ꓪꓴ-ꓢ ꓡꓰ ꓣꓳ ꓔꓯ ꓗꓹ ꓗꓹ ꓛꓲ ꓛꓲ ꓐꓰ ꓬꓲ ꓐꓰ ꓕꓲ ꓪꓼ ꓙꓻ ꓫꓱꓽ ꓠꓹ ꓟ ꓐꓱ ꓶ ꓘꓴ_ ꓟ ꓔꓯ ꓘꓳꓹ ꓣꓴ ꓓꓴ ꓬꓰ ꓡꓯ꓾

ꓪꓴ-ꓢ ꓡꓰ ꓣꓳ ꓔꓯ ꓗꓹ ꓗꓹ ꓛꓲ ꓛꓲ ꓐꓰ ꓬꓲ ꓐꓰ ꓕꓲ ꓪꓼ ꓙꓻ ꓫꓱꓽ ꓠꓹ ꓟ ꓐꓱ ꓶ ꓘꓴ_ ꓟ ꓔꓯ ꓘꓳꓹ ꓣꓴ ꓓꓴ ꓬꓰ ꓡꓯ꓾

ꓔꓲꓺ ꓒ ꓪ ꓔꓲ ꓡꓰ ꓡꓳꓹ ꓬꓰ ꓟ ꓠꓽ ꓫꓵ ꓠꓬꓲ ꓪꓴ-ꓢ ꓶꓼ ꓓꓳ ꓫꓱꓹ ꓓꓳ ꓗꓪ ꓐꓰ ꓪꓴ-ꓢ ꓡꓰ ꓣꓳ ꓔꓯ ꓤ ꓟꓶ ꓝꓱ ꓑꓮꓲ ꓗꓪ ꓐ ꓠꓹ ꓟ ꓐꓱ ꓶ ꓘꓴ ꓔ ꓟ ꓔꓯ ꓣꓳ ꓘꓳꓹ ꓣꓴ ꓢꓲ ꓙꓰ ꓠꓹ ꓟ꓾ ꓟꓽ ꓙꓰ ꓠꓹ ꓟ ꓠꓬ ꓣꓳ ꓚꓲ ꓛꓬ ꓓꓵꓽ ꓙ ꓞꓷꓹ ꓠꓹ ꓟ ꓚꓱꓹ ꓔꓯ ꓐꓯ ꓔ ꓡꓳ꓾ ꓪꓴ-ꓢ ꓡꓰ ꓘꓴ_ ꓟ ꓔꓯ ꓮ ꓕꓯ ꓥ ꓟꓲ ꓬꓰꓢ ꓥ ꓡꓯ꓾ ꓐꓰ ꓐꓯ ꓢꓲ꓾ ꓣꓳ ꓤꓶꓻ ꓗꓪ ꓪꓴ-ꓢ ꓐꓱ ꓶ ꓬꓲꓸ ꓔꓶꓸ ꓖꓶ ꓔ ꓠꓬ ꓮ ꓕꓯ ꓥ ꓟꓲ ꓬꓲ ꓐꓰ ꓕꓲ ꓪꓼ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶ ꓟ ꓔꓯ ꓢꓯꓼ ꓖꓶ ꓔ ꓡꓳ=

