ꓟꓷꓽ ꓠꓷꓹ ꓝ ꓒ ꓬꓲ-ꓫꓲ-ꓚꓰ ( ꓬꓲ ꓟꓳ ꓗꓷ ꓦ ꓐꓬꓱꓽ ꓬꓲꓸ ꓪꓴꓸ ꓕꓲ ꓟ)

ꓐ-ꓐꓶ-ꓡꓶ ꓪ ꓔꓲ ꓠꓬ ꓙꓱ-ꓣꓴ-ꓢ-ꓡꓱ ꓔꓯ ꓓꓶꓽ ꓧꓪꓸ ꓡꓰ ꓢꓲ ꓬꓲ-ꓢꓷ-ꓡꓰ ꓞꓳ ꓫꓵꓽ ꓮ ꓟꓬꓹ ꓔꓯ ꓐ-ꓐꓲ-ꓡꓶ ꓗꓪ ꓡꓳꓽ ꓔꓯꓹ ꓙꓰˍ ꓕꓯ ꓬꓲ ꓪ ꓐꓴ ꓘꓴꓽ ꓗꓪ ꓟ ꓕꓲ ꓣꓳ ꓠꓬꓬꓲ-ꓫꓲ-ꓚꓰ ꓐꓰ ꓟꓬꓱꓺ ꓔ ꓟ ꓔꓲꓺ ꓒ ꓕꓲ ꓣꓳ ꓥ ꓡꓳ= ꓬꓲ ꓠꓬ ꓙꓱ-ꓣꓴ-ꓢ-ꓡꓱ ꓢꓲ ꓫꓬ ꓦꓲ ꓗꓪ ꓟꓬꓱꓽ ꓬꓰ ꓠꓹ ꓟ ꓢꓳ ꓣꓴ ꓗꓷ ꓢꓴ ꓥ ꓡꓳ=

ꓬꓲ ꓠꓬ ꓐ-ꓐꓲ-ꓡꓶ ꓗꓪ ꓡꓳꓽ ꓔꓯꓹ ꓙꓰˍ ꓕꓯ ꓓꓽ ꓪꓴꓸ (ꓬꓲꓸ ꓪꓴꓸ) ꓗꓪ ꓬꓲ-ꓫꓲ-ꓚꓰ ꓠꓬ ꓪꓴ-ꓢ ꓔꓯ ꓬꓲ ꓔꓲꓺ ꓖꓶ ꓠꓹ ꓟ ꓠꓬ ꓒꓬꓱꓼ ꓡ ꓟꓽ ꓓꓻꓳ꓾ ꓪꓴ-ꓢ ꓐꓱ ꓶ ꓥꓳ ꓡꓳꓸ ꓓꓴ ꓟꓽ ꓙꓳ ꓐꓰ ꓓꓵꓽ ꓙ ꓔꓬ ꓡꓳ= ꓖꓳ ꓡꓱ ꓥˍ ꓟꓲ ꓗꓸ ꓠꓯ ꓕꓯ ꓐ-ꓐꓲ-ꓡꓶ ꓗꓪ ꓬꓲ ꓐꓱ ꓶ ꓪꓴ-ꓢ ꓡꓰ ꓟꓬꓱꓽ ꓕꓲ ꓟ ꓙꓽ ꓖꓶ ꓔ ꓖꓶˍ ꓟ ꓬꓲ ꓢꓷꓸ ꓡꓰꓳ=

ꓬꓲ-ꓫꓲ-ꓚꓰ ꓠꓬ ꓐ-ꓐꓶ-ꓡꓶ ꓟꓵꓽ ꓘꓷ-ꓐ ꓬꓲꓽ ꓟ ꓘꓶꓽ ꓗꓪ ꓪꓳꓽ ꓔ ꓢꓴ ꓐꓴ ꓐꓰ ꓔꓬ ꓕꓯ ꓬꓲ ꓔꓯ ꓪꓴ-ꓢ ꓬꓲ ꓦ ꓐꓬꓱꓽ ꓕꓲ ꓟ ꓟꓳꓸ ꓖꓶ ꓡˍ ꓡꓳ= ꓪꓴ-ꓢ ꓡꓰ ꓬꓲ ꓔꓯ ꓫꓸ ꓕꓱ ꓡ ꓢꓲ ꓬꓲ ꓪꓽ ꓠꓬꓲˍ ꓟ ꓡꓯ ꓒꓯꓹ ꓡꓰ ꓬꓲ-ꓫꓲ-ꓚꓰ ꓕꓯꓽ ꓢꓲꓺ ꓚꓰꓹ ꓡˍ ꓡꓳ=

