ꓫꓸ ꓪ ꓔꓯ ꓒꓴꓽ ꓢꓲ꓾ ꓕꓽ ꓕꓱ ꓪ ꓡꓰ ꓝꓲ꓾

ꓮ ꓠꓬꓲꓽ ꓕꓲ ꓗ ꓠꓬ ꓬꓲꓸ ꓢꓲ ꓒ ꓡꓰ ꓟꓬꓱꓽ ꓬꓰ ꓝꓲˍꓟ ꓟꓬꓱꓽ ꓮ ꓙꓵꓹ ꓬꓰ ꓓꓳ ꓡꓰ ꓢꓲ꓾ ꓮ ꓘꓶꓸ ꓪꓴ ꓧꓶ ꓡꓰ ꓟ ꓑꓶꓸ ꓓꓴ ꓪꓴ ꓧꓶ ꓠꓹ ꓔꓬ ꓡꓳ= ꓖꓳ ꓗꓪ ꓮꓸ ꓠ ꓕꓲ ꓗꓸ ꓡ ꓢꓲ꓾ ꓛꓳ ꓒꓯꓼ ꓮꓸ ꓠꓬꓲꓽꓳ ꓠꓴ ꓠꓸꓹ ꓔꓬ ꓥ꓾ ꓐꓰ ꓠꓸꓹ ꓠꓬꓲ ꓕꓯ ꓮꓸ ꓠꓬꓲꓽ ꓠꓬ ꓮ ꓘꓶꓸ ꓪꓴ ꓧꓶ ꓡ ꓟ ꓪꓴꓸ ꓠꓬꓲ ꓠꓸꓹ ꓔꓬ ꓫꓵꓽ ꓥ ꓡꓳ ꓐꓰ ꓐꓯ ꓡꓳ= ꓢ ꓠꓯꓼ ꓠꓽ ꓡꓲ ꓕꓲ ꓙꓵꓹ ꓛꓲ ꓪꓴꓸ ꓧꓶ ꓠꓹ ꓪ ꓐꓯ ꓠ  ꓥꓪ ꓮ ꓘꓶꓸ ꓗꓹ ꓛꓲ ꓡ ꓓꓴ ꓥꓳ ꓐꓰ ꓐꓯ ꓡꓳ= ꓮꓸ ꓠ ꓠꓬ ꓦꓲꓸꓹ ꓘꓴꓽ ꓗꓪ ꓡ ꓙꓰ ꓢꓲ꓾ ꓮꓼ ꓠꓬꓸ ꓔꓯ ꓐꓯ ꓟꓸ ꓔ ꓟ ꓠꓬ ꓮꓸ ꓠꓬꓲꓽ ꓡꓰ ꓕꓱ ꓡꓱ ꓐꓯ ꓡꓳ= ꓮ ꓘꓶꓸ ꓪꓴ ꓧꓶ ꓟˍ ꓑꓶꓸ ꓓꓴ ꓢ ꓠꓯꓼ ꓕꓲ ꓠꓬꓲ ꓛꓲ ꓪꓴ ꓧꓶ ꓠꓹ ꓠꓲꓹ ꓫꓵꓽ ꓙꓳ꓾ ꓬꓲꓸ ꓢꓲ ꓒ ꓡꓰ ꓟꓬꓱꓽ ꓮ ꓘꓶꓸ ꓬꓰ ꓝꓲˍ ꓟ ꓪꓴꓸ ꓠꓬꓲ ꓥ ꓐꓭ ꓥꓳ ꓐꓰ ꓐꓯ ꓡꓰ ꓘꓪ ꓡꓳ= ꓢꓲ ꓒ ꓡꓰ ꓮ ꓘꓶꓸ ꓝꓲˍ ꓟ ꓪꓴꓸ ꓠꓬꓲ ꓥ ꓭꓐ ꓥꓳ ꓐꓯˍ ꓟ ꓒꓴꓽ ꓘꓶꓸ ꓫꓸ ꓪ ꓐ ꓡꓰ ꓡꓳ=

