ꓬꓰ-ꓢꓴ ꓔꓯ ꓧꓪ ꓟꓶ_ ꓟ ꓠꓬ ꓠꓲꓹ ꓟ ꓘꓴꓽ ꓗꓪ ꓢꓲ ꓡꓲꓹ ꓗ ꓛꓲ_ ꓟ ꓔꓯ ꓧꓪ ꓟꓶ_ ꓟ ꓥꓳ=

ꓬꓰ-ꓢꓴ ꓔꓯ ꓧꓪ ꓟꓶ_ ꓟ ꓠꓬ ꓠꓲꓹ ꓟ ꓘꓴꓽ ꓗꓪ ꓢꓲ ꓡꓲꓹ ꓗ ꓛꓲ_ ꓟ ꓔꓯ ꓟꓶ_ ꓟ ꓥꓳ=

            ꓣꓰꓖꓲꓠꓮ ꓚꓮꓰꓡꓲ ꓪꓽ ꓘꓴꓽ_ ꓟ ꓙꓵꓹ ꓠꓽ ꓕꓲ ꓠꓬꓲ ꓗꓪ ꓬꓰ-ꓢꓴ ꓢꓯꓸ ꓬꓲꓼ ꓡ_  ꓟ ꓓꓳꓽ ꓔꓯ ꓚ_ ꓟ ꓐꓰ ꓟꓴ ꓗꓪ ꓝꓲ ꓓꓴ ꓟꓸ ꓟꓲ ꓔꓯ ꓚ ꓟꓸ ꓖꓶ_ ꓕꓯ ꓬꓰ-ꓢꓴ ꓔꓯ ꓧꓪ ꓟꓶ_ ꓟ ꓠꓬ ꓠꓲꓹ ꓟ ꓘꓴꓽ ꓗꓪ ꓢꓲ ꓡꓲꓹ ꓗ ꓛꓲ_ ꓟ ꓟꓶ_ ꓥꓳ ꓐꓰ ꓐꓯ_ ꓡꓳ= ꓔꓲ-ꓒ ꓪ ꓔꓲ ꓡꓰ ꓬꓰ-ꓢꓴ ꓢꓯꓸ ꓬꓲꓼ ꓡ ꓢꓲ ꓡꓱꓼ ꓜꓴ ꓗꓪ ꓡ_ ꓟ ꓤ ꓟꓶ ꓤ ꓐꓰ ꓟꓴ ꓗꓪ ꓝꓲ ꓓꓴ ꓐꓴ ꓡꓰ ꓟꓳ_ ꓟ ꓔꓯ ꓠꓽ ꓕꓲ ꓠꓬꓲ ꓕꓯ ꓝꓮꓲ ꓓꓵꓽ ꓙ ꓟꓶ_ ꓟ ꓑꓶꓸ ꓓꓴ ꓕꓱ ꓠꓽ ꓕꓲ ꓠꓬꓲ ꓔꓯ ꓟꓴ ꓗꓪ ꓝꓲ ꓓꓴ ꓐꓴ ꓠꓽ ꓕꓲ ꓠꓬꓲ ꓐꓰ ꓘꓴ_ ꓟ ꓥꓳ ꓐꓰ ꓐꓯ_ ꓡꓳ= ꓟꓴ ꓗꓪ ꓝꓲ ꓓꓴ ꓡꓰ ꓤ ꓟꓶ ꓤ ꓔꓯ ꓡꓯ ꓐꓳ ꓔꓶꓸ ꓓꓴ ꓗꓪ ꓢꓯꓼ ꓟꓬ ꓖꓶ ꓢꓴ ꓢꓲ ꓒꓽ ꓔꓯ ꓠꓴ ꓪ ꓧꓪ ꓔꓬ ꓟ ꓔꓯ ꓥꓪ  ꓢꓷꓸ ꓔ ꓡꓳ= ꓢꓲ ꓒꓽ ꓠꓬ ꓢꓯꓸ ꓬꓲꓼ ꓡꓸꓸꓳ= ꓕꓱ ꓗꓪ ꓟꓽ ꓔꓬ ꓐꓰ ꓐꓯ_ ꓡꓳ= ꓢꓯꓸ ꓬꓲꓼ ꓡꓸꓸꓳ ꓐꓯ_ ꓟ ꓠꓬ ꓣꓳ ꓞꓳ ꓤ ꓡꓰ ꓬꓰ ꓘꓴꓽ_ ꓟ ꓡꓰ ꓟ ꓞꓲ ꓟꓬꓹ  ꓟ ꓥꓳ= ꓡꓱꓼ ꓜꓴ ꓗꓪ ꓡ_ ꓟ ꓤ ꓟꓶ ꓤ ꓐꓴ ꓡꓰ ꓡꓱꓼ ꓜꓴ ꓗꓪ ꓫꓱꓸꓸ ꓔ ꓟ ꓭꓸ ꓛꓲ ꓡꓱꓸ ꓒꓴ ꓞꓹ ꓢꓲ ꓡꓱꓼ ꓜꓴ ꓘꓴꓽ ꓗꓪ ꓬꓰ-ꓢꓴ ꓟꓽ ꓔꓬ ꓟ ꓔꓯ ꓟꓳ ꓥ ꓟꓲ ꓬꓰ-ꓢꓴ ꓢꓯꓸ ꓬꓲꓼ ꓡ ꓥꓳ ꓐꓰ ꓬꓲ ꓪ ꓡꓰ ꓟꓽ ꓓꓵꓽ ꓙ ꓟ ꓥꓳ=

