ꓕꓱ ꓡꓱ ꓓꓵꓽ ꓙ ꓡꓯ

 ꓕꓱ ꓡꓱ ꓓꓵꓽ ꓙ ꓡꓯ

ꓡ ꓞꓳ ꓕꓲ ꓣꓳ ꓙꓳ_ꓟ ꓠꓬ ꓬꓲꓸꓹ ꓙꓬ ꓠꓯꓸꓸ ꓬꓲꓸꓸ ꓘꓶꓽ ꓗꓪ ꓖꓴ ꓫꓱꓽ ꓙꓰ ꓔꓬ ꓡꓳ= ꓖꓳ ꓕꓯ-ꓸ ꓟꓽ ꓦ ꓓ ꓟ ꓡꓲꓸꓹ ꓟ ꓑꓶꓸ ꓓꓴ ꓗꓴꓸꓸ ꓤꓽ ꓥꓪꓸ ꓮꓽ ꓟꓬꓹ ꓠꓬ ꓗꓸꓸ ꓢꓸꓸ ꓗꓪ-ꓸ ꓬꓲꓸ ꓢꓯꓸ ꓢꓯꓸ ꓡꓶꓽ ꓓꓳ ꓡ-ꓡꓳ= ꓡ ꓞꓳ ꓖꓳ ꓕꓲꓽ ꓣꓳ ꓟ ꓠꓬ-ꓸ ꓗꓴꓸꓸ ꓤ ꓥꓪꓸ ꓐꓴ ꓔꓯ ꓫꓱ ꓤ_ ꓠꓬꓲ-ꓸ ꓕꓲꓽ ꓟ ꓗꓳꓸ ꓕꓲ-ꓸ ꓬꓲꓸꓹ ꓙꓬ ꓘꓴ ꓗꓪ ꓡꓳꓸꓸ ꓧꓳꓽ ꓖꓶ_ꓡꓳ=

ꓡ ꓞꓳ ꓖꓳ ꓕꓲꓽ ꓣꓳ ꓬꓰ ꓔꓬ ꓟ ꓔꓯ ꓡ ꓞꓳ ꓝꓮꓲꓸ ꓕꓲ ꓣꓳ ꓟ ꓟꓳ_ ꓕꓯ-ꓸ ꓖꓪꓸꓸ ꓛꓳꓽ ꓳ ꓠꓴ ꓮ ꓫꓵꓽ ꓬꓰ ꓔꓬ ꓡ? ꓬꓲꓸ ꓟꓶꓽ ꓟꓬ ꓙꓳ_ꓟ ꓗꓴꓸꓸ ꓤ ꓥꓪꓸ ꓔꓯ-ꓸ ꓠꓴ ꓮ ꓡꓲ ꓐꓰ ꓠꓯꓸꓸ ꓬꓲꓸꓸ ꓡꓴ ꓐꓱ ꓘꓴꓽ ꓗꓪ-ꓸ ꓖꓳꓸꓸ ꓧꓳꓽ ꓟꓶ ꓘꓴ_ꓡ? ꓮ ꓡꓲ ꓥ ꓟꓲ ꓮꓽ ꓟꓬ_ ꓟ ꓠꓬ ꓫꓵ- ꓥꓳ-ꓸ ꓐꓰ ꓐꓯ ꓖꓶ-ꓡꓳ= ꓡ ꓞꓳ ꓖꓳ ꓕꓲꓽ ꓣꓳ ꓡꓰ ꓠꓴ ꓐꓯ- ꓟ ꓬꓯꓼ- ꓡꓳ= ꓕꓱ ꓟꓬ ꓛꓲ ꓙꓳ-ꓟ ꓗꓴꓸꓸ ꓤꓽ ꓟ ꓠꓬ  ꓗꓸꓸ ꓢꓸꓸ ꓗꓪ ꓞ ꓫꓵꓸꓹ ꓖꓴ_ ꓥꓳ= ꓖꓳ ꓡꓱ ꓥ- ꓟꓲ ꓥꓪ ꓠꓬ ꓠꓯꓸꓸ ꓬꓲꓸꓸ ꓘꓴꓽ ꓗꓪ ꓖꓳꓸꓸ ꓧꓳꓽ ꓟꓶ ꓘꓴ_ꓟ ꓱ ꓶ ꓡꓰ ꓢꓪ ꓠꓬꓲ_ꓡꓳ= ꓢꓯꓸ ꓙꓰ ꓟ ꓥꓪ ꓐꓱ ꓶ ꓡꓰꓽ ꓓꓵꓽ ꓙ _ꓡꓳ= ꓥꓪ ꓖꓳꓸꓸ ꓧꓳꓽ ꓟꓶ ꓟꓽ ꓘꓴ ꓟ ꓑꓶ ꓓꓴ-ꓸ ꓫꓵ- ꓟ ꓗꓴꓸꓸ ꓤ ꓥꓪꓸ ꓐꓱ ꓶ ꓟꓽ ꓢꓪ ꓐꓰ ꓖꓶ_ꓡꓳ=

