ꓗꓷ-ꓬꓲ ꓐꓰ ꓮ-ꓐꓱ ꓟꓸ ꓟꓲꓽ

ꓬꓲ-ꓓꓰ ꓐꓱꓺ ꓗꓪ ꓐꓰ ꓖꓼ ꓓꓳ ꓟꓶ ꓗꓷ ꓗꓸ ꓠꓯꓸ꓾ ꓮ-ꓓꓯ ꓐꓰ ꓰ-ꓪ ꓐꓴ ꓔꓯ ꓤ ꓠꓬꓲꓽ ꓣꓳ ꓙꓳ ꓡˍ ꓡꓳ= ꓤ ꓪꓴꓽ ꓔꓯ ꓠꓬ ꓗꓷ-ꓬꓲ ꓟꓬꓱ ꓔ ꓢꓲ ꓤ ꓣꓳ ꓔꓯ ꓠꓬ ꓮ-ꓐꓱ ꓟꓬꓱ ꓔ ꓡꓳ= ꓬꓲ ꓪ ꓐꓴ ꓪꓴꓽ ꓡˍ ꓕꓯ ꓗꓷ-ꓬꓲ ꓠꓬ ꓟꓲꓺ ꓠꓯꓺ ꓗꓪ ꓔꓶ ꓫꓵꓽ ꓔꓶ ꓙꓰꓽ ꓔꓶˍ ꓟ ꓟꓬꓱꓽ ꓬꓰ ꓢꓲ ꓬꓲꓸ ꓠꓬꓲ ꓤ ꓮ-ꓐꓱ ꓠꓽ ꓮ ꓣꓳ ꓜꓴꓻ ꓔꓯ ꓡꓳˍ ꓡꓳ=

ꓕꓲ ꓠꓬꓲ ꓗꓪ ꓗꓷ-ꓬꓲ ꓠꓬ ꓬꓲ ꓐꓱꓺ ꓗꓪ ꓐꓰ ꓔꓶ ꓟꓶˍ ꓟ ꓜꓽ ꓪꓳꓽ ꓡꓳ ꓔꓯ ꓪꓴ-ꓢ ꓔꓬ ꓗꓪ ꓔꓲꓺ ꓖꓶˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲ ꓔꓲꓺ ꓖꓶˍꓟ ꓠꓬ ꓔꓶ ꓔ ꓟ ꓗꓪ ꓟꓽ ꓙꓲꓻ ꓟ ꓜꓽ ꓪꓳ ꓡꓳ ꓪꓽ ꓡꓰꓽ ꓥ ꓡꓳ= ꓮ-ꓐꓱˍ ꓟꓲ ꓬꓲ ꓮ ꓣꓳ ꓜꓴꓻ ꓗꓪ ꓟ ꓮ ꓘꓶꓸ ꓞꓶˍ ꓟ ꓬꓲꓸ ꓪꓴꓸ ꓧꓳꓽ ꓔ ꓟ ꓮ ꓣꓳ ꓑꓸ ꓔꓯꓹ ꓡ ꓢꓲ ꓔꓲꓺ ꓖꓶˍ ꓡꓳ=  ꓖꓳ ꓕꓯ ꓪꓴ-ꓢ ꓠꓬ ꓮ-ꓐꓱ ꓔꓲꓺ ꓖꓶˍ ꓟ ꓔꓲꓺ ꓓꓴ ꓔꓯ ꓠꓲꓹ ꓒꓴˍ ꓟ ꓔꓯ ꓟꓳꓸ ꓖꓶˍ ꓡꓳ= ꓗꓷ-ꓬꓲ ꓬꓲꓸ ꓔꓲꓺ ꓖꓶˍ ꓟ ꓔꓯ ꓠꓬ ꓬꓲꓸ ꓠꓲꓹ ꓒꓴˍ ꓟ ꓔꓯ ꓟꓽ ꓟꓳꓸ ꓖꓶ=

