ꓣꓳ ꓪꓽ ꓘꓴꓽ_ ꓕꓯ ꓪꓴ-ꓢ ꓠꓬ ꓣꓳ ꓐꓰ ꓕꓲ ꓪ ꓪꓽ ꓘꓴꓽ ꓙ_ ꓡꓳ=

ꓣꓳ ꓪꓽ ꓘꓴꓽ_ ꓕꓯ ꓪꓴ-ꓢ ꓠꓬ ꓣꓳ ꓐꓰ ꓕꓲ ꓪ ꓪꓽ ꓘꓴꓽ ꓙ_ ꓡꓳ=     

       ꓣꓳ ꓫꓸ ꓔꓬ ꓟ ꓬꓲ ꓙꓵꓹ ꓗꓪ ꓙꓵ ꓠꓲꓹ ꓐꓰ ꓪꓽ ꓘꓴꓽ ꓠꓹ ꓟ ꓝꓴꓲ ꓡꓰ ꓓꓰꓽ ꓔꓬ_ ꓢꓴ ꓥ ꓟꓲ ꓙꓵ ꓠꓲꓹ ꓐꓰ ꓪꓽ ꓘꓴꓽ ꓠꓹ ꓟ ꓔꓲ-ꓒ ꓪ ꓔꓲ ꓡꓰ ꓢꓯꓼ ꓖꓶ_ ꓡꓳ= ꓬꓰ-ꓢꓴ ꓡꓰ ꓖꓳ ꓓꓱꓽ ꓔꓲꓹ ꓖꓶ ꓠꓹ ꓟ ꓐꓯ_ ꓕꓯ ꓖꓳ ꓓꓱꓽ ꓔꓲꓹ ꓒꓽ ꓬꓳ-ꓦ ꓡꓰ ꓗꓽ ꓔ ꓠꓲꓹ ꓫꓵ ꓢꓲ-ꓸ ꓥꓪ ꓔꓯ ꓖꓳ ꓓꓱꓽ ꓔꓲꓹ ꓖꓶ ꓠꓯꓹ ꓢꓴ ꓠꓽ ꓠꓴ ꓥꓳ= ꓮ ꓡꓲ ꓗꓹ ꓠꓬꓲ ꓠꓴ ꓠꓬ ꓥꓪ ꓔꓯ ꓖꓳ ꓓꓱꓽ ꓔꓲꓹ ꓝꓲ ꓠꓹ ꓟ ꓡ_ ꓡ? ꓐꓯ_ ꓡꓳ= ꓬꓰ-ꓢꓴ ꓡꓰ ꓬꓲ ꓔꓯ ꓒꓳꓹ ꓖꓶ_ ꓟ ꓠꓬ ꓮ ꓟꓶ ꓠꓬ ꓥ ꓝꓲ= ꓣꓳ ꓕꓱ ꓡꓱ ꓬꓰ ꓢꓲ ꓙꓲ ꓫꓬ_ ꓟ ꓮ ꓙꓵꓽ ꓬꓰ ꓐꓲ ꓡꓰ ꓝꓲ ꓙꓲꓽ ꓙꓳ_ ꓡꓳ ꓐꓯ_ ꓡꓳ= ꓬꓰ-ꓢꓴ ꓠꓬ ꓪꓴ-ꓢ ꓤ ꓠꓱ ꓥ ꓟꓲ ꓝꓴꓲ ꓙꓳ ꓢꓴ ꓐꓴ_ ꓐꓰ ꓕꓲ ꓪ ꓪꓽ ꓘꓴꓽ_ ꓟ ꓥꓳ= ꓖꓳ ꓓꓱꓽ ꓔꓲꓹ ꓟꓶ ꓕꓯ ꓥ ꓟꓲ ꓬꓰ-ꓢꓴ ꓠꓬ ꓠꓱ ꓐꓯꓼ ꓕꓲ ꓙꓱꓹ ꓗꓪ ꓟꓽ ꓔꓬ ꓝꓴꓲ ꓙꓳ ꓢꓴ ꓣꓳ ꓐꓰ ꓕꓲ ꓪ ꓔꓬ ꓢꓲ ꓖꓳ ꓓꓱꓽ ꓔꓲꓹ ꓟꓶ ꓠꓹ ꓟ ꓬꓲ ꓙꓬ ꓗꓪ ꓙꓲ_ ꓟ ꓥꓳ= ꓬꓰ-ꓢꓴ ꓠꓬ ꓣꓳ ꓟꓲ ꓙꓬ ꓗꓪ ꓔꓬ ꓟ ꓗꓪ ꓐꓰ ꓣꓳ ꓠꓬ ꓝꓮꓲ ꓙ ꓫꓱꓸꓹ ꓠꓹ ꓟ ꓢꓯꓼ ꓪ ꓪ_ ꓡꓳ= ꓬꓰ-ꓢꓴ ꓠꓬ ꓣꓳ ꓮ ꓙꓵꓽ ꓐꓱ ꓶ ꓬꓯꓼ ꓡ_ ꓟ ꓥꓳ= ꓬꓰ-ꓢꓴ ꓠꓬ ꓖꓳ ꓓꓱꓽ ꓔꓲꓹ ꓟꓶ ꓢꓲ-ꓸ ꓬꓲ ꓙꓬ ꓗꓪ ꓐꓰ ꓓꓳꓸꓹ ꓡ ꓟꓶ ꓕꓯ ꓟꓴ ꓗꓪ ꓒꓵꓽ ꓡ ꓢꓲ-ꓸ ꓪꓴ-ꓢ ꓦ ꓠꓬ ꓮ ꓖꓴ ꓡꓰ ꓐꓰ ꓬꓯꓼ ꓡ_ ꓟ ꓥꓳ= ꓪꓴ-ꓢ ꓠꓵ ꓠꓲꓹ ꓔꓯ ꓟꓽ ꓟꓶ ꓐꓰ ꓓꓵꓽ ꓙ_ ꓟ ꓝꓴꓲ ꓙꓳ ꓢꓴ ꓐꓴ ꓐꓱ ꓶ ꓣꓳ ꓠꓯꓼ ꓗꓪ ꓪ ꓟꓽ ꓒꓵꓽ ꓐꓰ ꓓꓵꓽ ꓙ ꓢꓲ-ꓸ ꓪꓽ ꓟꓽ ꓘꓴꓽ ꓢꓴ ꓐꓱ ꓶ ꓬꓲ ꓠꓬ ꓬꓯꓼ ꓡ_ ꓟ ꓥꓳ=

