ꓪꓴ-ꓢ ꓬꓲ ꓟꓽ ꓡꓳꓹ ꓬꓰ ꓟ ꓠꓵ ꓠꓲꓹ꓾ ꓫꓱꓸ ꓤ ꓠꓲꓹ ꓔꓯ ꓙꓵꓻ=

ꓪꓴ-ꓢ ꓬꓲ ꓟꓽ ꓡꓳꓹ ꓬꓰ ꓟ ꓠꓵ ꓠꓲꓹ꓾ ꓫꓱꓸ ꓤ ꓠꓲꓹ ꓔꓯ ꓙꓵꓻ=

9 ꓦ ꓟ 15 ꓠꓬꓲ꓾ 2019

ꓕꓲꓽ ꓠꓽ ꓡꓰ ꓕꓲꓽ ꓠꓽ ꓞꓳ ꓜꓴꓻ ꓜꓲꓼ ꓡꓳꓽˍ ꓟ ꓐꓰ Angelus ꓪꓽ ꓘꓴˍ ꓟ ꓗꓪ ꓠ-ꓦꓬ-ꓠꓬꓲ ꓟꓸ ꓟꓲ ꓔꓯ ꓟꓳꓸ ꓪꓴ-ꓢ ꓬꓲꓸ ꓟꓽ ꓡꓳꓹ ꓬꓰˍ ꓟ ꓠꓵ ꓠꓲꓹ ꓫꓱꓸ ꓤ ꓠꓲꓹ ꓔꓯ ꓙꓵꓻ ꓠꓹ ꓟ ꓐꓯ ꓑꓶꓻ ꓗꓷꓳ=

ꓠꓬꓲꓸ ꓠꓬꓲ ꓶ ꓓꓳꓽ ꓫꓱꓹ ꓓꓳꓽ ꓕꓳꓽ ꓶ ꓗꓪ ꓝꓲꓸ ꓢ ꓢꓴ꓾ ꓝꓴꓲꓸ ꓙꓳ ꓢꓴ ꓐꓴ ꓐꓰ ꓕꓲꓽ ꓪꓺꓽ ꓔꓬꓹ ꓟ꓾ ꓝꓴꓲ ꓙꓳ ꓢꓴ ꓐꓴ ꓔꓯ ꓘꓳꓹ ꓣꓴ ꓢꓲ ꓬꓲ ꓪ ꓐꓰ ꓕꓲꓽ ꓪꓺꓽ ꓜꓻ ꓜꓽˍ ꓟ ꓪꓴꓸ ꓠꓬꓲ ꓢꓲꓺ ꓒꓽ ꓬꓰ-ꓢꓴ ꓔꓯ ꓒ-ꓡꓲ-ꓢꓷ ꓐꓴ ꓡꓰ ꓱ’ꓽ ꓠꓱꓽˍ ꓡꓳ= ꓚꓵꓺ ꓚꓵꓺ ꓢꓲꓺ ꓒ ꓬꓰ-ꓢꓴ ꓡꓰ ꓝꓴꓲ ꓙꓳ ꓢꓴ ꓐꓴ ꓔꓯ ꓘꓳˍꓹ ꓣꓴˍ ꓟ꓾ꓬꓲꓸ ꓪ ꓐꓴ ꓐꓰ ꓕꓲꓽ ꓪꓺꓽ ꓜꓻ ꓜꓽˍ ꓟ ꓾ ꓕꓱꓻ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓬꓲꓸ ꓪꓴꓽ ꓓꓰˍ ꓟ ꓟꓬꓱꓽ ꓐꓬꓱꓽ ꓘꓶꓽ ꓔꓯ ꓟꓸ ꓖꓶꓽˍ ꓟ ꓥꓳ=ꓣꓳꓽ ꓐꓴ ꓪꓽ ꓘꓴ ꓦꓲꓻ ꓗꓹ ꓘꓶꓽ ꓓꓴ ꓗꓪ “ꓝꓴꓲ ꓙꓳ ꓢꓴ ꓐꓴ ꓔꓯ ꓘꓳꓹ ꓣꓴˍ ꓡꓳ꓾ ꓠꓴ ꓪ ꓐꓰ ꓕꓲꓽ ꓪꓺꓽ ꓜꓻ ꓜꓽˍ ꓥꓳ” ꓐꓰ ꓐꓳꓻ ꓔ ꓠ ꓗˍ ꓡꓳ=ꓟꓲ-ꓢꓮ ꓔꓲꓺ ꓖꓶꓽˍ ꓕꓯ ꓬꓲ ꓐꓰ ꓕꓲꓽ ꓪꓺꓽ ꓜꓽ ꓠꓹ ꓟ ꓣꓳꓽ ꓮꓽ ꓙꓵꓽ ꓔꓯ ꓘꓴꓻ ꓔꓬꓹ ꓡꓳ=