ꓖꓳ ꓕꓯ ꓞꓼ ꓐꓰ ꓟꓴꓽ ꓗꓪ ꓒꓴ ꓡ ꓢꓲ ꓖꓴ ꓪꓴꓸ ꓕꓲ ꓛꓱꓽ ꓗꓪ ꓐꓰ ꓕꓳꓽ ꓥꓳꓽ ꓙꓱꓼ ꓡˍ ꓟ ꓔꓯ ꓬꓲ ꓟꓳˍ ꓡꓳ= ꓮ ꓘꓶꓸ ꓪꓴꓽˍ ꓟ ꓟꓴ ꓗꓴꓸ ꓗꓪ ꓐꓰ ꓟꓲꓽ ꓐꓬꓱꓼ ꓤꓰꓽ (ꓟꓲꓽ ꓙꓰꓼ ꓬꓲꓽ) ꓡˍ ꓡꓳ= ꓖꓳ ꓡꓱ ꓠꓬꓲ ꓟꓴꓽ ꓗꓪ ꓠꓬ ꓐꓬꓱꓼ ꓡꓱꓼ ꓡꓰ ꓢꓲ ꓙꓲꓽˍ ꓡꓰ ꓐꓰ ꓐꓬꓱꓼ ꓡꓱꓼ ꓟ ꓕꓲꓽ ꓫꓵꓽ ꓓꓳ ꓡˍ ꓡꓳ= ꓕꓳꓽ ꓥꓳꓽ ꓙꓱ ꓔꓬ ꓟ ꓔꓱꓹ ꓫꓵ ꓗꓪ ꓞꓳ ꓤ ꓒꓬꓱꓽ ꓡꓰ ꓐꓰ ꓗꓹ ꓟ ꓢꓯꓸ ꓫꓵꓽ ꓡꓲꓸ ꓟ ꓔꓯ ꓟꓳˍ ꓡꓳ= ꓮ ꓡꓲ ꓕꓲ ꓟ ꓔꓯˍ ꓟꓲ ꓒꓬꓱꓽ ꓟꓬ ꓡꓲꓸ ꓟ ꓐꓰ ꓓꓴ ꓡꓯꓼ ꓡꓲ ꓐꓽ ꓙꓳˍ ꓡꓳ= ꓬꓲ ꓪ ꓛꓲ ꓪꓵꓽ ꓠꓬ ꓔꓱꓹ ꓔꓱꓹ ꓗꓹ ꓢꓲ꓾ ꓛꓲ ꓒꓯꓹ ꓠꓬ ꓮ ꓠꓬꓲꓽ ꓤ ꓛꓲ ꓐꓵꓼˍ ꓡꓰ ꓐꓰ ꓗꓹ ꓢꓲ ꓠꓬꓲ ꓢꓶꓸ ꓔ ꓟ ꓙꓲꓽˍ ꓡꓰ ꓐꓰ ꓐꓬꓱꓼ ꓡꓱꓼˍ ꓡꓳ= ꓬꓲ ꓪ ꓕꓲ ꓟ ꓐꓰ ꓕꓲ ꓟ ꓠꓬ ꓒꓬꓱꓽ ꓟꓬˍ ꓐꓰ ꓓꓴ ꓡꓯꓼ ꓙꓳ ꓢꓲ꓾ ꓓꓴ ꓡꓯꓼ ꓡꓲ ꓐꓽ ꓠꓯꓸ ꓘꓪ ꓠꓬ ꓞꓳ ꓤ ꓡꓯ ꓒꓯꓹ ꓡꓲ ꓐꓽ ꓙꓳˍ ꓡꓳ= ꓬꓲ ꓪ ꓓꓴ ꓡꓯꓼ ꓑꓶꓸ ꓠꓬ ꓕꓲꓺ ꓡꓯ ꓘꓳ ꓓꓹ ꓢꓲ ꓮ ꓡꓲ ꓔꓯ ꓟꓳꓸ ꓙꓰˍ ꓠꓬ ꓬꓲ ꓪ ꓖꓳ ꓓꓱ ꓟꓽ ꓒꓳꓹ ꓒꓳꓹ ꓟꓲ ꓕꓯꓽ ꓢꓲ ꓔꓱꓹ ꓔꓱꓹˍ ꓙꓰˍ ꓡꓳ=

ꓬꓲ ꓪ ꓮ ꓡꓲ ꓕꓲ ꓟˍ ꓟꓲ ꓟꓲꓽ ꓕꓯꓽ ꓢꓲ ꓕꓲ ꓒꓳꓹ ꓗꓪ ꓠꓬ ꓞꓳ ꓤ ꓒꓬꓱꓽ ꓟꓬ꓾ ꓡꓯꓼ ꓙ ꓕꓲ ꓛꓱꓽ ꓗꓪ ꓠꓬ ꓡꓽ ꓢꓯꓹ ꓒꓬꓱꓽ ꓟꓬ꓾ ꓡꓯꓼ ꓶꓸ ꓕꓲꓽ ꓛꓱꓽ ꓗꓪ ꓮ ꓠꓬꓲꓽ ꓑꓸ ꓒꓬꓱꓽ ꓟꓬ꓾ ꓗ ꓠꓯꓸ ꓢꓲ ꓕꓲ ꓒꓳꓹ ꓗꓪ ꓠꓬ ꓙꓱꓻ ꓓꓽ ꓟ ꓒꓬꓱꓽ ꓟꓬ ꓙꓳˍ ꓡꓳ=

