ꓪꓴ-ꓢ ꓔꓯ ꓠꓲꓹ ꓠꓵˍ ꓟ꓾ ꓞꓳ ꓤ ꓔꓯ ꓠꓲꓹ ꓠꓵˍ ꓟ ꓗꓪ ꓐꓰ ꓚꓬꓴ. ꓟꓶˍ ꓥꓳ=

ꓕꓲ: ꓠ: ꓡꓰ ꓕꓲ: ꓠ: ꓠ-ꓦꓬ-ꓠꓬꓲ ꓑ ꓫꓬ ꓜꓲꓼ ꓡꓳ:ˍ ꓟ ꓐꓰ Angelus ꓪ: ꓘꓴˍ ꓟ=

ꓪꓴ-ꓢ ꓔꓯ ꓠꓲꓹ ꓠꓵˍ ꓟ꓾ ꓞꓳ ꓤ ꓔꓯ ꓠꓲꓹ ꓠꓵˍ ꓟ ꓗꓪ ꓐꓰ ꓚꓬꓴ. ꓟꓶˍ ꓥꓳ=

8 ꓦꓻ ꓟ 25 ꓠꓬꓲ꓾ 2019

ꓠꓵ ꓠꓲꓹ ꓓꓰ: ꓘꓶ: ꓠ: ꓪꓴ:ˍ ꓡꓳ꓾ꓪꓴ-ꓢ ꓔꓯ ꓠꓲꓹ ꓠꓵˍ ꓟ꓾ ꓞꓳ ꓤ ꓔꓯ ꓠꓲꓹ ꓠꓵˍ ꓟ ꓗꓪ ꓐꓰ ꓡꓰ: ꓣꓳ: ꓠꓬ ꓚꓬꓴ. ꓟꓶˍ ꓥꓳ꓾ ꓟꓬꓱ: ꓕꓱꓻ ꓟ ꓠ: ꓢꓺ ꓢꓺ ꓡꓰ: ꓗꓹ ꓟ ꓟꓬꓱ: ꓠ: ꓟ: ꓥ꓾ ꓐꓰ ꓕꓲ: ꓠ: ꓡꓰ ꓕꓲ: ꓠ: ꓞꓳ ꓜꓴꓻ ꓜꓲꓼ ꓡꓳ:ˍ ꓟ ꓠ-ꓦꓬ-ꓠꓬꓲ ꓜꓲꓼ ꓡꓳ:ˍ ꓟ ꓐꓰ Angelus ꓪ: ꓘꓴˍ ꓟ ꓗꓪ ꓠ-ꓦꓬ-ꓠꓬꓲ ꓗꓪ ꓟ ꓢꓲ: ꓫꓬ ꓐꓯꓻ ꓘꓶ: ꓔꓯ ꓟꓳꓸꓼ ꓖꓴ ꓢꓲ꓾ ꓟ. ꓖꓶ: ꓗꓷ ꓟ ꓥꓳ= ꓢꓲꓺ ꓒ: ꓬꓰ-ꓢꓴ ꓟꓲ ꓠꓯ ꓗꓪ ꓔꓬꓹ ꓕꓯ꓾ ꓙꓲꓺ ꓙꓲꓺ ꓒꓳꓹ ꓫ ꓟ ꓠ: ꓠꓬꓲ ꓘꓶ: ꓥ ꓟ꓾ ꓮ. ꓔꓲ ꓤ ꓟ ꓞꓳ ꓤ ꓐꓴ ꓡꓰ: ꓚꓬꓴ. ꓟꓶˍ ꓡ?꓾ ꓐꓰ ꓠ ꓠꓬꓲꓺˍ ꓟ ꓟꓶ ꓗꓷꓳ= ꓮ. ꓔꓲ ꓤ ꓥˍ ꓟꓲ꓾ ꓮ: ꓟꓬꓹ ꓥˍ ꓟꓲ꓾ꓮ ꓡꓲ ꓟꓬ ꓚꓬꓴ. ꓟꓶˍ ꓐꓯ ꓟ ꓠꓬ ꓬꓳ. ꓚꓰˍ ꓟ ꓟ: ꓥ ꓟ꓾ ꓮ ꓟꓶ ꓢꓯ. ꓔꓬꓹ ꓕꓯ ꓚꓲ. ꓛꓬꓼ ꓬꓰ ꓙꓲ: ꓙꓳˍ ꓟ ꓔꓯ ꓡꓰ: ꓬꓰ ꓠ ꓗˍ ꓟ꓾ꓬꓲ. ꓙꓵꓹ ꓔꓯ ꓙꓲꓺˍ ꓗꓪ ꓡꓰ: ꓣꓱ: ꓠꓹ ꓟ꓾ ꓕꓵꓼ ꓪ: ꓖꓶ: ꓔ ꓟ ꓔꓯ ꓟꓳ ꓪ ꓓˍ ꓡꓳ=

