ꓫꓱꓸ ꓤ_ ꓟ ꓔꓯ ꓪ ꓟꓶꓽ_ ꓟ ꓡꓰ ꓐꓰ ꓫꓱꓸ ꓤ ꓗꓴꓸ ꓢꓴ ꓒꓬꓱꓼ ꓠꓹ ꓟ

Divine Mercy Sunday in the Church of Santo Spirito in Sassia

ꓫꓱꓸ ꓤ_ ꓟ ꓔꓯ ꓪ ꓟꓶꓽ_ ꓟ ꓡꓰ ꓐꓰ ꓫꓱꓸ ꓤ ꓗꓴꓸ ꓢꓴ ꓒꓬꓱꓼ ꓠꓹ ꓟ

            ꓫꓱꓸ ꓤ ꓟ ꓬꓰ-ꓢꓴ ꓑꓮꓲ ꓠꓽ ꓫꓵꓽ ꓠꓬꓲ ꓗꓪ ꓔꓲ-ꓒ ꓪ ꓔꓲ ꓡꓰ ꓙꓲ-ꓢꓴ ꓢꓲ ꓤ ꓐꓴ ꓔꓯ ꓬꓰ-ꓢꓴ ꓫꓱꓸ ꓤ ꓠꓲꓹ ꓔꓯ ꓘꓳ ꓣꓴ ꓠꓹ ꓟ ꓢꓯꓼ ꓖꓶ_ ꓡꓳ= ꓬꓰ-ꓢꓴ ꓠꓬ ꓬꓲ ꓫꓱꓸ ꓤ_ ꓟ ꓠꓲꓹ ꓟ ꓔꓯ ꓢꓲ ꓡꓲꓹ ꓟ-ꓸ ꓝꓴꓲ ꓖꓽ ꓖꓶ_ ꓟ ꓐꓰ ꓬꓲ ꓠꓸꓹ ꓓꓴ ꓗꓪ ꓐꓰ ꓣꓳ ꓔꓯ ꓖꓶ_ ꓟ ꓥꓳ= ꓫꓱꓸ ꓤ_ ꓟ ꓠꓲꓹ ꓟ ꓔꓯ ꓠꓱꓸ ꓐꓯꓼ ꓔꓯ ꓖꓶ ꓠꓹ ꓟ ꓢꓯꓼ ꓖꓶ_ ꓡꓳ=

            ꓢꓲ ꓡꓲꓹ ꓗ ꓛꓲ_ ꓟ-ꓸ ꓝꓴꓲ ꓖꓽ ꓖꓶ_ ꓟ ꓐꓰ ꓬꓰ-ꓢꓴ ꓫꓱꓸ ꓤ ꓟ ꓗꓪ ꓐꓰ ꓞꓳ ꓫꓵꓼ ꓒꓬꓱꓼ ꓓꓴ ꓬꓰ ꓡꓯ= ꓫꓱꓸ ꓤ ꓟ ꓔꓯ ꓣꓳ ꓟꓸ ꓖꓶ ꓠꓹ ꓟ ꓐꓱ ꓶ ꓶꓼ ꓤ ꓫꓱꓸ ꓤ ꓓꓰꓽ ꓓꓴ ꓬꓰ ꓡꓯ= ꓕꓱ ꓟ ꓗꓪ ꓐꓰ ꓣꓳ ꓙꓵ ꓠꓲꓹ ꓠꓬ ꓢꓯꓸ ꓔꓬ ꓢꓲ-ꓸ ꓣꓳ ꓤꓶꓸꓹ ꓥ ꓟꓲ ꓕꓲ ꓠꓲꓹ ꓕꓲ ꓪ ꓔꓬ ꓟꓶ_ ꓥꓳ= ꓫꓱꓸ ꓤ ꓟ ꓔꓯ ꓟꓸ ꓖꓶ ꓠꓹ ꓟ ꓪꓴ-ꓢ ꓶꓼ ꓓꓳ ꓫꓱꓸ ꓓꓳ ꓔꓯ ꓚ ꓟꓸ ꓖꓶ ꓠ ꓔ ꓡꓳ ꓐꓰ ꓔꓲ-ꓒ ꓪ ꓔꓲ ꓡꓰ ꓠꓬꓲꓽ ꓧꓪ ꓕꓲ ꓧꓪ ꓟ ꓰꓮꓢꓔꓰꓣ ꓠꓽ ꓫꓵꓽ ꓠꓬꓲ ꓫꓱꓸ ꓤ ꓟ ꓬꓰ-ꓢꓴ ꓑꓮꓲ ꓟꓲ-ꓢ ꓪꓽ ꓘꓴꓽ ꓙꓵꓹ ꓗꓪ ꓚ ꓟꓸ ꓖꓶ_ ꓟ ꓥꓳ=