ꓚꓲꓸ ꓛꓬꓼ ꓔꓯ ꓝꓴꓲ ꓓꓰꓺ ꓢꓴ ꓔꓯ ꓐꓰ ꓕꓽ ꓧꓹ ꓙꓰ= ꓠꓬꓲꓸ ꓠꓬꓲ ꓟꓸ ꓟꓲ ꓗꓪ ꓠꓻ ꓠꓹ ꓪꓸ ꓟ ꓔꓯꓺ ꓥꓳꓽ 3 ꓙꓰꓽ ꓟ ꓠꓬ ꓪꓴ-ꓢ ꓐꓰ ꓗꓶꓹ ꓶꓽ ꓡꓰ ꓢꓴ ꓐꓴ꓾ ꓒꓲꓼ ꓬꓰ ꓟꓶꓽ ꓬꓰ ꓢꓴ ꓐꓴ ꓔꓯ ꓪꓴ-ꓢ ꓡꓰ ꓧꓪꓺ ꓔꓬꓹ ꓟ ꓔꓯ ꓬꓲꓼ ꓠꓬꓲꓸ ꓖꓶꓽ ꓠꓲꓹ ꓫꓵˍ ꓡꓳ=

ꓓꓽ ꓪꓴꓸ ꓔꓯꓺ ꓐꓬꓱꓽ ꓠꓬ ꓒꓲꓼ ꓬꓰ ꓟ ꓮꓸ ꓣꓳ ꓤ ꓚ ꓟꓲꓽ ꓔꓯ  ꓑ ꓙꓽ ꓪˍ ꓡꓳ= 99 ꓟꓺ ꓟ ꓮꓸ ꓣꓳ ꓔꓯ ꓡꓳ ꓔ ꓢꓲ꓾ ꓒꓲꓼ ꓬꓰ ꓟ ꓮꓸ ꓣꓳ ꓕꓲꓽ ꓟꓺ ꓔꓯ ꓧꓪꓺ ꓙꓰˍ ꓡꓳ=ꓪꓴ-ꓢ ꓐꓰ ꓗꓶꓹ ꓶꓽ ꓡꓰ ꓢꓴ ꓐꓴ꓾ ꓝꓴꓲ ꓙꓳ ꓢꓴ ꓐꓴ ꓕꓽ ꓙ ꓣꓳꓺ꓾ ꓠꓴ ꓪ ꓔꓯ ꓫꓸ ꓟ ꓠꓲꓹ ꓟ ꓡꓰ ꓪꓴ-ꓢ ꓧꓪꓺ ꓔꓬꓹ ꓡꓳ=ꓠꓴ ꓠꓬ ꓠꓱꓸ ꓐꓯꓼ ꓕꓯꓽ ꓢꓲꓺ ꓪꓴ-ꓢ ꓬꓲꓸ ꓠꓲꓹ ꓟ ꓔꓱꓺ ꓫꓵꓸ ꓗꓪ ꓔꓬꓹ ꓟꓶ ꓢꓴ ꓥꓳ=ꓠꓴ ꓚꓲꓸ ꓛꓬꓼ ꓡꓰ ꓝꓴꓲꓸ ꓙꓳ ꓢꓴ ꓕꓲꓽ ꓣꓳ ꓥ ꓟ ꓪꓴꓸ ꓠꓬꓲ ꓕꓽ ꓙ ꓫꓸ=