ꓕꓱ ꓟ ꓔꓯ ꓗꓷ-ꓬꓲ ꓢꓷꓸ ꓡꓰ ꓠꓬ ꓮ ꓘꓶꓸ ꓠꓲꓹ ꓟ ꓦꓶꓻ ꓔꓴ ꓡˍ ꓡꓳ= ꓖꓳ ꓡꓱ ꓠꓬꓲ ꓪꓴ-ꓢ ꓡꓰ ꓬꓲ ꓔꓯ “ꓗꓷ-ꓬꓲꓳ ꓠꓴ ꓮ ꓫꓵꓽ ꓪꓴꓸ ꓠꓬꓲ ꓠꓲꓹ ꓟ ꓦꓶꓻ ꓔꓬ ꓡ? ꓠꓴ ꓠꓬ ꓮ ꓡꓰ ꓗꓹ ꓠꓬꓲ ꓠꓲꓹ ꓟ ꓫꓸꓔꓬ ꓡ? ꓠꓴ ꓡꓰ ꓙꓲˍ ꓟ ꓔꓱꓹ ꓟ ꓬꓰˍ ꓠꓬ ꓠꓴ ꓔꓯ ꓢꓲꓺ ꓡꓲꓺ ꓟ ꓙꓳˍ ꓥꓳ= ꓙꓲˍ ꓟ ꓔꓱꓹ ꓟ ꓟꓽ ꓬꓰ ꓠꓬ ꓥꓶˍ ꓟ ꓡꓰ ꓠꓴ ꓔꓯ ꓧꓪꓸ ꓡꓰˍ ꓥꓳ= ꓝꓴꓲꓸ ꓡꓰ ꓠꓴ ꓔꓯ ꓙꓵꓽ ꓡˍ ꓥꓳ= ꓖꓳ ꓡꓱ ꓠꓬꓲ ꓠꓴ ꓡꓰ ꓝꓴꓲ ꓔꓯ꓾ ꓥꓶˍ ꓟ ꓔꓯ ꓧꓪꓸ ꓡꓰ ꓝꓲ ꓠꓯꓹ ꓡꓳ꓾ ꓐꓯˍ ꓡꓳ= ꓕꓱ ꓟ ꓔꓯ ꓑ ꓙ ꓡꓰ ꓕꓯ ꓗꓷ-ꓬꓲ ꓡꓰ ꓮ ꓘꓶꓸ ꓐꓰ ꓮ ꓘꓶꓸ ꓦꓶ ꓡ ꓢꓲ ꓪꓴ-ꓢ ꓔꓯ ꓐꓰ ꓧꓹ ꓙꓰˍ ꓡꓳ=

ꓗꓷ-ꓬꓲ ꓠꓬ ꓬꓲ ꓠꓬꓲ ꓤ ꓐꓰ ꓫꓸ ꓕꓱ ꓠꓹ ꓟ ꓧꓪ ꓙꓰ ꓢꓲ ꓬꓲ ꓪ ꓠꓬꓲꓽ ꓣꓳ ꓠꓬ ꓬꓰ ꓟꓲ ꓓꓰ ꓗꓪ ꓛꓲ ꓬꓰ ꓠꓬ ꓪꓴ-ꓢ ꓡꓰ ꓮ-ꓐꓱ ꓔꓯ ꓠꓲꓹ ꓒꓵ ꓠꓲꓹ ꓡꓱ ꓬꓰ ꓖꓶ ꓟ ꓕꓯꓽ ꓢꓲ ꓗꓪ ꓗꓷ-ꓬꓲ ꓠꓬ ꓬꓲ ꓠꓬꓲ ꓤ ꓔꓯ ꓮ ꓘꓶꓸ ꓠꓲꓹ ꓟ ꓦꓶ ꓡˍ ꓡꓳ= ꓪꓴ-ꓢ ꓔꓯ ꓗꓷ-ꓬꓲ ꓦꓶꓻˍ ꓟ ꓦꓶꓻ ꓠꓲꓹ ꓠꓬ ꓮ-ꓐꓱ ꓔꓯ ꓟꓳꓸ ꓙꓰˍ ꓡꓳ= ꓖꓳ ꓡꓱ ꓠꓬꓲ ꓗꓷ-ꓬꓲ ꓡꓰ ꓬꓲ ꓠꓬꓲ ꓤ ꓮ-ꓐꓱ ꓔꓯ ꓢꓰꓼ ꓗꓷꓳ=  

