ꓕꓲ ꓦꓲꓸꓹ ꓡ ꓞꓳ ꓟꓽ ꓐꓬ ꓡꓰ ꓠ, ꓟ ꓮ ꓡꓰ ꓗꓪꓽ ꓫꓵꓽ ꓠ ꓔ ꓥ ꓢꓷ

Monday, October 17, 2022

ꓮ ꓟꓶ ꓟ ꓤꓶꓸꓹ ꓗꓪ ꓠꓬ ꓠꓬꓲꓽ ꓟ ꓡ ꓞꓳ ꓠꓬꓲꓽ ꓗꓳꓸ ꓚꓸ ꓗꓪ ꓠꓵ ꓠꓲꓹ ꓠꓬ ꓫꓵꓸꓹ ꓪ ꓡꓰ ꓗꓷ ꓔꓬ ꓟ ꓪꓴꓸ ꓠꓬꓲ ꓣꓳ ꓦꓲꓸꓹ ꓘꓴꓽ ꓔꓯ ꓮ ꓡꓰ ꓗꓪꓽ ꓫꓵꓽ ꓠ ꓔ ꓥ ꓢꓷ ꓐꓯ_ ꓟ ꓕꓱ ꓕꓲ ꓒꓳꓹ ꓗꓪ ꓐꓰ ꓢꓷꓸ ꓙ ꓟꓳ ꓟ ꓩꓴ ꓡ ꓥꓳ= ꓣꓳ ꓛꓳ ꓡꓳ ꓗꓪ ꓦꓲꓸꓹ ꓘꓴꓽ ꓡ ꓞꓳ ꓐꓬ ꓡꓰ ꓝꓲ ꓠꓲꓹ ꓟꓽ ꓫꓵ ꓥ ꓟꓲ ꓠꓵ ꓠꓲꓹ ꓟꓽ ꓙꓳ ꓗꓷ ꓡ ꓟ ꓪꓴꓸ ꓠꓬꓲ ꓧꓹ ꓡꓯꓼ ꓘꓳ ꓡꓰ ꓕꓯ ꓙꓬ ꓖꓳꓼ ꓡꓰ ꓟ ꓔꓯ ꓟꓳ ꓪ ꓡꓳ= ꓚꓵ ꓚꓵ ꓐꓯ ꓠꓬ ꓠꓵ ꓠꓲꓹ ꓔꓯ ꓠꓽ ꓠ ꓑ 1 ꓗꓪ ꓛꓬꓹ ꓦ ꓠ ꓔ ꓟ ꓥ ꓡꓳ= ꓦꓲꓸꓹ ꓘꓴ ꓕꓲ ꓟ ꓗꓪ ꓠꓵ ꓠꓲꓹ ꓠꓬ ꓮ ꓓꓰ ꓣꓳꓸ ꓚꓵ_ ꓡꓳ ꓣꓱꓽ ꓬꓯꓼ ꓡꓳ= ꓠꓵ ꓠꓲꓹ ꓐꓯ ꓟ ꓠꓬ ꓕꓲ ꓣꓳ ꓐꓰ ꓕꓲ ꓣꓳ ꓠꓲꓹ ꓠꓵ ꓡꓯꓼ ꓘꓳ ꓢꓲꓽ ꓕꓲ ꓣꓳ ꓠꓻ ꓓꓴ ꓙꓳ ꓠꓬ ꓬꓰ ꓙ ꓡꓯꓼ ꓘꓳ ꓟ ꓔꓯ ꓐꓯ ꓡꓳ= ꓕꓱ ꓐꓱ ꓠꓬ ꓡꓯꓼ ꓒꓯꓹ ꓝꓸ ꓦ ꓢꓲ ꓦꓲꓸꓹ ꓘꓴꓽ ꓕꓲ ꓟ ꓗꓷ ꓡꓰ ꓡ ꓥ ꓟꓲ ꓕꓲ ꓣꓳ ꓙ ꓟꓶ ꓟ ꓕꓲ ꓣꓳ ꓟ ꓟꓸ ꓡꓯꓼ ꓘꓳ ꓕꓱ ꓡꓱ ꓔꓬ ꓢꓴ ꓥ ꓟꓲ ꓙꓳˍ ꓡꓳ= ꓕꓱ ꓡꓰ ꓠꓬ ꓟꓽ ꓥ꓾ ꓕꓲ ꓣꓳ ꓒꓬꓱꓼ ꓠꓲꓹ ꓫꓵ_ ꓟ ꓕꓲ ꓣꓳ ꓐꓯ ꓟꓸ ꓖꓶ ꓡꓯꓼ ꓘꓳ ꓢꓲ ꓬꓲ ꓚꓱꓹ ꓖꓳ ꓟꓳꓸ ꓖꓶ ꓙ ꓠ ꓔ ꓡꓳ= ꓝꓮꓲ ꓦꓲꓸꓹ ꓘꓴꓽ ꓕꓲ ꓟ ꓗꓪ ꓠ ꓑ 2 ꓣꓳꓸ ꓚꓵ_ ꓟ ꓠꓬ ꓖꓽ ꓖꓶꓽ ꓡꓯꓼ ꓘꓳ ꓟ ꓮ ꓓꓰ ꓣꓳꓸ ꓚꓵ_ ꓡꓳ= ꓖꓽ ꓖꓶꓽ ꓡꓯꓼ ꓘꓳ ꓓꓴ ꓟꓽ ꓙꓳˍ ꓕꓯ ꓠꓬ ꓕꓲ ꓣꓳ ꓐꓰ ꓕꓲ ꓣꓳ ꓠꓲꓹ ꓢꓲꓼ ꓡꓯꓼ ꓘꓳ ꓠꓵ ꓠꓲꓹ ꓥ ꓟꓲ ꓟꓽ ꓙꓳ ꓗꓷ ꓡꓰ ꓢꓲ꓾ ꓦꓲꓸꓹ ꓘꓴꓽ ꓥ ꓟꓲ ꓐꓬ ꓬꓰ ꓡ ꓥꓳ= ꓖꓳ ꓡꓰ ꓔ ꓟ ꓪꓴꓸ ꓠꓬꓲ ꓦꓲꓸꓹ ꓘꓴꓽ ꓕꓲ ꓟ ꓗꓪ ꓕꓱ ꓡꓱ ꓟꓽ ꓗꓷ ꓡꓰ ꓠꓹ ꓟ ꓠꓲꓹ ꓠꓵ ꓢꓲ ꓖꓽ ꓖꓶꓽ ꓡꓯꓼ ꓘꓳ ꓡꓯ꓾ ꓫꓱꓸ ꓤ ꓡꓯꓼ ꓘꓳ ꓡꓯ꓾ ꓕꓲ ꓣꓳ ꓒꓬꓱꓼ ꓠꓲꓹ ꓫꓵ_ ꓟ ꓔꓯ ꓬꓲꓸ ꓚꓱꓹ ꓖꓳ ꓟꓳꓸ ꓖꓶ ꓡꓯꓼ ꓘꓳ ꓡꓯ= ꓕꓱ ꓡꓱ ꓬꓰ ꓠꓬ ꓔꓬ ꓢ ꓗꓹ ꓛꓲ ꓟ ꓦꓲꓸꓹ ꓘꓴ ꓒꓬꓱꓼ ꓡ ꓥꓳ= ꓮ ꓟꓶ ꓟ ꓤꓶꓸꓹ ꓗꓪ ꓠꓬ ꓞꓳ ꓡꓱ ꓐꓴ ꓥ ꓟꓲ ꓙꓲ_ ꓟ ꓦꓲꓸꓹ ꓘꓴ ꓕꓲ ꓟ ꓒꓬꓱꓼ ꓡ ꓠꓹ ꓟ ꓮ ꓡꓰ ꓬꓰ ꓓꓴ ꓬꓲ ꓚꓱꓹ ꓔꓯ ꓟꓽ ꓢꓷꓸ ꓢꓲ ꓕꓲ ꓑꓹ ꓤ ꓗꓹ ꓛꓲ ꓓꓴ ꓔꓯ ꓡꓰ ꓙ ꓟꓶ ꓢꓲ ꓦꓲꓸꓹ ꓕꓵꓽ ꓗꓪ ꓕꓵꓽ ꓡꓰ ꓟ ꓮ ꓟꓬꓹ ꓙꓳˍ ꓡꓳ= ꓕꓱ ꓡꓱ ꓬꓰ ꓗꓷ ꓕꓯ ꓟꓽ ꓓꓵꓽ ꓙ ꓔ ꓟ ꓦꓲꓸꓹ ꓘꓴꓽ ꓔꓬ ꓟꓽ ꓢ ꓓꓴ ꓢꓰꓼ ꓡꓯꓼ ꓘꓳ ꓟ ꓕꓱ ꓡꓱ ꓗꓷ ꓡ ꓕꓯ ꓬꓲꓸ ꓟꓶ ꓗꓪ ꓠꓬ ꓧꓹ ꓡꓯꓼ ꓘꓳ ꓠ ꓗꓪ ꓛꓲ ꓗꓷ ꓡꓰ ꓟ ꓙꓳ ꓡꓳ= ꓕꓱ ꓡꓱ ꓟꓽ ꓗꓷ ꓡꓰ ꓠꓹ ꓟ ꓐꓱ ꓶ ꓦꓲꓸꓹ ꓕꓵꓽ ꓟꓽ ꓗꓪ ꓕꓵꓽ ꓡꓰ ꓕꓯ ꓮ ꓘꓶꓸ ꓓꓵꓽ ꓙ ꓠ ꓔ ꓡꓳ=