ꓔꓯꓺ ꓥꓳꓽ 2 ꓙꓰꓽ ꓕꓲꓽ ꓙꓰꓽ ꓟ ꓠꓬ ꓓ-ꓘꓷ-ꓟ ꓒꓴ ꓒꓯꓼ ꓞꓲ ꓒꓯꓼ ꓙꓳˍ ꓟ ꓤ ꓟꓶ ꓤ ꓕꓲꓽ ꓣꓳ ꓕꓲꓽ ꓒꓯꓼ ꓒꓲꓼ ꓬꓰ ꓟ ꓪꓴꓸ ꓠꓬꓲ ꓧꓪˍ ꓟ ꓔꓯ ꓑ ꓙ ꓪˍ ꓡꓳ=ꓕꓱꓻ ꓗꓪ ꓓ-ꓘꓷ-ꓟ ꓕꓲꓽ ꓒꓯꓼ ꓡꓰꓽ ꓥ꓾ ꓮꓸ ꓫꓵꓽˍ ꓟꓲ ꓟꓽ ꓒꓵꓽ ꓐꓰ ꓐꓯˍ ꓟ ꓟꓽ ꓥ ꓥ ꓾ ꓣꓳˍ ꓥ ꓟꓲ ꓒꓵꓽ ꓗ ꓗꓷ ꓢꓲ ꓧꓪˍ ꓟ ꓟꓶˍ ꓡꓳ= ꓟꓳꓻ ꓡꓰˍ ꓕꓯꓽ ꓮ ꓘꓶꓸ ꓠꓲꓹ ꓒꓴˍ ꓡꓳ=ꓠꓴ ꓪ ꓚꓲꓸ ꓛꓬ ꓠꓴ ꓪ ꓮꓸ ꓫꓵꓽ ꓟꓲ ꓟꓽ ꓢꓷ꓾ ꓝꓴꓲ ꓙꓳ ꓢꓴ ꓾ ꓒꓴ ꓕꓲꓽ ꓒꓯꓼ ꓡꓰꓽ ꓒꓵꓽˍ ꓡꓳ꓾ꓟꓽ ꓬꓳꓸ ꓚꓰˍ ꓟ ꓞꓳ ꓤ ꓕꓲꓽ ꓣꓳ ꓡꓰ ꓐꓰ ꓚꓬꓹ ꓔ ꓥˍ ꓟꓲ ꓪꓴ-ꓢ ꓠꓬ ꓠꓴ ꓔꓯ ꓟꓽ ꓠꓽ ꓠꓽ ꓧꓪ ꓔꓬꓹ ꓡꓳ=ꓠꓴ ꓠꓬ ꓬꓲꓸ ꓐꓱ ꓶ ꓮ ꓘꓶꓸ ꓒꓵꓽˍ ꓟ ꓔꓯ ꓪꓴ-ꓢ ꓡꓰ ꓠꓴ ꓔꓯ ꓐꓯ ꓔꓬꓹ ꓡꓳ=

ꓢ ꓙꓰꓽ ꓕꓲꓽ ꓙꓰꓽ ꓟ ꓠꓬ ꓒꓲꓼ ꓬꓰ ꓟ ꓤꓽ ꓔꓯꓺ ꓥꓳꓽ ꓔꓯ ꓠꓻ ꓠꓹ ꓪˍ ꓡꓳ= ꓖꓳ ꓗꓪ ꓬꓲꓸ ꓐꓹ ꓐ ꓔꓬꓹ ꓗꓪ ꓬꓲꓼ ꓡꓹ ꓟ ꓓꓵꓽ ꓙ ꓧꓪꓸ ꓛꓲꓽ ꓡˍ ꓟ ꓤꓽ ꓔꓯ ꓬꓲꓸ ꓐꓹ ꓐ ꓠꓬ ꓠꓲꓹ ꓟ ꓟꓽ ꓙꓬ꓾ ꓥꓳ ꓡꓳꓸ ꓓꓴ ꓟꓽ ꓐꓬꓺ ꓡꓰꓽ ꓢꓲ ꓮ ꓕꓯˍ ꓟꓲ ꓡꓳꓸ ꓠꓬꓹ ꓔꓬꓹ ꓡꓳ=ꓕꓱ ꓗꓪ ꓠꓴ ꓪ ꓢꓷ ꓔ ꓓꓴ ꓠꓬ꓾ ꓠꓴ ꓮ ꓡꓰ ꓗꓪ ꓛꓲ ꓪꓴꓽ ꓓꓰˍ ꓟ ꓝꓴꓲꓸ ꓔꓯ ꓬꓰ ꓛꓬ ꓗꓷˍ ꓥ ꓟꓲ ꓙꓳꓺ ꓛꓱꓽ ꓓꓴ ꓟꓽ ꓙꓳ ꓙꓳ ꓐꓰ ꓪꓴ-ꓢ ꓔꓬꓹ ꓗꓪ ꓬꓲꓼ ꓡꓯ=ꓪꓴ-ꓢ ꓠꓬ ꓠꓴ ꓔꓯ ꓡꓳꓸ ꓠꓬꓹ ꓔꓬꓹ ꓟ ꓔꓯ ꓓꓵꓽ ꓙ ꓟꓶ ꓡꓯ=

