ꓟꓷ ꓠꓷꓹ ꓝ ꓒ ꓬꓲ-ꓡꓲ-ꓫ ꓟꓸ ꓟꓲꓽ (2) ꓕꓱ

ꓟꓸ ꓟꓲꓽ ꓕꓱ ꓟ ꓠꓬ 2 ꓪ ꓔꓲ ꓕꓳ ꓶ 5ꓽ ꓗꓪ ꓟ ꓟꓷ ꓠꓷ ꓝ ꓒ ꓬꓲ-ꓡꓲ-ꓫ ꓡꓰ ꓫꓲ-ꓡꓲ-ꓬ ꓟꓯꓼ ꓢꓲꓽ ꓒ ꓠꓰ-ꓬ-ꓟꓷ ꓔꓯ ꓓꓲꓻˍ ꓟ ꓔ ꓟ ꓩꓴꓸ ꓓꓻ ꓡꓰ ꓝꓲˍ ꓟ ꓟꓸ ꓟꓲꓽ ꓥ ꓡꓳ=

ꓫꓲ-ꓡꓲ-ꓬ ꓐꓰ ꓬꓲ-ꓢꓷ-ꓡꓰ ꓐꓴ ꓠꓬꓲꓽ ꓗꓴꓸ ꓝꓸꓼ ꓗꓪ ꓟꓯꓼ ꓓꓶꓽ ꓡꓯ ꓘꓳꓹ ꓕꓯ ꓫꓲ-ꓡꓲ-ꓬ ꓟꓯꓼ ꓜꓴꓻ ꓗꓪ ꓮ ꓘꓶꓸ ꓓꓹ ꓟ ꓟꓯꓼ ꓢꓲꓽ ꓒ ꓓꓽ ꓟ ꓕꓲ ꓣꓳ ꓙꓳˍ ꓡꓳ= ꓬꓲ ꓔꓯ ꓟꓬ ꓠꓰ-ꓬ-ꓟꓷ ꓐꓰ ꓟꓬꓱ ꓔ ꓡꓳ= ꓠꓰ-ꓬ-ꓟꓷ ꓡꓰ ꓬꓰ ꓙˍ ꓟ ꓪꓴꓸ ꓠꓬꓲ ꓫꓲ-ꓡꓲ-ꓬ ꓐꓴ ꓠꓬ ꓬꓲ-ꓢꓷ-ꓡꓲ ꓟꓵꓽ ꓘꓶꓽ ꓗꓪ ꓟ ꓡꓳ ꓒꓱ ꓐꓴ ꓔꓯ ꓓꓶꓽ ꓧꓪꓸ ꓡꓰꓳ= ꓬꓲ ꓪ ꓠꓬ ꓬꓲ ꓪ ꓟꓳˍ ꓟ ꓒꓵꓽ ꓡꓳ ꓐꓰ ꓚꓳ ꓑ ꓣꓱꓽ ꓝꓲ ꓠꓹ ꓟ ꓞꓳ ꓤ ꓮ ꓙꓵꓽ ꓔꓯ ꓡꓳꓽ ꓔꓯꓹ ꓙꓰˍ ꓡꓳ= ꓬꓲ ꓪ ꓐꓴ ꓡꓳꓽ ꓔꓯꓹ ꓙꓰˍ ꓟ ꓘꓴꓽ ꓗꓪ ꓤ ꓟꓶ ꓡꓯꓸ ꓤ ꓕꓲ ꓣꓳ ꓔꓯ ꓠꓬ ꓟꓯꓼ ꓢꓲꓽ ꓒ ꓠꓰ-ꓬ-ꓟꓷ ꓤ ꓟꓶ ꓔꓯ ꓣꓱꓽ ꓙ ꓢꓴ ꓬꓰ ꓝꓲˍ ꓡꓳ=

