ꓟꓷ ꓠꓷꓹ ꓝ ꓒ ꓬꓲ-ꓡꓲ-ꓫ ꓟꓸ ꓟꓲꓽ (1) ꓕꓱ

ꓟꓸ ꓟꓲꓽ ꓕꓱ ꓟ ꓠꓬ ꓟꓷꓽ ꓠꓷꓹ ꓝ ꓒ ꓬꓲ-ꓡꓲ-ꓬ ꓮ ꓔꓳꓸ ꓖꓼ ꓡꓲꓽ ꓐꓰ ꓟꓴ ꓗꓪ ꓗꓪ ꓓꓯ ꓙꓰ ꓗꓸ ꓠꓯꓸ ꓬꓲ-ꓡꓲ-ꓫ ꓡꓰ ꓪꓴ-ꓢ ꓟꓬꓱꓽ ꓝ ꓢꓲ ꓬꓰˍ ꓟ ꓟꓸ ꓟꓲꓽ ꓥ ꓡꓳ=

ꓬꓲ-ꓡꓲ-ꓬ ꓠꓬ ꓪꓴ-ꓢ ꓡꓰ ꓮꓸ ꓔꓳ ꓖꓼ ꓡꓲꓽ ꓐꓰ ꓟꓴ ꓗꓪ ꓗꓴꓷꓼ ꓗꓪ ꓛꓵꓽ ꓔꓯꓹ ꓙꓰ ꓗꓷ ꓟꓶ ꓢꓴ ꓥ ꓢꓲ꓾ ꓬꓲ-ꓡꓲ-ꓫ ꓠꓬ ꓬꓲ-ꓡꓲ-ꓬ ꓔꓯ ꓛꓳ ꓢꓴ ꓕꓲ ꓣꓳ ꓥ ꓡꓳ= ꓬꓲ-ꓡꓲ-ꓬ ꓠꓬ ꓦ ꓡꓱ ꓐꓳˍ ꓟ ꓪꓴ-ꓢ ꓬꓲ ꓚꓳ ꓑ ꓕꓲ ꓣꓳ ꓥ ꓢꓲ ꓠꓬꓲ꓾ ꓪꓴ-ꓢ ꓠꓬ ꓬꓲ ꓔꓯ ꓮ ꓘꓶꓸ ꓠꓲꓹ ꓠꓵ ꓟ ꓥ ꓢꓲ꓾ ꓧꓪꓽ ꓖꓳ ꓓꓱꓽ ꓟꓽ ꓫꓵꓻ ꓫꓵꓻ ꓟꓴꓽ ꓗꓪ ꓗꓴꓷꓼ ꓗꓪ ꓓꓯ ꓙꓰꓳ= ꓬꓲ-ꓡꓲ-ꓬ ꓔꓯ ꓟꓴ ꓗꓪ ꓗꓴꓷꓼ ꓗꓪ ꓮ ꓔꓳꓸ ꓖꓼ ꓡꓲꓽ ꓐꓰ ꓧꓳꓽ ꓔꓯꓹ ꓙꓰ ꓟ ꓥ ꓡꓳ=

ꓬꓲ-ꓡꓲ-ꓫ ꓠꓬ ꓕꓱ ꓟ ꓮ ꓙꓵꓽ ꓔꓯ ꓬꓲ ꓟꓬ ꓢꓶꓽ ꓗꓪ ꓐꓰ ꓟꓳ ꓪ ꓡꓰ ꓗ ꓠꓯꓸ ꓮ ꓟꓶ ꓠꓬ ꓞꓳ ꓤ ꓐꓴ꓾ ꓑ ꓫꓬ ꓐꓴ ꓔꓯ ꓪꓴ-ꓢ ꓐꓯ ꓘꓶꓽ ꓟꓸ ꓖꓶ ꓠꓹ ꓟ ꓠꓬ ꓬꓲ-ꓡꓲ-ꓫ ꓟꓬꓱꓽ ꓒꓬꓱꓼ ꓡꓺꓳ= ꓬꓲ-ꓡꓲ-ꓬ ꓬꓲ ꓟꓬꓱꓽ ꓔꓯ ꓝ ꓢꓲ ꓬꓰ ꓠꓹ ꓟ ꓪꓴ-ꓢ ꓠꓬ ꓬꓲ-ꓡꓲ-ꓫ ꓔꓯ ꓢꓷꓸ ꓠꓲꓹ ꓢꓯꓼ ꓪꓽ ꓧꓳꓽ ꓖꓶ ꓢꓲ ꓙ ꓖꓴ ꓟꓸ ꓖꓶˍ ꓡꓳ=

