ꓗ, ꓛꓲ ꓟ ꓦꓬꓼ ꓠꓬꓲ ꓕꓲ ꓠꓬꓲ (Youth)

Monday, March 27, 2023

ꓗ, ꓛꓲ ꓟ ꓦꓬꓼ ꓠꓬꓲ ꓕꓲ ꓠꓬꓲ

ꓟꓬ ꓢꓶꓽ ꓟꓽ ꓟꓳ ꓟ ꓞꓲꓼ ꓘꓳꓼ ꓛꓲ ꓡꓳˍ ꓟ ꓤ ꓠꓱ ꓤ ꓕꓲ ꓣꓳ ꓠꓬ ꓧꓶ. ꓕꓯ ꓗꓪ ꓡꓽ ꓧꓳ, ꓕꓲ ꓟ ꓚꓬꓹ ꓦ ꓢꓲ ꓓꓰꓽ ꓤ ꓡꓳ꓿ ꓓꓰꓽ ꓤ ꓒꓽ ꓥ꓾ ꓐꓰ ꓢꓷ. ꓡꓰ ꓝꓲ ꓓꓴ ꓗꓪ ꓮ ꓡꓰ ꓐꓳꓽ ꓔ ꓐꓯ ꓠꓬ ꓥꓪ ꓠꓬ ꓟꓬ ꓢꓶꓽ ꓟꓽ ꓟꓳ ꓢꓴ ꓕꓲ ꓣꓳ ꓥˍ ꓟ ꓪꓴ. ꓠꓬꓲ ꓥꓪ ꓔꓯ ꓖꓶ ꓜ ꓡꓯ ꓐꓰ ꓐꓳꓽ ꓔ ꓡꓳ꓿ ꓙ ꓖꓴ ꓙꓰ ꓢꓴ ꓠꓬ ꓬꓲ ꓔꓯ ꓡꓳ. ꓟꓳ ꓕꓯ ꓫ. ꓠꓬꓲ ꓤ ꓟ ꓪꓴ. ꓠꓬꓲ ꓒꓴ ꓖꓶ ꓡꓳ꓾ ꓬꓲ ꓡꓽ ꓧꓳ, ꓗꓪ ꓥ ꓟꓲ ꓒꓴ ꓬꓲ ꓧꓶ.. ꓮ ꓟꓬ, ꓪ ꓡꓰˍ ꓡꓳ꓿

ꓟꓽ ꓟꓶ ꓫꓵ ꓕꓯ ꓞꓳ ꓡꓱ ꓤ ꓕꓲ ꓣꓳ ꓬꓲ ꓒ ꓕꓲ ꓗꓪ ꓛꓲ ꓡ ꓡꓳ꓿ ꓬꓲ ꓐꓶ., ꓞꓲ ꓗꓪ ꓚꓳ ꓒꓴ ꓣꓴ ꓢꓲ ꓡꓽ ꓧꓳ, ꓗꓪ ꓗꓷ ꓖꓶ ꓡꓳ꓿ ꓓꓰꓽ ꓤ ꓒꓽ ꓥˍ ꓟ ꓢꓷ. ꓡꓰ ꓝꓲ ꓓꓴ ꓐꓳꓽ ꓦ ꓟ ꓔꓯ ꓣꓴ ꓢꓲ ꓠꓱꓸ ꓐꓯꓼ ꓕꓲ ꓟ ꓗꓪ ꓕꓳꓽ ꓶ ꓐꓳꓽ ꓖꓶ ꓢꓲ ꓞꓳ ꓡꓱ ꓤ ꓠꓬ ꓡ ꓙꓰꓳ꓿ ꓟꓽ ꓟꓶ ꓫꓵꓽ ꓕꓯ ꓙ ꓖꓴ ꓗꓪ ꓙꓰ ꓢꓴ ꓐꓴ ꓠꓬ ꓬꓲ ꓡꓽ ꓧꓳ, ꓗꓪ ꓒꓴ ꓮ ꓟꓬ, ꓖꓶ ꓡ ꓟ ꓔꓯ ꓚꓬꓹ ꓪ ꓡꓳ꓿ ꓠ ꓡꓲ ꓕꓲ ꓙꓵꓹ ꓛꓲ ꓡꓳꓼ ꓡ ꓕꓯ ꓡꓽ ꓧꓳ, ꓕꓲ ꓚꓳ, ꓗꓪ ꓒꓴ ꓥ ꓟꓲ ꓐꓲ ꓡꓳꓹ ꓬꓰꓳ꓿