ꓕꓱ ꓟ ꓔꓯ ꓮꓼ ꓠꓬꓯ ꓠꓬ ꓮꓸ ꓛꓵꓼ ꓔꓯ ꓐꓯ ꓟꓸ ꓔ ꓔꓯ ꓠꓬ ꓮꓸ ꓠꓬꓲꓽ ꓔꓯ ꓬꓲ ꓢꓲ ꓒ ꓡꓰ ꓮ ꓘꓶꓸ ꓟꓬꓱꓽ ꓝꓲˍ ꓟ ꓑꓶꓸ ꓓꓴ ꓢ ꓠꓯꓼ ꓗꓪ ꓐꓰ ꓮꓸ ꓠꓬꓲꓽ ꓠꓬ ꓟꓬꓱꓽ ꓟꓽ ꓬꓰꓳ ꓐꓰ ꓐꓯ ꓡꓳ ꓐꓰ ꓫꓸ ꓪ ꓒꓴꓽ ꓢꓲ꓾ ꓕꓱ ꓗꓷ ꓡꓳ= ꓝꓮꓲ ꓕꓲ ꓧꓪ ꓮꓸ ꓚꓵꓼ ꓠꓬ ꓮ ꓗꓸ ꓔꓯ ꓐꓯ ꓟ ꓠꓬ ꓢ ꓠꓯꓼ ꓗꓪ ꓚꓳ ꓢꓲ ꓒ ꓐꓱ ꓶ ꓟꓬꓱꓽ ꓟꓽ ꓬꓰ ꓖꓶ ꓐꓰ ꓐꓯ ꓡꓳ꓾ꓢꓲ ꓒ ꓡꓰ ꓟꓬꓱꓽ ꓮ ꓘꓶꓸ ꓝꓲˍ ꓟ ꓪꓴ ꓠꓬꓲ ꓬꓲ ꓢꓲ ꓒ ꓔꓯ ꓠꓲꓹ ꓖꓪ ꓟꓽ ꓫꓵꓽ ꓗꓷ ꓔꓬ ꓡꓳ ꓐꓰ ꓐꓯ ꓡꓳ= ꓢꓲ ꓒ ꓬꓲꓸ ꓫꓵꓽ ꓧꓪꓼ ꓠꓲꓹ ꓫꓵꓽˍ ꓐꓭ ꓐꓰ ꓒꓴꓽ ꓢꓲ꓾ ꓕꓱ ꓙꓰ ꓡꓳ= ꓖꓳ ꓕꓯ ꓢꓲ ꓒ ꓬꓲꓸꓦꓲꓸꓹ ꓢꓲ ꓟ ꓔꓯ ꓮ ꓗꓸ ꓡꓰ ꓮꓸ ꓠꓬꓲꓽ ꓠꓬ ꓬꓲꓸ ꓟꓬꓱꓽ ꓮ ꓘꓶꓸ ꓬꓰ ꓝꓲ ꓡ ꓟ ꓑꓶꓸ ꓓꓴ ꓢ ꓠꓯꓼ ꓗꓪ ꓖꓳ ꓟꓬꓱꓽ ꓟꓽ ꓬꓰ ꓐꓰ ꓐꓯ ꓡꓳ ꓐꓰ ꓟꓸ ꓖꓶ ꓡꓳ= ꓦꓲꓸꓹꓢꓲ ꓟ ꓥˍ ꓟꓲ ꓬꓲ ꓢꓲ ꓒ ꓔꓯ ꓐꓯ ꓟꓸ ꓖꓶ ꓡꓳ= ꓠꓴ ꓮꓸ ꓠꓬꓲꓽ ꓠꓬ ꓢ ꓠꓯꓼ ꓗꓪ ꓐꓰ ꓟꓬꓱꓽ ꓟꓽ ꓬꓰ ꓖꓶ ꓐꓰ ꓐꓯ ꓡꓳ꓾ ꓖꓳ ꓕꓯ ꓦꓲꓸꓹ ꓢꓲ ꓒ ꓥˍ ꓟꓲ ꓬꓲꓸ ꓟꓬꓱꓼ ꓬꓰ ꓡꓰ ꓟꓽ ꓛꓲ ꓬꓲꓸ ꓔꓯ ꓢꓰꓼ ꓢꓲ꓾ ꓪꓴ ꓖꓶ ꓩꓴ ꓓꓴ ꓥꓳ ꓐꓰ ꓐꓯ ꓡꓳ= ꓬꓲ ꓟꓶ ꓗꓪ ꓠꓬ ꓮꓸ ꓠꓬꓲꓽ ꓔꓯ ꓢꓰꓼ ꓟꓶ ꓗꓷ ꓪ=