ꓕꓲ ꓠꓬꓲ ꓙꓳˍ ꓕꓯ ꓙꓱ-ꓡꓱ-ꓘꓳ ꓡꓳ ꓒꓱ ꓢꓴ ꓕꓲ ꓧꓳꓽ ꓡꓰ ꓬꓲ-ꓡꓲ-ꓬ ꓔꓯ ꓡ ꓢꓲ ꓫꓵꓽ ꓪꓴ ꓕꓲ ꓟ ꓐꓯ ꓖꓶ ꓡˍ ꓡꓳ= ꓬꓲ ꓪ ꓐꓴ ꓡꓰ꓾ ꓟꓸ ꓒꓽꓳ꓾ ꓙꓱ-ꓡꓱ-ꓘꓳ ꓡꓳ ꓒꓱ ꓠꓬ ꓮ ꓘꓶ ꓜꓳꓽˍ ꓟ ꓕꓲ ꓔꓳꓸ ꓗꓪ ꓔꓶ ꓔ ꓥˍ ꓟꓲ ꓬꓲꓻ ꓙꓬ ꓠꓽ ꓟꓽ ꓙꓲ ꓠꓬꓲ꓾ ꓔꓶ ꓜꓽ ꓔꓶ ꓓꓳ ꓟꓽ ꓠ ꓟˍ ꓐꓰ ꓶꓻ ꓞꓹ ꓟ ꓤ ꓠꓱ ꓐꓬ ꓡꓰˍ ꓟ ꓙꓳˍ ꓡꓳ= ꓕꓱ ꓟ ꓠꓬ ꓞꓳ ꓤ ꓐꓴ ꓔꓯ ꓫ ꓡꓰ ꓝꓲˍ ꓟ ꓥ ꓢꓲ ꓫꓵꓻ ꓖꓴ ꓡꓰˍ ꓥꓳ꓾ ꓐꓯ ꓖꓶˍ ꓡꓳ= ꓕꓱ ꓟ ꓔꓯ ꓑ ꓙ ꓡꓰ ꓕꓯ ꓬꓲ-ꓡꓲ-ꓫ ꓡꓰ ꓬꓲ ꓪ ꓐꓴ ꓔꓯ ꓡꓴꓺ ꓗꓶꓸ ꓫꓵꓼ ꓕꓲ ꓒꓯꓼ ꓗꓪ ꓞꓼ ꓐꓳ ꓗꓶ ꓢꓲ ꓔꓯꓹ ꓖꓶ ꓡ ꓠꓹ ꓟ ꓐꓯ ꓖꓶˍ ꓡꓳ=

ꓬꓲ ꓪ ꓐꓴ ꓡꓰ ꓞꓼ ꓐꓳ ꓗꓶ ꓔ ꓟ ꓡꓴꓺ ꓗꓶꓸ ꓔꓯꓹ ꓡ ꓠꓬ ꓬꓲ-ꓡꓲ-ꓫ ꓠꓽ ꓬꓲꓻ ꓝꓳꓹ ꓟꓶ ꓗꓪ ꓙꓰ ꓢꓲ ꓖꓳ ꓗꓪ ꓞꓼ ꓐꓳ ꓧꓳꓸ ꓗꓷ ꓢꓲ ꓠꓬꓲ꓾ ꓪꓴ-ꓢ ꓡꓰ ꓕꓱ ꓡꓱ ꓐꓯˍ ꓡꓳ꓾ ꓬꓲꓻ ꓙꓬ ꓕꓱ ꓟ ꓔꓯ ꓥꓪ ꓡꓰ ꓫꓬ ꓡꓰ ꓝꓲꓳ= ꓕꓱ ꓡꓱ ꓖꓳ ꓑꓳꓸ ꓬꓲꓻ ꓙꓬ ꓕꓱ ꓟ ꓗꓪ ꓐꓰ ꓠꓻ ꓓꓴ ꓒꓬꓽ ꓓꓴ ꓟꓽ ꓙꓳ ꓡꓺꓳ= ꓶꓻ ꓞꓹ ꓟ ꓤ ꓠꓱ ꓐꓬ ꓡꓰˍ ꓟˍ ꓟꓲ ꓟꓽ ꓙꓳ ꓡꓺꓳ꓾ ꓐꓯˍ ꓡꓳ꓾ ꓐꓰ ꓐꓯ ꓖꓶˍ ꓡꓳ= ꓬꓲ-ꓡꓲ-ꓫ ꓡꓰ ꓐꓯˍ ꓟˍ ꓡꓰ ꓐꓰ꓾ ꓖꓳ ꓕꓲ ꓠꓬꓲ ꓗꓪ ꓐꓰ ꓠꓬꓲꓸ ꓠꓬꓲ ꓗꓪ ꓛꓲ ꓬꓲꓻ ꓙꓬ ꓖꓳ ꓟ ꓠꓽ ꓫꓬ ꓡꓰꓳ= ꓟꓵꓽˍ ꓟꓲ ꓮ ꓘꓶꓸ ꓙꓲꓻ ꓡ ꓢꓲ ꓠꓬꓲ ꓔꓶ ꓜꓽ ꓔꓶ ꓓꓳˍ ꓟ ꓗꓪ ꓮ ꓟꓬꓹ ꓪꓴꓽ ꓡ ꓟꓴ ꓡˍ ꓡꓳ=

ꓖꓳ ꓡꓱ ꓢꓲ ꓟꓷ ꓠꓷꓹ ꓝ ꓒ ꓬꓲ-ꓡꓲ-ꓫ ꓠꓬ ꓞꓳ ꓤ ꓐꓴ ꓔꓯ ꓮ ꓘꓶꓸ ꓣꓱꓽ ꓙ ꓬꓰ ꓙˍ ꓟ ꓪꓴꓸ ꓠꓬꓲ ꓬꓲ ꓙꓰ ꓛꓲ ꓬꓰˍ ꓟ ꓗꓪ ꓞꓳ ꓤ ꓐꓴ ꓠꓬ ꓬꓲ ꓔꓯ ꓠꓲꓹ ꓠꓵˍ ꓡꓳ= ꓬꓲ ꓠꓬ ꓕꓲ ꓟꓵꓽ ꓡꓰ ꓕꓲ ꓟꓵꓽ꓾ ꓕꓲ ꓡꓳ ꓒꓱ ꓐꓰ ꓕꓲ ꓡꓳ ꓒꓱ ꓗꓪ ꓙꓰ ꓢꓲ ꓪꓴ-ꓢ ꓐꓯ ꓘꓶꓽ ꓚ ꓟꓸ ꓖꓶ ꓢꓲ ꓑ ꓫꓬ ꓐꓴ ꓔꓯ ꓐ ꓡꓹ ꓕ ꓑꓳꓸꓼ ꓬꓰ ꓙˍ ꓡꓳ=