ꓣꓳˍ ꓟ ꓗꓹ ꓘꓶ: ꓓꓴ: ꓗꓪ ꓡꓰ: ꓓꓵ: ꓙꓰ ꓠꓹ ꓟ ꓢꓲꓺ ꓒ: ꓬꓰ-ꓢꓴ ꓠꓬ ꓕꓵꓼ ꓪ: ꓖꓶ: ꓔꓬꓹ ꓡꓳ= ꓕꓱꓻ ꓗꓪ ꓮ ꓡꓲ ꓟꓬ ꓣꓳ ꓐꓯˍ ꓟ ꓔꓯ ꓡꓰ: ꓟ: ꓐꓯ꓾ ꓞꓳ ꓤ ꓕꓲ: ꓣꓳ ꓡꓰ ꓕꓲ: ꓣꓳ ꓔꓱꓹ ꓚꓵˍ ꓟ ꓔꓯ ꓢꓲꓺ ꓢꓲ꓾ ꓣꓱ: ꓬꓰ ꓗꓴ. ꓠꓹ ꓟ ꓟ. ꓖꓶ: ꓔꓬꓹ ꓟ ꓥꓳ=ꓐꓲꓻˍ ꓟ ꓪꓴ: ꓓꓰˍ ꓟ ꓢꓺˍ ꓟ ꓔꓯ. ꓡꓰ: ꓟꓳ. ꓖꓶ: ꓢꓲ꓾ ꓡꓳꓹ ꓬꓰˍ ꓕꓯ ꓐꓬꓺ ꓡꓰ ꓓꓹ ꓡꓳ ꓫꓵ: ꓡꓰ: ꓟ. ꓖꓶ: ꓢꓲ ꓡꓰ: ꓬꓰ-ꓢꓴ ꓠꓬ ꓣꓳ: ꓔꓯ. ꓧꓳ: ꓣꓱ: ꓔꓬꓹ ꓟ ꓟ: ꓥ=ꓣꓳˍ ꓟ ꓫ. ꓟ ꓐꓰ ꓡꓰ: ꓢꓯꓼ ꓕꓵꓼ ꓔꓬꓹ ꓝꓲˍ ꓟ ꓥ ꓡꓳ= ꓪꓴ-ꓢ ꓔꓯ ꓠꓲꓹ ꓠꓵˍ ꓟ꓾ ꓞꓳ ꓤ ꓔꓯ ꓠꓲꓹ ꓠꓵˍ ꓟ ꓗꓪ ꓐꓰ ꓡꓰ: ꓣꓳ: ꓠꓬ ꓚꓬꓴ. ꓟꓶˍ ꓥꓳ꓾ ꓟꓬꓱ: ꓕꓱꓻ ꓟ ꓠ: ꓢꓺ ꓢꓺ ꓡꓰ: ꓗꓹ ꓟ ꓟꓬꓱ: ꓠ: ꓟ: ꓥ꓾ ꓐꓯˍ ꓟ ꓗꓪ ꓪꓴ-ꓢ ꓠꓬ ꓣꓳ: ꓐꓴ ꓢꓯꓼ ꓕꓵꓼ ꓠꓹ ꓟ ꓓꓰ: ꓔꓬꓹ ꓟ ꓥ ꓡꓳ= ꓣꓳ: ꓮ ꓡꓰ ꓗꓪ ꓛꓲ ꓧꓪ.ˍ ꓡꓰ ꓟ꓾ ꓮ ꓡꓰ ꓟꓬ ꓛꓲ ꓐꓳꓻ ꓶ ꓙꓳ ꓡˍ ꓟ ꓔꓯ ꓪꓴ-ꓢ ꓟ: ꓡꓳ.=ꓡꓯꓼ ꓕꓲꓺ ꓬꓰˍ ꓟ ꓙꓵꓻ ꓠꓲꓹ꓾ꓙꓲꓻˍ ꓟ ꓡꓰ: ꓬꓰ ꓢꓲ ꓢꓯ. ꓔꓬꓹ ꓟ꓾ ꓙ: ꓣꓳ ꓢꓲ ꓢꓯ. ꓔꓬꓹ ꓟ ꓔꓯ ꓡꓰ: ꓢꓲꓺ ꓒ: ꓬꓰ-ꓢꓴ ꓡꓰ ꓢꓷ. ꓙ ꓟꓳ ꓙ ꓢꓲ꓾ ꓟꓴ: ꓗꓪ ꓗ ꓘꓶ: ꓒꓴꓻ ꓖꓶ:ˍ ꓥꓳ=

