ꓪꓳꓽ ꓔꓳ ꓙꓴ ꓐꓲ ꓞꓹ ꓟ ꓡꓳꓻ ꓖꓳ

ꓬꓲ-ꓢꓷ-ꓡꓰ ꓐꓴ ꓠꓬ ꓪꓴ-ꓢ ꓔꓯ ꓮ ꓟꓬꓹ ꓘꓳꓼ ꓒꓳꓹ ꓔꓳ ꓢꓲ ꓠꓲꓽ ꓐꓬꓱꓽ ꓢꓲꓺ ꓐꓬꓱꓽ ꓐꓴ ꓔꓯ ꓦ ꓡꓱˍ ꓟ ꓪꓴꓸ ꓠꓬꓲ ꓪꓴ-ꓢ ꓡꓰ ꓬꓲ-ꓢꓷ-ꓡꓰ ꓞꓳ ꓫꓵꓽ ꓐꓴ ꓔꓯ ꓐ-ꓐꓲ-ꓡꓶ ꓚꓳ ꓑ ꓣꓱꓽ ꓝꓲ ꓗꓷꓳ= ꓦꓬꓼ ꓠꓬꓲ ꓖꓳ ꓟ ꓗꓪ ꓢꓲ ꓫꓬ ꓦꓲ ꓐꓴ꓾ ꓬꓲ ꓪ ꓔꓬ ꓟ ꓟꓵꓽ ꓐꓰ ꓗꓴꓷꓼ ꓐꓴ ꓠꓬ ꓐꓶꓽ ꓒ ꓐꓴ ꓡꓰ ꓣꓴ ꓔꓯꓹ ꓙꓰꓳ= ꓖꓳ ꓕꓲ ꓙꓵꓹ ꓗꓪ ꓪꓴ-ꓢ ꓠꓬ ꓬꓲ-ꓫꓲ-ꓚꓰ ꓐꓰ ꓟꓬꓱ ꓔ ꓟ ꓟꓷꓽ ꓠꓷꓹ ꓝ ꓒ ꓔꓯ ꓓꓵꓽ ꓙ ꓮ’ ꓡꓰ ꓓꓴ ꓦ ꓐꓬꓱꓽ ꓕꓲ ꓟ ꓟꓳꓸ ꓖꓶˍ ꓡꓳ=

ꓬꓲ-ꓫꓲ-ꓚꓰ ꓟꓳˍ ꓟ ꓦ ꓐꓬꓱꓽ ꓘꓴꓽ ꓗꓪ ꓪꓴ-ꓢ ꓬꓲ ꓦ ꓠꓬ ꓬꓲ ꓔꓯ ꓪꓳꓽ ꓔꓳ ꓙꓴˍ ꓡꓰꓽ ꓐꓲ ꓞꓹ ꓟ ꓡꓳꓻ ꓖꓳ ꓕꓲ ꓟ ꓗꓪ ꓧꓳꓽ ꓓꓳ ꓙꓰˍ ꓡꓳ=

ꓪꓴ-ꓢ ꓡꓰ ꓬꓲ ꓔꓯ ꓡ ꓞꓳ ꓮ ꓐꓲꓳ꓾ ꓪꓳꓽ ꓔꓳ ꓕꓱ ꓟꓬ ꓟ ꓠꓬ ꓢꓯꓸ ꓡ ꓗꓴꓸˍ ꓡ? ꓐꓰ ꓠ ꓠꓬꓲˍ ꓡꓳ= ꓖꓳ ꓕꓯ ꓬꓲ-ꓫꓲ-ꓚꓰ ꓡꓰ  ꓟꓴ ꓡꓳꓹ ꓬꓰ ꓟ ꓢꓲ ꓒ ꓪꓴ-ꓢꓺꓳ꓾ ꓠꓴ ꓢꓷꓸˍ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ= ꓖꓳ ꓕꓯ ꓪꓴ-ꓢ ꓡꓰ ꓬꓲ-ꓫꓲ-ꓚꓰ ꓔꓯ ꓙꓴꓺ ꓡꓰ ꓟ ꓪꓳꓽ ꓔꓳꓺꓳ꓾ ꓪꓴ-ꓢ ꓐꓯ ꓘꓶ ꓔꓯ ꓠ ꓠꓹ= ꓠꓴ ꓪ ꓔꓯ ꓟꓳ ꓡꓳꓹ ꓬꓰ ꓟ ꓢꓲ ꓒꓽ ꓪꓴ-ꓢ ꓥꓪ ꓡꓰ ꓢꓯꓼ ꓦ ꓧꓳꓽ ꓖꓶ ꓢꓲ ꓢꓯꓸ ꓡ ꓝꓲˍ ꓥꓳ= ꓬꓲ ꓙꓴꓽ ꓠꓳꓽ ꓖꓶ ꓢꓲ ꓧꓪꓽ ꓓꓱꓼ ꓡ ꓝꓲˍ ꓥꓳ= ꓢꓯꓼ ꓦ ꓧꓳꓽ ꓖꓶ ꓢꓲ ꓢꓯꓸ ꓡ ꓝꓲ ꓠꓬ꓾ ꓥꓪ ꓠꓽ ꓪꓴ-ꓢ ꓥ ꓟ ꓠꓴ ꓪ ꓢꓷꓸ ꓡꓰˍ ꓥꓳ꓾ ꓐꓰ ꓐꓯ ꓢꓲ ꓟꓷꓽ ꓠꓷꓹ ꓝ  ꓖꓶ ꓠꓹ ꓟ ꓐꓯ ꓖꓶˍ ꓡꓳ=