ꓕꓲ ꓠꓬꓲ ꓙꓳˍ ꓕꓯ ꓠꓰ-ꓬ-ꓟꓷ ꓠꓬ ꓓꓻ ꓡꓰ ꓫ ꓟ ꓔ ꓟꓼ ꓩꓴꓸ ꓕꓲ ꓫꓵꓽ ꓓꓲꓻˍ ꓡꓳ= ꓠꓯ ꓞꓲꓼ ꓫꓬꓹ ꓢꓴ ꓐꓴˍ ꓟꓲ ꓔ ꓟꓼ ꓩꓴꓸ ꓓꓲꓻˍ ꓟ ꓔꓯ ꓫꓬꓹ ꓖꓶ ꓟꓽ ꓐ ꓡ= ꓖꓳ ꓡꓱ ꓠꓬꓲ ꓠꓰ-ꓬ-ꓟꓷ ꓠꓬ ꓮ ꓘꓶꓸ ꓠꓲꓹ ꓟ ꓫ ꓡꓳ= ꓠꓰ-ꓬ-ꓟꓷ ꓬꓲ ꓤ ꓟꓶˍ ꓟꓲ ꓬꓲ ꓤ ꓖꓴ ꓐꓱ ꓶ ꓮ ꓘꓶꓸ ꓠꓲꓹ ꓟ ꓫ ꓡꓳ=

ꓕꓲ ꓠꓬꓲ ꓗꓪ ꓬꓲ ꓪ ꓐꓴ ꓔꓯ ꓣꓱꓽ ꓙ ꓔꓬ ꓟ ꓤ ꓟꓶ ꓡꓯꓸ ꓠꓬ ꓬꓲ ꓢꓲ ꓟ ꓠꓲꓹ ꓟ ꓫꓸ ꓔꓬ ꓟ ꓔꓯ ꓟꓳ ꓡꓰ ꓠꓬ ꓥꓪ ꓦꓵꓻ ꓟꓵꓽ ꓗꓪ ꓬꓲ-ꓡꓲ-ꓫ ꓐꓰ ꓟꓬꓱꓺ ꓔ ꓟ ꓢꓲꓽ ꓫꓬ ꓢꓴ ꓕꓲ ꓣꓳ ꓔꓬ ꓡꓳ= ꓬꓲ ꓠꓬ ꓢꓷꓸ ꓡꓰ ꓓꓴ ꓓꓵꓽ ꓙ ꓮ’ ꓡꓰ ꓓꓴ ꓮ ꓟꓬꓹ ꓬꓰ ꓐ ꓡ ꓢꓴ ꓥ ꓟ ꓪꓴꓸ ꓠꓬꓲ ꓬꓲ ꓔꓯ ꓞꓳ ꓤ ꓮ ꓟꓬꓹ ꓢꓷꓸˍ ꓟ ꓥ ꓡꓳ= ꓥꓪ ꓢꓲꓺ ꓒ ꓠꓰ-ꓬ-ꓟꓷ ꓡꓰ ꓬꓲ-ꓡꓲ-ꓫ ꓔꓬ ꓗꓪ ꓙꓰˍ ꓠꓬ ꓬꓲ ꓡꓰ ꓠꓻ ꓫꓬꓹ ꓖꓶ ꓡꓹ ꓥꓳ꓾ ꓐꓯ ꓖꓶˍ ꓡꓳ= 

ꓖꓳ ꓡꓱ ꓠꓬꓲ ꓟꓯꓼ ꓢꓲꓽ ꓒ ꓬꓲ ꓤ ꓟꓶ ꓡꓰ ꓟꓯꓼ ꓢꓲꓽ ꓒ ꓔꓯ ꓬꓲ-ꓡꓲ-ꓫ ꓡꓰ ꓠꓻ ꓫꓬꓹ ꓖꓶ ꓐ ꓡ ꓟ ꓔꓯ ꓐꓯ ꓖꓶˍ ꓕꓯ ꓬꓲ ꓠꓬ ꓫꓲ-ꓡꓲ-ꓬ ꓪ ꓔꓲ ꓔꓯ ꓐꓯ ꓟꓸ ꓖꓶ ꓗꓷ ꓠꓬ꓾ ꓪ ꓔꓲ ꓡꓰ ꓟꓯꓼ ꓢꓲꓽ ꓒ ꓠꓰ-ꓬ-ꓟꓷ ꓐꓱ ꓶ ꓬꓲ-ꓢꓷ-ꓡꓰ ꓪ ꓔꓲ ꓔꓬ ꓗꓪ ꓕꓳ ꓶ ꓕꓲ ꓚꓴꓸ ꓐꓳ ꓖꓶˍ ꓡꓳ=

ꓬꓲ-ꓢꓷ-ꓡꓰ ꓪ ꓔꓲ ꓡꓰ ꓫꓲ-ꓡꓲ-ꓬ ꓟꓯꓼ ꓢꓲꓽ ꓒ ꓠꓰ-ꓬ-ꓟꓷ ꓓꓰꓽ ꓘꓶꓽ ꓔꓯ ꓬꓲ-ꓢꓷ-ꓡꓰ ꓪ ꓔꓲ ꓑ ꓙ ꓡꓰ ꓠꓬ ꓧꓶꓸ ꓕꓯ ꓥꓪ ꓟꓵꓽ ꓔꓯ ꓬꓲ ꓡꓰ ꓟꓯꓼ ꓓꓶꓽ ꓡꓯ ꓘꓳ ꓡꓹ ꓟ ꓥ ꓢꓲ꓾ ꓮ ꓟꓶ ꓠꓬ ꓬꓲ ꓥꓪ ꓔꓯ ꓡ ꓠꓲꓹ ꓫꓵˍ ꓐꓯ ꓡꓳ= ꓕꓱ ꓟ ꓠꓬ ꓟꓯꓼ ꓓꓶꓽ ꓡꓯ ꓘꓳ ꓚꓱꓹ ꓫꓬꓹ ꓔꓬ ꓟ ꓥꓳ꓾ ꓐꓰ ꓐꓯ ꓡꓳ= ꓓꓳꓽ ꓕꓱ ꓟ ꓔꓯ ꓬꓲ-ꓡꓲ-ꓫ ꓑ ꓙ ꓡꓰ ꓕꓯ ꓬꓲ-ꓡꓲ-ꓫ ꓡꓰ ꓬꓲ ꓔꓯ ꓗꓴꓷꓼ ꓘꓴꓽ ꓗꓪ ꓓꓵꓽ ꓡ ꓝꓲ ꓢꓲ ꓪꓴ-ꓢ ꓬꓲ ꓟꓷ ꓠꓷꓹ ꓝ ꓢꓴ ꓕꓱ ꓗꓪ ꓔꓬ ꓟ ꓟꓯꓼ ꓢꓲꓽ ꓒ ꓢꓷꓸ ꓡꓰ ꓝꓲ꓾ ꓐꓯ ꓖꓶˍ ꓡꓳ=  

