ꓪꓴ-ꓢ ꓡꓰ ꓣꓳ ꓔꓯ ꓖꓶ_ ꓟ ꓫꓱꓸ ꓤ ꓠꓵ ꓠꓲꓹ ꓚꓱꓹ ꓔꓯ ꓙꓻ ꓜꓲꓼ ꓓꓴ ꓬꓰ ꓡꓯ꓾

ꓪꓴ-ꓢ ꓡꓰ ꓣꓳ ꓔꓯ ꓖꓶ_ ꓟ ꓫꓱꓸ ꓤ ꓠꓵ ꓠꓲꓹ ꓚꓱꓹ ꓔꓯ ꓙꓻ ꓜꓲꓼ ꓓꓴ ꓬꓰ ꓡꓯ꓾

ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓡꓳꓹ ꓬꓰ ꓟ ꓠꓽ ꓫꓵ ꓠꓬꓲ ꓮꓠꓖꓰꓡꓴꓢ ꓪꓽ ꓘꓴ ꓙꓵꓹ ꓕꓯ ꓢꓲ ꓒ ꓬꓰ-ꓢꓴ ꓡꓰ ꓟꓸ ꓖꓶ ꓟ ꓙꓵꓽ ꓗ ꓗꓪ ꓐꓰ (Great Commandment) ꓙꓵꓽ ꓗ ꓐꓴ ꓔꓯ ꓝꓮꓲ ꓓꓵꓽ ꓙ ꓢꓲ ꓣꓳ ꓠꓬ ꓚꓵ ꓚꓵ ꓠꓲꓹ ꓠꓵ ꓐ ꓡ ꓠꓹ ꓟ ꓐꓱ ꓶ ꓪꓴ-ꓢ ꓠꓵ ꓠꓲꓹ ꓔꓯ ꓔꓳꓹ ꓜꓳ ꓠꓬꓲ ꓕꓯ ꓢꓲ ꓠꓲꓹ ꓠꓵ ꓐ ꓡ ꓟ ꓚꓱꓹ ꓔꓯ ꓐꓯ ꓔ ꓡꓳ=

ꓔꓲꓺ ꓒ ꓪ ꓔꓲ ꓡꓰ ꓪꓴ-ꓢ ꓶꓼ ꓓꓳ ꓫꓱꓸ ꓓꓳ (ꓟ-ꓕꓲ 22ꓽ34-40) ꓗꓪ ꓐꓰ ꓪꓴꓽ ꓡꓳꓹ ꓬꓰ ꓟ ꓙꓵꓽ ꓗ ꓚꓱꓹ ꓔꓯ ꓓꓵꓽ ꓙ ꓠꓬꓲ ꓡꓳꓹ ꓬꓰ ꓟ ꓥꓳ= ꓙꓵꓽ ꓗ ꓗꓪ ꓐꓰ ꓪꓴꓽ ꓡꓳꓹ ꓬꓰ ꓟ ꓙꓵꓽ ꓗ ꓠꓬ ꓮ ꓫꓵ ꓔꓯ ꓐꓯ ꓡ ꓐꓰ ꓠ ꓠꓬꓲ ꓘꓶꓽ ꓔꓯ ꓬꓰ-ꓢꓴ ꓡꓰ ꓝꓮꓲ ꓒꓳꓹ ꓖꓶ_ ꓟ ꓠꓬ꓾”ꓠꓴ ꓪꓴ-ꓢ ꓔꓯ ꓠꓴ ꓕꓲ ꓖꓳ ꓓꓱꓽ ꓕꓲ ꓠꓲꓹ ꓟ ꓡꓱꓼ ꓦꓻ ꓐꓰ ꓠꓵ ꓠꓲꓹ ꓐꓰ ꓠꓴ ꓠꓶꓽ ꓛꓳ ꓕꓲ ꓛꓳ ꓔꓯ ꓥ ꓟꓲ ꓠꓴ ꓖꓳ ꓓꓱ ꓕꓲ ꓡꓰꓹ ꓐꓰ ꓠꓲꓹ ꓠꓵ” ꓐꓰ ꓥ ꓟ ꓚꓱꓹ ꓔꓯ ꓐꓯ ꓔ ꓡꓳ=

ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓪꓴ-ꓢ ꓶꓼ ꓓꓳ ꓫꓱꓸ ꓓꓳ ꓗꓪ ꓢꓲ ꓫꓬ ꓕꓳ ꓶ ꓠꓬꓲꓽ ꓕꓱ ꓔꓯ ꓐꓯ ꓡꓳꓹ ꓬꓰꓳ= ꓬꓲ ꓪꓴꓸ ꓕꓲ ꓕꓱ ꓠꓬ ꓪꓴ-ꓢ ꓔꓯ ꓠꓲꓹ ꓠꓵ ꓠꓹ ꓟ ꓚꓱꓹ꓾ ꓠꓬꓲ ꓕꓱ ꓕꓲ ꓕꓱ ꓠꓬ ꓪꓴ-ꓢ ꓔꓯ ꓠꓲꓹ ꓠꓵ ꓟ ꓡꓰ ꓐꓰ ꓣꓳ ꓠꓶꓽ ꓛꓳ ꓕꓲ ꓛꓳ ꓔꓯ ꓥ ꓟꓲ ꓣꓳ ꓖꓳ ꓓꓱ ꓐꓰ ꓕꓲ ꓡꓰꓹ ꓠꓲꓹ ꓠꓵ ꓠꓹ ꓟ ꓚꓱꓹ ꓔꓯ ꓐꓯ ꓡꓳꓹ ꓬꓰ ꓟ ꓥꓳ=

 “ꓪꓴ-ꓢ ꓬꓲ ꓠꓵ ꓠꓲꓹ ꓠꓬ ꓓ ꓪꓴꓸ ꓥ ꓡꓳ꓾” ꓪꓴ-ꓢ ꓠꓬ ꓣꓳ ꓔꓯ ꓕꓲ ꓞꓲꓼ ꓕꓲ ꓑ ꓠꓵ ꓠꓲꓹ ꓐꓰ ꓮ ꓕꓯ ꓟꓲ ꓣꓳ ꓔꓯ ꓠꓲꓹ ꓡꓱ ꓡꓱ ꓡꓳꓸ ꓔꓬ ꓟ ꓔꓯ ꓐꓯ ꓔ ꓡꓳ= ꓖꓳ ꓟ ꓑꓶ ꓓꓴ ꓤ ꓠꓱ ꓤ ꓐꓴ ꓠꓬ ꓐꓹ ꓐ ꓟꓹ ꓟ ꓡꓰ ꓖꓶ_ ꓟ ꓠꓵ ꓠꓲꓹ ꓔꓯ ꓠꓲꓹ ꓠꓵ ꓗꓴꓸ ꓠꓹ ꓟ꓾ ꓫꓱꓸ ꓤ ꓗꓴꓸ ꓠꓹ ꓟ ꓙꓻ ꓜꓲꓼ ꓟ ꓡꓰ ꓐꓰ ꓣꓳ ꓥ ꓟꓲ ꓪꓴ-ꓢ ꓠꓵ ꓠꓲꓹ ꓗꓪ ꓐꓰ ꓠꓲꓹ ꓠꓵ ꓗꓴꓸ ꓠꓹ ꓟ ꓙꓻ ꓜꓲꓼ ꓠꓹ ꓟ ꓚꓱꓹ ꓔꓯ ꓐꓯ ꓔ ꓡꓳ=

ꓢꓲ ꓒ ꓬꓰ-ꓢꓴ ꓬꓲꓸ ꓠꓵ ꓠꓲꓹ ꓠꓬ ꓣꓳ ꓔꓯ ꓠꓲꓹ ꓠꓵ ꓗꓴꓸ ꓠꓹ ꓟ ꓐꓱ ꓶ ꓢꓯꓼ ꓪ ꓖꓶ ꓡꓳ꓾ ꓐꓰ ꓢꓲ ꓫꓬ ꓢꓴ ꓒꓳ-ꓡꓳ ꓐꓯ ꓔ ꓟ ꓥꓳ= ꓔꓲꓺ ꓒ ꓪ ꓔꓲ ꓡꓰ “ꓣꓳ ꓠꓯꓼ ꓗꓪ ꓠꓵ ꓠꓲꓹ ꓟꓬ ꓡ ꓠꓹ ꓟ ꓠꓬ” ꓣꓳ ꓠꓬ ꓪꓴ-ꓢ ꓔꓯ ꓜꓲ ꓠꓹ ꓟ ꓥꓳ꓾ ꓣꓳ ꓬꓲ ꓔꓯ ꓟꓽ ꓗ ꓕ ꓕ ꓣꓳ ꓠꓲꓹ ꓟ ꓔꓯ ꓬꓲ ꓐꓱ ꓶ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓒꓴ ꓔ ꓓꓴ ꓬꓰ ꓡꓯ꓾ ꓐꓰ ꓐꓯ ꓔ ꓡꓳ=

ꓠꓬꓲ ꓕꓱ ꓕꓲ ꓕꓱ ꓠꓬ ꓪꓴ-ꓢ ꓐꓰ ꓣꓳ ꓠꓬꓲꓽ ꓗꓳꓸ ꓚ ꓗꓪ ꓠꓲꓹ ꓠꓵ ꓟ ꓠꓵ ꓠꓲꓹ ꓡꓰ ꓐꓰ ꓣꓳ ꓠꓶꓽ ꓛꓳ ꓕꓲ ꓛꓳꓽ ꓔꓯ ꓠꓲꓹ ꓠꓵ ꓠꓹ ꓟ ꓚꓱꓹ ꓐꓯ ꓔ ꓡꓳ=

ꓣꓳ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓠꓲꓹ ꓠꓵ ꓟ ꓠꓬ ꓪꓴ-ꓢ ꓠꓵ ꓠꓲꓹ ꓔꓯ ꓠꓬꓲ ꓐ ꓡꓰ ꓐꓰ ꓝꓮꓲ ꓓꓵꓽ ꓙ ꓟꓳ ꓡꓰ ꓝꓲ_ ꓟ ꓥꓳ꓾ “ꓪꓴ-ꓢ ꓬꓲ ꓠꓵ ꓠꓲꓹ ꓔꓯ ꓣꓳ ꓗꓪ ꓐꓰ ꓬꓲꓸ ꓔꓯ ꓮ ꓘꓶꓸ ꓟꓽ ꓢꓷꓸ ꓔ ꓟ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓠꓵ ꓠꓲꓹ ꓚꓱꓹ ꓔꓯ ꓢꓷꓸ ꓠꓹ ꓟ ꓣꓳ ꓫꓱꓸ ꓤ ꓠꓵ ꓠꓲꓹ ꓟꓸ ꓖꓶ ꓠꓹ ꓟ ꓥꓳ꓾”

