ꓔꓲꓺ ꓓꓴ ꓟꓸ ꓟꓲꓽ

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ-ꓸ ꓘꓶꓽ ꓫꓵꓽ ꓡꓵ ꓗꓪ ꓬꓲꓸ ꓑ ꓫꓬ ꓐꓰ ꓪꓴ-ꓢ ꓙ ꓡꓯ ꓘꓳꓹ ꓟ ꓗꓪ ꓔꓲ ꓓꓴ ꓥ ꓢꓲ-ꓸ ꓘꓶꓽ ꓫꓵꓽ ꓫꓵꓼ ꓦꓬꓼ ꓠꓬꓲ ꓗꓪ ꓪꓴ-ꓢ ꓐꓰ ꓬꓲꓸ ꓑ ꓫꓬ ꓙ ꓡꓯ ꓘꓳꓹ ꓟ ꓚꓱꓹ ꓗꓪ ꓪꓴꓽ ꓓꓰ ꓡꓰ ꓟ ꓬꓰ-ꓢꓴ ꓬꓲ ꓚꓲꓸ ꓛꓬ ꓔꓲ ꓖꓶ ꓗꓷ ꓟ ꓔꓲ ꓓꓴ ꓥ ꓟ ꓣꓳꓽ ꓢꓳ ꓣꓴ ꓡꓯ=

ꓪꓴ-ꓢ ꓦ ꓡꓱ ꓢꓴ ꓪꓴ-ꓢ ꓔꓯ ꓙ ꓡꓯ ꓘꓳꓹ ꓟ ꓗꓪ ꓙ ꓖꓴ ꓠꓬꓲꓽ ꓚꓱꓹ ꓙꓳˍ ꓡꓳ=

  1. ꓔꓲ ꓓꓴ ꓗꓪ ꓐꓰ-ꓸ

  2. ꓟꓷꓽ ꓠꓷꓹ ꓗꓴ ꓙꓲ ꓫꓸ ꓪ ꓘꓶꓽ ꓗꓪ ꓐꓰ ꓶ ꓓꓰꓽ ꓪ ꓘꓴ ꓟ꓾ ꓕꓱ ꓠꓬꓲꓽ ꓚꓱꓹ ꓥ ꓡꓳ=

ꓬꓲ ꓪꓴꓸ ꓘꓶꓽ ꓫꓵꓽ ꓡꓵ ꓗꓪ ꓟ ꓔꓲ ꓓꓴ ꓡꓲꓽ ꓒꓰꓼ ꓓꓴꓸ ꓓꓴꓸ ꓤꓽ ꓐꓯ ꓠꓬ-ꓸ ꓮ ꓠꓱ ꓬꓲꓸ ꓑ ꓫꓬ ꓬꓲ-ꓢꓷ-ꓡꓰ ꓡ ꓞꓳ ꓔꓯ ꓔꓲ ꓖꓶ ꓓꓴ ꓚꓱꓹ ꓜꓲ ꓜꓲ ꓟꓴ ꓟꓴ꓾ ꓤ ꓟꓸ ꓠꓱ ꓑꓱ ꓔ ꓠꓬꓲ ꓘꓶꓽ ꓫꓵꓽ ꓡꓵ ꓙꓵꓻ ꓚꓱꓹ ꓔꓯ ꓛꓳ ꓔꓬ ꓢꓴ ꓐꓴ ꓠꓬ ꓠꓬꓲꓸ ꓠꓬꓲ ꓗꓪ ꓛꓲꓺ ꓔꓲ ꓖꓶˍ ꓟ ꓡꓲꓽ ꓒꓰꓼ ꓖꓳ ꓟ ꓛꓳ ꓔꓬ ꓡꓳ=