ꓖꓳ ꓕꓲ ꓠꓬꓲ ꓕꓯ ꓡꓰꓽ ꓗꓷ-ꓬꓲ ꓡꓰ ꓐꓱ ꓗꓪ ꓟꓬꓱꓽ ꓬꓰ ꓔꓬ ꓕꓯ ꓪꓴ-ꓢ ꓡꓰ ꓬꓲ ꓔꓯ ꓠꓴ ꓠꓬꓲ ꓤ ꓮ ꓡꓰ ꓗꓪ ꓔꓬ ꓡ? ꓐꓰ ꓠ ꓠꓬꓲˍ ꓕꓯ ꓬꓲꓸ ꓡꓰ ꓒꓳꓹ ꓖꓶ ꓢꓲ ꓥꓪ ꓠꓽ ꓥꓪ ꓠꓬꓲ ꓤ ꓔꓯ ꓠꓬꓲꓺ ꓢꓴ ꓥ ꓡ? ꓐꓰ ꓐꓯˍ ꓡꓳ= ꓠꓴ ꓮ ꓫꓵꓽ ꓬꓰ ꓖꓶ ꓗꓷ ꓡ= ꓟꓲ ꓛꓬ ꓠꓯꓸ ꓘꓪ ꓗꓪ ꓐꓰ ꓠꓴ ꓠꓬꓲ ꓤ ꓮ-ꓐꓱ ꓫꓵꓽ ꓡꓰ ꓥꓪ ꓔꓯ ꓘꓴˍ ꓟ ꓢꓯꓼ ꓥꓪ ꓑ ꓙˍ ꓡꓳ꓾ ꓐꓰ ꓐꓯ ꓖꓶˍ ꓡꓳ=

ꓖꓳ ꓕꓯ ꓮ-ꓐꓱ ꓔꓯ ꓢꓰꓼ ꓗꓷ ꓟ ꓔꓯ ꓪꓴ-ꓢ ꓢꓷˍ ꓟ ꓗꓷ-ꓬꓲ ꓢꓷꓸ ꓡꓰ ꓠꓬꓲ ꓙꓳꓺ ꓛꓱꓽ ꓔꓴ ꓡˍ ꓡꓳ= “ꓠꓴ ꓠꓬꓲ ꓤ ꓫꓵꓽ ꓔꓯ ꓘꓳ ꓣꓴ ꓠꓹ ꓟ ꓟꓷ ꓠꓷ ꓧꓽ ꓗꓷ ꓟ ꓟꓲ ꓠꓯ ꓡꓰ ꓮ ꓟꓶ ꓠꓴ ꓔꓯ ꓙꓱꓽ ꓗꓷꓳ= ꓕꓱ ꓡꓱ ꓖꓳ ꓑꓳ ꓠꓴ ꓟꓬꓱꓽ ꓬꓰ ꓜˍ ꓕꓯ꓾ ꓟꓲ ꓠꓯ ꓠꓬ ꓠꓴ ꓐꓱ ꓶ ꓬꓲ ꓢꓶꓽ ꓟꓽ ꓓꓱꓼ ꓡ= ꓠꓴ ꓠꓬ ꓟꓲ ꓠꓯ ꓗꓪ ꓛꓰꓹ ꓚꓳꓺ ꓔꓬ ꓢꓴ ꓗꓷ ꓡꓰˍ ꓥꓳ꓾ ꓐꓰ ꓪꓴ-ꓢ ꓡꓰ ꓐꓯˍ ꓕꓯ꓾ ꓗꓷ-ꓬꓲ ꓡꓰ ꓪꓴ-ꓢ ꓔꓯ꓾ ꓥꓪ ꓛꓬꓻ ꓒꓵꓽ ꓠꓬ ꓥꓪ ꓟꓯꓻ ꓘꓴˍ ꓟ ꓕꓯ ꓢꓲ ꓡꓲꓽ ꓡꓰꓳ= ꓠꓬꓲꓸ ꓠꓬꓲ ꓠꓴ ꓡꓰ ꓥꓪ ꓔꓯ ꓟꓵꓽ ꓕꓱ ꓟ ꓗꓪ ꓐꓰ ꓖꓼ ꓓꓳ ꓗꓷ ꓠꓬ꓾ ꓠꓴ ꓒꓬꓱ ꓟꓬ ꓔꓯ ꓥꓪ ꓟꓽ ꓟꓳ꓾ ꓥꓪ ꓠꓬ ꓟꓲ ꓠꓯ ꓗꓪ ꓛꓰꓹ ꓚꓳꓺ ꓔꓬ ꓢꓴ ꓗꓷ ꓡꓰˍ ꓥꓳ= ꓥꓪ ꓔꓯ ꓧꓪ ꓟꓶ ꓢꓴ ꓮ ꓟ ꓥˍ ꓟꓲ ꓥꓪ ꓔꓯ ꓢꓰꓼ ꓡˍ ꓥꓳ꓾ ꓐꓯˍ ꓡꓳ=