“ꓕꓱ ꓟ ꓡꓰ ꓐꓰ ꓣꓳ ꓮ ꓡꓰ ꓐꓰ ꓠꓲꓹ ꓠꓵ ꓐ ꓡ ꓡ?” ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓟ ꓗꓪ ꓐꓰ “ꓬꓲꓸ ꓪꓴꓸ ꓗꓪ ꓪꓴ-ꓢ ꓣꓳ ꓔꓯ ꓠꓲꓹ ꓠꓵ ꓟ ꓥꓳ꓾”ꓣꓳ ꓠꓬ ꓕꓲ ꓧꓪꓹ ꓧꓪꓹ ꓕꓱ ꓟ ꓔꓯ ꓛꓳ ꓠꓹ ꓟ ꓬꓰ ꓠꓹ ꓟ ꓐꓱ ꓶ ꓟꓽ ꓢ ꓟ ꓑꓶ ꓓꓴ ꓕꓱ ꓟ ꓔꓯ ꓓꓵꓽ ꓙ ꓡꓯꓼ ꓟꓽ ꓛꓲ ꓫꓵ ꓙꓳ_ ꓡꓳ꓾ ꓖꓳ ꓡꓱ ꓥ ꓟꓲ ꓣꓳ ꓕꓲ ꓠꓲꓹ ꓕꓲ ꓪꓼ ꓬꓰ ꓠꓹ ꓟ ꓥꓳ꓾ ꓐꓰ ꓐꓯ ꓔ ꓡꓳ=

ꓬꓲꓸ ꓟꓶ ꓗꓪ ꓐꓰ ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓔꓯ ꓚꓲꓸ ꓛꓬ ꓔꓱꓹ ꓕ ꓠꓹ ꓟ ꓐꓱ ꓶ ꓠ ꓠꓬꓲ ꓘꓶꓽ ꓐꓰ ꓐꓯ ꓔ ꓡꓳ=

“ꓚꓲꓸ ꓛꓬ ꓔꓱ ꓚꓲꓸ ꓛꓬ ꓠ ꓠꓬꓲ ꓠꓬꓲ ꓓꓴ ꓬꓰ ꓡꓯ” “ꓣꓳ ꓔꓯ ꓧꓶꓸ ꓕꓯ ꓠꓲꓹ ꓠꓵ ꓟ ꓑꓶ ꓓꓴ ꓬꓲ ꓔꓯ ꓫꓸ ꓟꓳ ꓔꓬ ꓡ?” “ꓪꓴ-ꓢ ꓬꓲꓸ ꓠꓵ ꓠꓲꓹ ꓔꓯ ꓫꓱꓹ ꓡ ꓓꓵꓽ ꓙ ꓡ?”” ꓥꓪ ꓠꓬ ꓫꓸ ꓟꓳ ꓗꓴꓸ ꓡ?” “ ꓥꓪ ꓠꓬ ꓬꓲ ꓠꓵ ꓠꓲꓹ ꓔꓯ ꓢꓷꓸ ꓙ ꓟꓳ ꓙ ꓡ?” “ ꓚꓲꓸ ꓛꓬ ꓠꓶꓽ ꓛꓳ ꓕꓲ ꓛꓳ ꓔꓯ ꓠꓲꓹ ꓠꓵ ꓠꓹ ꓟ ꓫꓸ ꓔ ꓡ? ꓐꓰ ꓠ ꓠꓬꓲ ꓘꓶꓽ ꓐꓯ ꓔ ꓡꓳ=

“ꓚꓲꓸ ꓛꓬ ꓤꓶꓻ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓗꓪ ꓪꓴ-ꓢ ꓙꓵꓽ ꓗ ꓚꓱꓹ ꓗꓪ ꓐꓰ ꓠꓵ ꓠꓲꓹ ꓙꓵꓽ ꓗ ꓔꓯ ꓛꓳ ꓫꓱꓽ ꓐ ꓡ ꓠꓹ ꓟ ꓐꓰ ꓪꓴ-ꓢ ꓠꓵ ꓠꓲꓹ ꓔꓯ ꓣꓳ ꓘꓳꓹ ꓣꓴ ꓗꓴꓸ ꓠꓹ ꓟ ꓐꓱ ꓶ” “ꓢꓲ ꓫꓬ ꓟ ꓟꓹ ꓟ ꓟ-ꓡꓲ ꓗꓪ ꓐꓰ” ꓬꓰ ꓙ ꓝꓲ ꓐꓰ ꓐꓯ ꓡꓳꓹ ꓬꓰ ꓟ ꓥꓳ=