ꓪꓴ-ꓢ ꓡꓰ ꓬꓲ ꓪꓽ ꓔꓯ ꓤ ꓟꓸ ꓠꓱ ꓑꓱˍ ꓟ ꓗꓪ ꓬꓳꓸ ꓚꓲˍ ꓟ ꓕꓲꓽ ꓫꓵꓽ ꓠꓬ-ꓸ ꓔꓲ ꓓꓴ ꓚꓱꓹ ꓥ ꓡꓳ= ꓪ ꓘꓴ ꓦꓲ ꓘꓴꓽ ꓗꓪ ꓔꓲ ꓓꓴ ꓬꓰ ꓔ ꓟ ꓗꓪ ꓮꓸ ꓣꓳ꓾ ꓮꓸ ꓛꓵꓼ꓾ ꓮꓸ ꓠꓬꓲꓽ꓾ ꓮꓸ ꓖꓴꓽ꓾ ꓜꓽ ꓪꓳꓽ ꓡꓳ ꓪꓳꓽ꓾ ꓛꓱꓼ ꓡꓱꓼ ꓙꓵ ꓑ ꓑ ꓔꓯꓹ ꓡ ꓢꓲ ꓛꓴꓻ ꓔꓲ ꓓꓴ ꓡꓰ ꓛꓳ ꓠꓹ ꓟ ꓚꓱꓹ ꓠꓬ-ꓸ ꓪꓴ-ꓢ ꓡꓰ ꓬꓲ-ꓢꓷ-ꓡꓰ ꓔꓯ ꓤ ꓟꓸ ꓠꓱ ꓑꓱˍ ꓟ ꓬꓲꓸ ꓓꓽ ꓟ ꓕꓲꓽ ꓫꓵꓽ ꓥ ꓐꓭ=

ꓕꓯꓽ ꓢꓲ ꓗꓪ ꓐꓯ ꓡꓳꓹ ꓬꓰ ꓟ ꓔꓲ ꓓꓴ ꓮ ꓡꓰ ꓫꓬꓹ ꓚꓱꓹ ꓮ ꓡꓰ ꓕꓲꓽ ꓫꓵꓽ ꓐꓱ ꓶ ꓮ ꓡꓰ ꓛꓴ ꓔꓲ ꓠꓹ ꓟ ꓚꓱꓹ ꓓꓳ ꓙꓰ ꓕꓳ ꓶ꓾ ꓡꓱ-ꓬꓲ ꓕꓳ ꓶ꓾ ꓑ ꓫꓬ ꓵ ꓕꓳ ꓶ꓾ ꓕꓱ ꓢ ꓑꓷꓠꓽ ꓗꓪ ꓬꓲꓸ ꓓꓽ ꓟ ꓪꓴ-ꓢ ꓡꓰ ꓤ ꓟꓸ ꓠꓱ ꓑꓱˍ ꓟ ꓐꓯ ꓘꓶꓽ ꓓꓯꓹ ꓡꓳ=

ꓝꓮꓲ ꓔꓲ ꓓꓴ ꓟꓬꓱꓽ ꓟꓯꓻ ꓢꓴ ꓔꓲ ꓒꓽ ꓔꓯ ꓥ ꓟꓲ ꓬꓲꓸ ꓫꓳꓹ ꓫꓳꓹ ꓞꓳ ꓫꓵꓽ ꓪꓳꓼ ꓢꓲ ꓓꓳ ꓡ ꓢꓲ꓾ ꓔꓲ ꓓꓴ ꓗꓪ ꓟꓬꓱꓽ ꓬꓰ ꓠꓹ ꓟ ꓯ-ꓣꓷ ꓕꓲꓽ ꓪꓳꓼ ꓟ ꓔꓯ ꓢꓲꓺ ꓢꓲ ꓔꓲꓺ ꓓꓴ ꓟꓬꓱꓽ ꓗꓪ ꓣꓱꓽ ꓝꓲˍ ꓡꓳ= ꓠꓱꓸ ꓐꓯ ꓪꓴ-ꓢ ꓡꓰ ꓢꓲ ꓔ ꓟ ꓟꓽ ꓥ ꓠꓬ ꓮꓽ ꓟ ꓥˍ ꓟꓲ ꓔꓲ ꓓꓴ ꓟꓬꓱꓽ ꓗꓪ ꓣꓱꓽ ꓙ ꓟꓽ ꓐ ꓡ=