ꓣꓳꓽ ꓐꓴ ꓠꓬ ꓡꓲ ꓛꓲ ꓗꓪ ꓒꓲꓼ ꓬꓰ ꓟ ꓮ ꓣꓳ ꓡꓰ ꓐꓰ ꓡꓯꓼ ꓒꓶ ꓗꓪ ꓑꓱꓸ ꓔ ꓟ ꓟꓶ ꓢꓴ꓾ ꓒꓲꓼ ꓬꓰ ꓟ ꓒꓴ ꓡꓰ ꓐꓰ ꓧꓪˍ ꓟ ꓟꓶ ꓢꓴ꓾ꓐꓹ ꓐ ꓐꓰ ꓝꓮꓲ ꓕꓲꓽ ꓧꓪꓹ ꓜꓲꓺ ꓟꓶˍ ꓟ ꓤꓽ ꓐꓴ ꓡꓰ ꓐꓰ ꓣꓳꓽ ꓐꓴ ꓣꓱꓽ ꓛꓰ ꓘꓳꓹ ꓣꓴ ꓟꓶˍ ꓥꓳ=

ꓪꓴ-ꓢ ꓠꓬ ꓣꓳꓽ ꓔꓯ ꓟꓽ ꓡꓳꓹ ꓬꓰ ꓟ ꓬꓲꓸ ꓠꓵ ꓠꓲꓹ ꓔꓯ ꓘꓳꓹ ꓣꓴ ꓠꓹ ꓟ ꓡꓳꓸ ꓠꓬꓹ ꓔꓬꓹ ꓡꓳ=ꓖꓳ ꓡꓱ ꓥˍ ꓟꓲ ꓪꓴ-ꓢ ꓬꓲꓸ ꓪꓴꓽ ꓓꓰˍ ꓟ ꓫꓱꓸ ꓤ ꓠꓲꓹ ꓔꓯ ꓣꓳꓽ ꓐꓴ ꓡꓳ ꓗꓷ ꓔꓬꓹ ꓡꓳ=ꓒꓲꓼ ꓬꓰ ꓟ ꓤꓽ ꓔꓯ ꓥꓳꓽ ꓗꓪ  ꓟ ꓤꓽ ꓡꓰ ꓐꓰ ꓐꓹ ꓐ ꓔꓯ ꓐꓹ ꓐ ꓕꓲꓽ ꓣꓳ ꓡꓰ ꓟꓽ ꓟꓳꓻ ꓟꓳꓻ ꓐꓰ ꓟꓬꓱꓽ ꓢꓲꓺ ꓒꓽ ꓕꓲꓽ ꓣꓳ ꓡꓰ ꓐꓰ ꓟꓳꓻ ꓗꓷꓳ=ꓚꓵꓺ ꓘꓶꓽ ꓖꓶꓽˍ ꓟ ꓪꓴ-ꓢ ꓔꓯ ꓡꓰꓽ ꓟꓳꓻ ꓢꓲ꓾ ꓫꓱꓸ ꓤ ꓠꓲꓹ ꓐꓲꓻ ꓞꓹ ꓟ ꓪꓴ-ꓢ ꓔꓯ ꓟ ꓟꓳꓻ ꓟ ꓤꓽ ꓪꓴꓽ ꓡꓰ ꓐꓰ ꓥ ꓡꓳ=