ꓔꓲꓺ ꓒ ꓪ ꓔꓲ ꓡꓰ ꓡꓳꓹ ꓬꓰ ꓟ ꓠꓽ ꓫꓵ ꓠꓬꓲ ꓟꓲ-ꓢ ꓪꓽ ꓘꓴ ꓙꓵꓹ ꓕꓯ ꓢꓔꓸ ꓑꓰꓔꓰꓣ ꓪꓽ ꓘꓴ ꓦꓲꓻ ꓓꓽ ꓗꓪ ꓜꓲꓼ ꓡ ꓢꓴ ꓐꓴ ꓔꓯ ꓶꓼ ꓓꓳ ꓫꓱꓸ ꓓꓳ ꓟ-ꓕꓲ ꓕꓳ ꓶ ꓗꓪ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓔꓯ ꓥꓳꓽ ꓐꓯ ꓔ ꓟ ꓡꓰ ꓐꓰ ꓪ ꓔꓲ ꓕꓲ ꓣꓳ ꓡꓰ ꓬꓲ ꓤ ꓐꓱ ꓶ ꓤ ꓟꓶ ꓝꓱ ꓑꓮꓲ ꓬꓰ ꓖꓶ_ ꓟ ꓗꓪ ꓮ ꓙꓵ ꓔꓯ ꓘꓴ_ ꓟ ꓥ ꓡꓳ꓾ ꓖꓳ ꓟ ꓗꓪ ꓐꓰ ꓪ ꓔꓲ ꓠꓬ ꓬꓲ ꓠꓲꓹ ꓟ ꓘꓴꓽ ꓗꓪ ꓐꓰ ꓙꓲ_ ꓟ ꓚꓱꓹ ꓟꓸ ꓖꓶ_ ꓟ ꓥ ꓢꓲ꓾ ꓮ ꓡꓰ ꓕꓲ ꓣꓳ ꓔꓯ ꓥ ꓟꓲ ꓑꓮꓲ ꓗꓪ ꓙꓰ ꓠꓹ ꓟ ꓜꓲ ꓜꓲ ꓟꓴ ꓟꓴ ꓬꓰ_ ꓟ ꓟꓽ ꓥ꓾ ꓚꓲ ꓛꓬ ꓠꓲꓹ ꓟ ꓗꓪ ꓐꓰ ꓙꓰ ꓠꓹ ꓟ ꓐꓱ ꓶ ꓠꓲꓹ ꓡꓶꓽ ꓙꓳ_ ꓟ ꓚꓱꓹ ꓔꓯ ꓟꓳ ꓪ ꓡꓳ=

ꓕꓱ ꓟ ꓠꓬ ꓪꓴ-ꓢ ꓡꓰ ꓬꓲ ꓐꓰ ꓕꓲ ꓪ ꓤ ꓟꓶ ꓝꓱ ꓑꓮꓲ ꓗꓪ ꓐ ꓠꓹ ꓟ ꓐꓱ ꓶ ꓙ ꓖꓶ ꓔ ꓟ ꓥꓳ= ꓝꓮꓲ ꓬꓲ ꓡꓰ ꓣꓳ ꓮ ꓙꓵ ꓔꓯ ꓘꓴ_ ꓟ ꓥ ꓡꓳ= ꓔꓲꓺ ꓒ ꓪ ꓔꓲ ꓡꓰ ꓤ ꓟꓶ ꓝꓱ ꓑꓮꓲ ꓗꓪ ꓙꓰ ꓠꓹ ꓟ ꓐꓱ ꓶ ꓣꓳ ꓔꓯ ꓪꓴ-ꓢ ꓡꓰ ꓣꓳ ꓚꓲ ꓛꓬ ꓠꓲꓹ ꓡꓶꓽ ꓙꓳ_ ꓟ ꓡꓰ ꓐꓰ ꓠꓲꓹ ꓟ ꓞꓷꓹ ꓠꓹ ꓟ ꓓꓵꓽ ꓙ ꓡꓰ ꓝꓲ_ ꓟ ꓥꓳ= ꓕꓱ ꓟ ꓠꓬ ꓙꓰ ꓠ ꓔ ꓡꓳ꓾ ꓬꓰ ꓠ ꓔ ꓡꓳ꓾ ꓐꓰ ꓣꓳ ꓡꓯ ꓒꓯꓹ ꓗꓪ ꓟꓬꓱꓽ ꓬꓰ ꓢꓴ ꓡꓰ ꓐꓰ ꓟꓽ ꓥ꓾ ꓮꓽ ꓐ ꓐꓰ ꓬꓲꓸ ꓤ ꓠꓬꓲꓽ ꓗꓳꓸ ꓛ ꓗꓪ ꓞꓳ ꓒꓵꓽ_ ꓟ ꓐꓰ ꓪꓴ-ꓢ ꓡꓰ ꓣꓳ ꓔꓯ ꓠꓲꓹ ꓫꓵ_ ꓟ ꓔꓯ ꓙꓻ ꓜꓲꓼ ꓠꓹ ꓟ ꓚꓱꓹ ꓣꓳ ꓠꓲꓹ ꓡꓱ_ ꓟ ꓠꓲꓹ ꓫꓵ_ ꓟ ꓚꓱꓹ ꓔꓯ ꓢꓲꓺ ꓠꓹ ꓟ ꓙꓵꓽ ꓪ ꓖꓶ ꓔ ꓡꓳ꓾ ꓐꓰ ꓐꓯ ꓔ ꓡꓳ=