            ꓠꓵ ꓠꓲꓹ ꓠꓬ ꓣꓳ ꓐꓱ ꓶ ꓒꓬꓱꓼ ꓡ ꓠꓬ ꓙꓵꓸꓹ ꓠꓲꓹ ꓠꓬ ꓙꓲ ꓖꓴ ꓟꓽ ꓙꓳ ꓗꓷ ꓡ_ ꓟ ꓥꓳ= ꓙꓵꓸꓹ ꓠꓲꓹ ꓠꓬ ꓢꓯꓼ ꓟꓬ ꓟꓽ ꓙꓳ_ ꓟ ꓖꓳ ꓓꓱꓽ ꓗꓷ ꓡꓰ_ ꓟ ꓥꓳ= ꓫꓱꓸ ꓤ ꓟ ꓟꓬꓱꓽ ꓟꓽ ꓙꓳ ꓠꓬ ꓙꓵꓸꓹ ꓠꓲꓹ ꓠꓬ ꓫꓵꓸꓹ ꓟ ꓡꓰ ꓐꓰ ꓥꓳ ꓐꓰ ꓔꓲ-ꓒ ꓪ ꓔꓲ ꓡꓰ 1994 ꓘꓳꓼ ꓣꓳ-ꓟ ꓗꓪ Divine Mercy ꓪꓽ ꓘꓴꓽ ꓦꓲ ꓐꓰ ꓔꓲ_ꓒ ꓪ ꓔꓲ St. John Paul II ꓡꓰ ꓢꓷꓸ ꓙ ꓟꓳ ꓙ ꓗꓷ ꓟ Sassia ꓗꓪ ꓙꓳ_ ꓟ Santo Spirito ꓪꓽ ꓘꓴꓽ ꓦꓲ ꓗꓪ ꓚ ꓟꓸ ꓖꓶ_ ꓟ ꓥꓳ=

ꓔꓲ-ꓒ ꓪ ꓔꓲ ꓡꓰ Sassia ꓗꓪ ꓔꓬ ꓟ Santo Spirito ꓪꓽ ꓘꓴꓽ ꓦꓲ ꓗꓪ ꓟꓲ-ꓢ ꓪꓽ ꓘꓴꓽ_ ꓟ-ꓸ

            Covid ꓠꓸꓹ ꓫꓵꓽ ꓑꓶꓸ ꓓꓴ ꓤ ꓟꓳ ꓠ ꓔ ꓟ ꓐꓰ ꓟꓲ-ꓢ ꓪꓽ ꓘꓴꓽ_ ꓟ ꓗꓪ (80) ꓣꓳ ꓛꓲ ꓐ ꓢꓲ-ꓸ ꓐꓱ ꓓꓵꓽ ꓦꓲ ꓗꓪ ꓔꓬ ꓢꓴ ꓐꓰ ꓠꓯ ꓞꓲꓼ ꓫꓬꓹ ꓢꓴ-ꓸ ꓫꓸ ꓢꓴ ꓟꓶ ꓢꓴ ꓐꓰ Missionaries of Mercy ꓔꓲ-ꓒ ꓐꓴ ꓥ ꓟꓲ ꓔꓲ-ꓒ ꓪ ꓔꓲ ꓐꓰ ꓕꓲ ꓪ ꓟꓲ-ꓢ ꓪꓽ ꓘꓴꓽ ꓟ ꓗꓪ ꓐ_ ꓟ ꓥꓳ= ꓔꓲ-ꓒ ꓪ ꓔꓲ ꓚ ꓟ ꓠꓬ ꓬꓰ-ꓢꓴ ꓠꓬ ꓝꓲ-ꓓꓴ ꓐꓴ ꓠꓲꓹ ꓟ ꓔꓯ ꓧꓪꓸ ꓛꓲ ꓝꓲ ꓢꓲ-ꓸ ꓬꓲ ꓪ ꓤꓶꓸꓹ ꓔꓯ ꓮ ꓡꓲ ꓒꓳꓹ ꓡꓲꓼ ꓝꓲ_ ꓟ ꓔꓯ ꓢꓷꓸ ꓡꓰ ꓝꓲ_ ꓡꓳ= ꓝꓲ-ꓓꓴ ꓐꓴ ꓠꓬ ꓫꓱꓸ ꓤ ꓟ ꓔꓯ ꓟꓶꓸꓹ ꓡꓰ ꓢꓲ-ꓸ ꓬꓲ ꓪ ꓚꓲ ꓛꓬ ꓫꓱꓸ ꓤ ꓢꓴ ꓒꓬꓱꓼ ꓡ_ ꓟ ꓥꓳ= ꓬꓰ-ꓢꓴ ꓗꓪ ꓐꓰ ꓢꓲ ꓡꓲꓹ ꓗ ꓛꓲ_ ꓟ-ꓸ ꓢꓲ-ꓫꓬ-ꓟ-ꓦ ꓬꓰ-ꓢꓴ ꓠꓸꓹ ꓓꓴ ꓗꓪ ꓐꓰ ꓫꓱꓸ ꓤ ꓟ ꓔꓯ ꓘꓳꓹ ꓣꓳ ꓟꓶ_ ꓥꓳ=

