ꓕꓱ ꓟˍ ꓟꓲ ꓡꓳꓹ ꓬꓰˍ ꓥꓳ

ꓮ ꓠꓱ ꓕꓯ ꓔꓲꓸ ꓕꓲ ꓣꓳ ꓙꓳˍ ꓡꓳ= ꓬꓲꓸ ꓠꓬ ꓮ ꓘꓶꓸ ꓠꓲꓹ ꓟ ꓫꓸ ꓗꓴˍ ꓡꓳ= ꓖꓳ ꓡꓱ ꓠꓬꓲ ꓬꓲ ꓚꓴꓽ ꓬꓲꓹ ꓖꓶ ꓒ ꓐꓴ ꓔꓯ ꓕꓱ ꓡꓱ ꓐꓯˍ ꓡꓳ=ꓠꓴ ꓪ ꓥꓪ ꓔꓯ ꓮ ꓕꓯˍ ꓟꓲ ꓠꓲꓹ ꓗꓴ ꓟꓬꓸꓸ ꓗꓴ ꓖꓶ ꓐ ꓡˍ ꓟ ꓢꓷꓸ ꓠꓲꓹ ꓟꓸ ꓘꓶ ꓥꓪ ꓔꓯ ꓐꓯ ꓟꓸ ꓖꓶ ꓡꓯ= ꓮꓽ ꓟ ꓐꓯ ꓟꓶ ꓘꓴˍ ꓠꓬ ꓮꓽ ꓟ ꓔꓯ ꓥꓪ ꓒꓴꓸꓹ ꓫꓵꓸꓸ ꓮꓽ ꓟꓬ ꓖꓶˍ ꓥꓳ-ꓸ ꓐꓰ ꓐꓯ ꓖꓶˍ ꓡꓳ=

ꓪ ꓔꓲꓸ ꓚꓴꓽ ꓬꓲꓹ ꓖꓶ ꓒ ꓐꓴˍ ꓟꓲ ꓟꓶ ꓘꓶ ꓠꓯꓼ ꓓꓳꓽ ꓙ ꓠꓬꓲˍ ꓡꓳ= ꓕꓲ ꓐꓱ ꓠꓬ ꓟꓲ ꓠꓯ ꓗꓪ ꓬꓰ ꓟꓽ ꓐ ꓡ ꓫꓵ ꓕꓲ ꓫꓵˍ ꓟꓲ ꓟꓽ ꓙꓳ-ꓸ ꓐꓰ ꓪ ꓔꓲꓸ ꓔꓯ ꓠꓲꓹ ꓗꓴ ꓖꓶˍ ꓡꓳ= ꓕꓲ ꓐꓱ ꓠꓬ ꓢꓷꓹ ꓠꓲꓹ ꓠꓬ ꓬꓳꓸ ꓙꓲ ꓔꓷꓼ ꓡꓰ ꓟ ꓥꓳ ꓐꓰ ꓚꓴꓽ ꓬꓲꓹ ꓖꓶˍ ꓡꓳ= ꓖꓳ ꓡꓱ ꓥˍ ꓟꓲ ꓪ ꓔꓲꓸ ꓠꓬ ꓕꓲ ꓟˍ ꓟꓲ ꓟꓽ ꓧꓳꓹ ꓢꓰꓽ= ꓚꓴꓽ ꓬꓲꓹ ꓖꓶꓽ ꓒ ꓕꓲ ꓣꓳ ꓙꓳˍ ꓟ ꓠꓬ ꓪ ꓔꓲꓸꓳ  ꓔꓱ ꓟ ꓥˍ ꓟꓲ ꓡꓳꓹ ꓬꓰˍ ꓥꓳ ꓐꓰ ꓐꓯ ꓖꓶˍ ꓡꓳ= ꓪ ꓔꓲꓸ ꓡꓰ  ꓬꓲ ꓔꓯ ꓠꓴ ꓮ ꓫꓵ ꓐꓯ ꓠꓲꓹ ꓫꓵˍ ꓡ? ꓐꓰ ꓠ ꓠꓬꓲˍ ꓕꓯ ꓕꓱ ꓡꓱ ꓥ ꓡꓳ ꓪ ꓔꓲꓸꓳ ꓫꓸ ꓙꓵ ꓓꓴ ꓥˍ ꓟꓲ ꓗꓹ ꓛꓲ ꓓꓴ ꓥˍ ꓟꓲ ꓬꓲꓸ ꓝꓲꓸ ꓛꓲ ꓡ ꓕꓯ ꓡꓳꓹ ꓬꓰˍ ꓥꓳ ꓐꓰ ꓒꓳ ꓖꓶˍ ꓡꓳ= ꓪ ꓔꓲꓸ ꓠꓬ ꓬꓲꓸ ꓐꓯ ꓘꓶ ꓔꓯ ꓠꓲꓹ ꓧꓳꓹ ꓡꓰ ꓢꓲ-ꓸ ꓬꓲ ꓔꓯ ꓒꓴꓸꓹ ꓫꓵꓸꓸ ꓮ ꓟꓬ ꓖꓶꓽ ꓗꓷꓳ=