ꓖꓳ ꓡꓱ ꓠꓬꓲ ꓬꓲ-ꓫꓲ-ꓚꓰ ꓠꓬ ꓪꓴ-ꓢ ꓕꓵꓼ ꓪ ꓖꓶ ꓡˍ ꓟ ꓡꓰ ꓟꓷ ꓠꓷꓹ ꓝ ꓗꓷꓳ= ꓖꓳ ꓡꓱ ꓟꓷ ꓠꓷꓹ ꓝ ꓗꓷ ꓓꓳ ꓡꓰ ꓕꓯ ꓡꓳ ꓖꓳ ꓖꓳ ꓟ ꓗꓪ ꓢꓯꓼ ꓓꓽ ꓟ ꓐꓵ ꓡ ꓢꓲ꓾ ꓬꓲ ꓡꓳꓸ ꓠꓬꓲ ꓔꓬ ꓕꓯ ꓪꓳꓽ ꓔꓳ ꓠꓬ ꓚꓲ ꓡꓲ ꓗꓼ ꓡꓼ ꓝꓸ ꓡꓯ ꓘꓳ ꓡꓰˍ ꓡꓳ= ꓪꓳꓽ ꓔꓳ ꓗꓪ ꓬꓲ ꓙꓴꓽ ꓠꓳꓽ ꓠꓬꓲ꓾ ꓬꓲ ꓧꓪꓽ ꓓꓱꓼ ꓠꓬꓲ꓾ ꓬꓲ ꓗꓴꓹ ꓙꓲˍ ꓟꓲ ꓙꓳ ꓡˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲ ꓪ ꓠꓯꓸꓼ ꓗꓪ ꓦ ꓢꓯꓼ ꓠꓽ ꓟꓽ ꓓꓯꓹ=

ꓖꓳ ꓗ ꓠꓯꓸ ꓪꓴ-ꓢ ꓡꓰ ꓬꓲ-ꓫꓲ-ꓚꓰ ꓔꓯ ꓟꓴ ꓡꓳꓹ ꓬꓰ ꓟ ꓢꓲ ꓒꓽ ꓪꓴ-ꓢ ꓡꓰ ꓡꓲ ꓛꓱꓽ ꓟ ꓟꓲꓽ ꓦꓲ ꓠꓴ ꓪ ꓙꓱꓼ ꓡ ꓢꓲ ꓠꓬꓲ ꓫꓵꓻ ꓟꓳ ꓕꓱ ꓟ ꓢꓯꓸ ꓡ ꓠꓹ ꓟ ꓢꓯꓼ ꓦ ꓧꓳꓽ ꓖꓶ꓾ ꓐꓯ ꓢꓲ ꓟꓷ ꓠꓷꓹ ꓝ ꓠꓹ ꓟ ꓕꓵꓼ ꓪ ꓖꓶˍ ꓡꓳ= ꓬꓲ-ꓫꓲ-ꓚꓰˍ ꓟꓲ ꓪꓴ-ꓢ ꓕꓵꓼ ꓪ ꓖꓶˍ ꓟ ꓡꓰ ꓟꓷ ꓠꓷꓹ ꓝ ꓗꓷ ꓠꓬ ꓬꓲ ꓪ ꓠꓯꓸꓼ ꓗꓪ ꓦ ꓓꓴ ꓢꓯꓼ ꓓꓵꓽ ꓡꓰ ꓢꓲ꓾ ꓢꓯꓸ ꓡ ꓢꓲ ꓠꓬꓲ ꓟꓯꓼ ꓜꓴ ꓓꓽ ꓟ ꓕꓲ ꓜꓴꓻ ꓒꓬꓱꓼ ꓡꓺꓳ=

