ꓕꓽ ꓡꓰ ꓪꓽ ꓡꓰ ꓝꓲ꓾

ꓣꓳ ꓞꓳ ꓫꓵꓽ ꓐꓴ ꓠꓬ ꓡꓰ ꓡꓯ ꓘꓳꓹ ꓟˍ ꓔꓯ ꓗꓹ ꓛꓲ ꓡꓳ=ꓕꓱ ꓡꓱ ꓡꓰ ꓡꓯ ꓘꓳꓹ ꓕꓯ ꓢꓲ꓾ ꓣꓳ ꓛꓳ ꓒꓯꓹꓕꓲ ꓣꓳ ꓐꓰ ꓕꓲ ꓣꓳ ꓠꓲꓹ ꓠꓵ ꓟ ꓙꓳ ꓡ ꓥꓳ ꓐꓰ ꓓꓵ ꓙ ꓟ ꓠꓬ ꓮ ꓘꓶꓸ ꓥꓳꓽ ꓡꓰ ꓟ ꓕꓲ ꓚꓱꓹ ꓥ ꓡꓳ=ꓡꓰ ꓡꓯ ꓘꓳꓹ ꓟ ꓑꓶꓸ ꓓꓴ ꓬꓲꓸ ꓟꓶ ꓗꓪ ꓠꓬ ꓢꓱꓼ ꓡꓯꓼ ꓘꓳꓹˍꓟ ꓪꓽ ꓡꓯꓼ ꓘꓳꓹ ꓟ ꓐꓬ ꓡꓰ ꓡ ꓥꓳ= ꓖꓳ ꓡꓱ ꓟ ꓑꓶꓸ ꓓꓴ ꓞꓳ ꓟꓳ ꓥˍꓟꓲ ꓤ ꓠꓱ ꓔꓯ ꓥˍꓟꓲ ꓕꓽ ꓡꓰ ꓕꓽ ꓗꓷ ꓪꓽ ꓡꓰ ꓝꓲ= ꓞꓳ ꓟꓳ ꓕꓲ ꓣꓳ ꓤ ꓠꓱ ꓤ ꓔꓯ ꓡꓰ ꓕꓯ ꓤ ꓠꓱ ꓕꓱ ꓟ ꓠꓸꓹ ꓓꓴ ꓡꓰ ꓝꓲ꓾ ꓐꓰ ꓐꓯ ꓢꓲ꓾ ꓡꓰ ꓟ ꓠꓬ ꓟꓽ ꓥ= ꓖꓳ ꓡꓰ ꓐꓯ ꓥˍꓟꓲ ꓣꓳ ꓡꓰ ꓡꓰ ꓗꓷ ꓟ ꓑꓶꓸ ꓓꓴ ꓤ ꓠꓱ ꓤ ꓐꓴ ꓠꓲꓹ ꓟ ꓟꓽ ꓗꓹ ꓛꓲ ꓟ ꓕꓱ ꓡꓱ ꓗꓷ ꓡꓰˍꓡꓳ=ꓬꓲ ꓙꓵꓽ ꓟꓶ ꓫꓵꓽ ꓡ ꓕꓯ ꓠꓬ ꓤ ꓠꓱ ꓤ ꓐꓴ ꓠꓲꓹ ꓟ ꓠꓸꓹ ꓫꓵꓽ   ꓐꓯˍꓟ ꓪ ꓡꓰ ꓡ ꓥꓳ= 
ꓛꓲꓽ ꓛꓬ ꓦ ꓡꓱ ꓚꓱꓹ ꓟꓶ ꓡꓰ ꓡ ꓟ꓾ ꓢꓴ ꓡꓰ ꓐꓯˍꓟ ꓔꓯ ꓟꓽ ꓦ ꓡꓱ ꓡ ꓟ꓾ ꓫꓸ ꓕꓳꓸ ꓟ꓾ ꓙꓴꓸꓹ ꓟ꓾ꓢꓴ ꓐꓰ ꓙ ꓡꓯꓼ ꓘꓳꓹ ꓟꓽ ꓑꓶꓸ ꓡ ꓟ꓾ꓞꓳ ꓤ ꓮ ꓙꓵꓽ ꓔꓯ ꓟꓽ ꓙꓵꓹ ꓟ ꓡꓰ ꓡꓳꓸ ꓟꓳ ꓡ ꓟ꓾ꓕꓱ ꓡꓱ ꓮ ꓟꓬꓹ ꓫꓵꓽ ꓗꓷ ꓡ ꓥꓳ= ꓤ ꓠꓱ ꓤ ꓔꓯ ꓡꓰ ꓢꓲ꓾ ꓤ ꓠꓱ ꓤ ꓠꓬꓲ ꓠꓲꓹ ꓢꓲ ꓢꓲ꓾ ꓟꓽ ꓙꓵꓹ ꓟ ꓫꓸ ꓪ ꓕꓱ ꓡ ꓕꓯ ꓛꓳ ꓡꓳ ꓛꓳ ꓫꓵꓽ ꓗꓪ ꓔꓬ ꓟ ꓞꓳ ꓤ ꓐꓴ ꓠꓬ ꓤ ꓠꓱ ꓕꓱ ꓟ ꓔꓯ ꓬꓲꓸ ꓮꓽ ꓐ ꓮ ꓟ ꓡꓰ ꓟꓽ ꓟꓸ ꓦ ꓥ ꓢꓶ ꓐꓰ ꓐꓯ ꓓꓴ ꓙꓳ ꓡ ꓥꓳ= ꓖꓳ ꓟ ꓑꓶꓸ ꓓꓴ ꓡꓰ ꓟ ꓠꓬ ꓗꓷ ꓕꓽ ꓟ ꓠꓬ ꓕꓲ ꓦꓲꓸꓹ ꓘꓴꓽ ꓠꓯꓸꓹ ꓗꓪ ꓫꓵꓼ ꓪꓴ ꓕꓲ ꓟ ꓒꓬꓱꓼ ꓝꓲˍ ꓟ ꓥꓳ=
ꓖꓳ ꓡꓰ ꓕꓽ ꓟ ꓑꓶꓸꓸ ꓓꓴ ꓙ ꓜꓲꓼ ꓢ ꓟ ꓤ ꓠꓱ ꓤ ꓐꓴ ꓔꓯ ꓕꓽ ꓗꓷ ꓪ ꓡꓰ ꓝꓲ꓾ ꓕꓽ ꓡꓰ ꓪꓽ ꓡꓰ ꓝꓲ=  ꓟꓬ ꓠꓬꓲ ꓐꓭ ꓠꓬ ꓤ ꓠꓱ ꓤ ꓐꓴ ꓔꓬ ꓟ ꓕꓲ ꓦꓲꓸꓹ ꓡ ꓞꓳ ꓢꓴ ꓮ ꓙꓵꓽ ꓮ ꓘꓶꓸ ꓤ ꓐꓴ ꓠꓹ ꓗꓸ ꓡꓳ=  ꓤ ꓠꓱ ꓤ ꓠꓬ ꓮ ꓫꓵꓽ ꓡꓲꓽ ꓟꓽ ꓢꓷꓸ ꓐꓰ ꓐꓯ ꓢꓲ꓾ ꓫꓸꓪ ꓔꓯ ꓗꓷ ꓢꓲ꓾ ꓡꓰ ꓢꓲ꓾ꓕꓽ ꓕꓱ ꓪ ꓡꓰ ꓝꓲ꓾ ꓢꓷꓸ ꓠꓲꓹ ꓙꓳ ꓒ ꓕꓲ ꓣꓳ ꓡꓰ ꓮ ꓡꓰ ꓐꓯ ꓔꓽ ꓐꓯ ꓠꓬ ꓤ ꓠꓱ ꓤ ꓐꓴ 7 ꓘꓳꓼ ꓬꓲꓸ ꓘꓴ ꓗꓪ ꓮꓽ ꓐ ꓮ ꓟ ꓐꓴ ꓮ ꓡꓰ ꓐꓰ ꓙꓵꓽ ꓟ ꓚꓱꓹ ꓗꓪ ꓟꓸ ꓖꓶ ꓟ ꓔꓯ ꓤꓼ ꓠꓬꓲ ꓥ ꓡꓳ ꓐꓰ ꓐꓯ ꓔꓽ ꓡꓳ= ꓖꓳ ꓟ ꓑꓶꓸ ꓓꓴ ꓣꓳ ꓕꓲ ꓦꓲꓸꓹ ꓡ ꓞꓳ ꓘꓴꓽ ꓗꓪ ꓥˍꓟꓲ ꓚꓳ ꓡꓳ ꓚꓳ ꓫꓵꓽ ꓗꓪ ꓢꓴ ꓥˍ ꓟꓲ ꓤ ꓠꓱ ꓤ ꓐꓴ ꓔꓯ ꓕꓽ ꓡꓰ ꓪ ꓡꓰ ꓝꓲ= ꓟꓽ ꓥ ꓐꓭ ꓠꓬ ꓣꓳ ꓤ ꓠꓱ ꓤ ꓐꓴ ꓠꓲꓹ ꓟ ꓪꓴꓽ ꓡꓰ ꓢꓲ꓾ ꓙꓴꓸꓹ ꓡꓰ ꓢꓲ꓾ ꓬꓲꓸ ꓕꓲ  ꓤꓶꓸꓹ ꓗꓪ ꓐꓬ ꓡꓰ ꓓꓴ ꓡꓰ ꓗꓷ ꓡꓰ ꓡ ꓥꓳ= ꓕꓱ ꓟ ꓪꓴꓸ ꓠꓬꓲ ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ ꓤ ꓟꓳ ꓓꓴ ꓬꓰ ꓡꓯ=