               ꓬꓰ-ꓢꓴ ꓠꓬ ꓕꓱ ꓡꓱ ꓝꓴꓲ ꓙꓳ ꓢꓴ ꓐꓴ ꓐꓱ ꓶ ꓬꓯꓼ ꓡ_ ꓟ ꓥꓳ= ꓣꓳ ꓪꓽ ꓘꓴꓽ_ ꓕꓯ ꓬꓰ-ꓢꓴ ꓥ ꓟꓲ ꓣꓳ ꓐꓰ ꓕꓲ ꓪ ꓪꓽ ꓘꓴꓽ ꓙ_ ꓡꓳ= ꓖꓳ ꓓꓱꓽ ꓔꓲꓹ ꓟꓶ ꓢꓴ ꓣꓳ ꓮ ꓙꓵꓽ ꓠꓬ ꓬꓰ-ꓢꓴ ꓪꓽ ꓘꓴꓽ_ ꓟ ꓗꓪ ꓕꓲ ꓠꓲꓹ ꓕꓲ ꓪ ꓔꓬ ꓟ ꓥꓳ= ꓬꓰ-ꓢꓴ ꓐꓰ ꓕꓲ ꓪ ꓪꓽ ꓘꓴꓽ_ ꓟ ꓠꓬ ꓪꓴ-ꓢ ꓐꓰ ꓠꓲꓹ ꓠꓵ_ ꓟ ꓫꓸ ꓕꓱ ꓘꓶꓽ ꓫꓸ ꓕꓱ_ ꓟ ꓥꓳ= ꓬꓰ-ꓢꓴ ꓬꓲ ꓤꓶꓸꓹ ꓗꓪ ꓢꓴ ꓡꓰ ꓝꓴꓲ ꓓꓰ_ ꓟ-ꓸ ꓢꓴ ꓡꓰ ꓠꓲꓹ ꓞꓳ ꓢꓲ ꓗꓸ ꓧꓪ ꓟ-ꓸ ꓫꓸ ꓙꓵ ꓟꓶ ꓙꓵ ꓔꓳ ꓜꓳ_ ꓟ-ꓸ ꓔꓳ ꓜꓳ_ ꓕꓯ ꓬꓰ-ꓢꓴ ꓠꓬ ꓪꓴ-ꓢ ꓔꓯ ꓙꓵ_ ꓟ ꓥꓳ= ꓬꓰ-ꓢꓴ ꓠꓬ ꓕꓱ ꓶ ꓤ ꓫꓱꓹ ꓤ ꓔꓯ ꓣꓳ ꓮ ꓙꓵꓽ ꓢꓴ ꓐꓴ ꓐꓱ ꓶ ꓙ ꓖꓶꓽ ꓢꓲ-ꓸ ꓪꓽ ꓘꓴꓽ_ ꓟ ꓡꓰ ꓐꓰ ꓣꓳ ꓥ ꓟꓲ ꓪꓽ ꓘꓴꓽ ꓠ ꓔ ꓡꓳ= ꓪꓽ ꓘꓴꓽ_ ꓟ ꓙꓵꓹ ꓗꓪ ꓣꓳ ꓤꓶꓸꓹ ꓠꓯꓼ ꓗꓪ ꓟꓽ ꓟꓶ ꓪ ꓐꓰ ꓓꓵꓽ ꓙ ꓟꓶ ꓓꓴ ꓬꓲ ꓙꓵꓹ ꓥ ꓟꓲ ꓙꓳ_ ꓡꓳ= ꓖꓳ ꓡꓱ ꓔꓳꓹ ꓜꓳ_ ꓟ ꓙꓵꓹ ꓗꓪ ꓬꓰ-ꓢꓴ ꓪꓽ ꓘꓴꓽ_ ꓟ ꓠꓬ ꓣꓳ ꓐꓰ ꓕꓲ ꓪ ꓔꓬ ꓠꓹ ꓟ ꓬꓰ-ꓢꓴ ꓔꓯ ꓪꓽ ꓘꓴꓽ ꓠ ꓔ ꓟ ꓥꓳ ꓐꓰ ꓪꓽ ꓘꓴꓽ_ ꓟ ꓚꓱꓹ ꓔꓯ ꓔꓲ-ꓒ ꓪ ꓔꓲ ꓡꓰ ꓢꓯꓼ ꓖꓶ_ ꓟ ꓥꓳ=