ꓕꓯꓽ ꓢꓲ ꓗꓪ ꓪꓴ-ꓢ ꓡꓰ ꓬꓲ-ꓢꓷ-ꓡꓰ ꓔꓯ ꓤ ꓟꓸ ꓠꓱ ꓑꓱ ꓟ ꓗꓪ ꓔꓲ ꓓꓴ ꓚꓱꓹ ꓮꓽ ꓟꓬꓹ ꓫꓵꓽ ꓟꓸ ꓔ ꓟ ꓔꓱꓹ ꓕ ꓠꓬꓲ ꓟꓶˍ ꓡꓳ= ꓮ ꓫꓵꓽ ꓪꓴꓸ ꓠꓬꓲ ꓔꓲ ꓓꓴ ꓔꓲ ꓚꓱꓹ ꓡꓲꓽ ꓛꓳ ꓝꓲ ꓡꓳꓺꓽ ꓐꓯ ꓠꓬ꓾ ꓬꓲ ꓑ ꓫꓬ ꓟꓷꓽ ꓠꓷꓹ ꓗꓴꓹ ꓙꓲ ꓡꓰ ꓪꓴ-ꓢ-ꓳ-ꓸ ꓘꓴˍ ꓟ ꓡꓰꓽ ꓟꓽ ꓐꓲ ꓜꓲꓼ= ꓚꓵ ꓚꓵ ꓠꓲꓹ ꓟ ꓗꓪ ꓐꓰ ꓙꓵꓻ ꓢꓲ ꓦ ꓡꓱ ꓢꓲ ꓚꓲꓸ ꓛꓬꓽ ꓒꓵꓽ ꓶꓽ ꓔꓯꓹ ꓡ ꓢꓲ ꓔꓲ ꓖꓶ ꓡ ꓟ ꓠꓬ-ꓸ ꓠꓴ ꓙꓵꓻ ꓚꓱꓹ ꓗꓪ ꓬꓰ ꓐꓲ ꓡꓰ ꓟ ꓟꓬꓱꓽ ꓕꓲꓽ ꓟ ꓥ ꓠꓬꓲ-ꓸ ꓬꓲ ꓪꓽ ꓔꓯ ꓡꓲꓽ ꓒꓰꓼ ꓕꓱ ꓟ ꓟꓽ ꓓꓽ ꓞꓽ ꓛꓳꓻ ꓝꓲ ꓬꓰ ꓝꓲˍ ꓟ ꓥꓳ ꓐꓰ ꓣꓳ ꓢꓷꓸˍ ꓡꓳ=

ꓕꓯꓽ ꓢꓲ ꓗꓪ ꓘꓶꓽ ꓫꓵꓽ ꓡꓵ ꓦꓬꓼ ꓠꓬꓲ ꓗꓪ ꓪꓴ-ꓢ ꓐꓰ ꓬꓲꓸ ꓑ ꓫꓬ ꓙ ꓡꓯ ꓘꓳꓹ ꓟ ꓚꓱꓹ ꓐꓯ ꓡꓳꓹ ꓬꓰꓳ= ꓮ ꓟꓶ ꓠꓬ ꓘꓶꓽ ꓫꓵꓽ ꓫꓵꓼ ꓗꓪ ꓟ ꓔꓲ ꓓꓴ ꓟꓸ ꓟꓲꓽ ꓐꓯ ꓝꓸ ꓬꓰ ꓓꓴ ꓥꓳ= ꓬꓲ-ꓢꓷ-ꓡꓰ ꓪꓴ-ꓢ ꓑ ꓫꓬ ꓚ ꓟꓲꓽ ꓔꓯ ꓡꓳꓸ ꓠꓬꓲˍ ꓕꓯ ꓮ-ꓐ-ꓡ-ꓦ ꓕꓲꓽ ꓞꓲꓼ ꓗꓪ ꓐꓰ ꓪꓴ-ꓢ ꓑ ꓫꓬ ꓢꓲꓺ ꓓꓳ ꓡ ꓢꓲ ꓬꓲ ꓪ ꓔꓯ ꓬꓰ ꓙˍ ꓟ ꓦꓵꓻ ꓙˍ ꓟ ꓟꓸ ꓟꓲꓽ ꓢꓲ-ꓫꓬ ꓕꓳ ꓶ ꓗꓪ ꓓꓯꓹ ꓡꓳ=