ꓖꓳ ꓡꓱ ꓟ: ꓥ ꓠꓬ꓾ ꓠꓴ ꓪ ꓔꓯ ꓥꓪ ꓟ: ꓢꓷ.꓾ꓐꓰ ꓐꓯ ꓢꓲ ꓗ ꓘꓶ: ꓚꓲ. ꓗꓷˍ ꓥꓳ= ꓣꓳ: ꓙꓲ-ꓢꓴ ꓢꓲꓺ ꓤ: ꓤꓶꓻ ꓠꓬ ꓢꓲ: ꓫꓬ ꓟ. ꓟꓲ ꓗꓪ ꓐꓰ ꓢꓯꓼ ꓪ: ꓣꓴꓺˍ ꓟ꓾ ꓢ-ꓗ-ꓣ-ꓟꓰ-ꓔꓴ ꓔꓯ ꓘꓳ ꓣꓴˍ ꓟ꓾ ꓪꓴ-ꓢ ꓠꓯꓸꓼ ꓗꓪ ꓕꓲ: ꓠꓲꓹ ꓕꓲ: ꓪꓺ: ꓬꓰˍ ꓟ꓾ꓟ: ꓠ: ꓠ: ꓪ: ꓘꓴ ꓦꓲꓻ ꓗꓪ ꓙꓰˍ ꓟ꓾ ꓪ: ꓘꓴˍ ꓟ꓾ ꓙꓲ-ꓢꓴ ꓠꓯꓸꓼ ꓗꓪ ꓕꓲ: ꓠꓲꓹ ꓕꓲ: ꓪꓺ: ꓬꓰˍ ꓟ ꓤꓶꓻ ꓗꓪ ꓢꓯ. ꓔꓬꓹ ꓠꓹ ꓟ ꓘꓴ ꓔ ꓟ ꓥ ꓡꓳ= ꓤꓶꓻ ꓕꓱꓻ ꓟ ꓗꓪ ꓐꓰ ꓡꓰ: ꓣꓳ: ꓐꓴ ꓙꓵꓻ ꓠꓲꓹ꓾ ꓥꓳ ꓡꓳ.ˍ ꓟ꓾ ꓫꓱ. ꓤ ꓠꓲꓹ ꓔꓯ ꓔꓳꓹ ꓙ ꓔ ꓟ ꓥꓳ= ꓕꓲ: ꓠꓲꓹ ꓕꓲ: ꓪꓺ: ꓟ: ꓥ ꓟ꓾ ꓢ-ꓓꓯ ꓟꓬꓱ: ꓔꓯ ꓬꓰ-ꓢꓴ ꓙꓲ-ꓢꓴ ꓬꓲ. ꓣꓱ: ꓛꓰ: ꓗꓪ ꓐꓰ ꓗꓳ. ꓙꓰ ꓢꓲ꓾ ꓞꓳ ꓤ ꓮ: ꓙꓵ: ꓙꓲꓻ ꓖꓴ ꓐꓱ ꓶ꓾ ꓣꓳ: ꓤꓶꓻ ꓔꓯ ꓣꓱ: ꓢꓲ ꓢꓯꓼ ꓕꓵꓼ ꓙꓰ ꓡꓯ=ꓣꓳ: ꓐꓴ ꓔꓯ ꓟ-ꓡꓲ ꓡꓰ ꓙ ꓖꓴ ꓧꓳ: ꓟ. ꓖꓶ: ꓗꓷꓳ=ꓬꓰ-ꓢꓴ ꓐꓰ ꓕꓲ: ꓪꓺ: ꓫ. ꓟ ꓤꓶꓻ ꓗꓪ ꓞꓳ ꓙꓳ ꓢꓲ꓾ ꓧꓪ. ꓡꓰ ꓟ ꓙꓵ: ꓪꓴ. ꓛꓴ: ꓟꓶ ꓗꓷꓳ= ꓟ-ꓡꓲ-ꓬ ꓬꓰ ꓙˍ ꓟ ꓗꓪ ꓐꓰ ꓬꓰ-ꓢꓴ ꓠꓲꓹ ꓫꓵˍ ꓟ ꓣꓳˍ ꓟ ꓙꓻ ꓖꓴ ꓥ ꓟ ꓢꓯꓼ ꓕꓵꓼ WU: ꓧꓶꓹ ꓟ ꓤꓶꓻ ꓗꓪ ꓢꓯ. ꓔꓬꓹ ꓠꓹ ꓟ ꓐꓱ ꓶ ꓪ: ꓘꓴ ꓔꓬꓹ ꓡꓯ꓾ ꓐꓰ ꓔꓲꓺ ꓒ: ꓪ ꓔꓲ ꓝꓣꓮꓠꓚꓲꓢ ꓡꓰ ꓐꓯ ꓗꓷ ꓟ ꓥ ꓡꓳ=

Photo credit to Vatican News

https://bit.ly/2Hpk23C

Add new comment

5 + 1 =