ꓔꓶꓻ ꓙꓱꓼ ꓙꓳˍ ꓕꓯ ꓢꓲ ꓧꓪꓸ ꓡꓰ ꓓꓴ ꓔꓯ ꓘꓳꓹ ꓣꓴ ꓟꓶ ꓡ ꓥꓳ=

ꓔꓶꓻ ꓙꓱꓼ ꓙꓳˍ ꓕꓯ ꓢꓲ ꓧꓪꓸ ꓡꓰ ꓓꓴ ꓔꓯ ꓘꓳꓹ ꓣꓴ ꓟꓶ ꓡ ꓥꓳ

ꓮ ꓫꓵ ꓟꓬꓱꓽ ꓬꓰ ꓥˍ ꓟꓲ ꓔꓶꓻ ꓙꓱꓼ ꓚꓬꓹ ꓢꓲ ꓟꓬꓱꓽ ꓬꓰ ꓢꓯꓼ ꓕꓵꓼ ꓕꓯ ꓢꓲ ꓧꓪꓸ ꓡꓰ ꓓꓴ ꓔꓯ ꓘꓳꓹ ꓣꓴ ꓟꓶ ꓡ ꓥꓳ=  ꓬꓲ ꓔꓶꓻ ꓙꓱꓼ ꓟꓶ ꓡꓰ ꓠꓬ ꓮ ꓫꓵ ꓬꓰ ꓕꓯ ꓢꓲ ꓟꓬ ꓠꓬꓲ ꓙꓲ ꓥ ꓢꓶ ꓐꓰ ꓓꓵꓽ ꓙ ꓢꓲ ꓦꓬꓼ ꓠꓬꓲ ꓮꓽ ꓔꓳ ꓖꓴ ꓡꓰˍ ꓡꓳ=

ꓙ ꓖꓴ ꓗꓪ ꓡꓯꓽ ꓒꓯꓹ ꓠꓬꓲ ꓐ ꓟꓽ ꓙꓳˍꓟ ꓞꓳ ꓤ ꓕꓲ ꓣꓳ ꓓꓰꓽ ꓜ ꓔꓬ ꓟ ꓔꓯ ꓟꓳ ꓠꓬꓲ ꓪ= ꓥꓪ ꓔꓯ ꓬꓰ ꓙ ꓡꓯ꓾ ꓖꓶ ꓜ ꓡꓯ꓾ ꓐꓰ ꓐꓯ ꓟ ꓕꓯ ꓢꓲ ꓙ ꓖꓴ ꓗꓪ ꓘꓳꓽ ꓓꓳꓸꓹ ꓘꓳꓽ ꓢꓲ ꓠꓬꓲ ꓬꓲ ꓠꓯꓼ ꓗꓪ ꓙꓳˍ ꓟ ꓛꓲꓸꓹ ꓒꓯꓹ ꓗꓪ ꓐꓰ ꓮ ꓘꓶꓸ ꓡꓳꓸ ꓐꓲ ꓠ ꓕꓳꓽ ꓶ ꓐꓳ ꓢꓯꓸ ꓒꓬꓱꓽ ꓗꓪ ꓐꓰ ꓔꓯ ꓟꓸ ꓕꓱ ꓡꓱ ꓬꓰ ꓕꓯ ꓙ ꓖꓴ ꓗꓪ ꓙꓲ ꓢꓴ ꓐꓴ ꓥ ꓟꓲ ꓬꓲ ꓔꓯ ꓫꓸ ꓠꓬꓲ ꓤ ꓢꓲ ꓒꓴ ꓖꓶ ꓡꓳ=

ꓬꓲ ꓠꓬ ꓮ ꓫꓵ ꓪꓴꓸ ꓠꓬꓲ ꓛꓲꓸꓹ ꓒꓯꓹ ꓗꓪ ꓐꓰ ꓕꓳꓽ ꓶ ꓐꓳ ꓗꓴꓸ ꓔ ꓡ? ꓬꓲ ꓠꓯꓼ ꓗꓪ ꓢꓲ ꓠꓹ ꓟ ꓚꓱꓹ ꓟꓽ ꓙꓳ ꓡꓰ ꓟ ꓪꓴꓸ ꓠꓬꓲ ꓛꓲꓸꓹ ꓒꓯꓹ ꓗꓪ ꓐꓰ ꓕꓳꓽ ꓶ ꓐꓳ ꓠ ꓗꓷ ꓡꓰ ꓟ ꓥ ꓡꓳ= ꓬꓲ ꓔꓯ ꓬꓰ ꓙ ꓢꓴ ꓟꓽ ꓔꓬ ꓟ ꓪꓴꓸ ꓠꓬꓲ ꓬꓲ ꓚꓲ ꓛꓬ ꓬꓲ ꓦ ꓡꓱ ꓠ ꓗꓷ ꓡꓰ ꓟ ꓥ ꓡꓳ= ꓡꓯꓽ ꓒꓯꓹ ꓟꓽ ꓙꓳˍ ꓟ ꓪꓴꓸ ꓠꓬꓲ ꓙꓳ ꓟ ꓛꓲꓸꓹ ꓒꓯꓹ ꓕꓲ ꓟ ꓔꓯ ꓦ ꓡꓱ ꓢꓲ ꓦꓱꓼ ꓟ ꓐꓱ ꓶ ꓢꓯꓼ ꓕꓵꓼ ꓔꓬ ꓟ ꓥ ꓡꓳ= 