ꓪꓴ-ꓢ ꓔꓬꓹ ꓗꓪ ꓬꓲꓼ ꓡ ꓠꓹ ꓟ ꓪꓴ-ꓢ ꓘꓴ ꓔꓬꓹ ꓟ ꓠꓬ ꓐꓯ ꓟꓴ ꓘꓶꓽ ꓠꓹ ꓟ ꓟꓽ ꓥ꓾ ꓪꓴ-ꓢ ꓠꓬ ꓙꓲꓽ ꓙꓲꓽ ꓑꓰꓹ ꓑꓰꓹ ꓡꓰ ꓟꓽ ꓥ꓾ ꓠꓵ ꓠꓲꓹ ꓗꓪ ꓐꓰ ꓚꓬꓴꓸ ꓙ ꓢꓴ ꓥ ꓡꓳ=

ꓣꓳ ꓐꓴ ꓥꓳꓽ ꓔꓬꓹ ꓟ ꓠꓬ ꓔꓯ ꓥꓳꓽ ꓗꓪ ꓟ ꓤꓽ ꓪꓴꓽ ꓡꓰ ꓐꓰ ꓥꓪ ꓠꓬ ꓔꓱꓹ ꓚꓵˍ ꓡꓳ꓾ ꓬꓲꓸ ꓠꓬ ꓛꓳꓸ ꓢꓴ ꓥꓳ꓾ ꓐꓰ ꓟꓳꓻ ꓔꓬꓹ ꓡꓳ= ꓚꓲꓸ ꓛꓬ ꓠꓬ ꓔꓱꓹ ꓢꓴ ꓥ ꓢꓲ꓾ ꓠꓱꓸ ꓐꓯꓼ ꓠꓬ ꓝꓴꓲꓸ ꓬꓰ ꓢꓴ ꓟꓽ ꓙꓲ ꓢꓴ ꓡꓰ ꓐꓰ ꓟꓳꓻ ꓔꓬꓹ ꓡꓳ=ꓚꓲꓸ ꓛꓬ ꓔꓯ ꓙꓲꓻ ꓢꓴ ꓕꓲꓽ ꓣꓳ ꓡꓰ ꓐꓰ ꓮ ꓕꓯꓹ ꓟꓲ ꓕꓽ ꓙꓵꓻ꓾ ꓪꓴ-ꓢ ꓐꓰ ꓕꓲꓽ ꓠꓲꓹ ꓕꓲꓽ ꓪꓺꓽ ꓣꓱꓽ ꓬꓰ ꓢꓴ ꓡꓰꓽ ꓙꓲꓻ ꓢꓴ ꓥ ꓢꓲꓻ ꓝꓴꓲ ꓔꓯ ꓮ ꓡꓰ ꓐꓰ ꓤˍ ꓙꓰ ꓠꓯˍ ꓟ ꓢꓷ ꓢꓴ ꓥ ꓡꓳ=ꓪꓴ-ꓢ ꓣꓱꓽ ꓙˍ ꓟ ꓟꓽ ꓥ ꓠꓬ ꓟꓽ ꓙꓲꓻ ꓡ ꓟ ꓡꓰ ꓐꓰ ꓝꓴꓲꓸ ꓗꓪ ꓐꓰˍ ꓟꓲ ꓧꓹ ꓙꓰ ꓟꓽ ꓐ ꓡ=

ꓪꓴ-ꓢ ꓬꓲꓸ ꓖꓼ ꓖꓶꓽˍ ꓟ ꓣꓱꓽ ꓛꓰ ꓔꓯ ꓘꓳꓹ ꓣꓴ ꓢꓲ ꓪꓴ-ꓢ ꓗꓪ ꓐꓰ ꓢ-ꓓꓯꓼ ꓔꓯ ꓧꓪꓸ ꓡꓰ ꓡꓯ=

Credit to Vatican News

https://bit.ly/2kCLLpp