ꓪꓴ-ꓢ ꓔꓯ ꓠꓲꓹ ꓠꓵ_ ꓟ ꓠꓬ ꓮ ꓟꓬ ꓛꓲ ꓡꓳꓸ ꓐꓲ_ ꓟ꓾ (Show how beautiful it is to love the Lord)

ꓪꓴ-ꓢ ꓔꓯ ꓠꓲꓹ ꓠꓵ_ ꓟ ꓠꓬ ꓮ ꓟꓬ ꓛꓲ ꓡꓳꓸ ꓐꓲ_ ꓟ꓾

ꓔꓲꓺ ꓒ ꓪ ꓔꓲ ꓡꓰ ꓡꓳꓹ ꓬꓰ ꓟ ꓠ ꓦꓬꓼ ꓠꓬꓲ ꓟꓲ-ꓢ ꓪꓽ ꓘꓴ ꓙꓵꓹ ꓕꓯ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓔꓯ ꓣꓳ ꓠꓯꓼ ꓗꓪ ꓬꓲꓸ ꓙꓵꓹ ꓮ ꓟꓬ ꓙꓳ ꓥ ꓟꓲ꓾ ꓣꓳ ꓤꓶꓻ ꓡꓰ ꓐꓰ꓾ ꓣꓳ ꓗꓹ ꓛꓲ ꓚꓱꓹ ꓡꓲ ꓐꓰ꓾ ꓪꓴ-ꓢ ꓔꓯ ꓠꓲꓹ ꓠꓵ_ ꓟ ꓠꓬ ꓮ ꓟꓬ ꓛꓲ ꓡꓳꓸ ꓐꓲ_ ꓟ ꓔꓯ ꓢꓷꓸ ꓙ ꓟꓳ ꓙ ꓠꓹ ꓟ ꓐꓱ ꓶ ꓢꓲ ꓒꓽ ꓬꓰ-ꓢꓴ ꓡꓰ ꓢꓯꓼ ꓖꓶ ꓔ ꓟ ꓥꓳ= ꓝꓮꓲ ꓪꓴ-ꓢ ꓶꓼ ꓓꓳ ꓫꓱꓸ ꓓꓳ ꓗꓪ ꓐꓰ ꓬꓲ ꓙꓵꓹ ꓞꓰ ꓡꓰꓳ ꓫꓵ ꓟꓽ ꓙꓳ꓾ ꓟ ꓔꓯ ꓥ ꓟꓲ ꓐꓯ ꓔ ꓟ ꓥꓳ=

ꓪꓴ-ꓢ ꓠꓬ ꓬꓲ ꓝꓲ ꓓꓴ ꓐꓴ ꓕꓯ ꓢꓲ ꓠꓲꓹ ꓟ ꓫꓵꓺ ꓟ ꓡꓰ ꓐꓰ ꓣꓳ ꓐꓰ ꓥ ꓟꓲ ꓮ ꓕꓯ ꓟꓲ ꓕꓲ ꓪꓼ ꓔꓬ ꓟ ꓥꓳ= ꓣꓳ ꓢꓲ ꓒ ꓬꓰ-ꓢꓴ ꓔꓯ ꓠꓲꓹ ꓠꓵ_ ꓟ ꓠꓬ ꓮ ꓟꓬ ꓛꓲ ꓡꓳꓸ ꓐꓲ_ ꓟ ꓚꓱꓹ ꓔꓯ ꓣꓳ ꓤꓶꓻ ꓠꓯꓼ ꓗꓪ ꓣꓳ ꓠꓲꓹ ꓡꓱ ꓗꓹ ꓛꓲ ꓛꓲ ꓐꓰ꓾ ꓢꓷꓸ ꓙ ꓟꓳ ꓙ ꓠꓹ ꓟ ꓐꓯ ꓔ ꓡꓳ= ꓶꓼ ꓓꓳ ꓫꓱꓸ ꓓꓳ ꓗꓪ ꓐꓰ ꓪꓴ-ꓢ ꓠꓬ꓾” ꓟꓲ ꓠꓯ ꓞꓳ ꓤ ꓐꓴ ꓔꓯ ꓧꓪ ꓜꓲꓼ ꓢꓴ ꓡ ꓞꓳ ꓒꓬꓱꓼ ꓡꓰ ꓠꓹ ꓟ ꓐꓱ ꓶ” ꓬꓲꓸ ꓪꓴꓸ ꓕꓯ ꓡꓰ ꓬꓲ ꓡꓰ ꓢꓲ ꓚꓰꓸ ꓔ ꓟ ꓝꓲ ꓓꓴ ꓐꓴ ꓟꓬꓱꓽ ꓟꓯ ꓚꓱꓹ ꓔꓯ ꓐꓯ ꓡꓳꓹ ꓬꓰ ꓟ ꓥꓳ= ꓣꓳ ꓔꓯ ꓢꓲ ꓒ ꓬꓰ-ꓢꓴ ꓡꓰ ꓬꓲꓸ ꓪꓴꓸ ꓕꓯ ꓬꓲ ꓤꓶꓻ ꓗꓪ ꓬꓲ ꓟꓬꓱꓽ ꓔꓯ ꓟꓯ ꓠꓹ ꓟ ꓐꓱ ꓶ ꓞꓳ ꓤ ꓐꓴ ꓔꓯ ꓘꓴ ꓗꓷ ꓟ ꓥꓳ= ꓕꓱ ꓟ ꓔꓯ ꓣꓳ ꓓꓵꓽ ꓙ ꓔꓱꓹ ꓕ ꓠꓬ ꓢꓷꓸ ꓡꓰ ꓓꓴ ꓕꓲ ꓟ ꓐꓰ ꓡꓳꓸ ꓟꓳ ꓪ ꓡꓳ꓾ꓕꓱ ꓟ ꓠꓬ꓾ “ ꓣꓳ ꓠꓬ ꓬꓲ ꓐꓰ ꓕꓲ ꓪꓼ ꓟꓲ ꓠꓯ ꓡ ꓞꓳ ꓔꓯ ꓚꓬꓴ ꓙ_ ꓟ ꓟꓬꓱꓽ ꓗꓪ ꓬꓰ ꓙ ꓠꓹ ꓟ ꓔꓯ ꓠꓲꓹ ꓫꓵ_ ꓟ ꓥꓳ= ꓝꓮꓲ ꓬꓲ ꓐꓰ ꓕꓲ ꓪꓼ ꓮ ꓕꓯ ꓟꓲ ꓫꓱꓹ ꓡꓯ ꓘꓳ ꓠꓹ ꓟ ꓔꓯ ꓠꓲꓹ ꓫꓵ_ ꓟ꓾” ꓐꓰ “ ꓬꓲ ꓟꓬꓱꓽ ꓔꓯ ꓬꓰ ꓙ ꓔ ꓙ ꓢꓲ ꓧꓳꓽ ꓣꓱꓽ ꓠꓹ ꓟ ꓠꓲꓹ ꓫꓵ_ ꓟ” ꓚꓱꓹ ꓔꓯ ꓐꓯ ꓡꓳꓹ ꓬꓰ ꓟ ꓥꓳ=

ꓔꓲꓺ ꓒ ꓪ ꓔꓲ ꓡꓰ ꓣꓳ ꓓꓵꓽ ꓙ ꓰ’ ꓡꓰ ꓓꓴ ꓕꓱ ꓟ ꓔꓯ ꓡꓳꓸ ꓠꓬꓲ ꓓꓴ ꓬꓰ ꓡꓯ꓾” ꓬꓲ ꓮ ꓟꓬ ꓛꓲ ꓬꓲ ꓝꓲ ꓓꓴ ꓐꓴ ꓕꓯ ꓢꓲ ꓠꓯꓼ ꓗꓪ ꓠꓲꓹ ꓟ ꓫꓵꓺ ꓡꓳꓹ ꓬꓰ ꓟ ꓥꓳ꓾ꓕꓲ ꓧꓪꓹ ꓧꓪꓹ ꓬꓲ ꓪ ꓠꓬ ꓬꓰ-ꓢꓴ ꓡꓰ ꓐꓯ_ ꓟ ꓐꓯ ꓘꓶꓽ ꓔꓯ ꓠ ꓠꓹ ꓟꓽ ꓗꓴꓸ꓾ ꓕꓲ ꓣꓳ ꓛꓳ ꓕꓲ ꓣꓳ ꓟꓽ ꓫꓱꓹ ꓟ ꓙꓵꓹ ꓙꓳ ꓟ ꓥꓳ꓾ ꓬꓲꓸ ꓙꓵꓹ ꓮ ꓟꓬꓹ ꓬꓲ ꓡꓰ ꓟꓸ ꓟꓲ ꓚꓺ ꓗꓷ ꓟ ꓔꓯ ꓘꓳꓹ ꓣꓴ ꓟꓽ ꓐ ꓡ ꓟ ꓙꓳ ꓗꓷ ꓟ ꓥꓳ꓾” ꓢꓲ ꓒ ꓬꓰ-ꓢꓴ ꓬꓲ ꓪ ꓠꓯꓼ ꓗꓪ ꓕꓱ ꓟ ꓡꓰ ꓐꓰ ꓮ ꓟꓬ ꓛꓲ ꓙꓳ ꓥ ꓟꓲ ꓬꓲ ꓪ ꓔꓯ ꓙꓵꓻ ꓢꓲ꓾ ꓢꓲ ꓚꓰꓸ ꓗꓷ ꓟ ꓚꓱꓹ ꓔꓯ ꓐꓯ ꓡꓳꓹ ꓬꓰ ꓟ ꓥꓳ= “ ꓞꓳ ꓤ ꓮ ꓙꓵ ꓐꓱ ꓶ ꓪꓴ-ꓢ ꓚꓬꓴ ꓙ ꓟ ꓔꓯ ꓣꓳ ꓐꓱ ꓶ ꓬꓲ ꓡꓰ ꓬꓰ ꓖꓶ ꓡ ꓟ ꓠꓬ꓾ ꓢꓲ ꓒ ꓬꓰ-ꓢꓴ ꓬꓲ ꓠꓲꓹ ꓡꓱ ꓗꓹ ꓛꓲ ꓡꓳꓹ ꓬꓰ ꓟ ꓐꓰ ꓢ-ꓢꓶ- ꓠ ꓟꓬꓱꓽ ꓥ ꓟ ꓚꓱꓹ” ꓔꓯ ꓔꓲꓺ ꓒ ꓪ ꓔꓲ ꓡꓰ ꓐꓯ ꓡꓳꓹ ꓬꓰ ꓟ ꓥꓳ= ꓣꓳ ꓠꓲꓹ ꓠꓵ ꓟ ꓗꓪ “ꓣꓳ ꓕꓲ ꓠꓲꓹ ꓟ ꓡꓱꓼ꓾ ꓣꓳ ꓐꓯ ꓗꓷ ꓟ꓾ ꓬꓰ ꓗꓷ ꓟ ꓮ ꓙꓵ ꓠꓬ ꓬꓲ ꓐꓰ ꓕꓲ ꓪꓽ ꓗꓷ ꓠꓹ ꓟ ꓚꓱꓹ” ꓐꓰ “ ꓠꓬꓲ ꓟꓳ ꓓꓴ ꓐꓰ ꓗꓹ ꓛꓲ ꓓꓴ ꓔꓯ ꓣꓳ ꓠꓶꓽ ꓛꓳ ꓕꓲ ꓛꓳ ꓗꓪ ꓡꓰ ꓟꓽ ꓞꓲ ꓣꓳ ꓠꓲꓹ ꓟ ꓘꓴꓽ ꓗꓪ ꓐꓰ ꓥ ꓟꓲ ꓔꓬ ꓠꓹ ꓟ ꓔꓯ ꓐꓯ ꓡꓳꓹ ꓬꓰ ꓟ ꓥꓳ=

 ꓣꓳ ꓔꓯ ꓟꓸ ꓟꓲ ꓚꓺ ꓟꓸ ꓖꓶ_ ꓟ ꓠꓬ꓾ “ ꓬꓲ ꓙꓵꓹ ꓔꓯ ꓮ ꓔꓳ ꓟꓽ ꓡꓳꓹ ꓬꓰ ꓠꓹ ꓟ꓾ ꓟꓽ ꓖꓴ ꓡꓰ ꓠꓹ ꓟ꓾” ꓐꓰ ꓚꓵ ꓚꓵ ꓢꓯꓼ ꓖꓶ ꓔ ꓟ ꓠꓬ “ ꓠꓱꓸ ꓐꓯꓼ ꓢꓴ ꓔꓯ ꓗꓹ ꓛꓲ ꓡꓰ ꓝꓲ ꓠꓹ ꓟ ꓬꓰ ꓙ_ ꓟ ꓐꓰ ꓟꓬ ꓠꓬꓲ ꓗꓹ ꓛꓲ ꓪ ꓡꓰ ꓝꓲ_ ꓟ꓾ ꓢꓴ ꓔꓯ ꓡꓲꓹ ꓙꓰ ꓠꓹ ꓟ ꓬꓰ ꓙ_ ꓟ ꓠꓬ ꓚꓲꓸ ꓛꓬ ꓔꓯ ꓥ ꓟꓲ ꓡꓲꓹ ꓙꓰ ꓪ ꓡꓰ ꓝꓲ_ ꓟ꓾ ꓠꓱꓸ ꓐꓯꓼ ꓢꓴ ꓔꓯ ꓟꓬ ꓠꓬꓲ ꓙꓲ ꓠꓹ ꓟ ꓬꓰ ꓙ_ ꓟ ꓗꓪ ꓐꓰ ꓚꓲ ꓛꓬ ꓥ ꓟꓲ ꓟꓬ ꓠꓬꓲ ꓙꓲ ꓡ ꓟ” ꓚꓱꓹ ꓘꓳꓹ ꓣꓴ ꓟꓶ ꓡ ꓟ ꓔꓯ ꓐꓯ ꓡꓳꓹ ꓬꓰ ꓟ ꓥꓳ=