ꓖꓳ ꓡꓱ ꓕꓳꓽ ꓶ ꓐꓳꓽ ꓖꓶ ꓦꓲ., ꓔ ꓟ ꓞꓳ ꓡꓱ ꓤ ꓕꓲ ꓣꓳ ꓠꓬ ꓒꓴ ꓮ ꓟꓬ ꓗꓪ ꓛꓲ ꓪꓽ ꓡꓰ ꓥ ꓢꓷ ꓐꓰ ꓙ ꓟꓶ ꓢꓲ ꓓꓰ ꓜ ꓢꓴ ꓔꓬ ꓗꓪ ꓛꓲ ꓡ ꓡꓳ꓿ ꓟꓬ ꓢꓶꓽ ꓟꓽ ꓟꓳ ꓟ ꓤ ꓠꓱ ꓤ ꓠꓬ ꓞꓳ ꓤ ꓕꓲ ꓣꓳ ꓡ ꓟ ꓢꓯꓼ ꓔꓯ ꓑ ꓙ ꓡꓳ꓿ ꓮ ꓢꓳ ꓑꓸ ꓡ ꓟ ꓕꓲ ꓣꓳ ꓥ ꓟ ꓔꓯ ꓬꓲ ꓚꓬꓹ ꓪ ꓡꓰꓳ꓿ ꓟꓬ ꓢꓶꓽ ꓟꓽ ꓟꓳ ꓟ ꓤ ꓠꓱ ꓤ ꓡꓰ ꓮ ꓢꓳ ꓑꓸ ꓮ ꓫꓵꓽ ꓐꓳꓽ ꓦ ꓥ ꓐꓰ ꓠ ꓠꓬꓲ ꓡꓳ꓿ ꓮ ꓫꓵꓽ ꓪꓴ. ꓠꓬꓲ ꓠ ꓠꓬꓲ ꓡ ꓐꓰ ꓐꓯ ꓕꓯ ꓙ ꓖꓴ ꓗꓪ ꓙꓰˍ ꓟ ꓞꓳ ꓤ ꓐꓴ ꓠꓬ ꓥꓪ ꓔꓯ ꓒꓴ ꓮ ꓟꓬ, ꓖꓶ ꓡ ꓡꓳ ꓐꓰ ꓒꓳꓹ ꓖꓶ ꓡꓳ꓿

ꓞꓳ ꓡꓱ ꓤ ꓡꓰ ꓒꓳꓹ ꓖꓶ ꓡꓳ꓿ ꓥꓪ ꓟ ꓙꓲꓹ ꓟ ꓠꓬ ꓟ ꓐꓳꓽ ꓦ꓾ ꓠꓬꓲ. ꓠꓬꓲ ꓠꓬ ꓮ ꓓꓲ ꓗ, ꓛꓲ ꓟ ꓦꓬꓼ ꓠꓬꓲ ꓕꓲ ꓠꓬꓲ ꓥꓳ꓾ ꓖꓳ ꓡꓰ ꓐꓯ ꓥ ꓟꓲ ꓥꓪ ꓟꓬ ꓢꓶꓽ ꓟꓽ ꓟꓳ꓾ ꓕꓱ ꓡꓱ ꓗ, ꓛꓲ ꓟ ꓦꓬꓼ ꓠꓬꓲ ꓔꓯ ꓥꓪ ꓟꓳ ꓟꓽ ꓐ ꓡ ꓐꓰ ꓐꓳꓽ ꓦ ꓟ ꓥ ꓡꓳ꓾ ꓐꓰ ꓒꓳꓹ ꓖꓶ ꓡꓳ꓿

ꓠꓬꓲ. ꓠꓬꓲ ꓟ. ꓟꓲꓽ ꓗꓪ ꓐꓰ ꓣꓳ ꓮ ꓡꓰ ꓢꓷ. ꓪ ꓔ ꓐꓯ ꓠꓬ ꓟꓲ ꓠꓯ ꓗꓪ ꓟꓬ ꓢꓶꓽ ꓟꓽ ꓟꓳ ꓢꓴ ꓒꓴ ꓫꓵꓺ ꓟꓽ ꓙꓳ ꓢꓴ ꓫ. ꓢꓴ ꓐꓳ ꓢꓴ ꓮ ꓡꓰ ꓔ ꓥ ꓟꓲ ꓞꓳ ꓤ ꓡꓰ ꓥ ꓟ ꓢꓴ ꓔꓯ ꓐ ꓡ ꓟꓬ ꓛꓲ ꓬꓰ ꓙ ꓟ ꓙꓲ_ ꓟ ꓠꓲ, ꓟ ꓙꓳ ꓠ ꓗꓹ ꓟ ꓐꓰ ꓫ. ꓢꓴ ꓟꓷꓼ ꓢꓴ ꓔꓯ ꓬꓰ ꓙ ꓠ ꓗꓹ ꓟ ꓔꓯ ꓣꓳ ꓢꓷ. ꓪ ꓡꓳ꓿