ꓢꓲ ꓡꓲꓹ ꓗ ꓛꓲ_ ꓟ-ꓸ

            ꓬꓰ-ꓢꓴ ꓫꓵꓸꓹ ꓗ ꓠꓯꓸ ꓝꓲ-ꓓꓴ ꓐꓴ ꓠꓬ ꓬꓲ ꓪ ꓤꓶꓸꓹ ꓟꓶꓽ ꓢꓲ-ꓸ ꓬꓲ ꓪ ꓢꓲ ꓒꓽ ꓔꓯ ꓡꓳ ꓒꓰꓹ ꓗꓷ ꓟ ꓔꓯ ꓠꓲꓹ ꓟ ꓡꓶꓸ ꓢꓲ-ꓸ ꓙꓳꓸꓸ ꓟ ꓠꓲꓹ ꓟ ꓐꓰ ꓬꓲ ꓪ ꓦꓲ ꓘꓴꓽ ꓗꓪ ꓔꓬ ꓟ ꓥꓳ= ꓖꓳ ꓡꓱ ꓥ ꓟꓲ ꓬꓰ-ꓢꓴ ꓠꓬ ꓬꓲ ꓪ ꓗꓳ ꓡꓳ ꓗꓪ ꓦꓰꓼ ꓡ ꓢꓲ-ꓸ ꓠꓴ ꓪ ꓢꓲ ꓡꓲ ꓟ ꓟꓶ ꓝꓲ-ꓸ ꓐꓯ_ ꓡꓳ= ꓬꓰ-ꓢꓴ ꓠꓬ ꓫꓸ ꓓꓴ ꓟꓽ ꓙꓳ ꓢꓲ ꓡꓲꓹ ꓟ ꓔꓯ ꓟꓽ ꓖꓶ= ꓖꓳ ꓡꓱ ꓥ ꓟꓲ ꓙꓵꓸꓹ ꓠꓲꓹ ꓐꓰ ꓠꓲꓹ ꓟ ꓘꓴꓽ ꓗꓪ ꓢꓲ ꓡꓲ ꓗꓹ ꓛꓲ_ ꓟ ꓔꓯ ꓖꓶ_ ꓡꓳ= ꓬꓰ-ꓢꓴ ꓢꓲ ꓡꓲꓹ ꓗ ꓛꓲ_ ꓟ ꓠꓬ ꓝꓲ-ꓓꓴ ꓐꓴ ꓔꓯ ꓝꓴꓲ ꓒꓳꓹ ꓡꓲꓼ_ ꓟ ꓗꓪ ꓐꓰ ꓢ-ꓢꓶ-ꓠ ꓟꓬꓱꓽ ꓔꓯ ꓬꓰ_ ꓟ ꓥꓳ= ꓬꓰ-ꓢꓴ ꓢꓲ ꓡꓲꓹ ꓗ ꓛꓲ_ ꓟ ꓠꓬ ꓟꓽ ꓢ ꓥ ꓟꓲ ꓣꓳ ꓠꓲꓹ ꓟ ꓘꓴꓽ ꓗꓪ ꓫꓸ ꓔꓬ ꓟ-ꓸ ꓣꓳ ꓚꓲ ꓛꓬ ꓗ ꓕꓸ ꓔ ꓟ ꓗꓪ ꓐꓰ ꓢꓯꓼ ꓓꓵꓼ ꓠꓹ ꓟ ꓥ ꓡꓳ= St. John Henery Newman ꓡꓰ ꓣꓳ ꓚꓲ ꓛꓬ ꓠꓲꓹ ꓠꓵ ꓟ ꓓꓲ ꓢ ꓪꓴ-ꓢ ꓠꓬ ꓣꓳ ꓔꓯ ꓟꓬ ꓠꓬꓲ ꓠꓲꓹ ꓠꓵ_ ꓡꓳ= ꓐꓰ ꓐꓳ ꓔ ꓟ ꓡꓰ ꓐꓰ ꓝꓲ-ꓓꓴ ꓐꓴ ꓥ ꓟꓲ ꓪꓴ-ꓢ ꓠꓬ ꓬꓲ ꓪ ꓔꓯ ꓝꓴꓲ ꓟꓽ ꓖꓶ_ ꓟ ꓔꓯ ꓬꓲ ꓪ ꓢꓷꓸ ꓡꓰ_ ꓟ ꓥꓳ=

