ꓕꓰꓸꓹ ꓕꓰꓸꓹ ꓡꓰꓽ ꓔꓬ

ꓕꓰꓸꓹ ꓕꓰꓸꓹ ꓡꓰꓽ ꓔꓬ

ꓮ ꓠꓱ ꓕꓯ-ꓸ ꓡ ꓞꓳ ꓕꓲ ꓣꓳ ꓠꓬ ꓪ ꓚꓲ ꓕꓯ ꓢꓲ ꓗꓪ ꓩꓴꓸꓹ ꓕꓲ ꓟ ꓟꓳˍ ꓡꓳ= ꓩꓴ ꓖꓳ ꓟ ꓠꓬ ꓛꓱꓽ ꓛꓱꓽ ꓷꓹ ꓷ, ꓙꓬꓸꓹ ꓢꓲ ꓓꓳꓽ ꓷꓹ ꓡꓳ= ꓩꓴ ꓡꓰ ꓡ ꓞꓳ ꓔꓯ-ꓸ ꓡ ꓞꓳꓸꓸ ꓳ-ꓸ ꓥꓪ ꓔꓯ ꓪ ꓚꓲ ꓕꓯ ꓢꓲ ꓗꓪ ꓐꓰ ꓪ ꓚꓲ ꓠꓯꓸ ꓘꓪ ꓗꓪ ꓟꓯꓸꓹ ꓬꓯꓼ ꓖꓶ ꓡꓯ-ꓸ ꓐꓰ ꓓꓰꓽˍ ꓡꓳ= ꓮ ꓡꓰ ꓩꓴ ꓡꓰ ꓠꓴꓸꓹ ꓔꓯ ꓟꓯ ꓛꓰ ꓑꓶꓸ- ꓡ?= ꓠꓴ ꓥꓪ ꓔꓯ ꓕꓳꓹ ꓡ_ ꓥꓳ-ꓸ ꓐꓰ ꓒꓳꓹ ꓖꓶˍ ꓡꓳ= ꓩꓴ ꓡꓰ ꓠꓴ ꓔꓯ ꓥꓪ ꓟꓽ ꓕꓳꓹ ꓐꓰ ꓒꓳꓹ ꓖꓶˍ ꓡꓳ= ꓡ ꓞꓳ ꓖꓳ ꓕꓲ ꓣꓳ ꓠꓬ ꓩꓴ ꓔꓯ ꓚꓲꓸ ꓛꓴ ꓡꓯꓼ ꓫꓬꓸ ꓗꓪ ꓧꓳꓽ ꓢꓲ ꓟꓯ ꓬꓯꓼ ꓬꓰ ꓖꓶˍ ꓡꓳ=

ꓪ ꓚꓲ ꓠꓯꓸ ꓘꓪ ꓗꓪ ꓛꓲ ꓬꓰ ꓕꓯ ꓡ ꓞꓳ ꓠꓬ ꓩꓴ ꓔꓯ ꓡꓯꓼ ꓫꓬꓸ ꓗꓪ ꓐꓰ ꓣꓴ ꓓꓳ ꓖꓶˍ ꓡꓳ= ꓖꓳ ꓕꓯ ꓩꓴ ꓠꓬ ꓬꓲ ꓔꓯ ꓕꓳꓹ ꓗꓷꓳ= ꓡ ꓞꓳ ꓖꓳ ꓟ ꓠꓬ ꓓꓵ ꓙ ꓮ ꓡꓰ ꓢꓲ ꓬꓲ ꓔꓯ ꓠꓴ ꓕꓳꓹ ꓡ? ꓐꓰ ꓠꓸꓹ ꓠꓬꓲˍ ꓡꓳ= ꓩꓴ ꓡꓰ ꓬꓲ ꓔꓯ ꓥꓪ ꓬꓲꓸ ꓚꓳꓽ ꓠꓬ ꓕꓳꓹ ꓚꓳꓽ ꓥꓳ= ꓠꓴ ꓥꓪ ꓔꓯ ꓟꓽ ꓕꓳꓹ ꓐꓰ ꓐꓯ ꓔ ꓫꓵꓽ ꓟꓽ ꓥ ꓡ?= ꓮ ꓫꓵ ꓪꓴꓸ ꓠꓬꓲ ꓥꓪ ꓔꓯ ꓕꓳꓹ ꓡ? ꓐꓰ ꓠꓸꓹ ꓠꓬꓲˍ ꓡꓳ= ꓩꓴ ꓡꓰ ꓬꓲ ꓔꓯ ꓥꓪ ꓬꓲꓸ ꓚꓳꓽ ꓠꓬ ꓕꓳꓹ ꓚꓳꓽ ꓥꓳ= ꓠꓴ ꓥꓪ ꓔꓯ ꓙꓵꓸꓹˍ ꓟ ꓑꓶꓸ ꓓꓴ ꓠꓴ ꓠꓬ ꓥꓼˍ ꓡꓳ-ꓸ ꓐꓰ ꓒꓳꓹ ꓖꓶˍ ꓡꓳ= ꓡ ꓞꓳ ꓖꓳ ꓕꓲ ꓣꓳ ꓠꓬ ꓩꓴ ꓓꓳꓼ ꓖꓳꓸꓹ ꓠꓬꓲ ꓖꓳ ꓗꓪ ꓞꓼ ꓫꓵꓸꓹ ꓳ=