ꓕꓲ ꓠꓬꓲ ꓙꓳˍ ꓕꓯ ꓫꓴ-ꓠ-ꓟꓲ ꓡꓳ ꓒꓱ ꓗꓪ ꓔꓬ ꓟ ꓞꓳ ꓐꓳ ꓟ ꓕꓲ ꓣꓳ ꓠꓬ ꓬꓲ-ꓡꓲ-ꓫ ꓡꓰ ꓬꓲ ꓪ ꓔꓬ ꓟ ꓡꓳ ꓒꓱ ꓗꓪ ꓛꓲ ꓡ ꓟ ꓔꓯ ꓑ ꓙˍ ꓕꓯ ꓬꓲ ꓤ ꓖꓴ ꓔꓯ ꓬꓲ-ꓡꓲ-ꓫ ꓐꓱ ꓶ ꓬꓲ ꓪ ꓦꓲ ꓪꓴꓸ ꓓꓵ ꓓꓰ ꓗꓪ ꓦꓲ ꓗꓳꓹ ꓤ ꓕꓲ ꓟ ꓫꓬꓹ ꓖꓶ ꓠꓹ ꓟ꓾ ꓐꓯ ꓖꓶˍ ꓡꓳ=  ꓬꓲ-ꓡꓲ-ꓫ  ꓠꓬ ꓫꓴ-ꓠ-ꓟꓲ ꓡꓳ ꓒꓱ ꓗꓪ ꓛꓲ ꓬꓰˍ ꓕꓯ ꓞꓳ ꓐꓳ ꓟ ꓠꓬ ꓬꓲ-ꓡꓲ-ꓫ ꓔꓯ ꓠꓲꓹ ꓒꓵꓽ ꓠꓲꓹ ꓡꓱ ꓘꓳꓹ ꓣꓴ ꓢꓲ ꓬꓲ ꓪ ꓐꓴ ꓦꓲ ꓪꓴꓸ ꓓꓵ ꓗꓪ ꓟ ꓦꓲ ꓗꓳꓹ ꓗꓪ ꓠꓽ ꓝꓲˍ ꓡꓳ=

ꓬꓲ-ꓡꓲ-ꓫ ꓠꓬ ꓞꓳ ꓐꓳ ꓟ ꓬꓲ ꓔꓯ ꓬꓰ ꓖꓶ ꓡˍ ꓟ ꓕꓯꓽ ꓢꓲ ꓗꓪ ꓮ ꓘꓶꓸ ꓫ ꓟꓳˍ ꓡꓳ= ꓖꓳ ꓡꓱ ꓠꓬꓲ ꓬꓲ ꓔꓯ ꓣꓱꓽ ꓙ ꓢꓴ ꓔꓯ꓾ ꓥꓪ ꓠꓬ ꓕꓱ ꓫꓱꓸ ꓤ ꓠꓲꓹ ꓙꓳˍ ꓟ ꓤ ꓟꓶ ꓤ ꓔꓯ ꓬꓰ ꓙ ꓠꓲꓹ ꓫꓵˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲ ꓠꓬ ꓮ ꓘꓶꓸ ꓐꓳˍ ꓟ ꓪꓴꓸ ꓠꓬꓲ ꓬꓲ ꓔꓯ ꓮ ꓫꓵꓽ ꓣꓱꓽ ꓞꓹ ꓟ ꓥꓪ ꓟꓽ ꓢꓷꓸ꓾ ꓐꓯ ꓖꓶˍ ꓡꓳ= ꓖꓳ ꓕꓯ ꓬꓲ ꓔꓯ ꓣꓱꓽ ꓙ ꓢꓴ ꓡꓰ꓾ ꓞꓳ ꓐꓳ ꓟ ꓕꓱ ꓟ ꓬꓲ ꓤ ꓖꓴ ꓠꓬ ꓞꓳ ꓟꓳꓽ ꓤ ꓥ ꓢꓲ꓾ ꓬꓲ ꓪ ꓔꓯ ꓤ ꓠꓱ ꓟꓽ ꓙꓳ꓾ ꓐꓰ ꓒꓳꓹ ꓖꓶˍ ꓡꓳ=