ꓢꓲ-ꓫꓬ-ꓟ-ꓦ ꓗꓪ ꓐꓰ ꓝꓴꓲ ꓖꓽ ꓖꓶ_ ꓟ

            ꓬꓰ-ꓢꓴ ꓫꓱꓸ ꓤ_ ꓟ ꓠꓲꓹ ꓟ ꓟꓸ ꓖꓶ_ ꓟ ꓠꓬꓲ ꓚꓱꓹ ꓠꓬ ꓝꓴꓲ ꓖꓽ ꓖꓶ ꓠꓹ ꓟ ꓐꓱ ꓶ ꓢꓲ-ꓫꓬ-ꓟ-ꓦ ꓔꓯ ꓝꓲ ꓩꓴ ꓡ_ ꓟ ꓥꓳ= ꓣꓳ ꓠꓬ ꓣꓳ ꓚꓲ ꓛꓬ ꓝꓴꓲ ꓔꓯ ꓒꓯꓽ ꓟꓽ ꓐ ꓡ= ꓪꓴ-ꓢ ꓕꓲ ꓣꓳ ꓡꓰ ꓝꓴꓲ ꓔꓯ ꓒꓯꓽ ꓐ ꓡ_ ꓡꓳ= ꓪꓴ-ꓢ ꓫꓱꓸ ꓤ ꓟ ꓠꓲꓹ ꓟ ꓗꓪ ꓐꓰ ꓣꓳ ꓝꓴꓲ ꓔꓯ ꓡꓲꓸ ꓙꓲ ꓝꓲ_ ꓡꓳ= ꓖꓳ ꓟ ꓑꓶ ꓓꓴ ꓣꓳ ꓚꓲ ꓛꓬ ꓣꓳ ꓖꓽ ꓖꓶ ꓠꓹ ꓟ ꓣꓱ ꓬꓯꓼ_ ꓡꓳ= ꓢꓲ-ꓫꓬ-ꓟ-ꓦ ꓗꓪ ꓐꓰ ꓝꓴꓲ ꓣꓷꓠꓸ_ ꓟ ꓠꓬ ꓠꓲꓹ ꓟ ꓘꓴꓽ ꓗꓪ ꓝꓮꓲ ꓢꓯꓸ ꓔꓬ ꓠꓹ ꓟ ꓠꓬ ꓰꓮꓢꓔꓰꓣ ꓡꓯꓼ ꓫꓴꓸꓹ ꓥ ꓡꓳ= ꓐꓰ ꓔꓲ-ꓒ ꓪ ꓔꓲ ꓡꓰ ꓐꓯ ꓢꓲ-ꓸ ꓙꓲ-ꓢꓴ ꓢꓲ ꓤ ꓐꓴ ꓔꓯ ꓝꓴꓲ ꓣꓷꓠꓸ ꓓꓴ Sacrament ꓶꓼ ꓤ ꓫꓱꓸ ꓤ ꓪ ꓟꓶ ꓠꓹ ꓟ ꓶꓽ ꓓꓰꓽ ꓐꓰ ꓢꓯꓼ ꓖꓶ_ ꓡꓳ=