           ꓟ-ꓡꓲ ꓠꓯꓼ ꓗꓪ ꓤ ꓠꓱ ꓶꓸꓹ ꓡꓰ ꓢꓲ ꓤ ꓕꓲ ꓣꓳ ꓦꓵ ꓡ_ ꓥꓳ= ꓬꓲ ꓠꓬ ꓪꓴꓽ_ ꓟ ꓒꓬꓱꓼ ꓡ_ ꓥꓳ= ꓬꓲ ꓔꓯ ꓠꓬ-ꓸ ꓟꓴ ꓡꓳꓹ ꓬꓰ ꓢꓴ ꓬꓲ ꓮ ꓐꓲ-ꓸ ꓘꓴ_  ꓥꓳ= ꓟꓴ ꓗꓪ ꓝꓲ ꓓꓴ ꓬꓲꓼ ꓡ_ ꓟ ꓑꓶꓸ ꓓꓴ ꓟꓲ ꓠꓯ ꓡꓵ ꓢꓲ ꓡꓱꓼ ꓜꓴ ꓗꓪ ꓫꓱꓸꓸ ꓔ ꓟ ꓭꓸ ꓛꓲ ꓡꓱꓸ ꓠꓬ ꓫꓱ ꓑꓲꓸ ꓔ ꓡꓳ ꓐꓰ ꓟꓳ ꓪ ꓡꓳ= ꓭꓸ ꓛꓲ ꓡꓱꓸ ꓠꓬ ꓟꓽ ꓙꓲ_ ꓟ ꓐꓰ ꓫꓵꓸꓹ ꓟ ꓔꓯ ꓧꓪꓸ ꓡꓰ_ ꓟ ꓥ ꓢꓲ-ꓸ ꓕꓱ ꓟ ꓠꓬ ꓟꓴ ꓗꓪ ꓝꓲ ꓓꓴ ꓛꓲ ꓟꓶ ꓓꓴ ꓗꓪ ꓔꓬ ꓟ ꓠꓬ ꓪꓴ-ꓢ ꓝꓲ ꓓꓴ ꓛꓲ ꓟꓶ ꓓꓴ ꓥ ꓡꓳ ꓐꓰ ꓐꓯ_ ꓡꓳ= ꓡꓱꓼ ꓜꓴ ꓟꓲ ꓕꓯ ꓭꓸ ꓛꓲ ꓗꓪ ꓔꓬ ꓟ ꓟꓴ ꓗꓪ ꓝꓲ ꓓꓴ ꓠꓬ ꓟꓽ ꓙꓲ_ ꓟ ꓗꓪ ꓐꓰ ꓪꓴ-ꓢ ꓧꓪꓸ ꓡꓰ_ ꓟ-ꓸ ꓠꓯ ꓞꓲꓸ_ ꓟ ꓔꓯ ꓠꓬꓲ ꓟꓳ ꓓꓴ ꓗꓪ ꓐꓰ ꓧꓪꓸ ꓡꓰ_ ꓟ ꓥꓳ= ꓠꓬꓲ ꓚꓱꓹ ꓗꓪ ꓐꓰ ꓐꓯ ꓟꓸ ꓔ ꓡꓳ= ꓕꓲꓽ ꓚꓱꓹ ꓠꓬ ꓟꓯꓼ ꓜꓴ ꓐꓴ ꓥ ꓡꓳ= ꓟꓲ ꓠꓯ ꓡꓵ ꓡ ꓟ ꓑꓶꓸ ꓓꓴ ꓬꓲ ꓪ ꓠꓬ ꓙꓳ ꓡꓰ ꓢꓲ ꓞꓳ ꓫꓵꓸꓹ ꓡꓰ ꓐꓰ ꓗꓷ ꓡꓰ_ ꓟ ꓥꓳ= ꓠꓬꓲ ꓚꓱꓹ ꓠꓬ ꓤ ꓟꓶ ꓤ ꓐꓴ ꓥ ꓡꓳ= ꓕꓱ ꓤ ꓟꓶ ꓤ ꓐꓴ ꓠꓬ ꓟꓴ ꓗꓪ ꓝꓲ ꓓꓴ ꓗꓪ ꓐꓰ ꓟꓽ ꓙꓳ ꓠꓹ ꓟ ꓐꓰ ꓡꓱꓼ ꓜꓴ ꓗꓪ ꓬꓰ-ꓢꓴ ꓔꓯ ꓟꓽ ꓧꓪ ꓡꓰ ꓠꓹ ꓟ ꓐꓯ_ ꓟ ꓥꓳ= ꓬꓲ ꓔꓯ ꓟꓳ ꓢꓴ ꓔꓯ ꓠꓬ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓔꓯ ꓖꓶ_ ꓟ ꓢꓯꓸ ꓬꓲꓼ ꓡ_ ꓟ ꓬꓰ-ꓢꓴ ꓔꓯ ꓣꓳ ꓠꓬ ꓧꓪ ꓠ ꓔ ꓡꓳ=

