ꓐꓯ ꓟꓴ ꓫꓬ, ꓒ ꓦꓬꓼ ꓠꓬꓲ ꓚꓺ ꓟꓲꓽ

ꓚꓬꓴꓸ ꓙˍ ꓟ ꓟꓬꓱꓽ ꓪꓴ-ꓢ ꓡꓰ ꓬꓰ ꓖꓶ ꓔꓬ ꓟ ꓬꓲ ꓤꓶꓻ ꓕꓲ ꓤꓶꓻ꓾ ꓐꓚ 1450 ꓘꓳꓼ ꓐꓰ ꓐꓚ 1000 ꓘꓳꓼ ꓠꓬꓲꓽ ꓗꓴꓸ ꓚꓸꓼ ꓗꓪ ꓟ ꓐꓯ ꓟꓴ ꓫꓬꓹ ꓒ ꓦꓬꓼ ꓠꓬꓲ ꓚꓺ ꓟꓲꓽ ꓔꓯ ꓠ ꓡꓳꓸ ꓓꓴ ꓬꓰ ꓡꓯ=

ꓬꓲꓼ ꓤ ꓠꓬꓲ ꓤ ꓐꓴꓳ-ꓸ ꓐꓯ ꓟꓴ ꓫꓬꓹ ꓒꓽ ꓦꓬꓼ ꓠꓬꓲ ꓗꓪ ꓬꓲ-ꓢꓷ-ꓡꓰ ꓐꓴ ꓙꓵ ꓠꓲꓹ ꓚꓱꓹ ꓢꓯꓼ ꓐꓽ ꓡꓰ ꓢꓲ-ꓸ ꓪꓴ-ꓢ ꓙ ꓖꓴ ꓗꓪ ꓫꓱꓽ ꓥꓳꓽ ꓙꓰˍ ꓟ ꓔꓯ ꓟꓳꓸ ꓔꓱꓹ ꓕ ꓠꓬꓲ ꓡꓯ=

ꓬꓲ ꓪ ꓬꓲ-ꓙꓲ ꓟꓵꓽ ꓗꓪ 430 ꓘꓳꓼ ꓚꓳ ꓑꓸ ꓬꓰ ꓢꓲ-ꓸ ꓫꓸ ꓙꓵ ꓔꓬ ꓟ ꓗꓪ ꓐꓰ ꓪꓴ-ꓢ ꓠꓬ ꓟꓳ-ꓫꓲ ꓐꓰ ꓕꓲꓽ ꓛꓳꓼˍ ꓟꓬꓱꓽ ꓬꓰ ꓢꓲ-ꓸ ꓜꓲꓽ ꓜꓲꓽ ꓑꓰꓹ ꓑꓰꓹ ꓬꓰˍ ꓟ ꓬꓲ-ꓙꓲ ꓪ-ꓔꓲ ꓩ-ꓣꓳ ꓡꓯꓽ ꓒꓯꓹ ꓗꓪ ꓐꓰ ꓧꓳꓽ ꓓꓳ ꓡ ꓕꓯ ꓕꓲꓽ ꓙ ꓖꓴ ꓡꓱꓸꓼ ꓗꓪ ꓪꓴ-ꓢ ꓡꓰ ꓬꓲ ꓪ ꓔꓯ ꓔ ꓙ ꓬꓰ ꓙˍ ꓟ ꓬꓲꓸ ꓪꓽ ꓚꓲꓸ ꓛꓬꓽ ꓟꓬ ꓢꓶꓽ ꓡꓰ ꓡꓳꓸ ꓟꓳˍ ꓡꓳ=

ꓬꓳ-ꓫꓴ ꓡꓰ ꓘꓷ-ꓠ ꓟꓵꓽ ꓗꓪ ꓟ ꓡꓽ ꓞꓳ ꓔꓯ ꓓꓶꓽ ꓧꓪꓸ ꓡꓰ ꓗꓪ ꓛꓲ ꓪꓴ-ꓢ ꓡꓰ ꓬꓲꓸ ꓪ ꓔꓯ ꓔ ꓙ ꓟ ꓫꓱꓸ ꓤꓼ ꓟ ꓔꓯ ꓥ ꓟꓲ ꓬꓲꓸ ꓪꓽ ꓚꓲꓸ ꓛꓬꓽ ꓟꓬ ꓢꓶꓽ ꓡꓰ ꓟꓳ ꓟ ꓡꓰꓽ ꓟꓽ ꓞꓲꓺ ꓘꓷ-ꓠ ꓟꓵꓽ ꓗꓪ ꓬꓲ ꓪ ꓚꓲꓸ ꓛꓬ ꓗꓴꓷꓼ ꓙꓵꓽ ꓪ ꓙꓳˍ ꓟ ꓡꓳꓸ ꓟꓳꓻ ꓗꓷꓳ=