ꓬꓰ-ꓢꓴ ꓠꓸꓹ ꓓꓴ

            ꓬꓰ-ꓢꓴ ꓠꓬ ꓣꓳ ꓠꓸꓹ ꓓꓴ ꓔꓯ ꓬꓲ ꓠꓸꓹ ꓓꓴ ꓡꓰ ꓐꓰ ꓘꓳꓹ ꓣꓳ ꓢꓲ-ꓸ ꓬꓲ ꓫꓱꓸ ꓤ ꓟ ꓗꓰ ꓐꓰ ꓝꓴꓲ ꓑꓶꓸ ꓓꓴ ꓪ_ ꓟ ꓣꓳ ꓠꓸꓹ ꓓꓴ ꓔꓯ ꓫꓬꓹ ꓖꓶ_ ꓟ ꓥꓳ= ꓬꓰ-ꓢꓴ ꓠꓸꓹ ꓓꓴ ꓠꓬ ꓣꓳ ꓫꓸ ꓓꓴ ꓠꓯꓼ ꓗꓪ ꓬꓲ ꓫꓱꓸ ꓤ ꓟ ꓙꓳ ꓢꓲ ꓬꓲ ꓐꓰ ꓣꓳ ꓠꓯꓼ ꓗꓪ ꓙꓸꓹ ꓫꓱ ꓠꓹ ꓟ ꓚꓱꓹ ꓔꓯ ꓒꓵꓽ ꓖꓶ_ ꓟ ꓥꓳ= ꓬꓰ-ꓢꓴ ꓡꓰ ꓬꓲ ꓠꓸꓹ ꓓꓴ ꓐꓰ ꓢꓯꓸ ꓬꓲꓼ ꓡ_ ꓟ ꓖꓳ ꓓꓱꓽ ꓔꓯ ꓣꓳ ꓐꓱ ꓶ ꓖꓶ_ ꓟ ꓔꓯ ꓟꓲ-ꓢ ꓪꓽ ꓘꓴꓽ_ ꓟ ꓗꓪ ꓟꓳ ꓪ ꓓ_ ꓡꓳ= ꓪꓴ-ꓢ ꓠꓵ ꓠꓲꓹ ꓔꓯ ꓣꓳ ꓪ ꓟꓶꓸꓸ ꓕꓯ ꓢꓲ-ꓸ ꓣꓳ ꓥ ꓟꓲ ꓟꓲ ꓠꓯ ꓡꓽ ꓞꓳ ꓔꓯ ꓠꓵ ꓠꓲꓹ ꓖꓶ ꓐ ꓡ_ ꓟ ꓥꓳ=

ꓫꓱꓸ ꓤ ꓟ ꓠꓲꓹ ꓟ ꓔꓯ ꓘꓳꓹ ꓣꓳ_ ꓟ ꓐꓰ ꓖꓶ_ ꓟ

            ꓕꓱ ꓟ ꓠꓬ ꓝꓲ-ꓓꓴ ꓐꓴ ꓬꓰ_ ꓟ ꓟꓬꓱꓽ ꓥꓳ ꓐꓰ ꓝꓲ-ꓓꓴ ꓕꓳ ꓶ ꓔꓯ ꓟꓸ ꓢꓲ ꓔꓲ-ꓒ ꓪ ꓔꓲ ꓡꓰ ꓚ ꓡꓳ= ꓫꓱꓸ ꓤ ꓟ ꓠꓲꓹ ꓟ ꓔꓯ ꓘꓳꓹ ꓣꓳ ꓢꓲ-ꓸ ꓬꓲ ꓪ ꓠꓬ ꓫꓱꓸ ꓤ ꓢꓴ ꓒꓬꓱꓼ ꓡ ꓥꓳ= ꓬꓲ ꓪ ꓠꓬ ꓙꓳꓸꓸ ꓟ ꓠꓲꓹ ꓟ ꓔꓯ ꓬꓰ-ꓢꓴ ꓠꓸꓹ ꓓꓴ ꓔꓯ ꓠꓶꓽ_ ꓟ ꓗꓪ ꓐꓰ ꓟꓶ ꓡꓰ ꓢꓲ-ꓸ ꓮ ꓟꓶ ꓠꓬ ꓬꓲ ꓪ ꓣꓱꓽ ꓬꓯꓼ_ ꓢꓴ ꓠꓸꓹ ꓓꓴ ꓔꓯ ꓠꓶꓽ ꓠꓹ ꓟ ꓬꓲ ꓪ ꓟꓽ ꓙꓳꓸꓸ ꓗꓷ ꓡꓰ_ ꓟ ꓥꓳ=

ꓔꓲ-ꓒ ꓪ ꓔꓲ ꓡꓰ ꓫꓱꓸ ꓤ ꓟ ꓠꓲꓹ ꓟ ꓔꓯ ꓪꓽ ꓟꓶ_ ꓟ ꓡꓰ ꓐꓰ ꓫꓱꓸ ꓤ ꓠꓲꓹ ꓙꓳ ꓢꓴ ꓒꓬꓱꓼ ꓡ ꓝꓲ ꓐꓰ ꓢꓯꓼ ꓖꓶ ꓢꓲ ꓶ ꓓꓳ ꓫꓱꓹ ꓓꓳ ꓔꓯ ꓬꓲ ꓟꓶ ꓢꓲꓼ ꓗꓷ_ ꓡꓳ=

         Source: Vatican News

           https://bit.ly/3wS1CQX

Add new comment

4 + 10 =