ꓚꓵ ꓚꓵ ꓮꓸ ꓠꓬꓲꓽ ꓠꓬ ꓬꓲꓸ ꓮ ꓘꓶꓸ ꓪꓴ ꓧꓶˍ ꓟ ꓑꓶꓸ ꓓꓴ ꓢ ꓠꓯꓼ ꓕꓲ ꓠꓬꓲ ꓪꓴ ꓧꓶ ꓠꓹ ꓟꓶ ꓢꓳˍ ꓟ ꓓꓰ ꓥ ꓡꓳ= ꓬꓲ ꓢꓲ ꓒ ꓔꓯ ꓠꓹ ꓓꓴ ꓡꓰ ꓝꓲˍ ꓟ ꓢ ꓪ ꓔꓯ ꓕꓱ ꓫꓵꓽ ꓟꓽ ꓥ꓾ ꓖꓳ ꓡꓰ ꓐꓯ ꓥˍ ꓟꓲ ꓫꓸ ꓪ ꓒꓴꓽ ꓢꓲ꓾ ꓕꓱ ꓟ ꓖꓶ ꓗꓷ ꓟ ꓑꓶꓸ ꓓꓴ ꓬꓲꓸ ꓟꓶ ꓗꓪ ꓬꓲꓸ ꓠꓬ ꓢꓰꓼ ꓪ ꓡꓰ ꓟ ꓥ ꓡꓳ=  ꓣꓳ ꓓꓵ ꓠꓬꓲ ꓡꓯ꓾ ꓕꓲ ꓖ ꓕꓲ ꓧꓪ ꓣꓳ ꓐꓴ ꓥˍ ꓟꓲ ꓮꓸ ꓠꓬꓲꓽ ꓡꓰ ꓟꓽ ꓢꓰꓼ ꓪ ꓡꓰ ꓡ ꓐꓯ ꓥˍ ꓟꓲ ꓣꓳ ꓟ ꓕꓱ ꓦ ꓟ ꓫꓸ ꓪ ꓔꓯ ꓣꓳ ꓟꓲ ꓐꓬ ꓡꓰ ꓠꓹ ꓛꓲ ꓗꓷ ꓡꓰ ꓟ ꓥˍ ꓟꓲ ꓙꓳ ꓡꓳ= ꓖꓳ ꓡꓰ ꓟ ꓑꓶꓸ ꓓꓴ ꓠꓲꓹ ꓠꓵ ꓟ ꓬꓲ ꓤ ꓠꓬꓲ ꓤ ꓐꓴ ꓥˍ ꓟꓲ ꓖꓳ ꓤꓶꓸꓹ ꓐꓬ ꓡꓰ ꓠꓹ ꓟ ꓢꓴ ꓠꓹ ꓡꓰ ꓠꓹ ꓫꓸ ꓪ ꓔꓯ ꓟꓽ ꓕꓱ ꓪ ꓡꓰ ꓠꓹ ꓟ ꓙ ꓟꓴ ꓓꓴ ꓬꓰ ꓡꓯ=   

 

Add new comment

5 + 1 =