ꓖꓳ ꓡꓱ ꓥ ꓟꓲ ꓘꓷ-ꓠ ꓟꓵꓽ ꓗꓪ ꓬꓲꓸ ꓪ ꓐꓳ ꓡ ꓢ ꓡ ꓗꓸ ꓠꓯ꓾ꓬꓳ-ꓫꓴ ꓫꓵꓻ ꓢꓲ ꓧꓶꓸ ꓕꓯ ꓟ ꓞꓳ ꓪꓴꓽ ꓞꓳ ꓔꓲ ꓐꓴ ꓫꓵꓻ ꓖꓴ ꓡꓰ ꓗ ꓠꓯꓸ꓾ ꓗ ꓠꓯꓸ ꓪꓴꓽ ꓡꓹ ꓟ ꓕꓲꓽ ꓤꓶꓻ ꓗꓪ ꓛꓲ ꓡ ꓕꓯ ꓬꓲ ꓪ ꓠꓬ ꓪꓴ-ꓢ ꓙꓵꓽ ꓗ ꓔꓯ ꓟꓲ ꓟꓽ ꓛꓳ= ꓐꓶꓽ ꓒꓽ ꓠꓲꓽ ꓤꓽ ꓢꓲ ꓤꓼ ꓔꓯ ꓪꓴꓸ ꓓꓵ ꓕꓱꓼ ꓙꓰ ꓠꓬꓲ ꓪꓴ-ꓢ ꓡꓰ ꓬꓲ ꓪ ꓔꓯ ꓟꓸ ꓙꓽ ꓠꓬꓲ ꓫꓸ ꓙꓵ ꓓꓴ ꓓꓽ ꓟ ꓔꓳꓹ ꓜꓳꓽ ꓡꓰꓳ=

ꓖꓳ ꓡꓱ ꓠꓬꓲ ꓬꓲ ꓪꓽ ꓔꓯ ꓡꓳꓸ ꓢꓴ ꓙꓵꓽ ꓢꓴ ꓐꓯ ꓟꓴ ꓫꓬꓹ ꓒꓽ꓾ ꓟꓯꓼ ꓢꓲꓽ ꓒꓽ ꓐꓴ ꓓꓳ ꓡ ꓝꓲ ꓢꓲ-ꓸ ꓬꓲ-ꓢꓷ-ꓡꓰ ꓐꓴ ꓔꓯ 450 ꓘꓳꓼ ꓧꓳꓽ ꓣꓱꓽ ꓗꓷꓳ=

ꓐꓯ ꓟꓴ ꓫꓬꓹ ꓒ ꓕꓳꓽ ꓶ ꓗꓪ ꓟꓳꓸ ꓖꓶ ꓔ ꓟ ꓬꓲ-ꓢꓷ-ꓡꓰ ꓐꓴ ꓔꓯ ꓚꓬꓴꓸ ꓙˍ ꓟ ꓗꓪ ꓬꓰ ꓙ ꓗꓷ ꓟ ꓐꓯ ꓟꓴ ꓫꓬꓹ ꓒꓽ꓾ ꓟꓯꓼ ꓢꓲꓽ ꓒ ꓐꓴ ꓠꓬ ꓳ-ꓕꓷ-ꓠꓲ꓾ ꓱ-ꓩꓴ-ꓓ꓾ ꓫꓬ-ꓟꓷ-ꓖ꓾ ꓔꓷ-ꓐꓳ-ꓣ꓾ ꓖꓷ-ꓓꓰ-ꓬꓴ꓾ ꓕꓳ-ꓡꓰ꓾ ꓬ-ꓣꓱ꓾ ꓬꓰ-ꓩꓴ-ꓕ꓾ ꓬꓲ-ꓐꓷ-ꓞꓷ꓾ ꓬꓲ-ꓡꓳ꓾ ꓱ-ꓓꓳ-ꓠ ꓐꓰ ꓢ-ꓟꓳ-ꓢꓳ-ꓠ ꓐꓴ ꓥ ꓡꓳ= ꓖꓳ ꓡꓱ ꓢꓲ ꓢ-ꓟꓳ-ꓢꓳ-ꓠ ꓠꓬ ꓐꓯ ꓟꓴ ꓫꓬꓹ ꓒ ꓐꓴ ꓗꓪ ꓡꓳꓹ ꓬꓰ ꓕꓲ ꓣꓳ ꓟ ꓐꓰ ꓮ ꓘꓶꓸ ꓪꓽ ꓠꓬꓲˍ ꓟ ꓓꓻ ꓒ ꓕꓲ ꓣꓳ ꓥ ꓡꓳ=