ꓥ ꓡꓳ= ꓖꓳ ꓡꓱ ꓥ ꓟꓲ ꓬꓲ-ꓢꓷ-ꓡꓰ ꓡ ꓞꓳ ꓟꓽ ꓥ ꓟ ꓠꓱꓸ ꓐꓯ ꓡ ꓞꓳ ꓞꓳ ꓫꓵꓽ ꓞꓳ ꓙꓰꓽ ꓵ ꓖꓴ ꓟꓽ ꓓ ꓙꓳ ꓔꓬ ꓡꓳ= ꓬꓲ ꓪꓽ ꓔꓯ ꓮ ꓟ ꓡꓰ ꓚꓰꓼ ꓔ ꓡꓽ? ꓪꓴ-ꓢ ꓡꓰ ꓚꓰꓼ ꓔ ꓟ ꓥ ꓡꓳ= ꓬꓲꓸ ꓪ ꓮ ꓙꓵꓽ ꓪꓴ-ꓢ ꓑ ꓫꓬ꓾ ꓪꓴ-ꓢ ꓤ ꓠꓱ ꓒꓬꓱꓼ ꓡ ꓠꓹ ꓟ ꓪꓴ-ꓢ ꓤ ꓔꓲꓸ ꓫꓵꓻ ꓠ ꓗꓷ ꓡꓰꓳ= ꓟꓬꓱꓽ ꓕꓱ ꓟ ꓟꓯꓻ ꓠꓹ ꓟ꓾ ꓬꓰ ꓠꓹ ꓟ ꓮꓽ ꓟ ꓥˍ ꓟꓲ ꓬꓰ ꓟꓽ ꓐ ꓡ= ꓬꓰ-ꓢꓴ ꓡꓰꓽ ꓟꓯꓻ ꓠ ꓗꓷ ꓡꓰ ꓠꓬꓲ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓫꓵꓳ=

ꓪꓴ-ꓢ ꓡꓰ ꓚꓰꓼ ꓔ ꓟ ꓡ ꓞꓳ ꓮꓽ ꓙꓵꓽ ꓪꓴ-ꓢ ꓑ ꓫꓬ ꓒꓬꓱꓼ ꓡ ꓠꓹ ꓟ ꓬꓰ-ꓢꓴ ꓫꓵꓽ ꓡꓯ ꓐꓳ ꓔꓶꓸ ꓓꓴ ꓗꓪ ꓟꓰ ꓗꓷˍ ꓟ ꓗꓪ ꓐꓰ ꓬꓲ-ꓢꓷ-ꓡꓰ ꓕꓲꓽ ꓪꓳꓼ ꓟ ꓡꓰꓽ ꓪꓴ-ꓢ ꓑ ꓫꓬ ꓟꓽ ꓥ-ꓸ ꓪꓴ-ꓢ ꓡꓰ ꓚꓰꓼ ꓔ ꓟ ꓡ ꓞꓳ ꓮ ꓙꓵꓽ꓾ ꓟꓵꓽ ꓗꓳꓹ ꓓꓵ ꓓꓵ ꓗꓪ ꓟ ꓡ ꓞꓳ ꓬꓰ ꓪ ꓓꓹ ꓟ ꓤꓶꓻ ꓦꓬꓼ ꓠꓬꓲ ꓬꓰ-ꓢꓴ ꓫꓵꓽ ꓗꓪ ꓐꓰ ꓒꓳꓹ ꓡꓶꓸ ꓗꓷꓳ= ꓬꓰ-ꓢꓴ ꓣꓳ ꓐꓱ ꓶ ꓫꓵꓻ ꓙ ꓗꓷˍ ꓟ ꓔꓯ ꓕꓲ ꓤꓶꓻ ꓗꓳꓸ ꓕꓲꓽ ꓤꓶꓻ ꓗꓪ ꓟ ꓡ ꓞꓳ ꓚꓲꓸ ꓟꓶ ꓠꓹ ꓟ ꓢꓲꓽ ꓫꓬꓹ ꓟ ꓠꓽ ꓡꓲꓹ ꓠꓬꓲ ꓟꓶꓽ ꓘꓶꓼ ꓬꓲꓸ ꓛꓳ ꓒꓯꓹ ꓐꓴ ꓐꓰ ꓜꓻ ꓜꓽˍ ꓕꓯ ꓡꓲꓽ ꓕꓱ ꓟ ꓬꓰ ꓠꓹ ꓟ “ꓥꓪ ꓔꓯ ꓓꓵꓽ ꓙ ꓛꓲ ꓡ ꓠꓹ ꓟ ꓕꓱ ꓡꓱ ꓬꓰ” ꓐꓰ ꓕꓵꓼ ꓪꓽ ꓡꓯꓼ ꓙꓱ ꓔ ꓡꓳ(ꓡꓴ-ꓘ 22ꓽ19)=