ꓖꓳ ꓟ ꓪꓴꓸ ꓠꓬꓲ ꓝꓮꓲ ꓕꓲ ꓠꓬꓲ ꓗꓪ ꓬꓲ-ꓡꓲ-ꓫ ꓡꓰ ꓞꓳ ꓐꓳ ꓟ ꓔꓯ ꓘꓴ ꓢꓲ ꓝꓮꓲ ꓕꓲ ꓘꓳꓼ ꓕꓱ ꓕꓲ ꓙꓵꓹ ꓗꓪ ꓬꓲ ꓡꓯ ꓖꓳꓼ ꓗꓪ ꓤ ꓠꓱ ꓕꓲ ꓣꓳ ꓔꓯꓹ ꓪ ꓡꓰˍ ꓥꓳ꓾ ꓐꓯ ꓖꓶˍ ꓡꓳ= 

ꓤ ꓟꓶ ꓤ ꓖꓳ ꓕꓲ ꓣꓳ ꓠꓬ ꓬꓲ-ꓡꓲ-ꓫ ꓟꓷ ꓠꓷ ꓝ ꓔ ꓟ ꓕꓲ ꓡꓰꓹꓼ ꓝꓮꓲ ꓕꓲ ꓘꓳꓼ ꓗꓪ ꓤ ꓕꓲ ꓣꓳ ꓦꓵꓻ ꓟꓶˍ ꓡꓳ= ꓤ ꓠꓱ ꓤ ꓪꓴꓽ ꓡ ꓗ ꓠꓯꓸ ꓕꓲ ꓠꓬꓲ ꓙꓳˍ ꓠꓬ꓾ ꓤ ꓠꓱ ꓤ ꓠꓽ ꓠꓻ ꓢꓲ ꓫꓵꓻꓳ= ꓖꓳ ꓡꓱ ꓠꓬꓲ ꓞꓳ ꓐꓳ ꓟ ꓡꓰ ꓫꓴ-ꓠ-ꓟꓲ ꓡꓳ ꓒꓱ ꓗꓪ ꓐꓰ ꓬꓲ-ꓡꓲ-ꓫ ꓔꓬ ꓟ ꓘꓹ-ꓟꓱ-ꓡꓱ ꓪꓽ ꓚꓲ ꓗꓪ ꓡ ꓢꓲ ꓬꓲ ꓤ ꓫꓵꓻ ꓗꓷ ꓟ ꓓꓳꓽ ꓐꓯ ꓖꓶ ꓡꓹ ꓡꓳ=

ꓬꓲ-ꓡꓲ-ꓫˍ ꓟꓲ ꓤ ꓟꓶ ꓤ ꓔꓯ ꓛꓳ ꓙꓰ ꓢꓲ ꓤ ꓠꓱ ꓤ ꓫꓵꓻ ꓟꓳ ꓗꓶ ꓔ ꓟ ꓬꓲꓼ ꓔ ꓗꓳꓹ ꓗꓪ ꓓꓵꓽ ꓙꓰ ꓢꓲ ꓪꓴ-ꓢ ꓔꓯ ꓪꓽ ꓘꓴˍ ꓡꓳ= ꓖꓳ ꓗ ꓠꓯꓸ ꓤ ꓠꓱ ꓤ ꓟꓷ ꓠꓷꓹ ꓗꓪ ꓢꓯꓼ ꓧꓳꓽ ꓖꓶ ꓗꓷ ꓠꓬꓲ ꓤ ꓠꓱ ꓤ ꓠꓬ ꓞꓼ ꓐꓰ ꓮ-ꓛꓲꓴꓸ꓾ ꓮ ꓛꓴꓲꓸ ꓐꓰ ꓗꓷ ꓡꓰ ꓠꓬ ꓟꓬ ꓢꓶꓽ ꓒꓴ ꓡꓺꓳ= ꓬꓲ-ꓡꓲ-ꓫ ꓡꓰ ꓤ ꓟꓶ ꓤ ꓔꓯ ꓠꓴ ꓕꓽ ꓥꓴꓻ꓾ ꓠꓴ ꓤ ꓠꓽ ꓢꓯꓸ ꓬꓲꓼ ꓡꓺꓳ꓾ ꓐꓰ ꓐꓯ ꓖꓶˍ ꓡꓳ=