ꓮ ꓟˍ ꓟꓲ ꓠꓴ ꓔꓯ ꓟꓽ ꓢꓰꓼ ꓡ= ꓠꓴ ꓢꓯꓼ ꓟꓬ ꓮ ꓟˍ ꓟꓲ ꓟꓽ ꓣꓴ ꓠꓹ ꓟ ꓥꓪ ꓡꓰ ꓠꓴ ꓔꓯ ꓢꓷꓸ ꓡꓰ ꓓꓴ ꓕꓲ ꓟ ꓬꓰ ꓖꓶˍ ꓥꓳ= ꓠꓴ ꓔꓯ ꓫꓸ ꓙꓵ ꓡ ꓢꓴ ꓮ ꓙꓵꓽ ꓔꓯ ꓠꓬ ꓪꓽ ꓛꓴ ꓫꓵꓽ ꓝꓸ ꓚꓱꓹ ꓖꓶ ꓝꓲˍ ꓥꓳ꓾ ꓐꓰ ꓪꓴ-ꓢ ꓡꓰ ꓐꓯˍ ꓡꓳ= ꓖꓳ ꓡꓱ ꓠꓬꓲ ꓗꓷ-ꓬꓲ ꓠꓬ ꓖꓳ ꓕꓲ ꓠꓬꓲ ꓗꓪ ꓪꓴ-ꓢ ꓟꓲ ꓙꓬ ꓗꓪ ꓐꓰ ꓓꓳ ꓙꓰ ꓢꓲ ꓬꓲ-ꓓꓰ ꓐꓱꓺ ꓐꓶꓻ ꓓꓳ ꓔꓯ ꓟꓳꓸ ꓗꓪ ꓟ ꓠꓳ-ꓓ ꓟꓵꓽ ꓗꓪ ꓔꓬ ꓬꓰˍ ꓡꓳ=

