶ_ ꓟ ꓥꓳ= ꓣꓳ ꓐꓱ ꓶ ꓪꓴꓸ ꓓꓵꓽ ꓣꓱꓽ ꓢꓴ ꓕꓲ ꓣꓳ ꓡꓰ ꓣꓳ ꓟꓲ ꓙꓬ ꓗꓪ ꓪꓽ ꓘꓴꓽ_ ꓟ ꓥꓳ= ꓖꓳ ꓟ ꓑꓶ ꓓꓴ ꓣꓳ ꓢꓯꓼ ꓠꓬ ꓪꓴ-ꓢ ꓠꓯꓼ ꓗꓪ ꓙꓳ ꓢꓲ-ꓸ ꓪꓴ-ꓢ ꓢꓯꓼ ꓥ ꓟꓲ ꓣꓳ ꓠꓯꓼ ꓗꓪ ꓔꓬ ꓟ ꓔꓯ ꓣꓳ ꓢꓷꓸ ꓠ ꓔ ꓡꓳ= ꓕꓱ ꓟ ꓠꓬ ꓪꓽ ꓘꓴꓽ ꓢꓴ ꓙꓲ-ꓢꓴ ꓢꓲ-ꓤ ꓐꓴ ꓙꓳ ꓠ ꓟꓽ ꓔ ꓟ ꓥ ꓡꓳ ꓐꓰ ꓐꓯ_ ꓡꓳ=