ꓖꓳ ꓕꓯ ꓪꓴ-ꓢ ꓡꓰ ꓬꓲ-ꓫꓲ-ꓚꓰ ꓔꓯ ꓡ ꓞꓳ ꓮ ꓐꓲꓳ꓾ ꓬꓲ-ꓢꓷ-ꓡꓰ ꓐꓴ ꓠꓬ ꓪꓳꓽ ꓔꓳ ꓙꓴ ꓕꓱ ꓕꓷˍ ꓡꓰ ꓐꓰ ꓗꓹ ꓡꓳ= ꓬꓲ ꓪ ꓡꓰ꓾ ꓥꓪ ꓠꓴꓽ ꓠꓬ ꓙꓴꓺ ꓡꓰꓳ꓾ ꓮ ꓫꓵꓽ ꓥꓳ ꓡꓳꓸ ꓓꓴ ꓟꓽ ꓙꓳꓻꓳ= ꓥꓪ ꓠꓴꓽ ꓔꓯ ꓠꓬ ꓡꓳ ꓒꓰꓹꓳ꓾ ꓐꓯ ꓡꓳ=

ꓝꓮꓲ ꓪꓴ-ꓢ ꓡꓰ ꓬꓲ-ꓫꓲ-ꓚꓰ ꓔꓯ ꓬꓲ-ꓢꓷ-ꓡꓰ ꓐꓴ ꓔꓯ ꓟꓷ ꓠꓷꓹ ꓝ ꓘꓶꓽ ꓖꓶ ꓝꓲˍ ꓟ ꓠꓬ ‘ꓥꓪ ꓑ ꓫꓬꓼ ꓐꓴꓳ꓾ ꓥꓪ ꓡꓰ ꓠꓴ ꓪ ꓡꓱꓼ ꓜꓴ ꓒꓴ ꓗꓷ ꓢꓲ꓾ ꓠꓴ ꓪ ꓔꓯ ꓢꓯꓸ ꓡ ꓝꓲ ꓢꓲ ꓠꓬꓲ ꓾ꓬꓲ-ꓢꓷ-ꓡꓰ ꓟꓵꓽ ꓗꓪ ꓠꓴ ꓪ ꓔꓯ ꓧꓳꓽ ꓬꓲꓼ ꓙꓰˍ ꓥꓳ= ꓥꓪ ꓡꓰ ꓠꓴ ꓪ ꓠꓯꓸꓼ ꓗꓪ ꓢꓯꓼ ꓦ ꓧꓳꓽ ꓖꓶ ꓢꓲ ꓠꓴ ꓪ ꓔꓯ ꓢꓯꓸ ꓡ ꓝꓲ ꓢꓲ ꓠꓬꓲ꓾ ꓠꓴ ꓪ ꓚꓲ ꓛꓬ ꓟꓵꓽ ꓗꓪ ꓧꓳꓽ ꓛꓲ ꓬꓰˍ ꓕꓯ꓾ ꓪꓴ-ꓢ ꓥꓪ ꓠꓬ ꓙ ꓟꓳ ꓔ ꓟ ꓔꓯ ꓬꓰ ꓐꓲ ꓡꓰ ꓝꓲ ꓢꓴ ꓥ ꓟ ꓠꓴ ꓢꓷꓸ ꓡꓰˍ ꓥꓳ= ꓕꓱ ꓟ ꓠꓬ ꓪꓴ-ꓢ ꓥꓪ ꓐꓯ ꓘꓶ ꓥꓳ꓾ ꓐꓰ ꓐꓯ ꓖꓶ ꓬꓰ ꓝꓲˍ ꓡꓳ=

Add new comment

6 + 7 =