ꓬꓲ ꓪ ꓐꓬꓱ ꓙꓰˍ ꓕꓯ ꓓꓴ ꓡꓯ ꓟꓶˍ ꓟ ꓢꓯꓼ ꓠꓬ ꓬꓲꓻ ꓙꓬ ꓡꓳꓻ ꓓꓽ ꓟ ꓟꓶˍ ꓟ ꓢꓯꓼˍ ꓐꓰ꓾ ꓮ ꓫꓵꓽˍ ꓟꓲ ꓬꓰ ꓐ ꓡ ꓢꓴ ꓬꓲ ꓟꓴꓽ ꓖꓴꓽ ꓑꓱꓹ ꓢꓯꓼˍ ꓐꓰ ꓟꓯꓼ ꓜꓴ ꓐꓵꓻ ꓢꓯꓼˍ ꓡꓰ ꓐꓰ ꓗꓹ ꓡꓳ= ꓬꓲ ꓪ ꓐꓬꓱˍ ꓟ ꓠꓽ ꓗꓷˍ ꓕꓯ ꓬꓲ ꓪ ꓓꓴ ꓡꓯꓼ ꓔꓯ ꓪꓴꓸ ꓓꓵ ꓕꓯꓽ ꓢꓲ ꓗꓪ ꓔꓱ ꓗꓷ꓾ ꓓꓱ ꓗꓷ ꓡꓳ=

ꓖꓳ ꓡꓱ ꓢꓲ ꓬꓲ ꓪ ꓪꓴꓸ ꓗꓪ ꓟ ꓟꓵꓽ ꓪꓴꓽ ꓗꓪ ꓠꓬ ꓒꓵꓽ ꓡꓳ ꓟꓵꓽ ꓪꓴꓽˍ ꓡꓰ ꓐꓰ ꓗꓹ ꓟ ꓙꓵꓽ ꓠꓬꓲꓸ ꓕꓲ ꓕꓲꓽ ꓟ ꓓꓹ ꓢꓲ꓾ ꓖꓳ ꓟ ꓗꓪ ꓠꓬ ꓞꓳ ꓤˍ ꓡꓰ ꓐꓰ ꓗꓹ ꓟ ꓕꓲ ꓣꓳ ꓠꓬꓲꓸ ꓠꓸ ꓔꓬ ꓡꓳ= ꓬꓲ ꓙꓴꓽ ꓝꓲꓸ ꓖꓼ ꓑꓳꓸ ꓕꓲ ꓕꓱ ꓟ ꓠꓬ ꓐꓬꓱꓼ ꓡꓱꓼ ꓡꓱꓼ ꓗꓹ ꓟ ꓙꓲꓽˍ ꓡꓰ ꓐꓰ ꓗꓹ ꓢꓲ꓾ ꓚꓳ ꓡꓳ ꓗꓪ ꓠꓬ ꓮ ꓔꓳꓸ ꓐꓬꓻ ꓞꓹ ꓟˍ ꓡꓰ ꓐꓰ ꓗꓹ ꓡꓳ= ꓙꓴꓼ ꓝꓲꓸ ꓪꓳꓼ ꓑꓳꓸ ꓕꓲ ꓕꓱ ꓟ ꓠꓬ ꓮ ꓔꓳꓸˍ ꓡꓰ ꓐꓰ ꓗꓹ ꓢꓲ꓾ ꓚꓳ ꓡꓳ ꓗꓪ ꓐ ꓡꓱ ꓡꓱ ꓗꓹ ꓡꓳ=

ꓚꓳ ꓡꓳ ꓗꓪ ꓟ ꓐ ꓡꓱˍ ꓟ ꓖꓳ ꓟ ꓠꓬ ꓟꓶꓽ ꓦ ꓦˍ ꓕꓯ ꓟꓴ ꓗꓴꓸ ꓗꓪ ꓓꓳˍ ꓟ ꓮ ꓟꓴꓽ ꓫꓵˍ ꓡꓰ ꓐꓰ ꓗꓹ ꓡꓳ= ꓕꓱ ꓟ ꓠꓬ ꓪꓴ-ꓢ ꓬꓲ ꓐꓬꓱꓼ ꓡꓱꓼ ꓡꓱ ꓟ ꓟꓳꓸ ꓖꓶ ꓓꓳ ꓡˍ ꓟ ꓬꓲ ꓒꓬꓱꓽ ꓥ ꓡꓳ=