ꓬꓲ ꓦꓬꓼ ꓠꓬꓲ ꓟꓶ ꓤ ꓗꓳꓸ ꓙꓰˍ ꓕꓯ ꓰ-ꓪ ꓡꓰ ꓤ ꓝꓮꓲ ꓕꓲ ꓣꓳ ꓦꓵꓻ ꓡˍ ꓡꓳ= ꓬꓲ ꓠꓬ ꓗꓹ ꓛꓲ ꓠꓬꓲ ꓐꓰ ꓘꓴ ꓢꓲ꓾ ꓗꓷ-ꓬꓲ ꓠꓬ ꓮ-ꓐꓱ ꓢꓯꓼ ꓟꓬ ꓣꓴ ꓗꓷ ꓥˍ ꓟꓲ ꓮ ꓟꓶ ꓠꓬ ꓪꓴ-ꓢ ꓡꓰ ꓣꓳ ꓔꓯ ꓤ ꓠꓱ ꓕꓲ ꓣꓳ ꓖꓶ ꓡꓺꓳ= ꓣꓳ ꓠꓬ ꓬꓲ ꓔꓯ ꓢꓷ-ꓕꓱ ꓐꓰ ꓟꓬꓱꓺ ꓖꓶ ꓡꓯ꓾ ꓐꓯˍ ꓡꓳ= ꓢꓷ-ꓕꓱ ꓪꓴꓽ ꓡˍ ꓕꓯ ꓬꓲ ꓥˍ ꓟꓲ ꓤ ꓟꓶ ꓫ ꓗꓷ ꓢꓲ꓾ ꓬꓲ ꓔꓯ ꓤ ꓕꓲ ꓣꓳ ꓙꓳ ꓡꓰ ꓢꓲ ꓠꓬꓲ ꓬꓲ ꓤ ꓔꓯ ꓬꓲ-ꓠꓳ-ꓢꓷ ꓐꓰ ꓟꓬꓱꓺ ꓖꓶˍ ꓡꓳ=  ꓬꓲ ꓪ ꓕꓲ ꓦꓲ ꓢꓴ ꓠꓬ ꓪꓴ-ꓢ ꓔꓯ ꓙꓳꓺ ꓒꓵꓽ ꓢꓲ꓾ ꓮ-ꓓꓯ ꓐꓰ ꓰ-ꓪ ꓐꓴˍ ꓟꓲ ꓬꓲꓸ ꓘꓳꓼ ꓮ ꓟꓬꓹ ꓔꓬ ꓗꓷꓳ=

ꓗꓷ-ꓬꓲˍ ꓟꓲ ꓠꓳ-ꓓ  ꓗꓪ ꓔꓬ ꓬꓰ ꓗꓸ ꓠꓯꓸ ꓬꓲˍ ꓟꓲ ꓤ ꓟꓶ ꓕꓲ ꓣꓳ ꓫ ꓗꓷ ꓢꓲ꓾ ꓬꓲ ꓔꓯˍ ꓟꓲ ꓤ ꓠꓱ ꓮ ꓟꓬ ꓙꓳ ꓡꓰꓳ= ꓡꓳꓹ ꓬꓰˍ ꓗꓪ ꓬꓲ ꓠꓬ ꓡꓳ ꓒꓱ ꓕꓲ ꓟ ꓜꓶꓻ ꓢꓲ ꓖꓳ ꓗꓪ ꓙꓱꓽ ꓤ ꓦꓵꓻ ꓟ ꓟꓬꓱꓽ ꓬꓰˍ ꓡꓳ= ꓬꓲ ꓤ ꓬꓲ ꓠꓱ ꓐꓴ ꓠꓬ ꓛꓲꓺ ꓐꓶ ꓛꓰꓹ꓾ ꓙꓵꓽ ꓡꓵꓽ ꓟꓵˍ ꓟ ꓗꓪ ꓢꓳ ꓣꓴˍ ꓡꓳ= ꓕꓲ ꓐꓱ ꓠꓽ ꓧꓳꓻˍ ꓐꓰ ꓙꓲꓽ ꓡꓰ ꓫꓬꓹ ꓔ ꓟ ꓡꓴꓻ ꓫꓵ ꓡꓴ ꓙꓰ ꓓꓶꓽ ꓢꓴ ꓬꓰˍ ꓡꓳ=

ꓕꓱ ꓟ ꓠꓬ ꓬꓰ-ꓧꓳ-ꓧꓪ ꓪꓴ-ꓢ ꓡꓰ ꓚꓰꓼ ꓔ ꓟ ꓞꓳ ꓤ ꓕꓲ ꓪꓳꓼ ꓐꓴ ꓥ ꓡꓳ= ꓝꓮꓲ ꓟꓲ ꓠꓯ ꓠꓬ ꓬꓲ ꓪ ꓤ ꓠꓱ ꓐꓴ ꓬꓲ ꓪ ꓞꓲꓼ ꓤ ꓡꓯꓹ ꓤ ꓐꓴ  ꓐꓰ ꓐꓲ ꓡꓰˍ ꓡꓳ=