ꓫꓬꓹ ꓦꓵꓽ ꓟ ꓟꓸ ꓟꓲꓽ

            ꓟꓸ ꓟꓲꓽ ꓕꓱ ꓟ ꓬꓳ-ꓦ 3ꓽ3-21 ꓗꓪ ꓟꓸ ꓟꓲꓽ ꓥ ꓡꓳ= ꓒ-ꓡꓲ-ꓢꓷ ꓡ ꓞꓳ ꓠꓲ-ꓗꓳ-ꓓꓲ-ꓟꓴ ꓐꓰ ꓟꓬꓱ ꓔ ꓟ ꓞꓳ ꓔꓲ ꓕꓲ ꓣꓳ ꓔꓯ ꓟꓲ ꓠꓯ ꓡ ꓞꓳ ꓮ ꓟ ꓥ ꓟꓲ ꓪꓴ-ꓢ ꓗꓴꓷꓼ ꓗꓪ ꓛꓲ ꓬꓰ ꓠꓹ ꓟ ꓟꓬ-ꓸ ꓬꓲ ꓙꓬ ꓐꓰ ꓦ ꓡꓰ ꓫꓬꓹ ꓦꓵꓽ ꓠ ꓗ ꓡꓳ ꓐꓰ ꓒꓴ ꓒꓴ ꓡꓯꓽ ꓡꓯꓽ ꓢꓲ-ꓒ ꓬꓰ-ꓢꓴ ꓡꓰ ꓐꓯ ꓟꓸ ꓖꓶ ꓗꓷꓳ= ꓠꓲ-ꓗꓳ-ꓓꓲ-ꓟꓴ ꓠꓬ ꓟꓸ ꓟꓲ ꓕꓱ ꓟ ꓔꓯ ꓬꓲꓹ ꓙ ꓜꓲꓼ ꓟꓽ ꓐ ꓡ ꓠꓬꓲ ꓞꓳ ꓤ ꓠꓬ ꓞꓲꓼ ꓪꓴꓽ ꓡꓰ ꓕꓯ ꓮ ꓡꓰ ꓐꓰ ꓫꓬꓹ ꓦꓵꓽ ꓐ ꓡ ꓐꓰ ꓠ ꓠꓬꓲ_ ꓡꓳ= ꓬꓰ-ꓢꓴ ꓠꓬ ꓧꓪ ꓡꓰ ꓦꓵꓽ ꓔ ꓟ ꓠꓬ ꓧꓪ ꓥ ꓡꓳ= ꓦ ꓡꓰ ꓦꓵꓽ ꓔ ꓟ ꓠꓬ ꓦ ꓥ ꓡꓳ= ꓖꓳ ꓡꓱ ꓠꓬꓲ ꓪꓴ-ꓢ ꓗꓴꓷꓼ ꓓꓽ ꓟꓶ ꓠꓹ ꓟ ꓛꓲ ꓠꓹ ꓟ ꓠꓬ ꓟꓲ ꓠꓯ ꓡ ꓞꓳ ꓮ ꓟ ꓥ ꓟꓲ ꓟꓴ ꓗꓪ ꓗꓪ ꓟ ꓪꓴ-ꓢ ꓑ ꓫꓬꓼ ꓘꓳꓹ ꓣꓴ ꓶ ꓠꓹ ꓟ ꓫꓬꓹ ꓦꓵꓽ ꓠ ꓗ_ ꓡꓳ= ꓬꓰ-ꓢꓴ ꓐꓯ ꓘꓶꓽ ꓕꓱ ꓟ ꓗꓪ ꓮ ꓟ ꓥ ꓟꓲ ꓫꓬꓹ ꓦꓵꓽ ꓠ ꓗ ꓡꓳ= ꓐꓯ ꓟ ꓥꓳ=

            ꓬꓰ-ꓢꓴ ꓐꓯ ꓘꓶꓽ ꓕꓱ ꓟ ꓗꓪ ꓞꓲꓼ ꓪꓴ ꓢꓴ ꓣꓳ ꓢꓴ ꓟꓽ ꓐꓱ ꓒꓯꓼ ꓔ ꓟꓲ ꓠꓯ ꓡ ꓞꓳ ꓮ ꓟ ꓥ ꓟꓲ ꓪꓴꓽ ꓪꓴꓽ ꓣꓳ ꓣꓳ ꓮ ꓙꓵꓽ ꓫꓬꓹ ꓦꓵꓽ ꓢꓴ ꓢꓲ ꓪꓴ-ꓢ ꓗꓴꓷꓼ ꓛꓲ ꓬꓰ ꓥꓳ= ꓐꓯ ꓟ ꓐꓯ ꓘꓶꓽ ꓠꓽ ꓬꓳꓹ ꓚꓲ_ ꓟ ꓐꓯ ꓘꓶꓽ ꓥ ꓟ ꓚꓲꓸ ꓔ ꓡꓯ= ꓖꓳ ꓡꓱ ꓠꓬꓲ ꓮ ꓡꓰ ꓐꓰ ꓫꓬꓹ ꓦꓵꓽ ꓠ ꓔ ꓟ ꓝꓮꓲ ꓠ ꓠꓹ ꓡꓯ= ꓮ ꓡꓰ ꓐꓰ ꓫꓬꓹ ꓦꓵꓽ ꓠꓹ ꓟ ꓔꓯ ꓬꓰ-ꓢꓴ ꓫꓵꓸꓸ ꓟ ꓗꓪ ꓐꓰ ꓝꓮꓲ ꓢꓯꓸ ꓬꓲꓼ ꓡ ꓗꓸ ꓠꓯ ꓬꓲꓸ ꓝꓲ ꓓꓴ ꓐꓴ ꓔꓯ ꓙꓵꓽ ꓪ ꓖꓶ ꓟ ꓐꓰ ꓮ ꓡꓰ ꓐꓰ ꓫꓬꓹ ꓦꓵꓽ ꓖꓶꓽ ꓠꓹ ꓟ ꓟꓬꓱꓽ ꓐꓱꓽ ꓘꓶꓽ ꓟꓸ ꓖꓶ ꓔ ꓟ ꓥꓳ=