ꓣꓳ ꓤꓶ ꓗꓪˍ ꓟꓲ ꓖꓳ ꓡꓱ ꓒꓬꓱꓼ ꓡ ꓗꓴˍ ꓡꓳ= ꓟꓽ ꓧꓸꓹ ꓟ ꓢꓷꓸ ꓢꓷꓸˍ ꓡꓰꓽ-ꓸ ꓟꓽ ꓔꓱꓹ ꓟ ꓢꓷꓸ ꓢꓷꓸˍ ꓡꓰꓽ-ꓸ ꓠꓲꓹ ꓖꓳꓼ ꓟ ꓢꓷꓸ ꓢꓷꓸ ꓡꓰꓽ ꓝꓴꓲ ꓡꓲꓸꓸ ꓡ ꓗꓴˍ ꓟ ꓟꓳ ꓟꓳ ꓡꓰꓽ ꓓˍ ꓟꓲ ꓣꓳꓽ ꓠꓬ ꓬꓲ ꓪ ꓔꓯ ꓙꓵꓸꓹ ꓜ ꓢꓲ-ꓸꓬꓲ ꓪ ꓔꓯ ꓠꓸꓹ ꓠˍ ꓥꓳ-ꓸ ꓐꓯˍ ꓠꓬ ꓣꓳ ꓔꓯ ꓛ ꓥꓳ= ꓙꓲꓸꓹ ꓒꓶꓽ ꓓꓳ-ꓸ ꓬꓼ ꓒꓲꓸ ꓛꓵꓼ ꓟ ꓟꓽ ꓧꓸꓹ ꓟ ꓢꓷꓸ ꓢꓷˍ ꓡꓰ” ꓣꓳꓽ ꓜ ꓓꓳˍ ꓕꓯ ꓠꓽ ꓣꓳꓽ ꓥꓼˍ ꓟ ꓥꓳ= ꓞꓳ ꓐꓬꓸꓸ ꓬꓼ ꓒꓲꓸ ꓛꓵꓽ ꓔꓯ ꓔꓹ ꓠꓬ ꓣꓳꓽ ꓟꓲ ꓐꓬꓸꓸ ꓡꓰˍ ꓟ ꓟꓳ ꓟꓳ ꓡꓰꓽ ꓣꓳꓽ ꓬꓲ ꓪ ꓐꓴ ꓔꓯ ꓛꓳꓽ ꓒꓯꓹ ꓬꓰ ꓔꓬ ꓥꓳ-ꓸ ꓐꓯ ꓠꓬ ꓣꓳ ꓔꓯ ꓛˍ ꓥꓳ=

ꓩꓴ ꓠꓬ ꓕꓳꓹ ꓚꓳꓽ ꓥ ꓟ ꓣꓳ ꓢꓷꓸ ꓔ ꓠꓬ ꓤꓸꓹ ꓟꓳ ꓐ ꓡˍ ꓥꓳ= ꓙ ꓜꓲꓼ ꓠꓲꓹ ꓙꓳ ꓙꓳˍ ꓡꓰꓽ ꓧꓪꓸ ꓛꓲ ꓛꓲ ꓡꓰꓽ ꓕꓰꓸꓹ ꓕꓰꓻ ꓡꓰꓽ ꓔꓬ ꓠ ꓗ ꓡꓳ-ꓸ ꓐꓰ ꓚꓴꓽ ꓬꓲꓹ ꓖꓶ ꓠꓲꓹ ꓫꓵˍ ꓡꓳ= ꓫꓸ ꓟꓳ=

Add new comment

1 + 2 =