ꓥ ꓡꓳ= ꓣꓳ ꓤꓶ ꓗꓪˍ ꓟꓲ ꓠꓲꓹ ꓫ ꓟꓬ ꓫ ꓟ ꓔꓳꓹ ꓜꓳˍ ꓟ ꓦꓬꓼ ꓠꓬꓲ ꓙꓳˍ ꓡꓳ= ꓗꓹ ꓛꓲˍ ꓟ ꓦꓬꓼ ꓠꓬꓲˍ ꓟꓲ ꓙꓳˍ ꓡꓳ= ꓠꓲꓹ ꓫ ꓟꓬ ꓫ ꓟ ꓦꓬꓼ ꓠꓬꓲ ꓔꓳꓹ ꓜꓳˍ ꓕꓯ ꓥˍ ꓟꓲ ꓠꓲꓹ ꓟ ꓫꓸ ꓔꓬ ꓟꓽ ꓛꓵ=

ꓪꓴ-ꓢ ꓔꓯ ꓛꓲ ꓪꓳ ꓡꓯꓼ ꓪꓳ ꓔ ꓢꓲ-ꓸ ꓫꓸ ꓙꓵˍ ꓥˍ ꓟꓲ ꓔꓱ ꓟ ꓠꓬ ꓡꓳꓹ ꓬꓰˍ ꓥꓳ-ꓸ ꓐꓰ ꓓꓵꓽ ꓙ ꓠ ꓗ ꓡꓳ= ꓪꓴ-ꓢ  ꓠꓬ ꓣꓳꓽ ꓔꓯ ꓟꓽ ꓡꓳ ꓒꓰ= ꓣꓳꓽ ꓔꓯ ꓗꓪꓼ ꓫꓵꓼ ꓔꓬˍ ꓡꓳ-ꓸ ꓐꓯ ꓟ ꓔꓯ ꓙꓵꓸꓹ ꓔ ꓠ ꓗˍ ꓡꓳ=

ꓖꓳ ꓡꓱ ꓠꓬꓲ ꓠꓲꓹ ꓟ ꓫꓸ ꓟ ꓛꓵ= ꓮ ꓫꓵꓽ ꓥˍ ꓟꓲ ꓬꓲ ꓙꓵꓹ ꓛꓲ ꓡ ꓠꓬ ꓡꓳꓹ ꓬꓰˍ ꓥꓳ= ꓬꓲꓸ ꓙꓵꓹ ꓠꓬ ꓮ ꓫꓵˍ ꓟꓲ ꓫꓬꓹ ꓗꓴˍ ꓟ ꓠꓯꓸꓸ ꓞꓲꓼ ꓟꓸ ꓒ ꓥꓳ= ꓮ ꓫꓵˍ ꓟꓲ ꓬꓲ ꓙꓵꓹ ꓛꓲ ꓡ ꓠꓬ ꓡꓳꓹ ꓬꓰˍ ꓥꓳ= ꓙꓸꓹ ꓬꓰˍ ꓥꓳ= ꓠꓲꓹ ꓟ ꓫꓸ ꓟ ꓛꓵ=