        ꓖꓳ ꓡꓱ ꓠꓬꓲ ꓡ ꓞꓳ ꓔꓯ ꓫꓬꓹ ꓦꓵꓽ ꓖꓶ ꓟ ꓖꓳ ꓓꓱꓽ ꓔꓲ ꓖꓶ ꓕꓯ ꓐꓹ ꓐ ꓮ ꓐꓲ ꓢꓲ-ꓫꓬ-ꓟ-ꓦ ꓟꓬꓱ ꓗꓪ ꓐꓰ ꓖꓳ ꓓꓱ ꓔꓲ ꓖꓶꓽ ꓫꓬꓹ ꓦꓵꓽ ꓟ ꓚꓱꓹ ꓕꓱ ꓟ ꓗꓪ ꓬꓰ-ꓢꓴ ꓐꓯ ꓘꓶꓽ ꓔꓯ ꓐꓲ ꓜꓲꓼ ꓡꓰ ꓠꓹ ꓟ ꓣꓳ ꓧꓪꓹ ꓛꓲꓽ ꓓꓴ ꓬꓲ ꓓꓽ ꓟ ꓠꓬ-ꓸ

1ꓸ ꓠꓲ-ꓗꓴ-ꓓꓲ-ꓟꓴ ꓔꓯ ꓝꓮꓲ ꓫꓬꓹ ꓦꓵꓽ ꓟ ꓚꓱꓹ ꓔꓯ ꓟꓳꓸ ꓬꓰ-ꓢꓴ ꓐꓯ ꓘꓶꓽ ꓗꓪ ꓖꓳ ꓓꓱꓽ ꓔꓲ ꓠꓹ ꓟ ꓗꓪ ꓡ ꓞꓳ ꓪꓴꓽ ꓪꓴꓽ ꓣꓳ ꓣꓳ ꓟꓽ ꓐꓱ ꓒꓯꓽ ꓔ

2ꓸ ꓖꓳ ꓓꓱꓽ ꓔꓲ ꓖꓶ ꓕꓯ (ꓞꓲꓽ ꓫꓬ ꓖꓶ ꓕꓯ) ꓔꓲ ꓖꓶ ꓢꓴ ꓠꓬ ꓐꓹ ꓐ ꓤ ꓔꓲ ꓢꓲ-ꓫꓬ-ꓟ-ꓦ ꓟꓬꓱ ꓗꓪ ꓐꓰ ꓢ-ꓣꓳ ꓲ ꓖꓳ ꓓꓱ ꓟꓬꓱ ꓟꓽ ꓞꓶ ꓟꓽ ꓓ ꓟ ꓥꓳ=

3ꓸ ꓘꓴ ꓜꓲꓼ ꓞꓳ ꓕꓲ ꓟ ꓟ ꓗꓪ ꓬꓰ-ꓢꓴ ꓟꓬꓱ ꓗꓪ ꓐꓰ ꓕꓲ ꓣꓳ ꓟꓬꓱ ꓡꓰ ꓞꓶ ꓢꓲ ꓖꓳ ꓓꓱ ꓔꓲ ꓖꓶ ꓢꓴ ꓙꓳ ꓡꓳ= ꓕꓱ ꓡꓱ ꓬꓰ ꓠꓬ ꓬꓰ-ꓢꓴ ꓐꓯ ꓘꓶꓽ ꓕꓵꓽ ꓪ ꓔꓯ ꓟꓽ ꓜꓯ ꓧꓳꓼ ꓡꓰ ꓠꓬꓲ ꓟꓽ ꓐꓲ ꓜꓲꓼ ꓡꓰ ꓠꓬꓲ ꓘꓳꓹ ꓣꓴ ꓢꓴ ꓚꓲ ꓚꓲ ꓫꓬꓹ ꓦꓵꓽ ꓟꓶ ꓡꓰꓳ ꓐꓰ ꓦ ꓡꓱ ꓟꓽ ꓓ ꓣꓳ ꓧꓪꓹ ꓛꓲꓽ ꓡꓯ=