ꓮ ꓟꓶ ꓕꓵꓼ ꓪ ꓕꓱ ꓟ ꓡꓯꓼ ꓙꓱˍ ꓕꓯ ꓑ ꓑ ꓔꓯ ꓥꓪ ꓧꓪꓽ꓾ ꓥꓪ ꓖꓳ ꓓꓱꓽ ꓥ ꓡꓳ꓾ ꓐꓯ ꓡꓳ= ꓝꓮꓲ ꓛꓱꓼ ꓡꓱꓼ ꓙꓵꓻ ꓔꓯ ꓥˍ ꓟꓲ ꓥꓪ ꓫꓵꓽ ꓥ ꓡꓳ꓾ ꓐꓯ ꓡꓳ= ꓑ ꓑ ꓐꓰ ꓛꓱꓼ ꓡꓱꓼ ꓙꓵꓻ ꓠꓬ ꓬꓲ ꓫꓵꓽ ꓬꓲ ꓧꓪꓽ ꓚꓵꓺ ꓥ ꓟ ꓬꓰ-ꓢꓴ ꓐꓯ ꓘꓶꓽ ꓬꓳꓸ ꓚꓲꓸˍ ꓟ ꓐꓯ ꓘꓶꓽ ꓥ ꓡꓳ=

ꓮ ꓟꓶ ꓬꓰ-ꓢꓴ ꓧꓪꓽ ꓬꓰ-ꓢꓴ ꓫꓵꓽ ꓒꓬꓱꓼ ꓡ ꓠꓹ ꓟ ꓔꓲ ꓒ ꓐꓴ ꓡꓰ ꓟꓲ-ꓢ ꓬꓰˍ ꓟ ꓗꓪ ꓬꓰ-ꓢꓴ ꓧꓪꓽ ꓬꓰ-ꓢꓴ ꓫꓵꓽ ꓚꓰꓼ ꓢꓲ ꓢꓲꓺ ꓤ ꓐꓴ ꓔꓯ ꓬꓰ-ꓢꓴ ꓫꓵꓽ ꓬꓰ-ꓢꓴ ꓧꓪꓽ ꓚꓵ ꓑꓶ ꓖꓶꓽ ꓜꓽˍ ꓡꓳ= ꓟꓸ ꓟꓲꓽ ꓕꓱ ꓟ ꓬꓲ ꓠꓯꓸˍ ꓟ ꓚꓵ ꓘꓶꓽ ꓥ ꓡꓳ= ꓬꓰ-ꓢꓴ ꓐꓯ ꓘꓶꓽ ꓗꓪ ꓐꓰ ꓘꓳꓹ ꓣꓴ ꓡꓯ= ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓑ ꓑ꓾ ꓫꓵꓻ ꓥˍ ꓟꓲ ꓝꓮꓲ ꓢꓯꓸ ꓬꓲꓼ ꓡˍ ꓟ ꓠꓯꓻ ꓞꓲꓼ ꓓꓽ ꓟ ꓬꓰ-ꓢꓴ ꓖꓳ ꓓꓱꓽ ꓟꓲ-ꓢ ꓬꓰˍ ꓟ ꓗꓪ ꓐꓰ ꓘꓳꓹ ꓣꓴ ꓟꓶˍ ꓡꓳ=

Add new comment

4 + 5 =