ꓟꓯꓼ ꓢꓲꓽ ꓒ ꓬꓰ-ꓬ-ꓟꓷ ꓡꓰ ꓬꓲ-ꓡꓲ-ꓫ ꓦꓲ ꓗ ꓘꓶ ꓓꓴꓽ ꓗꓪ ꓛꓲ ꓡ ꓕꓯ ꓬꓲ-ꓡꓲ-ꓫ ꓡꓰ ꓚꓳ ꓑ ꓕꓲ ꓣꓳ ꓝꓲ ꓩꓴ ꓗꓷ ꓢꓲ ꓠꓴ ꓠꓬ ꓬꓳ-ꓔ ꓬꓲꓽ ꓟ ꓗꓪ ꓫꓵꓽ ꓧꓪꓹ ꓞꓲꓽ ꓬꓰ= ꓖꓳ ꓡꓱ ꓠꓬ ꓠꓴ ꓓꓻ ꓡꓰˍ ꓥꓳ꓾ ꓐꓰ ꓐꓯ ꓖꓶ ꓬꓰ ꓝꓲˍ ꓡꓳ= ꓖꓳ ꓡꓱ ꓥˍ ꓟꓲ ꓠꓰ-ꓬ-ꓟꓷ ꓠꓽ ꓮ ꓘꓶꓸ ꓠꓲꓹ ꓟ ꓦꓶ ꓡꓰ ꓢꓲ ꓬꓲꓻ ꓙꓬ ꓗꓪ ꓞꓲꓽ ꓗꓷ ꓕꓲ ꓖꓼ ꓔ ꓟ ꓩꓴꓸ ꓓꓲꓻˍ ꓟ ꓓꓻ ꓡꓰ ꓓ ꓡꓳ ꓫꓵꓽ ꓥ ꓠꓬ꓾ ꓥꓪ ꓠꓽ ꓫꓲ-ꓡꓲ-ꓬ ꓟꓵꓽ ꓗꓪ ꓟ ꓷ-ꓐ-ꓠˍ ꓐꓰ ꓒ-ꓣꓱ-ꓒ ꓬꓲꓻ ꓙꓬ ꓠꓬꓲꓽ ꓓꓴꓽ ꓠꓬ ꓬꓲ-ꓢꓷ-ꓡꓰ ꓟꓵꓽ ꓗꓪ ꓟ ꓬꓲꓻ ꓙꓬ ꓕꓯꓽ ꓢꓲ ꓙꓲˍ ꓡꓳ ꓟꓽ ꓥ ꓡ= ꓖꓳ ꓗꓪ ꓥꓪ ꓖꓳ ꓓꓱ ꓞꓲꓽˍ ꓠꓬ ꓪ ꓜꓲ ꓫꓬ ꓡꓰˍ ꓥꓳ ꓟꓽ ꓥ ꓡ? ꓐꓯ ꓢꓲ ꓬꓲ ꓠꓲꓹ ꓟ ꓦꓶ ꓠꓬꓲ ꓐꓰ ꓔꓲꓸ ꓒꓳꓹ ꓢꓲ ꓙꓰˍ ꓡꓳ=

ꓖꓳ ꓕꓯ ꓠꓰ-ꓬ-ꓟꓷ ꓚꓳ ꓑꓸ ꓡꓰ꓾ ꓥꓪ ꓢꓲꓺ ꓒꓽꓳ꓾ ꓠꓴ ꓓꓻ ꓡꓰ ꓠꓲꓹ ꓫꓵˍ ꓠꓬ ꓟꓷ ꓠꓷꓹ ꓝ ꓢꓴ ꓡꓰ ꓬꓰ ꓝꓲˍ ꓟ ꓔꓯ ꓬꓰ ꓠꓯꓹ ꓡꓳ ꓟꓽ ꓥ ꓡ? ꓐꓯ ꓖꓶˍ ꓡꓳ= ꓖꓳ ꓡꓱ ꓠꓬꓲ ꓠꓰ-ꓬ-ꓟꓷ ꓬꓯꓼ ꓙꓰ ꓢꓲ ꓬꓲ-ꓡꓲ-ꓫ ꓐꓯˍ ꓟˍ ꓡꓰ ꓐꓰ ꓬꓳ-ꓔ ꓬꓲꓽ ꓟ ꓗꓪ ꓫꓵꓽ ꓧꓪꓹ ꓔꓲꓹ ꓗꓷ ꓠꓬ ꓔ ꓟꓼ ꓩꓴꓸ ꓫꓬ ꓡꓰ ꓢꓲ꓾ ꓬꓲ ꓗꓴ ꓙꓲꓻ ꓠꓬ ꓞꓳ ꓡꓯꓸ ꓗꓴ ꓙꓲꓻˍ ꓐꓰ ꓐꓰ ꓗꓷ ꓡꓰꓳ=

ꓠꓰ-ꓬ-ꓟꓷ ꓡꓰ ꓕꓱ ꓟ ꓠꓬ ꓓꓵꓽ ꓙ ꓮ’ ꓡꓰ ꓓꓴ ꓕꓲ ꓫꓵꓽ ꓢꓷꓸ ꓡꓰ ꓓꓴ ꓕꓲ ꓫꓵꓽ ꓥ ꓢꓲ꓾ ꓪꓴ-ꓢ ꓠꓬ ꓬꓲ-ꓢꓷ-ꓡꓰ ꓗꓪ ꓔꓬ ꓟ ꓥ ꓐꓷ꓾ ꓐꓰ ꓐꓯ ꓡꓳ=