            ꓪꓴ-ꓢ ꓶ ꓓꓳ ꓫꓱꓹ ꓓꓳ ꓗꓪ ꓤ ꓟꓶ ꓤ ꓐꓴ ꓠꓬ ꓓ ꓪꓴꓸ ꓕꓯ ꓬꓲ ꓪ ꓙꓵꓸꓹ ꓠꓲꓹ ꓗꓪ ꓐꓰ ꓙꓳ ꓡꓰ ꓥ ꓟꓲ ꓬꓲ ꓪ ꓢꓲ ꓒꓽ ꓢꓯꓸ ꓔꓬ ꓟ ꓔꓯ ꓟꓳ ꓠꓬ ꓗꓹ ꓛꓲ ꓟ ꓥꓳ= ꓔꓲ-ꓒ ꓪ ꓔꓲ ꓡꓰ ꓕꓱ ꓙꓵꓹ ꓗꓪ ꓥꓪ ꓓꓵꓽ ꓙ_ ꓟ ꓠꓬ ꓰꓮꓢꓔꓰꓣ ꓗꓹ ꓛꓲ_ ꓟ ꓓꓳꓽ ꓔꓯ ꓣꓳ ꓕꓲ ꓦꓲ ꓡꓽ ꓞꓳ-ꓸ ꓣꓳ ꓦꓲ ꓗꓪ ꓥ ꓟꓲ-ꓸ ꓣꓳ ꓠꓲꓹ ꓟ ꓘꓴꓽ ꓗꓪ ꓥ ꓟꓲ ꓘꓳꓹ ꓣꓴ ꓢꓲ-ꓸ ꓦ ꓢꓯꓼ ꓣꓳ ꓠ ꓔ ꓡꓳ ꓐꓰ ꓢꓯꓼ ꓖꓶ_ ꓡꓳ= ꓕꓱ ꓟ ꓗꓪ ꓐꓰ ꓰꓮꓢꓔꓰꓣ ꓙꓵꓹ ꓗꓪ ꓟꓬ ꓠꓬꓲ ꓪꓽ ꓘꓴꓽ ꓠꓹ ꓟ ꓢꓯꓼ ꓖꓶ_ ꓡꓳ= ꓟ-ꓡꓲ ꓔꓯ ꓟꓴ ꓗꓪ ꓝꓲ ꓓꓴ ꓚꓬ-ꓑꓷ-ꓡꓰ ꓗꓪ ꓐꓰ ꓣꓱ ꓛꓰ ꓟꓶ ꓢꓴꓳ-ꓸ ꓧꓪꓸ ꓧꓪꓸꓼ-ꓸ ꓢꓲ ꓒꓽ ꓠꓬ ꓠꓴ_ ꓐꓰ ꓔꓬ ꓡꓳ-ꓸ ꓐꓰ ꓐꓯ_ ꓟ ꓔꓯ (ꓡꓴ-ꓘ 1ꓽ28) ꓗꓪ ꓟꓳ ꓪ ꓡꓳ= ꓟ-ꓡꓲ ꓗꓹ ꓛꓲ_ ꓟ ꓠꓬ ꓐꓲ ꓡꓰ_ ꓟ ꓥꓳ= ꓬꓰ-ꓢꓴ ꓢꓯꓸ ꓬꓲꓼ ꓡꓸꓸꓳ= ꓬꓰ-ꓢꓴ ꓠꓵ ꓠꓲꓹ ꓗꓪ ꓐꓰ ꓧꓪꓸ ꓡꓰꓳ= ꓕꓱ ꓟ ꓠꓬ ꓣꓳ ꓔꓯ ꓗꓹ ꓛꓲ ꓡꓰ ꓝꓲ ꓐꓰ ꓐꓯ ꓢꓲ ꓶ ꓓꓳ ꓫꓱꓹ ꓓꓳ ꓔꓯ ꓬꓲ ꓟꓶ ꓢꓲꓼ ꓗꓷ_ ꓡꓳ=

       Transalted by: Cecilia Hti Ram

        #Vatican_News #rva_myanmar

        https://bit.ly/2OyT7ci