ꓐꓹ ꓐ꓾ ꓪꓴ-ꓢ꓾ ꓪ ꓔꓲ ꓠꓬ ꓣꓳ ꓐꓴ ꓠꓯꓼ ꓗꓪ ꓠꓲꓹ ꓟ ꓙꓬ ꓓꓴ ꓟꓽ ꓙꓳ꓾ ꓮ ꓕꓯ ꓟꓲ ꓬꓲ ꓡꓰ ꓘꓴ_ ꓟ ꓗꓪ ꓡ ꓠꓹ ꓟ ꓡꓳꓸ ꓔꓬ ꓟ ꓡꓰ ꓐꓰ ꓘꓶ ꓡꓶꓽ ꓗꓽ ꓕ ꓓꓴ ꓐꓰ ꓔꓳꓹ ꓜꓳ ꓥ ꓟꓲ ꓘꓳꓹ ꓣꓴ ꓬꓲꓸ ꓙꓵꓹ ꓖꓶ_ ꓟ ꓥꓳ=

ꓕꓲ ꓧꓪꓹ ꓧꓪꓹ ꓣꓳ ꓠꓬ ꓪꓴ-ꓢ ꓡꓰ ꓘꓴ_ ꓟ ꓔꓯ ꓓꓵꓽ ꓙ ꓡꓯꓼ ꓟꓽ ꓛꓲ ꓫꓵ ꓟꓽ ꓢꓷꓸ ꓡꓰꓳ ꓫꓵ ꓚꓲꓸ ꓛꓬ ꓠꓲꓹ ꓟ ꓔꓯ ꓡꓰ ꓓꓵꓽ ꓙ ꓢꓲ ꓬꓰ ꓔꓬ ꓟ ꓥꓳ꓾ ꓝꓮꓲ ꓣꓳ ꓔꓯ ꓪꓴ-ꓢ ꓡꓰ ꓣꓳ ꓠꓲꓹ ꓫꓵ_ ꓟ ꓔꓯ ꓬꓰ ꓠꓹ ꓟ ꓐꓱ ꓶ ꓙꓵꓽ ꓪ ꓖꓶ ꓔ ꓟ ꓡꓰ ꓐꓰ ꓣꓳ ꓥ ꓟꓲ ꓬꓲ ꓠꓲꓹ ꓡꓶꓽ ꓔꓯ ꓛꓳ ꓠꓹ ꓟ꓾ ꓬꓲ ꓔꓯ ꓬꓲ ꓙꓵꓹ ꓖꓶ ꓠꓹ ꓟ ꓥꓳ꓾ ꓣꓳ ꓠꓯꓼ ꓗꓪ ꓔꓳꓹ ꓜꓳ ꓡ ꓟ ꓫꓸ ꓓꓴ ꓙꓳ ꓥ ꓟꓲ ꓣꓳ ꓔꓯ ꓚꓬꓴ ꓙ ꓟ ꓬꓰ ꓙ ꓟ ꓐꓰ ꓣꓳ ꓠꓲꓹ ꓟ ꓘꓴꓽ ꓗꓪ ꓢꓲ ꓡꓲꓹ ꓟ ꓐꓰ ꓗꓹ ꓛꓲ ꓟ ꓔꓯ ꓖꓶ_ ꓟ ꓔꓯ ꓥ ꓟꓲ ꓐꓯ ꓔ ꓡꓳ=