 ꓔꓲꓺ ꓒ ꓪ ꓔꓲ ꓡꓰ ꓣꓳ ꓕꓲ ꓣꓳ ꓡꓲ ꓕꓲ ꓣꓳ ꓔꓯ ꓶꓼ ꓓꓳ ꓫꓱꓸ ꓓꓳ ꓚꓺ ꓒꓬꓱꓽ ꓠꓹ ꓟ ꓐꓱ ꓶ ꓘꓴ ꓟꓶ ꓢꓴ ꓡꓰ ꓥ ꓟ ꓔꓯ ꓚꓵꓸ ꓔ ꓢꓲ ꓐꓯ ꓖꓶ ꓗꓷ ꓟ ꓥꓳ= “ ꓚꓲꓸ ꓛꓬ ꓔꓱꓹ ꓚꓲ ꓛꓬ ꓔꓱꓹ ꓕ ꓠꓬꓲ ꓓꓴ ꓬꓰ ꓡꓯ꓾” “ ꓥꓪ ꓢꓲ ꓒ ꓬꓰ-ꓢꓴ ꓡꓰ ꓘꓴ_ ꓟ ꓔꓯ ꓢꓷꓸ ꓙ ꓟꓳ ꓙ ꓠꓹ ꓟ ꓘꓳꓹ ꓣꓴ ꓟ ꓡꓰ ꓐꓰ ꓣꓳ ꓑ ꓕꓲ ꓗꓪ ꓔꓬ ꓢꓴ ꓐꓴ ꓔꓯ ꓗꓹ ꓛꓲ ꓟ ꓚꓱꓹ ꓮ ꓕꓯ ꓟꓲ ꓟꓬ ꓡ ꓠꓹ ꓟ ꓚꓱꓹ ꓔꓯ ꓓꓵꓽ ꓙ ꓠꓹ ꓟ ꓐꓱ ꓶ ꓠꓽ ꓡꓰ ꓔꓬ ꓡ? “ ꓥꓪ ꓪꓽ ꓘꓴ ꓔꓬ ꓟ ꓙꓵꓹ ꓗꓪ ꓪꓴ-ꓢ ꓠꓬ ꓟꓲ ꓠꓯ ꓡ ꓞꓳ ꓐꓴ ꓔꓯ ꓠꓲꓹ ꓟ ꓗꓹ ꓛꓲ ꓚꓱꓹ ꓖꓶ ꓠꓹ ꓟ ꓐꓱ ꓶ ꓢꓲ ꓚꓰꓸ ꓟꓶ ꓢꓴ ꓔꓯ ꓫ ꓟꓳ ꓔꓬ ꓡ? ꓥꓪ ꓗꓹ ꓛꓲ ꓟ ꓐꓰ ꓢꓷꓸ ꓙ ꓟꓳ ꓙ ꓟ ꓗꓪ ꓐꓰ ꓡ ꓞꓳ ꓕꓲ ꓣꓳ ꓣꓳ ꓔꓯ ꓚꓬꓴ ꓙ ꓠꓹ ꓟ ꓐꓱ ꓶ ꓠꓲꓹ ꓡꓶꓽ ꓙꓳ_ ꓡ? ꓣꓳ ꓪꓴ-ꓢ ꓔꓯ ꓠꓲꓹ ꓠꓵ ꓟ ꓠꓬ ꓮ ꓟꓬ ꓛꓲ ꓡꓳꓸ ꓐꓲ_ ꓡ? ꓐꓰ ꓥ ꓡꓳ꓾ ꓔꓲꓺ ꓒ ꓪ ꓔꓲ ꓡꓰ ꓬꓲꓸ ꓟꓶ ꓗꓪ ꓐꓰ “ ꓟꓹ ꓟ ꓟ-ꓡꓲ ꓗꓪ ꓐꓰ ꓗꓹ ꓛꓲ_ ꓟ ꓶꓼ ꓓꓳ ꓫꓱꓸ ꓓꓳ ꓐꓰ ꓗꓹ ꓛꓲ ꓟꓶ ꓡꓰ ꓠꓹ ꓟ ꓔꓯ ꓪ ꓟꓶ ꓠꓹ ꓟ ꓐꓱ ꓶ ꓬꓰ ꓙ ꓝꓲ꓾” ꓐꓰ ꓪꓽ ꓘꓴ ꓖꓶ ꓗꓷ ꓟ ꓥꓳ=