ꓣꓳ ꓮ ꓘꓶꓸ ꓫꓸ ꓔ ꓟ ꓙꓵꓹ ꓗꓪ ꓪꓴ-ꓢ ꓠꓬ ꓣꓳ ꓐꓰ ꓔꓬ ꓡꓳ꓾

ꓣꓳ ꓮ ꓘꓶꓸ ꓫꓸ ꓔ ꓟ ꓙꓵꓹ ꓗꓪ ꓪꓴ-ꓢ ꓠꓬ ꓣꓳ ꓐꓰ ꓔꓬ ꓡꓳ꓾

ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓠꓬ ꓦꓮꓔꓲꓚꓮꓠ ꓗꓪ ꓔꓬ ꓟ Gemelli ꓠꓯꓺ ꓞꓲꓼ ꓫꓬꓹ ꓔꓬ ꓟ ꓗꓪ ꓐꓰ ꓟꓬ ꓠꓬꓲ ꓔꓬ ꓢ ꓡ ꓟ ꓑꓶ ꓓꓴ ꓠꓽ ꓥꓪ ꓠꓬꓲ ꓠꓯꓼ ꓕꓯ ꓠꓯꓺ ꓞꓲꓼ ꓦꓲꓻ ꓗꓪ ꓐꓰ ꓡ ꓙꓰ ꓪ ꓡꓰ ꓢꓲ꓾ ꓠꓽ ꓫꓵ ꓠꓬꓲ Angelus ꓪꓽ ꓘꓴ ꓙꓵꓹ ꓕꓯ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓔꓯ ꓠꓯꓺ ꓞꓲꓼ ꓦꓲꓻ ꓗꓪ ꓔꓬ ꓢꓲ꓾ ꓠꓻ ꓫꓬꓹ ꓔꓬ ꓕꓯ ꓙꓵꓻ ꓠꓲꓹ ꓐꓰ ꓪꓽ ꓘꓴ ꓙ_ ꓟ꓾ ꓠꓵ ꓠꓲꓹ ꓗꓪ ꓐꓰ ꓬꓰ ꓙ ꓔꓳꓹ ꓙ ꓣꓱꓽ ꓙ ꓢꓴ ꓐꓴ ꓮ ꓙꓵ ꓔꓯ ꓫ ꓟꓳ ꓘꓶꓽ ꓔꓯ ꓠꓽ ꓫꓵ ꓠꓬꓲ ꓕꓯ ꓐꓯ ꓔ ꓡꓳ=

ꓟ-ꓕꓲ 10ꓽ7 ꓗꓪ ꓕꓱ ꓡꓱ ꓙꓰ ꓕꓱ ꓡꓱ ꓟꓸ ꓟꓲꓽ ꓚ ꓢꓲ ꓟꓴ ꓗꓪ ꓗꓴꓷꓼ ꓠꓶꓽ ꓡꓻꓳ ꓐꓯ ꓖꓶ ꓐꓰ ꓬꓰ-ꓢꓴ ꓡꓰ ꓝꓲ ꓓꓴ ꓐꓴ ꓔꓯ ꓐꓯ ꓔ ꓟ ꓔꓯ ꓡꓳꓸ ꓠꓬꓲ ꓢꓲ꓾ ꓚꓵ ꓚꓵ ꓪꓴ-ꓢ ꓟꓴ ꓗꓪ ꓗꓴꓷꓼ ꓠꓶꓽ ꓡ ꓠꓬ ꓟꓲ ꓠꓯ ꓗꓪ ꓣꓳ ꓕꓲ ꓣꓳ ꓡꓰ ꓟꓽ ꓥ꓾ ꓫꓸ ꓔ ꓟ ꓙꓵꓹ ꓗꓪ ꓥ ꓟꓲ ꓬꓲ ꓠꓯꓼ ꓗꓪ ꓠꓲꓹ ꓟ ꓐꓬ ꓓꓴ ꓟꓽ ꓙꓳ ꓙꓳ ꓙꓵꓻ ꓠꓲꓹ ꓐꓰ ꓙꓵꓻ ꓠꓬ ꓟꓶꓽ ꓡꓰ ꓓꓴ ꓟꓽ ꓙꓳ ꓐꓰ ꓐꓯ ꓔ ꓡꓳ=

ꓪꓴ-ꓢ ꓠꓬ ꓬꓲꓸ ꓤ ꓠꓱ ꓤ ꓐꓴ ꓔꓯ ꓢꓷꓸ ꓢꓲ꓾ ꓠꓲꓹ ꓠꓵ_ ꓟ ꓐꓹ ꓐ ꓥ ꓟ꓾ ꓫꓸ ꓔ ꓟ ꓙ ꓖꓴ ꓗꓪ ꓙꓻ ꓫꓱꓽ ꓔꓬ ꓟ ꓙꓵꓹ ꓗꓪ ꓥ ꓟꓲ ꓣꓳ ꓪꓴ ꓧꓶ ꓢꓲ꓾ ꓣꓳ ꓢꓯꓼ ꓐ ꓢꓲ꓾ ꓣꓳ ꓞꓳꓸ ꓡꓰ ꓢꓲ ꓝꓮꓲ ꓢꓯꓼ ꓪ ꓣꓴ ꓠꓹ ꓟ ꓢꓯꓼ ꓕꓵꓼ ꓟ ꓙꓵꓹ ꓗꓪ ꓥ ꓟꓲ ꓪꓴ-ꓢ ꓠꓬ ꓣꓳ ꓐꓰ ꓔꓬ ꓡꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ_ ꓡꓳ=