ꓥ ꓡꓳ= ꓣꓳ ꓤꓶ ꓗꓪ_ꓟꓲ-ꓸ ꓣꓳꓽ ꓮ ꓡꓲ ꓐ ꓡ ꓮ ꓡꓲ-ꓸ ꓧ_ ꓟ ꓬꓰ ꓠ ꓗ_ ꓡꓳ= ꓙꓲ_ ꓟ ꓟꓬꓱꓽ ꓬꓰ ꓠ ꓗ_ ꓡꓳ= ꓢꓴ ꓔꓯ ꓮ ꓡꓲ ꓬꓰ ꓐ ꓡ ꓠꓬ ꓮ ꓡꓲ ꓬꓰ ꓙ ꓠ ꓗ_ ꓡꓲ= ꓥꓪ ꓕꓲꓽ ꓣꓳ ꓔꓴꓸ ꓠꓬ ꓮ ꓙꓵꓽ ꓡꓱꓼ ꓔꓯ ꓬꓰ ꓙ ꓟꓽ ꓐ ꓡ ꓠꓬꓲ-ꓸ  ꓮ ꓟ ꓔꓯ_ ꓟꓲ ꓟꓽ ꓬꓰ ꓙ ꓙꓰꓳ-ꓸ ꓐꓰ ꓕ ꓓꓵꓽ ꓙ= ꓢꓴ ꓔꓯ ꓣꓳꓽ ꓮ ꓡꓲ ꓬꓰ ꓙ ꓐ ꓡ ꓠꓬ-ꓸ ꓮ ꓡꓲ ꓬꓰ ꓙ=

ꓔꓯꓸꓸ ꓥꓳ ꓐꓯ_ ꓠꓬ-ꓸ ꓣꓳꓽ ꓔꓲꓸꓸꓒ ꓖꓴ-ꓔ ꓠꓬ ꓣꓳꓽ ꓡꓲ-ꓢꓴ ꓤ ꓐꓴ ꓐꓱ ꓶꓽ ꓬꓲꓸ ꓮ ꓡꓲ ꓬꓰ ꓐ ꓡ ꓠꓬ ꓮ ꓡꓲ ꓤ ꓬꓰ ꓙ ꓔꓬ_ ꓡꓳ= ꓬꓲꓸ ꓠꓬ ꓞꓳ ꓐꓳ ꓒ ꓟ ꓥ= ꓖꓳ ꓡꓱ ꓥ_ ꓟꓲ ꓬꓲ ꓜꓽ ꓝꓳ-ꓸ ꓓꓳꓸꓹ ꓝꓳ_ ꓟ  ꓟꓽ ꓬꓰ ꓬꓰ ꓐꓰ ꓡꓲ- ꓢꓴ ꓐꓱ ꓶ ꓬꓰ ꓙ ꓔꓬ ꓡꓳ=

ꓡꓲ-ꓢꓴ ꓮ ꓙꓵꓽ ꓡꓱꓸꓼ ꓐꓱ ꓶ ꓬꓲꓸ ꓬꓰ ꓙ ꓟꓽ ꓐ ꓡ= ꓡꓲ-ꓢꓴ ꓮ ꓙꓵꓽ ꓡꓱꓸꓼ ꓔꓯ ꓬꓰ ꓙ ꓟꓽ ꓐ ꓡ ꓠꓬꓲ-ꓸ ꓮ ꓟ ꓔꓯ_ ꓟꓲ-ꓸ ꓥꓪ ꓟ ꓬꓰ ꓙꓸꓹ ꓳ ꓐꓰ ꓬꓲꓸ ꓟꓽ ꓐꓯ= ꓬꓲꓸ ꓬꓰ ꓙ ꓟꓽ ꓐ ꓡ ꓟ ꓙꓳ_ ꓥ_ ꓟꓲ-ꓸ ꓬꓲꓸ ꓬꓰ ꓙ ꓐ ꓡ ꓟ ꓔꓯ-ꓸ ꓜꓳꓽꓒ ꓜꓳ ꓬꓰ ꓖꓶ_ ꓡꓳ=

ꓣꓳ ꓤꓶꓸꓹ ꓗꓪ ꓥ_ꓟꓲ ꓕꓱ ꓡꓱ ꓬꓰ ꓠ ꓗ_ ꓡꓳ= ꓣꓳꓽ ꓮ ꓙꓵ ꓡꓱꓸꓼ ꓔꓯ ꓬꓰ ꓙ ꓟꓽ ꓐ ꓡ ꓥ_ ꓟꓲ ꓠꓲꓹ ꓟ ꓕꓽ ꓫꓸ= ꓣꓳꓽ ꓬꓰ ꓙ ꓐ ꓡ ꓕ ꓑꓳꓽ ꓡꓰꓽ ꓣꓳꓽ ꓬꓰ ꓢꓲ-ꓸ ꓪꓴ-ꓢ ꓟꓬꓱꓸꓸ ꓓꓳꓽ ꓓꓳꓸꓸ ꓡ ꓠꓹ ꓟ-ꓸ ꓡꓲ-ꓢꓴ ꓫꓵꓽ ꓟꓬꓱꓸꓸ ꓓꓳꓽ ꓓꓳꓸꓸ ꓡ ꓠꓹ ꓟ ꓣꓳꓽ ꓢꓯꓼ ꓕꓵꓼ ꓙꓰ ꓡꓯ=