ꓬꓲ ꓠꓬ ꓛꓲꓸꓹ ꓒꓯꓹ ꓗꓪ ꓐꓰ ꓟꓬꓱꓽ ꓬꓰ ꓜ ꓓꓴ ꓥꓳ ꓐꓰ ꓓꓵꓽ ꓙ ꓗꓷ ꓗꓪ ꓚꓳꓸ ꓔꓶꓻ ꓙꓱꓼ ꓚꓬꓹ ꓢꓲ ꓢꓯꓼ ꓕꓵꓼ ꓕꓯ ꓬꓲ ꓟꓶ ꓗꓪ ꓠꓬ ꓞꓳ ꓤ ꓕꓲ ꓣꓳ ꓬꓰ ꓟꓽ ꓐ ꓡ ꓟ ꓛꓲꓸꓹ ꓒꓯꓹ ꓗꓪ ꓐꓰ ꓕꓳꓽ ꓶ ꓐꓳ ꓠꓹ ꓟ ꓢꓷꓸ ꓠꓲꓹ ꓔꓯ ꓬꓲ ꓢꓷꓸ ꓡꓰ ꓟ ꓥ ꓡꓳ= ꓕꓱ ꓟ ꓠꓬ ꓔꓶꓻ ꓙꓱꓼ ꓚꓬꓹ ꓢꓲ ꓢꓯꓼ ꓕꓵꓼ ꓟ ꓑꓶ ꓓꓴ ꓠꓬꓲ ꓥˍ ꓡꓳ=

ꓖꓳ ꓡꓰ ꓔꓽ ꓟ ꓪꓴꓸ ꓠꓬꓲ ꓮ ꓫꓵ ꓟꓬꓱꓽ ꓢꓯꓼ ꓕꓵꓼ ꓥˍ ꓟꓲ ꓔꓶꓻ ꓙꓱꓼ ꓚꓬꓹ ꓢꓲ ꓢꓯꓼ ꓕꓵꓼ ꓡꓯ= ꓙꓳꓽ ꓟ ꓤ ꓕꓲ ꓣꓳ ꓠꓬ ꓕꓳꓽ ꓶ ꓢꓳˍ ꓟ ꓕꓲ ꓙꓵꓹ ꓗꓪ ꓕꓳꓽ ꓶ ꓔꓯ ꓡꓰ ꓔꓶꓻ ꓙꓱꓼ ꓚꓬꓹ ꓢꓲ ꓢꓯꓼ ꓕꓵꓼ ꓠꓬ ꓧꓪꓸ ꓡꓰ ꓓꓴ ꓔꓯ ꓘꓳꓹ ꓣꓴ ꓟꓶ ꓥꓳ= ꓖꓳ ꓡꓰ ꓟꓽ ꓥ ꓕꓳꓽ ꓶ ꓥ ꓟꓲ ꓢꓳ ꓠꓲꓹ ꓫꓵ ꓟꓴꓽ ꓖꓪ ꓥ ꓟꓲ ꓖꓪ ꓠꓲꓹ ꓫꓵ Computer ꓥ ꓟꓲ ꓢꓳ ꓠꓲꓹ ꓫꓵ ꓐꓭ ꓠꓬ ꓮ ꓫꓵꓽ ꓗꓪ ꓥ ꓟꓲ ꓧꓪꓸ ꓡꓰ ꓓꓴ ꓠꓬ ꓟꓽ ꓪ ꓡ= ꓖꓳ ꓟ ꓡꓰ ꓐꓰ ꓚꓲꓸ ꓛꓬ ꓟꓬꓱꓽ ꓬꓰ ꓢꓴ ꓐꓴ ꓥ ꓟꓲ ꓖꓳ ꓟ ꓡꓲꓸ ꓬꓰ ꓕꓱ ꓟ ꓡꓲꓸ ꓬꓰ ꓕꓱ ꓡꓱ ꓬꓰ ꓔꓬ ꓐꓭ ꓠꓬ ꓧꓪꓸ ꓡꓰ ꓓꓴ ꓔꓯ ꓘꓳꓹ ꓣꓴ ꓟꓶ ꓠꓹꓟ ꓟꓽ ꓢ=