ꓪꓴ-ꓢ ꓐꓰ ꓕꓲ ꓪ ꓔꓬ ꓟ ꓗꓪ ꓐꓰ ꓣꓳ ꓠꓬ ꓙꓳꓺ ꓠꓲꓹ ꓔꓯ ꓧꓪꓸ ꓡꓰ ꓟ꓾ ꓣꓳ ꓚꓲꓸ ꓛꓬ ꓠꓲꓹ ꓠꓵ ꓡ_ ꓟ꓾ ꓙꓲ_ ꓟ ꓕꓲ ꓒꓳꓹ ꓗꓪ ꓪꓴꓽ ꓟꓴ ꓡ ꓢꓲ꓾ ꓠꓲꓹ ꓡꓱ ꓗꓹ ꓛꓲ ꓓꓴ ꓔꓯ ꓪ ꓟꓶ ꓡ ꓥꓳ= ꓙꓲ_ ꓟ ꓝꓲ ꓓꓴ ꓗꓷ ꓠꓲꓹ ꓫꓵ ꓠꓬ ꓣꓳ ꓠꓲꓹ ꓟ ꓔꓯ ꓤ ꓠꓱ ꓤ ꓕꓲ ꓣꓳ ꓡꓰ ꓐꓰ ꓘꓳꓹ ꓣꓴ ꓗꓴꓸ ꓠ ꓔ ꓡꓳ= ꓣꓳ ꓠꓲꓹ ꓟ ꓒꓳꓹ ꓡꓶꓸ ꓢꓲ꓾ ꓪꓴ-ꓢ ꓙ ꓖꓴ ꓧꓳꓽ ꓟꓳꓸ ꓖꓶ_ ꓟ ꓗꓪ ꓙꓻ ꓫꓱꓽ ꓠꓬ ꓢꓲ ꓡꓲꓹ ꓗꓹ ꓛꓲ ꓟ ꓔꓯ ꓘꓳꓹ ꓣꓴ ꓟꓶ ꓡ ꓥꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ=

ꓪꓴ-ꓢ ꓠꓬ ꓣꓳ ꓑ ꓕꓲ ꓗꓪ ꓣꓳ ꓐꓰ ꓔꓬ ꓟ ꓔꓯ ꓫꓸ ꓪ ꓘꓶꓽ ꓗꓪ ꓐꓰ ꓡꓰ ꓕꓱ_ ꓟ ꓐꓰ ꓟꓽ ꓥ꓾ ꓪꓴ-ꓢ ꓟꓬꓱ ꓗꓪ ꓐꓰ ꓠꓵ ꓠꓲꓹ ꓐꓰ ꓥꓳ ꓡꓳꓸ ꓓꓴ ꓮ ꓟꓬꓹ ꓐꓰ ꓙꓻ ꓫꓱꓽ ꓠꓹ ꓟ ꓚꓱꓹ ꓐꓯ ꓔ ꓡꓳ= ꓔꓲꓺ ꓒ ꓪ ꓔꓲ ꓡꓰ ꓙꓲ ꓢꓴ ꓢꓲ ꓤ ꓐꓴ ꓔꓯ ꓚꓲꓸ ꓛꓬ ꓓꓵꓽ ꓙ ꓔꓱꓹ ꓕ ꓢꓲ ꓔꓬ ꓠꓹ ꓟ ꓐꓯ ꓡꓳ꓾ ꓪꓴ-ꓢ ꓔꓯ ꓙꓵꓻ ꓢꓲ꓾ ꓣꓳ ꓠꓯꓼ ꓗꓪ ꓔꓳꓹ ꓜꓳ ꓔꓬ ꓟ ꓔꓯ ꓒꓴ ꓒꓴ ꓡꓯ ꓡꓯ ꓫꓸ ꓕꓱ ꓔ ꓡ? ꓪꓴ-ꓢ ꓶꓼ ꓓꓳ ꓫꓱꓹ ꓓꓳꓽ ꓐꓯ ꓘꓶꓽ ꓔꓯ ꓠ ꓠꓹ ꓢꓲ꓾ ꓢꓲ ꓫꓬ ꓖꓳ ꓓꓱ ꓑ ꓑ ꓔꓯ ꓣꓳ ꓘꓳꓹ ꓣꓴ_ ꓡ? ꓫꓸ ꓢꓴ ꓔꓯ ꓬꓰ ꓙ ꓔꓳꓹ ꓙ ꓢꓲ꓾ ꓬꓲ ꓪ ꓢꓯꓼ ꓪ ꓪ ꓠꓹ ꓟ ꓮ ꓡꓰ ꓐꓰ ꓢꓯꓼ ꓪ ꓖꓶ ꓢꓲ ꓬꓰ ꓙ ꓔꓳꓹ ꓙ ꓡ? ꓐꓰ ꓣꓳ ꓚꓲ ꓛꓬ ꓔꓱꓹ ꓕ ꓠꓹ ꓟ ꓐꓯ ꓔ ꓡꓳ=