ꓪꓴ-ꓢ ꓔꓯ ꓟꓲ-ꓢ ꓪꓽ ꓘꓴ ꓙꓵꓹ ꓕꓯ ꓣꓳ ꓥ ꓟꓲ ꓬꓲ ꓐꓱ ꓶ ꓬꓲ ꓙꓵꓹ ꓖꓶ ꓠꓹ ꓟ ꓥꓳ꓾ ꓬꓲ ꓐꓯ ꓘꓶꓽ ꓔꓯ ꓠ ꓠꓹ꓾ ꓪꓽ ꓘꓴ_ ꓟ꓾ ꓫꓸ ꓓꓴ ꓔꓳꓹ ꓜꓳ ꓔꓬ ꓢꓴ ꓠꓻ ꓫꓵ ꓠꓻ ꓔꓬ ꓢꓴ ꓕꓲ ꓣꓳ ꓕꓵꓼ ꓡꓰ ꓓꓵꓽ ꓙ ꓟ ꓣꓳ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓬꓰ ꓙ ꓔꓳꓹ ꓙ ꓠꓲꓹ ꓟ ꓗꓳꓸ ꓖꓶ ꓠꓹ ꓟ ꓐꓰ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓙꓻ ꓡꓯ ꓘꓳ ꓓꓴ ꓬꓰ ꓠꓹ ꓟ ꓥꓳ꓾ ꓫꓸ ꓓꓴ ꓔꓳꓹ ꓜꓳ ꓔꓬ ꓢꓴ ꓔꓯ ꓬꓰ ꓙ ꓔꓳꓹ ꓙ ꓖꓶ_ ꓟ ꓠꓬ ꓪꓴ-ꓢ ꓐꓰ ꓕꓲ ꓪꓼ ꓔꓬ ꓟ ꓥ ꓡꓳ=

ꓪꓴ-ꓢ ꓡꓰ ꓘꓴ_ ꓟ ꓔꓯ ꓮ ꓡꓰ ꓐꓰ ꓒꓳꓹ ꓖꓶ_ ꓡ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓓꓴ ꓬꓰ ꓡꓯ=ꓬꓲꓸ ꓟꓶ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰ ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓢꓯꓸ ꓔꓬ ꓟ ꓤꓶꓻ ꓗꓪ ꓚꓲꓸ ꓛꓬ ꓬꓰ ꓔꓬ ꓟ ꓟꓬꓱꓽ ꓐꓰ ꓪꓴ-ꓢ ꓔꓯ ꓬꓲꓸ ꓙꓵꓹ ꓮ ꓟꓬ ꓖꓶ_ ꓡ? ꓣꓳ ꓔꓱꓹ ꓕ ꓠꓬꓲ ꓠꓹ ꓟ ꓐꓰ ꓫꓸ ꓔꓬ ꓢꓴ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓬꓰ ꓙ ꓟ ꓐꓰ ꓣꓳ ꓠꓯꓼ ꓗꓪ ꓠꓲꓹ ꓟ ꓢꓲ ꓡꓲꓹ ꓗꓹ ꓛꓲ ꓟ ꓔꓯ ꓪ ꓟꓶ ꓡ ꓥꓳ ꓐꓰ ꓐꓯ ꓔ ꓡꓳ=

ꓟꓹ ꓟ ꓟ-ꓡꓲ ꓠꓯꓼ ꓗꓪ ꓐꓰ ꓣꓳ ꓔꓯ ꓪꓴ-ꓢ ꓡꓰ ꓘꓴ_ ꓟ ꓔꓯ ꓟꓽ ꓑ ꓙ ꓟꓽ ꓢꓷꓸ ꓫꓵ ꓕꓱ ꓡꓱ ꓟꓽ ꓙꓳ ꓠꓹ ꓟ ꓐꓱ ꓶ ꓣꓳ ꓤꓶꓻ ꓗꓪ ꓬꓲꓸ ꓙꓵꓹ ꓖꓶ ꓠꓹ ꓟ ꓐꓱ ꓶ ꓪꓽ ꓘꓴ ꓙ ꓖꓶ ꓝꓲ꓾